Ayịzaya 40
40
Ḅiokpọma Ẹkwẹn Ma
1Wamịna Tamụnọ ḅẹẹarị: Ị̀ atomi ḅio kpọmaa! Ịna ḅio kpọmaa!
2Ḅiokpọma ẹkwẹn kọn Jeruselemu ḅẹ apụ ma pịrịị.
Ḍuko ịn pịrị ịn tọrụsiẹrị alama tẹ ḅara iḅi tẹẹ
tẹ mịọkụ ịna asi ma ịn wẹrịso ịn pịrị tẹ.
Ịna asi ma gotẹ àrị in fomu la tẹ ḅara iḅi tẹ.
3 #
Mat 3.3; Mak 1.3; Jọn 1.23 #
Luk 3.4-6
Pọkọ oloku pakamarị:
Ịkpa mẹ ḅio etela tẹlẹma KỊNỊNYANAḄỌ ḅe pịrị!
Kịnị anga-a yọ mẹ ḅụ ḅẹ etela mẹ ḅụ simearị
aị ma tan siin wamịna Tamụnọ pịrị!
4Pokolo ayọ ma sara pakama-ḅoo;
tụndụ mamgba ḅaa lẹsẹrẹmaa.
Tụndụ ma ḅo lẹsẹrẹ-kiri sọ ḅa,
tẹ gbima-gbima-kiri mẹ kẹ minimini kiri mịẹ.
5Anịtẹso KỊNỊNYANAḄỌ ḅe ori ebube mịẹfinji ḅa,
tẹ tomi mamgba anị ẹrị ḅa.
KỊNỊNYANAḄỌ ḅe ḅioju mie minini tẹ. 6#Jem 1.10,11; 1 Pit 1.24,25Pọkọ oloku pakamarị: Oku ḍuko wasamaa!
À gbelarị: À tọ oku ḍuko wasama ḅẹ?
Ḍuko wasama mịnẹ tomi mamgba osuka kịkarị;
in ḍumo mu piri-ḅio-ḅẹ afịlawa laarị ḅiri nẹngị-a.
7Osuka kpatụarị, tẹ fịlawa ḍisiarị,
KỊNỊNYANAḄỌ ḅe fẹrụ kẹ fịrịma tẹ
anị fie ịn saramarị sakị.
Tomi ḅarị sime mu etela osuka nẹngị-a. 8Inn, osuka kpatụarị, tẹ fịlawa ḍisiarị,
kụma wamịna Tamụnọ ẹkwẹn mẹ sime mu
ḅẹẹ-sakị ḅẹẹ-sakị laarị.
9Jeruselemu, gele tẹ tụndụ kpọlị tẹ iḅi-oku mẹ ḍuko wasamaa!
Gele pọkọ kẹ sịn pakama, Zayọnị,
iḅi-oku mẹ ḍuko pakamaa!
Ẹkwẹn pakamaa, tẹ ḅalafa ma.
Ḍuko Juda ḅẹ ama ma pịrị
mịnẹ ịna Tamụnọ ḅoarị!
10 #
Ayị 62.11; Mịẹ 22.12 Ḅẹrẹtọn kụrọ nyana tẹịn KỊNỊNYANAḄỌ
ḅe kụrọ kẹ ḅẹrẹtọn ḅẹ ḅoarị
Ọ̀ pọkọ pakama ḅo tẹ apụ ma na ḅoarị.
11 #
Izi 34.15; Jọn 10.11 Ori anana-ḍikiḍikiḅọ ḅara kẹ ori atomi koko ḅa;
Ori awọmẹ ma kobiri gboloma ḅa
tẹ ori aḅara ḅụ in dogi ḅa;
ọ̀ nwẹnị deinma iyingi apụ ma tọrọkọ sụn tẹ ini na mu ḅa.
Izirẹlị Ḅẹ Kẹ Pii-pii Ḅẹẹ-Ḅẹẹ Ḅọ Nyana-a Tamụnọ
12Tomḅọ inetẹ amịna ḅara-kuḅu kẹ bọlị ḅara kẹ
abajị ḅio simearị minji mẹ tọn ḅẹ;
anịanịa ḅara ẹnzụ kẹ So-tọrụ ḅẹ finjima mẹ tọn nimi ḅẹ?
Tomḅọ inetẹ kiri mẹ ḅẹ lịka mẹ kẹ gbọrụ
bọlị ḅio sụa ḅẹ
anịanịa tụndụ ma na gele akiri ma na ḅẹ iku
kẹ ye-tọnye ọgọnọ gbana tẹ tọn nimi ḅẹ?
13 #
Rom 11.34; 1 Kọr 2.16 Tomḅọ inetẹ KỊNỊNYANAḄỌ ḅe mịẹ ḅẹ ye tọn ọ̀ pịrị ḅẹ?
Tụḅọ inetẹ ye kẹ ò toluma, anịanịa
datụkụma ẹkwẹn kọn ọ̀ pịrị ḅẹ?
14Tamụnọ ọ̀ tụḅọ na ḅẹrẹ ḅịyarị
ọ̀ mịẹ ḅẹ ye nimi tẹ anị fiearị ye
naa tẹ ḍawọ tẹrẹmẹ anị mịẹ ḅụ?
15KỊNỊNYANAḄỌ ḅe sime anga tomikiri ḅẹ asịẹ ma papaa aị,
arị yela tọịn-koro minji sọ nẹngị-a,
ala jụ simearị asọ ma fọọn feke-feke
ḅara feke-fekem;
16Lẹbanọnị opu piri-ḅio simearị anama mamgba sọ
boowa kẹ agbamịẹ wamịna Tamụnọ pịrị ḅụ,
tẹ anị ḅẹ asịn ma boowa ḅara ḅakam kẹ fịnị mẹ tọnọ ḅụ.
17Sịẹ-sịẹ mamgba ọ̀ ḅụ gberie-sọ gberie-a;
ọ̀ tọrọkọ inimgba papaa aị famam.
18 #
Fịr 17.29
Wa inetẹ kẹ Tamụnọ na pii-pii ḅẹẹ ḅarị ḅọ tụḅọ?
Ndẹẹ í inetẹ ọ̀ kịkaye sime-ḅara ḍuko ḅẹ ḅara?
19Kọrịnama kọrị apụ mịẹ mḅudu na ori na kịka-a,
anie ini ikulele kẹ mịẹ tẹ golu kẹ anị sara gbaịn
tẹ seleḅa kẹ anị ḅẹ suku mẹ mịẹ ye mẹ.
20Ine tẹ seleḅa anịanịa golu nyana ḅịa ḅọ
ḅụrụ, ḅụrụ-a sịn sẹlẹ ọkịarị.
Ọ̀ ḅara-ḍịntẹ akanịḅọ ḍọkị ḅo
tẹ mḅọ ḅịkị koro ḅịa mḅudu mịẹ pakama-ḅoarị.
21Í nimi-a aro?
Anịngẹ-kụraḅio amụ in ḍuko ị́ pịrị-a?
Tomikiri mẹ saakị ḅara amụ ị́ naa-a?
22Amịna emine ọgọnọ lẹgị wararị ḅọ ḅe
anie anị tẹmẹ ye,
anị emine mẹ kiri mẹ ọgọnọ-jụ ḅio tẹ
So-tọrụ mẹ ḅọrọ iwo ḅụ anị emi;
anị yọ ḍiki ideri kụma tomi ma ịrụ ḅo
mẹnẹ ma kịkarị.
Ori mie So-tọrụ mẹ kẹ ye gbaịn ye ḅara finjima ye,
gbala akpụrụ-warị tẹ kịnị sọ tẹ anga ḅẹ yọ ḅara.
23Ori mie opu kụrọ nyana ḅẹrẹtọn apụ iderima koromarị
tẹ ịn kẹ ḅo papaa ye sọmarị.
24Ịn kịkarị ye asambịrịma asịn,
ịwọma so-pakarị tẹ amụ kuno sụa kụrọma-a aị.
KỊNỊNYANAḄỌ ḅe fẹrụ kẹ fịrịmarị sakị,
arị samụnọ tẹ fẹrụ mẹ arị kẹ fiin soarị
samụnọ tẹ asịra ḅara ḅụ.
25Wa inetẹ tụḅọ kẹ Fịafịa Ḅọ ḅe
na pii-pii ḅẹẹ ḅẹ?
Ọ̀ kịka jen tomḅọ emi?
26Tọrụ saakị so tọrụ mẹ ḍikii!
Ị́ ẹrịarị lolia ma tụḅọ arị tẹmẹ?
Ọmụ-ogbo ḅara kẹ arị atọrọkọ sụn tẹ ịn
pakama ḅoarị ḅọ ḅe.
Arị akịẹn-ḅịḅị ò nimi wararị,
tẹ ẹrẹ kẹ gberie-gberie sịn-arị!
Ọ̀ kụrọ ḍụḅa ḅakam
arị aḅụụ gberie-sọ iri-faa-a!
27Izirẹlị, ọkọ kụma tiye ẹrẹsị í ḍuko sụarị
mịnẹ KỊNỊNYANAḄỌ ḅe ị́ ḅụụ-fụka nimi-a
anịanịa kẹ ye-sịn í inoma tọrụsiẹrị kọn-arị sakị?
28Í nimi-a? Amụ ị́ naa-a?
KỊNỊNYANAḄỌ ḅe anie sime-gbamaso Tamụnọọ;
Ori bebe tomikiri mẹ tẹmẹm.
Gbala, gbala ịnyọ ọ̀ ta ta-a anịanịa ọ̀ ḅụụ-lọkọ.
Ori akuroma nimi ḅọ ofori.
29Ori ịnyọ fa tẹ ịnyọ pọkọ ta tẹ apụ ḅụụ
ḅio ịwọ ịnyọ kẹ sụarị.
30Asambịrịma apụ sọ ḅo ḅụụ lọkọarị;
asawọ amẹẹ inetẹ ḅịkị ḅa ịnyọ fa ḅụ.
31Kụma ini ma tẹ ḅarasụa gotẹ KỊNỊNYANAḄỌ
ḅe kẹ ḅiokpọmarị apụ ma
ḍọkị nimi ḅa ini ịwọ ịnyọ sụa tẹ.
Ini igo fiin iwo tẹ ịwọ ịnyọ nyana ḅara
kẹ naa sakị ḅa;
ịn mangị ḅa tẹ ịn ḅụụ-lọkọ ḅịa;
ịn mẹnjị ḅa tẹ ịnyọ ịna ḅụụ fa ḅịa.
Currently Selected:
Ayịzaya 40: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria