Fịrịmẹnjịapụ 24
24
Juu-ḅẹ-apụ Ma Ḅẹrẹ Kẹ Pọlụ Sịḅị Sẹịnm
1Sọnọa aḍin ḅọrọ tẹso, Ananayasị Sịḅịda-Agbamịẹḅọ ḅe nwẹnị omongiapụ ma ḅẹ ja apụ na Tatulọsị nwẹn-sịn oloko nimi gbọrụḅọ na kẹ ọ̀ ḅụụ sụa tẹ Sizariya mu. Ịn nwẹnị Fẹlịkisi tọrọkọ ḅẹrẹ kẹ Pọlụ sịḅị sẹịn. 2Anịtẹso, ịn Pọlụ sịn warị mẹ ḅio suu tẹ Tatulọsị nwẹnị ịn kẹ Pọlụ sịḅị sẹịn ḅẹ ḅẹrẹ mẹ saakị ḍuko, tẹ ḅẹẹ:
“Í opu ḅụ! Ị́yẹrị saakị wamịna sịḅịda kụra-ḅio dein na iḅi-aḍima na mie wamịna sịẹ ḅụ wa ẹrịarị. 3Sakị mamgba wa miemẹ kẹ ye-sịn lamam anga, anga ḅụ, tẹ pịkị kpọma ịmịẹtẹ kẹ ị́ ḅẹẹarị sakị mamgba. 4Ị́ sakị fama-a ḅara ḅụ, sisi paa iḅi ḅeri kẹ wa kpụlụma ḍuko ḅẹ ye mẹ pokii. 5Ḅị tomḅọ ḅe, wa ḍọkị-ẹrịm, ori sụntẹ ḅụụ-fụkama ḍin lama tẹ lala-si tomḅọ; bebe tomikiri mẹ ḅụ ọ̀ la anga, la anga ò Juu-ḅẹ-apụ ma gbiri-gbirimarị, ori pịkị Nazarẹtị ḅẹ apụ ogbo mẹ sịḅịdapụ ma ḅẹ gbọrụḅọ. 6Ọ̀ pịkị Tamụnọ-warị mẹ pilema ḅẹ ḍọkị tẹ wa ó kun. [Tẹ wamịna oloko ḍiki ọ̀ kọn ḅẹ-yearị ogbo 7Lisiyasị, ọmụapụ sịḅịdaḅọ ḅe ḅo kụrọ ḅara kẹ wamịna ḅara ọ̀ pụkọ-pakamaḅo, tẹ tọnm mịnẹ ḅẹrẹ kẹ ọ̀ sịḅị sẹịn-arị apụ ma ị́ tọrọkọ ḅoo.] 8Ị́ ḅẹrẹ kẹ ḅị tomḅọ ḅe gbela sakị ị́ ḅarana ọ̀ ḅịḅị wa kẹ ọ̀ sịḅị sẹịn-arị aị mamgba naa fama ḅa.” 9Juu-ḅẹ-apụ ma sọ ḅịḅị sụa tẹ ḅẹẹm mịnẹ anị ḍuko ḅara mie ye paka ḅara.
Pọlụ Fẹlịkisi Tọrọkọ Ọ̀ Ḅụụ Ḍụam
10Ḅẹrẹtọnḅọ ḅe nwẹnị ḅara kẹ Pọlụ fẹngụma mịnẹ ori amịna ḅịḅị ḍukoo, tẹ Pọlụ nwẹnị ḅẹẹ,
“À nimim mịnẹ ị́ tọnwa akụra kẹ mị sịẹ mẹ ḅụ sime tẹ ḅẹrẹ kọn tẹ, mie ḅụ ị́ tọrọkọ ị̀ ḅụụ-ḍụa mẹ ì ḅioḅẹlẹma ye sọm. 11Ị́yẹrị sọ inetẹ ḅarana ḍọkị-nimi ḅa, mịnẹ à Jeruselemu ḅụ Tamụnọ-warị mẹ ḅio tẹkẹ ḅẹ mu tẹ amụ oyi maa ḍin finji nẹngị-a. 12Juu-ḅẹ-apụ ma à Tamụnọ-warị mẹ ḅio kịnị na ye nụnụarị ye kẹ ị̀ ẹrị-a, amụ ịn pịkị gbọrụ anga ḅụ sọ arị ama-awarị ma ḅio tomi toluma, toluma tẹ ịn gbiri-gbiri mịẹ ye sọ ẹrị-a. 13Mịọkụ ịn kẹ ị̀ ọgọnọ gbanarị aị ma ḅụ ini inetẹ ḍuko pakama-ḅo ḅẹ gberie-sọ ofori. 14Yẹrị nimi tẹ ḍuko ị́ pịrị ḅarịye anie, ini kẹ si ogbo sịn-arị Etela mẹ mie à ḅọrọ tẹ wamịna atẹngịapụ ma Tamụnọ ḅe tẹkẹarị, Mozizi Oloko mẹ ḅio kẹẹ ye goyegoye na, ịkịankoroapụ ma kẹẹ aị mamgba na ḅụ à minini-a ye ofori. 15Ini Tamụnọ ḅụ nyana wararị ḅiokpọmaye mẹ mie yẹrị sọ nyana ye, mịnẹ tomi mamgba, iḅi-apụ na si-mịẹapụ na, saakị ḅa fịị ḅụ. 16Mie ḅụ, à pịkị arị inetẹ ḅara, inetẹ ḅara mịẹarị sakị mamgba, mịnẹ Tamụnọ tọrọkọ na tomina tọrọkọ na ị̀ tẹmẹ ḅioḅẹngbọ fịafịa.
17 #
Fịr 21.17-28
“À Jeruselemu la-a ala tẹ ḅara ḅụ à mu igbigi kẹ ị̀ ama ḅẹ apụ ma pịrị, tẹ pịkị agbamịẹ ḅẹ tẹ mum. 18À miemẹ mịẹarị ogbo in ḅo Tamụnọ-warị mẹ ḅio ị̀ ẹrịm, arị ị̀ ḅụụ fịafịama mịẹye mẹ mịẹ fama tẹso. Japụ na ị̀ na ofori, gbiri-gbiri sọ paka-a. 19Kụma anị sakị mẹ Esiya Ibe jụ sime tẹ ḅo Juu-ḅẹ-apụ sọ simem, ini ị̀ ḅụụ ḍuko ḅẹ ye emi ḅẹḅẹ, ịn ḅarana ḅo ị̀ tọrọkọ ḍuko na-iḅim. 20Anịanịa ini mịna atomi ma, ịna Ḅẹrẹ-siri ḅụ ị̀ kọn sakị à koro oloko emi-emii, in ḍukoo. 21#Fịr 23.6Mị gberie mẹ sikima tẹ, ịna tọrọkọ arị oloku pakamam: ‘Ó gotẹ mịmgba ị̀ kẹ ḅẹrẹkọn ḅo ye anie, à mininim mịnẹ fịtẹ-apụ saakị ḅa tẹ ḍumo ḅa.’ ”
22Anịtẹso, Fẹlịkisi iḅiọkụ Jizọsị Etela mẹ gbolomaye nimi wararị ẹrẹsị, ọ̀ nwẹnị ḅẹrẹkọn mẹ gbaịn, tẹ ịn ḅẹẹ, “Ọmụapụ sịḅịdaḅọ, Lisiyasị, ḅo sakị mie arị ọmịna ḅẹrẹ-pẹlẹ ḅarịye.” 23Ọ̀ nwẹnị Pọlụ ḍikiḍikiarị ọmụ-alaḅọ ḅe ḅẹẹ mịnẹ ori iḅi tọrụ kẹ ọ̀ ḅụụ wẹrị, kụma ori ọ̀ wẹrịsoo ọ̀ mẹnjịma ḅọrọ, tẹ pịkị ori ikiapụ wẹrịso tẹ in ḅo ori ẹrị tẹ ọ̀ ḅụụ fụkama ye, fụkama ye mịẹ ọ̀ pịrị.
Pọlụ Mu Fẹlịkisi Na Ọ̀ Ta Durusila Na Tọrọkọ Sịẹm
24Ḍin kẹlẹ ḅọrọ tẹso, Fẹlịkisi nwẹnị ọ̀ ta Juu-ḅẹ ẹrẹḅọ Durusila na ḅo, tẹ fịrịma Pọlụ sịn ḅo, tẹ ó Jizọsị Kịrayịsị ḅụ minini nyana gbolomaye ḍuko ịn pịrị tẹ ịn pokim. 25Kụma Pọlụ ẹkwẹn ma ḅo iḅi ḍumo na, ḅụụ ọlọ kpaịnma na Ḅẹrẹkọn Ene ḅoarị ye na la sakị, Fẹlịkisi ḅalafa tẹ nwẹnị ọ̀ ḅẹẹ, “Mị sakị kẹ so tẹrẹmẹ, jen sakị paka sakị, à pịkị fịrịma ị́ sịn ḅa.” 26Ori sụntẹ sịn ḅara Pọlụ ọḅụ kẹ ọ̀ pịrị fị ḅarị ḅoto, ọ̀ pịkị mie gotẹ tọnwa sakị kẹ ọ̀ sịn tẹ ori na ẹkwẹnm.
27Maa kụra ḅo ḅọrọ tẹso, Pọsịyọsị Fẹsịtọsị nwẹnị ḅo Ḅẹrẹtọnḅọ kiri mẹ ḅụ Fẹlịkisi ḍima. Fẹlịkisi ḅe, Juu-ḅẹ-apụ ma tọrụ iḅi ọkị ḍọkịarị gotẹ, nwẹnị Pọlụ kẹ ikoli ḅio wẹrị tẹ so.
Pọlụ Ọ̀ Ḅẹrẹ Mẹ Iwoma Romu Tomikiri Mẹ Daarịḅọ Ḅe tọrọkọ Mum
Currently Selected:
Fịrịmẹnjịapụ 24: KBTP
Highlight
Share
Compare
Copy
Want to have your highlights saved across all your devices? Sign up or sign in
(C) The Bible Society of Nigeria
Fịrịmẹnjịapụ 24
24
Juu-ḅẹ-apụ Ma Ḅẹrẹ Kẹ Pọlụ Sịḅị Sẹịnm
1Sọnọa aḍin ḅọrọ tẹso, Ananayasị Sịḅịda-Agbamịẹḅọ ḅe nwẹnị omongiapụ ma ḅẹ ja apụ na Tatulọsị nwẹn-sịn oloko nimi gbọrụḅọ na kẹ ọ̀ ḅụụ sụa tẹ Sizariya mu. Ịn nwẹnị Fẹlịkisi tọrọkọ ḅẹrẹ kẹ Pọlụ sịḅị sẹịn. 2Anịtẹso, ịn Pọlụ sịn warị mẹ ḅio suu tẹ Tatulọsị nwẹnị ịn kẹ Pọlụ sịḅị sẹịn ḅẹ ḅẹrẹ mẹ saakị ḍuko, tẹ ḅẹẹ:
“Í opu ḅụ! Ị́yẹrị saakị wamịna sịḅịda kụra-ḅio dein na iḅi-aḍima na mie wamịna sịẹ ḅụ wa ẹrịarị. 3Sakị mamgba wa miemẹ kẹ ye-sịn lamam anga, anga ḅụ, tẹ pịkị kpọma ịmịẹtẹ kẹ ị́ ḅẹẹarị sakị mamgba. 4Ị́ sakị fama-a ḅara ḅụ, sisi paa iḅi ḅeri kẹ wa kpụlụma ḍuko ḅẹ ye mẹ pokii. 5Ḅị tomḅọ ḅe, wa ḍọkị-ẹrịm, ori sụntẹ ḅụụ-fụkama ḍin lama tẹ lala-si tomḅọ; bebe tomikiri mẹ ḅụ ọ̀ la anga, la anga ò Juu-ḅẹ-apụ ma gbiri-gbirimarị, ori pịkị Nazarẹtị ḅẹ apụ ogbo mẹ sịḅịdapụ ma ḅẹ gbọrụḅọ. 6Ọ̀ pịkị Tamụnọ-warị mẹ pilema ḅẹ ḍọkị tẹ wa ó kun. [Tẹ wamịna oloko ḍiki ọ̀ kọn ḅẹ-yearị ogbo 7Lisiyasị, ọmụapụ sịḅịdaḅọ ḅe ḅo kụrọ ḅara kẹ wamịna ḅara ọ̀ pụkọ-pakamaḅo, tẹ tọnm mịnẹ ḅẹrẹ kẹ ọ̀ sịḅị sẹịn-arị apụ ma ị́ tọrọkọ ḅoo.] 8Ị́ ḅẹrẹ kẹ ḅị tomḅọ ḅe gbela sakị ị́ ḅarana ọ̀ ḅịḅị wa kẹ ọ̀ sịḅị sẹịn-arị aị mamgba naa fama ḅa.” 9Juu-ḅẹ-apụ ma sọ ḅịḅị sụa tẹ ḅẹẹm mịnẹ anị ḍuko ḅara mie ye paka ḅara.
Pọlụ Fẹlịkisi Tọrọkọ Ọ̀ Ḅụụ Ḍụam
10Ḅẹrẹtọnḅọ ḅe nwẹnị ḅara kẹ Pọlụ fẹngụma mịnẹ ori amịna ḅịḅị ḍukoo, tẹ Pọlụ nwẹnị ḅẹẹ,
“À nimim mịnẹ ị́ tọnwa akụra kẹ mị sịẹ mẹ ḅụ sime tẹ ḅẹrẹ kọn tẹ, mie ḅụ ị́ tọrọkọ ị̀ ḅụụ-ḍụa mẹ ì ḅioḅẹlẹma ye sọm. 11Ị́yẹrị sọ inetẹ ḅarana ḍọkị-nimi ḅa, mịnẹ à Jeruselemu ḅụ Tamụnọ-warị mẹ ḅio tẹkẹ ḅẹ mu tẹ amụ oyi maa ḍin finji nẹngị-a. 12Juu-ḅẹ-apụ ma à Tamụnọ-warị mẹ ḅio kịnị na ye nụnụarị ye kẹ ị̀ ẹrị-a, amụ ịn pịkị gbọrụ anga ḅụ sọ arị ama-awarị ma ḅio tomi toluma, toluma tẹ ịn gbiri-gbiri mịẹ ye sọ ẹrị-a. 13Mịọkụ ịn kẹ ị̀ ọgọnọ gbanarị aị ma ḅụ ini inetẹ ḍuko pakama-ḅo ḅẹ gberie-sọ ofori. 14Yẹrị nimi tẹ ḍuko ị́ pịrị ḅarịye anie, ini kẹ si ogbo sịn-arị Etela mẹ mie à ḅọrọ tẹ wamịna atẹngịapụ ma Tamụnọ ḅe tẹkẹarị, Mozizi Oloko mẹ ḅio kẹẹ ye goyegoye na, ịkịankoroapụ ma kẹẹ aị mamgba na ḅụ à minini-a ye ofori. 15Ini Tamụnọ ḅụ nyana wararị ḅiokpọmaye mẹ mie yẹrị sọ nyana ye, mịnẹ tomi mamgba, iḅi-apụ na si-mịẹapụ na, saakị ḅa fịị ḅụ. 16Mie ḅụ, à pịkị arị inetẹ ḅara, inetẹ ḅara mịẹarị sakị mamgba, mịnẹ Tamụnọ tọrọkọ na tomina tọrọkọ na ị̀ tẹmẹ ḅioḅẹngbọ fịafịa.
17 #
Fịr 21.17-28
“À Jeruselemu la-a ala tẹ ḅara ḅụ à mu igbigi kẹ ị̀ ama ḅẹ apụ ma pịrị, tẹ pịkị agbamịẹ ḅẹ tẹ mum. 18À miemẹ mịẹarị ogbo in ḅo Tamụnọ-warị mẹ ḅio ị̀ ẹrịm, arị ị̀ ḅụụ fịafịama mịẹye mẹ mịẹ fama tẹso. Japụ na ị̀ na ofori, gbiri-gbiri sọ paka-a. 19Kụma anị sakị mẹ Esiya Ibe jụ sime tẹ ḅo Juu-ḅẹ-apụ sọ simem, ini ị̀ ḅụụ ḍuko ḅẹ ye emi ḅẹḅẹ, ịn ḅarana ḅo ị̀ tọrọkọ ḍuko na-iḅim. 20Anịanịa ini mịna atomi ma, ịna Ḅẹrẹ-siri ḅụ ị̀ kọn sakị à koro oloko emi-emii, in ḍukoo. 21#Fịr 23.6Mị gberie mẹ sikima tẹ, ịna tọrọkọ arị oloku pakamam: ‘Ó gotẹ mịmgba ị̀ kẹ ḅẹrẹkọn ḅo ye anie, à mininim mịnẹ fịtẹ-apụ saakị ḅa tẹ ḍumo ḅa.’ ”
22Anịtẹso, Fẹlịkisi iḅiọkụ Jizọsị Etela mẹ gbolomaye nimi wararị ẹrẹsị, ọ̀ nwẹnị ḅẹrẹkọn mẹ gbaịn, tẹ ịn ḅẹẹ, “Ọmụapụ sịḅịdaḅọ, Lisiyasị, ḅo sakị mie arị ọmịna ḅẹrẹ-pẹlẹ ḅarịye.” 23Ọ̀ nwẹnị Pọlụ ḍikiḍikiarị ọmụ-alaḅọ ḅe ḅẹẹ mịnẹ ori iḅi tọrụ kẹ ọ̀ ḅụụ wẹrị, kụma ori ọ̀ wẹrịsoo ọ̀ mẹnjịma ḅọrọ, tẹ pịkị ori ikiapụ wẹrịso tẹ in ḅo ori ẹrị tẹ ọ̀ ḅụụ fụkama ye, fụkama ye mịẹ ọ̀ pịrị.
Pọlụ Mu Fẹlịkisi Na Ọ̀ Ta Durusila Na Tọrọkọ Sịẹm
24Ḍin kẹlẹ ḅọrọ tẹso, Fẹlịkisi nwẹnị ọ̀ ta Juu-ḅẹ ẹrẹḅọ Durusila na ḅo, tẹ fịrịma Pọlụ sịn ḅo, tẹ ó Jizọsị Kịrayịsị ḅụ minini nyana gbolomaye ḍuko ịn pịrị tẹ ịn pokim. 25Kụma Pọlụ ẹkwẹn ma ḅo iḅi ḍumo na, ḅụụ ọlọ kpaịnma na Ḅẹrẹkọn Ene ḅoarị ye na la sakị, Fẹlịkisi ḅalafa tẹ nwẹnị ọ̀ ḅẹẹ, “Mị sakị kẹ so tẹrẹmẹ, jen sakị paka sakị, à pịkị fịrịma ị́ sịn ḅa.” 26Ori sụntẹ sịn ḅara Pọlụ ọḅụ kẹ ọ̀ pịrị fị ḅarị ḅoto, ọ̀ pịkị mie gotẹ tọnwa sakị kẹ ọ̀ sịn tẹ ori na ẹkwẹnm.
27Maa kụra ḅo ḅọrọ tẹso, Pọsịyọsị Fẹsịtọsị nwẹnị ḅo Ḅẹrẹtọnḅọ kiri mẹ ḅụ Fẹlịkisi ḍima. Fẹlịkisi ḅe, Juu-ḅẹ-apụ ma tọrụ iḅi ọkị ḍọkịarị gotẹ, nwẹnị Pọlụ kẹ ikoli ḅio wẹrị tẹ so.
Pọlụ Ọ̀ Ḅẹrẹ Mẹ Iwoma Romu Tomikiri Mẹ Daarịḅọ Ḅe tọrọkọ Mum
Currently Selected:
:
Highlight
Share
Compare
Copy
Want to have your highlights saved across all your devices? Sign up or sign in
(C) The Bible Society of Nigeria