Fịrịmẹnjịapụ 14
14
In Mu Ikonịyọmụ Lam
1Anị gberie mẹ pịkị Ikonịyọmụ jụ sọ pakam. Pọlụ na Banabasị na mu Juu-ḅẹ-apụ ama-warị mẹ ḅio ẹkwẹn ḅara mẹ mịẹtẹ tọnwa Juu-ḅẹ-apụ na Ja asịẹ ḅẹ apụ na ḅo minini apụ sọm. 2Kụma minini ḍụkụ-a Juu-ḅẹ-apụ ma nwẹnị Ja asịẹ ḅẹ apụ ma toluma tẹ ịn minini apụ ma na tụḅụrụ. 3Anịanga fịrịmẹnjịapụ ma tọnwa aḍin sime tẹ, ḅiokpọ ḅara kẹ KỊNỊNYANAḄỌ ḅe gbolomaye ḍukom, tẹ ori pịkị kụrọ kẹ ịn pịrị tẹ ịn kẹ ḅụụ-buama-aị na ḅụụ-gbiripuma aị na mịẹ, tẹ kẹ tomi ma ḍiem, mịnẹ ó ḍiki-ḅụụjịrị oku mẹ tẹ in ḍuko ye mẹ karakaram. 4Opu ama mẹ nwẹnị maa anga ḍie, anga Juu-ḅẹ-apụ ma anga sọm, anga pịkị fịrịmẹnjịapụ ma konju simem.
5Anịtẹso Ja asịẹ ḅẹ apụ ma Juu-ḅẹ-apụ ma na ḅẹ ja apụ na mu ịna sịḅịdapụ na ḅiya tẹ si ḅara kẹ fịrịmẹnjịapụ ma na mịẹ tẹ ḍụḅarị kẹ ịn gbin ḅẹ tọnm. 6Kụma fịrịmẹnjịapụ ma anị ḅẹ ịba naa tẹ mangị-so Lịkahoniya ibe ḅụ Lisitara na Dabi na opu ama ma na arị na kpeki ja ama ma na mum. 7Anịjụ ini Iḅi Oku mẹ ḍukom.
In Lisitara Na Dabi Na Lam
8Lisitara jụ ḅụ iyi kụra-ḅio ngụrọ sọ tẹ jene amụ inetẹ mẹnjị-a gbọrụḅọ simem. 9Ori anịanga lẹgị tẹ Pọlụ ḍuko ye pokiarị ogbo, Pọlụ nwẹnị ẹrị mịnẹ ò minini nyana wararị, tẹ inetẹ gwọ ḅa, tẹ ọ̀ nwẹnị da-da ò ḍiki 10tẹ oloku ọ̀ pịrị, “Saakị tụkụ tẹ ị́ aḅụọ kẹ sịẹsimee!” Tomḅọ ḅe nwẹnị ḍosi saakị tẹ mẹnjị ikelema. 11Tomi ma Pọlụ mịẹ ye mẹ ẹrị tẹso, ini ịna ama ḅẹ Lịkahoniya ḅẹ ḅịḅị ḅụ ḅẹẹm, “Oru ma tomi ḍi tẹ wamịna ogboku ḅo tẹ.” 12Ịn nwẹnị Banabasị sịn Zẹhusu, tẹ Hamisi kẹ Pọlụ sịn, ori ẹkwẹn sịḅịdaḅọ ẹrẹsị. 13Tẹ Zẹhusu agbamịẹḅọ ḅe nwẹnị nambulo na fịlawa na kẹ ogigo-ḅọkọ mẹ mu, Zẹhusu ḅẹ oru-warị mẹ ama mẹ ḅio ḅelem ẹrẹsị, gbala oru-alaḅọ ḅe na tomi ma na kẹ agba mịẹ fịrịmẹnjịapụ ma pịrị ḅẹ ḅara.
14Banabasị na Pọlụ na ịn mịẹ ḅẹ tọn ye mẹ naa tẹso ịn nwẹnị ịna akapa kan tẹ mangị tomi ma ogboku sọ-mu tẹ oloku, 15#Pks 20.11; Dev 146.6“Ó tiegotẹ nwẹn sime ye mịẹarị? Wamịnị kọkọ ọmịna pembema tomi! Wa gotẹ mịanga ḅo ye Iḅi Oku mẹ ḍuko ọ́ pịrị tẹ ọ́ mịna papaa aị ma ḅụ pịkị ḍumo wararị tẹ So na Kiri na, tọrụ na, arị ḅio sime aị mamgba tẹmẹ Tamụnọ ḅe da ḅẹ ḅara. 16Ḅọrọ tẹ sakị ḅụ, ori ó ḍiki-tọrụsin tẹ ama sịẹ-sịẹ amịna ḅụụ-ḅẹlẹ mẹnjị-mẹnjị kọnm. 17Kụma sakị mamgba ori ori emi nwẹn ḅẹẹ elekima kẹ tomi ḍiearị, ọ̀ mịẹarị iḅi aị ma ḅụ; ori mie So-ḅio ene koroma ọ́ pịrịarị, pịkị ḍiḅi aị ma pakama-ḅo ọ́ pịrịarị karakara asakị ḅụ; ò fịye kẹ ọ́ pịrị fị tẹ ḅioḅẹlẹ ọmịna aḅioḅẹngbọ ḅin-arị.” 18Mịna ẹkwẹn mamgba ḅụ sọ kẹlẹ kọnm fịrịmẹnjịapụ ma inetẹ agbamịẹ ịn pịrị mẹ dasịẹma-a so tẹ.
19Juu-ḅẹ-apụ ma ḅẹ ja apụ tẹ Pisidiya ḅẹ Anịtọkụ na Ikonịyọmụ na ḅụ sime tẹ ḅo apụ na nwẹnị ama mẹ ḅẹ apụ ma fẹẹ ịna ḅụụ pịrị, tẹ ḍụḅarị kẹ Pọlụ gbin tẹ ama mẹ ḅio ọ̀ fọnọ pakama; ịn sịnm ọ̀ fịị tẹ. 20Kụma Jizọsị minini apụ ma ḅo ò gbori-ikelema tẹso, ọ̀ nwẹnị saakị tẹ inina ama mẹ ḅio sọ-mu. Anị ḅẹ ene-ḅaa ḅụ ori na Banabasị na so Dabi mum.
Ịn pịkịma So Siriya Ḅẹ Anịtọkụ Mum
21Pọlụ na Banabasị na mu Dabi ḅụ Iḅi Oku mẹ ḍuko sakị tọnwa-apụ minini tẹ Jizọsị ḍukamẹnjịapụ sọm. Anịtẹso ịn nwẹnị pịkịma Lisitara na Ikonịyọmụ na mu, tẹ ḅọrọ mu Pisidiya ḅẹ Anịtọkụ la. 22Ịn nwẹnị ịnyọ kẹ minini apụ ma pịrị tẹ ịna ḅiokpọma mịnẹ ịn karakara ḅara kẹ mininiye mẹ ḅụ sịẹ kụrọọ. In ye kẹ in toluma tẹ ḅẹẹm, “Mịẹ ḅara mịẹ ḅara sọ, tọnwa ḅụụ-fụka ḅio mie wa tolu-ḅọrọ mu Tamụnọ Ama-da yọ mẹ sọ ḅarịye.” 23In mu la sọsị sọsị, ịn sọsị omongiapụ tọn ịn pịrịm, tẹ ḅuru-ịmọ tẹ tẹkẹ tẹ ịn kẹ KỊNỊNYANAḄỌ ḅe ḅara sụam, in ḅioḅẹngbọ kẹ ḅụụ ḅụ gbana ḅọ ḅe.
24In Pisidiya iri mẹ mẹnjị fama tẹso, in ḅo Pamụfiliya lam. 25Anịanga ini oku mẹ ḍukom Paga ḅụ tẹso, ini Atalaya mu 26tẹ anịanga arụ ḅụkụlọ tẹ pịkịma-so Anịtọkụ mum, anie in sime tẹ paka mu mịọkụ ịn kọrị gbaịn tẹ kọrịnama mẹ kọrị ḅẹ tẹ ịn Tamụnọ ḍiki-ḅụụjịrị ḅii ịn pịrị anga mẹ.
27In mu Anịtọkụ la tẹso, ịn nwẹnị sọsị mẹ sịn kobiri tẹ Tamụnọ ịna ḅụụ ḅọrọ tẹ kọrị tẹ akọrịnama mamgba na, ọ̀ ḅọkọ finji Ja asịẹ ḅẹ apụ sọ pịrị tẹ in ḅo minini ḅẹ tẹ ḅara mẹ na ḍuko ịn pịrị. 28Tẹ ịn nwẹnị minini apụ ma na anịanga sime alama.
Currently Selected:
Fịrịmẹnjịapụ 14: KBTP
Highlight
Share
Compare
Copy
Want to have your highlights saved across all your devices? Sign up or sign in
(C) The Bible Society of Nigeria
Fịrịmẹnjịapụ 14
14
In Mu Ikonịyọmụ Lam
1Anị gberie mẹ pịkị Ikonịyọmụ jụ sọ pakam. Pọlụ na Banabasị na mu Juu-ḅẹ-apụ ama-warị mẹ ḅio ẹkwẹn ḅara mẹ mịẹtẹ tọnwa Juu-ḅẹ-apụ na Ja asịẹ ḅẹ apụ na ḅo minini apụ sọm. 2Kụma minini ḍụkụ-a Juu-ḅẹ-apụ ma nwẹnị Ja asịẹ ḅẹ apụ ma toluma tẹ ịn minini apụ ma na tụḅụrụ. 3Anịanga fịrịmẹnjịapụ ma tọnwa aḍin sime tẹ, ḅiokpọ ḅara kẹ KỊNỊNYANAḄỌ ḅe gbolomaye ḍukom, tẹ ori pịkị kụrọ kẹ ịn pịrị tẹ ịn kẹ ḅụụ-buama-aị na ḅụụ-gbiripuma aị na mịẹ, tẹ kẹ tomi ma ḍiem, mịnẹ ó ḍiki-ḅụụjịrị oku mẹ tẹ in ḍuko ye mẹ karakaram. 4Opu ama mẹ nwẹnị maa anga ḍie, anga Juu-ḅẹ-apụ ma anga sọm, anga pịkị fịrịmẹnjịapụ ma konju simem.
5Anịtẹso Ja asịẹ ḅẹ apụ ma Juu-ḅẹ-apụ ma na ḅẹ ja apụ na mu ịna sịḅịdapụ na ḅiya tẹ si ḅara kẹ fịrịmẹnjịapụ ma na mịẹ tẹ ḍụḅarị kẹ ịn gbin ḅẹ tọnm. 6Kụma fịrịmẹnjịapụ ma anị ḅẹ ịba naa tẹ mangị-so Lịkahoniya ibe ḅụ Lisitara na Dabi na opu ama ma na arị na kpeki ja ama ma na mum. 7Anịjụ ini Iḅi Oku mẹ ḍukom.
In Lisitara Na Dabi Na Lam
8Lisitara jụ ḅụ iyi kụra-ḅio ngụrọ sọ tẹ jene amụ inetẹ mẹnjị-a gbọrụḅọ simem. 9Ori anịanga lẹgị tẹ Pọlụ ḍuko ye pokiarị ogbo, Pọlụ nwẹnị ẹrị mịnẹ ò minini nyana wararị, tẹ inetẹ gwọ ḅa, tẹ ọ̀ nwẹnị da-da ò ḍiki 10tẹ oloku ọ̀ pịrị, “Saakị tụkụ tẹ ị́ aḅụọ kẹ sịẹsimee!” Tomḅọ ḅe nwẹnị ḍosi saakị tẹ mẹnjị ikelema. 11Tomi ma Pọlụ mịẹ ye mẹ ẹrị tẹso, ini ịna ama ḅẹ Lịkahoniya ḅẹ ḅịḅị ḅụ ḅẹẹm, “Oru ma tomi ḍi tẹ wamịna ogboku ḅo tẹ.” 12Ịn nwẹnị Banabasị sịn Zẹhusu, tẹ Hamisi kẹ Pọlụ sịn, ori ẹkwẹn sịḅịdaḅọ ẹrẹsị. 13Tẹ Zẹhusu agbamịẹḅọ ḅe nwẹnị nambulo na fịlawa na kẹ ogigo-ḅọkọ mẹ mu, Zẹhusu ḅẹ oru-warị mẹ ama mẹ ḅio ḅelem ẹrẹsị, gbala oru-alaḅọ ḅe na tomi ma na kẹ agba mịẹ fịrịmẹnjịapụ ma pịrị ḅẹ ḅara.
14Banabasị na Pọlụ na ịn mịẹ ḅẹ tọn ye mẹ naa tẹso ịn nwẹnị ịna akapa kan tẹ mangị tomi ma ogboku sọ-mu tẹ oloku, 15#Pks 20.11; Dev 146.6“Ó tiegotẹ nwẹn sime ye mịẹarị? Wamịnị kọkọ ọmịna pembema tomi! Wa gotẹ mịanga ḅo ye Iḅi Oku mẹ ḍuko ọ́ pịrị tẹ ọ́ mịna papaa aị ma ḅụ pịkị ḍumo wararị tẹ So na Kiri na, tọrụ na, arị ḅio sime aị mamgba tẹmẹ Tamụnọ ḅe da ḅẹ ḅara. 16Ḅọrọ tẹ sakị ḅụ, ori ó ḍiki-tọrụsin tẹ ama sịẹ-sịẹ amịna ḅụụ-ḅẹlẹ mẹnjị-mẹnjị kọnm. 17Kụma sakị mamgba ori ori emi nwẹn ḅẹẹ elekima kẹ tomi ḍiearị, ọ̀ mịẹarị iḅi aị ma ḅụ; ori mie So-ḅio ene koroma ọ́ pịrịarị, pịkị ḍiḅi aị ma pakama-ḅo ọ́ pịrịarị karakara asakị ḅụ; ò fịye kẹ ọ́ pịrị fị tẹ ḅioḅẹlẹ ọmịna aḅioḅẹngbọ ḅin-arị.” 18Mịna ẹkwẹn mamgba ḅụ sọ kẹlẹ kọnm fịrịmẹnjịapụ ma inetẹ agbamịẹ ịn pịrị mẹ dasịẹma-a so tẹ.
19Juu-ḅẹ-apụ ma ḅẹ ja apụ tẹ Pisidiya ḅẹ Anịtọkụ na Ikonịyọmụ na ḅụ sime tẹ ḅo apụ na nwẹnị ama mẹ ḅẹ apụ ma fẹẹ ịna ḅụụ pịrị, tẹ ḍụḅarị kẹ Pọlụ gbin tẹ ama mẹ ḅio ọ̀ fọnọ pakama; ịn sịnm ọ̀ fịị tẹ. 20Kụma Jizọsị minini apụ ma ḅo ò gbori-ikelema tẹso, ọ̀ nwẹnị saakị tẹ inina ama mẹ ḅio sọ-mu. Anị ḅẹ ene-ḅaa ḅụ ori na Banabasị na so Dabi mum.
Ịn pịkịma So Siriya Ḅẹ Anịtọkụ Mum
21Pọlụ na Banabasị na mu Dabi ḅụ Iḅi Oku mẹ ḍuko sakị tọnwa-apụ minini tẹ Jizọsị ḍukamẹnjịapụ sọm. Anịtẹso ịn nwẹnị pịkịma Lisitara na Ikonịyọmụ na mu, tẹ ḅọrọ mu Pisidiya ḅẹ Anịtọkụ la. 22Ịn nwẹnị ịnyọ kẹ minini apụ ma pịrị tẹ ịna ḅiokpọma mịnẹ ịn karakara ḅara kẹ mininiye mẹ ḅụ sịẹ kụrọọ. In ye kẹ in toluma tẹ ḅẹẹm, “Mịẹ ḅara mịẹ ḅara sọ, tọnwa ḅụụ-fụka ḅio mie wa tolu-ḅọrọ mu Tamụnọ Ama-da yọ mẹ sọ ḅarịye.” 23In mu la sọsị sọsị, ịn sọsị omongiapụ tọn ịn pịrịm, tẹ ḅuru-ịmọ tẹ tẹkẹ tẹ ịn kẹ KỊNỊNYANAḄỌ ḅe ḅara sụam, in ḅioḅẹngbọ kẹ ḅụụ ḅụ gbana ḅọ ḅe.
24In Pisidiya iri mẹ mẹnjị fama tẹso, in ḅo Pamụfiliya lam. 25Anịanga ini oku mẹ ḍukom Paga ḅụ tẹso, ini Atalaya mu 26tẹ anịanga arụ ḅụkụlọ tẹ pịkịma-so Anịtọkụ mum, anie in sime tẹ paka mu mịọkụ ịn kọrị gbaịn tẹ kọrịnama mẹ kọrị ḅẹ tẹ ịn Tamụnọ ḍiki-ḅụụjịrị ḅii ịn pịrị anga mẹ.
27In mu Anịtọkụ la tẹso, ịn nwẹnị sọsị mẹ sịn kobiri tẹ Tamụnọ ịna ḅụụ ḅọrọ tẹ kọrị tẹ akọrịnama mamgba na, ọ̀ ḅọkọ finji Ja asịẹ ḅẹ apụ sọ pịrị tẹ in ḅo minini ḅẹ tẹ ḅara mẹ na ḍuko ịn pịrị. 28Tẹ ịn nwẹnị minini apụ ma na anịanga sime alama.
Currently Selected:
:
Highlight
Share
Compare
Copy
Want to have your highlights saved across all your devices? Sign up or sign in
(C) The Bible Society of Nigeria