Nimi Tolumaḅọ 7
7
Ḍumo Gboloma Akuroma
1 #
Egb 22.1
Iḅi ẹrẹ yelatẹịn iḅi olo nẹngịm;
anịsakị tomḅọ fị ene yefie-tẹịn
in mḅọ iyi ene nẹngịm.
2Kịnị fị anga mu yefie-tẹịn
ịn kopini afịaị fịarị anga mu nẹngịm;
gbala fị anie tomi mamgba kunoma ẹrẹsị,
ḍumo wararị apụ ma anị kẹ ḅiokoroma ḅa mịnẹ ini sọ fịị ḅa.
3Kururu yefie-tẹịn ḍẹrị nẹngịm,
gbala tọrụ-fụrụma ḅụ
mie ḅioḅẹngbọ mẹ ḅẹlẹ nyanarị ye ẹrẹsị.
4Ye-nimiḅọ ḅe fị kẹ sakị mẹmgba
kuroma ḅio wẹrị wararị;
kụma anị ḅọ tẹ ḅioḅẹlẹ kẹ sakị mẹmgba ḅioḅẹngbọ ḅụ wẹrị wararị ḅọ mẹ anie oḅori ḅọ.
5Ye-nimiḅọ ḍukoarị datụkụma-ẹkwẹn poki
yefie-tẹịn oḅori atomi tokini anume poki nẹngịm.
6Nangị afịnị ọpọ ḅio ḅẹlẹ suku
kpra-kpra-kprama poloarị ḅara,
mie oḅori atomi ḍẹrị pọkọ mẹ sime-ḅara:
miemẹ sọ ḅintẹ ḅara kẹ anị fieye nimi-a ye.
7Kụrọ ḅara furo-tụḅọ kẹ omoniḅọ sọma ḅara,
mie ponoma kẹ ye-nimiḅọ kẹ oḅori-ḅọ sọma ḅara;
anịsakị ọḅụ-fị, tomḅọ ye-mịẹ-ḅara sima-simam.
8Ye ḅẹ kunoma iḅi anị ḅẹ suku-saakị nẹngịm;
anịsakị dein ḅara kẹ ye mịẹ iḅi kẹ opu amịẹaị nẹngịm.
9 #
Jem 1.19
Bẹkẹ ịganị kọn ma;
gbala oḅori tomḅọ ḅe toni-ḅio ọ̀ kpapụ
mẹnjịarị ye anie ịganị.
10Ḅịẹịn ḅẹ ene ma tiegotẹ iḅi mịmgba ḅẹ
ene ma nẹngị? Ḅẹ ma
Ị́ ọkọ ḅẹ, ḅẹ, í nimi ẹkwẹn kọn-a.
11Ḍuu ḅụ fị warị wẹrịma ngọ iḅi ḅara,
mie nimi iḅi ḅara;
anị iḅi sọ tọrụngbọ kẹ ịrụa mẹ
ẹrị tẹ apụ pịrịm.
12Igbigi tomḅọ sịḅị kikima ḅara,
mie nimi sịḅị kikimarị ḅara;
anịsakị ye ḍawọ ḍịn mẹ ḅẹ iḅi anie mie,
nimi anị nyana ḅọ mẹ ḍumo wẹrị kpaịnmarị.
13Tamụnọ kọrịnama mẹ kẹ ḅiokoromaa;
tụḅọ inetẹ ò pengema ye mịẹ karakarama ḅẹ?
14Ị́ lọkọlọkọ ene ḅụ ḍerekuu,
anịsakị ị́ ḅụụ-fụka ene ḅụ ye kẹ ḅiokoromaa;
Tamụnọ kẹ gbọrụḅọ tẹmẹ ḅara,
mie ọ̀ pịkị kẹ osi-ḅọ sọ tẹmẹ ḅara;
mịẹ tẹ tomḅọ ye kẹ Tamụnọ ọlọ ḅịa ḅara.
Ḍumo Ḅụ Tomḅọ Larị Aị
15Ị̀ papaa ḍumo ḅụ à ye goyegoye ẹrị fama tẹ karakara tomḅọ amịna karakara ḅụ sime tẹ fịị guluguluarị, kụma si-sịḅịḅio-sụaḅọ amịna si amịẹaị ḅụ sime tẹ nangwọ ḍumo nyanarị. 16Gbana ḅara kẹ karakarama, anịsakị gbana ye-nimiḅọ ḅara kẹ ị́ ḅụụ wẹrị ma; í tiegotẹ ị́ ḅụụ guluguluma na-iḅi? 17Si-sịḅịḅio-sụa ḅụra, anịanịa oḅori-sọ ma; tiegotẹ amụ ị́ sakị la-a ogbo ị́ fịị na-iḅi? 18Í gbọrụ ye ọlọ-sịẹma tẹ osi ye wẹrịso na-iḅi-a. Tamụnọ ḍiki-ḅalafarị ḅọ arịmgba ḅụ mịẹ-wama ẹkịlẹ ḅa.
19Nimi ḅẹlẹma ịnyọ kẹ ye-nimiḅọ pịrị tẹịn kẹ oyi ḅẹrẹtọn-apụ gbọrụ opu ama ḅụ sime tẹ ḅẹrẹtọn nẹngịm.
20Tụkụma ḅara ḅụ gbọrụ karakara tomḅọ sọ tomikiri ḅụ iḅi-ḅi-ḅi mịẹ, tẹ gbala-gbala si mịẹ-a ḅọ ofori.
21Tomi ḍukoarị aị mamgba poki fama ma, anieofori í ḅofa naa ị́ fịrịmẹnjịḅọ í woriarị; 22í ḅioḅẹngbọ ḅụ í nimi wararị mịnẹ sọ tọnwa sakị ḅụ jen-apụ wori tẹ.
23Nimi ḅụ à mịna aị mamgba pekele-ḍiki fama tẹ; à ḅẹẹm, “À ye-nimi ḅẹ ḅii ḅa”; kụma anị ị̀ ḅụụ ḅụ ḅele mu la anga iḅerea. 24Anie mẹ tẹ simearị ye mẹ, iḅere-iḅerea jụjụ-ḅio anị emi, tẹ pokolotẹ, iḅiọkụ pokolo lama wararị; tụḅọ inetẹ anị ḍọkị-ẹrị ḅẹ? 25Anie ḅụ à nwẹnị vuunma ì ḅioḅẹngbọ pịkị kẹ nimi ḅio ḍọkị, anị sọkịrị ḍiki tẹ anị fiearị ye naa tẹ ye amịẹaị ma ḅẹ suku nimi; tẹ pịkị si-sịḅịḅio-sụa mẹ ḅẹ oḅori na, oḅori mẹ ḅẹ nọmụ na fiearị ye naa ḅẹ ḅara.
Ereme Gbolomaye
26À nwẹnị akụ fịị nẹngị ye ḍọkị-ẹrị, anie ẹrẹḅọ tẹ ḅioḅẹngbọ ḍiein na ịgbọ na sụa wararị ḅọ, anịsakị arị aḅara ma anie kụrọtẹ ikoli. Ḅẹẹ owiḅọ-owiḅọ tẹ Tamụnọ ḅụụ-ḅẹlẹ ye mịẹḅọ mịẹḅọ, arị aḅara ma ḅio pụkọ-pakaḅo ḅa, kụma si mịẹ ḅọ ḅe árị ori ọkị ḅa. 27Ẹkwẹn-kọnḅọ ḅe mẹẹ, “Ḍikii, mie à ḍọkị-ẹrị yee, gbọrụ ye kẹ jen na sụa kịẹn gbolomaa, tẹ arịmgba pakaye nimii, 28aniemẹ tẹ ì ḅioḅẹngbọ sịkọpẹlẹ-a ḅara kẹ nimi ḅẹ ḍọkị ye mẹ. Owiapụ maa ẹndẹ oyia asi finji sime anga à karakara mịẹarị gbọrụ owiḅọ ḍọkị-ẹrịm, kụma ereme mamgba ogbo-ḅio ḅụ karakara mịẹarị kpọkpọ gbọrụ ẹrẹḅọ sọ ofori.”
29Ḍikii, miemẹ ḅụ ngẹrị sọ à ḍọkị-ẹrịm mịnẹ Tamụnọ karakara mịẹ kẹ tomḅọ tẹmẹm, kụma tomi tọnwa kịrị-kịrị aḅọkọ ḍọkị amịna aḅụụ pịrị tẹ.
Currently Selected:
Nimi Tolumaḅọ 7: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria