Ayịzaya 13
13
1 #
Ayị 47.1-15; Jer 50.1—51.64 Mie Babịlọnị gboloma oku tẹ Emọzị-ye Ayịzaya
ḅe Tamụnọ ḅara da ḅo ye mẹ.
2Gbọrụ sịn sọ ofori tụndụ ọgọnọ ḅụ arụ pike ḅịtẹ mẹ pikee! Oloku ọmụapụ ma pịrị, tẹ ḅara-kọngọ saakị gelema tẹ kẹ in ḍie mịnẹ ini owu kẹ ḅụụ-gelemarị opu ama mẹ paka onu aḅọkọ ma ḅụ. 3KỊNỊNYANAḄỌ ḅe ori ọmụapụ sịn pakama-ḅo tẹ, ḅụụ-tọn-arị tẹ ḅiokpọ nyana wararị apụ ma, mịnẹ in mu fịafịa ọmụ mẹ gbin, tẹ fomu-ḅara kẹ ori ịganị nyana pịrị wararị apụ ma pịrịị.
4Tụndụ ma ọgọnọ ḍụrụkụarị ye mẹ pokii — opu tomi ogbo yeke-yekearị, sịẹ, sịẹ na ama, ama na kobiri tẹ yeke-yekearị. Ọmụ ogbo-ogbo Nyanaḅọ ḅe ori ọmụapụ ma tẹlẹma ọmụ gbin pịrịarị. 5Ala lamatẹ, kiri kunoma ḅụ sime apụ, mie ḅoarị. Ori ịganị ḅụ KỊNỊNYANAḄỌ ḅe bebe ama mẹ fama ḅẹ ḅoarị.
6 #
Jow 1.15
Akụye ḅụ olokuu! KỊNỊNYANAḄỌ ḅe eneḅaka ḅo kpeki tẹ, KỊNỊNYANAḄỌ ḅe ye guluguluma ḅẹ ene mẹ. 7Ḅẹḅọ-ḅẹḅọ aḅara mḅọ angagbasa ḅụ kpịlasaịma sime ḅa, tẹ ḅẹḅọ-ḅẹḅọ ḅiokpọ sọ so ḅa. 8Inimgba tẹmẹ-naịn-naịn tẹ akụye ịn nẹngịma ḅa, iyiarị ẹrẹḅọ da-da akụye kịkaye. Ịn jụmọ-jụmọ tọrụ ḅio ḍiki ḅa, ḅalafa ḅụ, tẹ ịna atọrụ ḅịya ḅa ḅụụ-jịrị ḅụ. 9KỊNỊNYANAḄỌ ḅe eneḅaka mẹ ḅoarị, anị ori opu ịganị si eneḅaka mẹ. Kiri mẹ ḅo kịnị anga-a yọ sọ ḅa, tẹ si-mịẹapụ mamgba ini ịn ḅaa-guluguluma ḅa. 10#Izi 32.7; Mat 24.29; Mak 13.24,25; Luk 21.25; Mịẹ 6.12,13; 8.12Lolia goyegoye, na So-tọrụ sime ye goyegoye na, ḅarị ḅịya ḅịa, ịrụa mẹ kanakana ḅa anị saakị sakị, tẹ akalụ mẹ bele pịrị ḅịa.
11KỊNỊNYANAḄỌ ḅe ḅẹẹarị, “Arị opu ḅụụ-fụka kẹ tomikiri ḅo ḅa, tẹ fomu-ḅara kẹ si-sịḅịḅio-sụa apụ ma pịrị ḅa, ịna asi gotẹ. Ḅụụ-gelemarị ḅọ goḅọ-goḅọ arị mḅọ iderima ḅa, tẹ Opu Ẹkwẹn kọn-arị, pịkị kụrọ-kụrọ ḅara kẹ kịnị na mịẹarị ḅọ goḅọ-goḅọ à fomu ḅa. 12Kiri kọn ḅarị apụ ḍọkị-ẹrị ḅụụ-fụkama golu ḍọkị-ẹrị nẹngị ḅa. 13Yẹrị Kụrọmamgba nyana KỊNỊNYANAḄỌ ḅe ịganị ḍie pakama ḅarị eneḅaka mẹ, à mịẹ tẹ So ma jike ḅa, tẹ Kiri mẹ jike nwenii tẹ amịna sime yọ ḅụ sikima ḅa.
14“Jen asịẹ ḅẹ apụ tẹ Babịlọnị ḅụ angarị apụ mangị-so ịna ama mu ḅa, ịn mangị gala-gala ḅarị ḅara gbala tụḅara ogbo piri-deeapụ ẹrị tẹ mangị-so ḅara pembe ḅara, ḍikiḍikiḅọ ofori anana ogbo ọkụ. 15Ọkọ kẹ mangị-soarị tẹ in kun ḅọ, kun ḅọ, ini ogie kẹ mḅọ temi ḅaa ḅa. 16Ịn ḅarasụa ofori ḅara kẹ looma-ḍikiarị ogbo, ini mgbele kẹ ịna ḍọkọḍọkọ-awọmẹ ma fomu ḅaa ḅa, ini ịna awarị fọịn tẹ kụrọ-ḅara kẹ ịna sime-ereme tii ḅa.”
17KỊNỊNYANAḄỌ ḅe ḅẹẹarị, “À Midi apụ jikema tẹ ini owu kẹ Babịlọnị paka ḅa. Ini ma in seleḅa kẹ gberie-sọ sịn-a, golu sọ ịna pọkọ sọlịma-a. 18Ịna iboli ma na ḍiein ma na mie ịn kẹ asambịrịma atomi ma ḅaa ḅarị aị. Ini ọkụrụkụrụ nyana ḍọkọḍọkọ-awọmẹ pịrị ḅịa, tẹ ịn pịkị kala awọmẹ ḍiki sịḅị-kụrụkụrụ ḅịa. 19#Suk 19.24Babịlonịya anie amadapụ daarị anga mamgba ḅụ iḅi tẹịn anga; anị anie tomi ma kẹ ḅụụ-tọn-arị yọ mẹ. Kụma yẹrị, KỊNỊNYANAḄỌ ḅe, Babịlọnị sukuruma-gbin ḅa, à kẹ Sọdọmụ na Gomora na mịẹ ḅara mẹ! 20Gbọrụḅọ sọ ḅarị jen kẹ anịanga anga ḅịa. Etela ḅụ mẹnjịma-mẹnjịmarị Arabụ apụ ḅẹ gbọrụḅọ-sọ jen kẹ anịanga akpụrụ-warị pike ḅịa, tẹ gbọrụ anana-koru ḅọ sọ jen kẹ amịna anana ogbo kẹ mu tẹ ini anịanga osuka fị ḅịa. 21#Ayị 34.14; Zẹf 2.14; Mịẹ 18.2Anị ịkpa ḅio ḅẹ anama angarị anga na mgbukumgbuku ịna awarị namarị anga na sọ ḅa. Okpo afeni ma anị yọ anga ḅa, tẹ piri-oḅori ḍosi, ḍosi kan-saratẹ ayọ ma ikelema ḅa. 22Tawa ma na amada-awarị ma na ḅio hayịna nwẹn-sịn ja anama pẹị-pẹị anama ma na piri-obiri ma na kọn-arị oloku mẹ arị ḅio fie ḅa. Babịlọnị sakị ḅo la tẹ! Árị ene ma kẹlẹ kọnm ḅọrọ-so fama ḅa.”
Currently Selected:
Ayịzaya 13: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria