2 Samụẹlị 5
5
Devidi Ḅo Izirẹlị Na, Juda Na Ḅẹ Amadaḅọ Sọm
(1 Pkị 11.1-9; 14.1-7)
1Anịtẹso Izirẹlị ḅẹ afuro mamgba nwẹnị Hẹbụrọnị ḅụ Devidi ḍọkụma-ḅo, tẹ ḅẹẹ, “Ḍikii, wamịnị anie ị́ oju ḅẹ mgbe na, meni na. 2Ḅọrọtẹ asakị Sọlụ amadaḅọ sọ wa pịrị sime sakị, ị́yẹrị mie etela kẹ Izirẹlị ḍie pakama, pịkị ọkị-ḅo suu ḅọ; tẹ KỊNỊNYANAḄỌ ḅe nwẹnị ị́ ḅẹẹ, ‘Ị́yẹrị ị̀ atomi Izirẹlị kẹ anana ogbo sọma ḍikiḍikiḅọ sọ ḅa, anịsakị ị́ amadaḅọ sọ Izirẹlị pịrị ḅa.’ ” 3Anieḅụ Izirẹlị ḅẹ omongiapụ mamgba Hẹbụrọnị ḅụ amadaḅọ ḅe ḍọkụma-ḅom; tẹ Amadaḅọ Devidi, Hẹbụrọnị ḅụ KỊNỊNYANAḄỌ ḅe tọrọkọ ini na ọḅọkụ fịm, tẹ ịn nwẹnị pulo kẹ Devidi sịḅị sara, tẹ ọ̀ kẹ amadaḅọ mịẹ Izirẹlị pịrị. 4#1 Ama 2.11; 1 Pkị 3.4; 29.27Devidi sịḅị kụra suei ḅọrọ tẹso, ọ̀ saakị ama-dam, tẹ kụra amesi kẹ ama-dam. 5Hẹbụrọnị ḅụ ọ̀ sọnọma akụra na, sonio akalụ na, kẹ ama-da Juda pịrịm; anịsakị Jeruselemu ḅụ ọ̀ kụra asuei, tẹra kụra finji kẹ ama-da Izirẹlị mẹmgba na, Juda na pịrịm.
6 #
Jọs 15.63; Ḅẹr 1.21 Amadaḅọ ḅẹ na ori atomi na Jeruselemu ḅụ, owu kẹ Jebusayịtị apụ ma, ama mẹ ḅio simearị apụ ma, tẹ Devidi ḅẹẹm, “Ị́ mịanga sọ-ḅo ḅịa, kụma tọrụngbọ-pụụntẹ-apụ ma na, ekeliapụ ma na mie í dee pakama ḅarịye” ḅiotọn-arị, “Devidi inetẹ mịanga sọ-ḅo ḅịa” ḅẹẹ apụ ma paka ḅẹ mum. 7Anịsọ Devidi Zayọnị ḅụ kụrọtẹ ḅọị anga mẹ ọkịm, anie Devidi opu ama mẹ.
8Devidi nwẹnị anị ene mẹ ḅụ ḅẹẹ, “Jebusayịtị apụ ma ḅaa ḅarị ḅọ goḅọ-goḅọ, yee mḅọ minji ḅọrọarị ḅarapuuye mẹ ḅụ iwo mu owu kẹ ekeliapụ ma na, tọrụngbọ-pụụntẹ-apụ ma na pakaa, inima tẹ Devidi tẹmẹ ḍiki-ḅioḅu apụ ma.” Anịẹrẹsị anị ḍuko wararị, “Tọrụngbọ-pụụntẹ-apụ ma na, ekeliapụ ma na KỊNỊNYANAḄỌ warị mẹ sọ-ḅo ḅịa.”
9Devidi nwẹnị kụrọtẹ ḅọị anga mẹ ḅụ sime tẹ anị sịn Devidi opu ama. Devidi nwẹnị in Kiri sara pakama wararị anga mẹ ḅụ saakị opu ama mẹ nama ikelemama sọ mu. 10Devidi nwẹnị gburo-gburo tọrọkọ-tọrọkọ mu, gbala KỊNỊNYANAḄỌ ḅe, ọmụ-ogbo ma ḅẹ Tamụnọ ḅe ori na emi ẹrẹsị.
11Hiramụ, Taya ḅẹ amadaḅọ nwẹnị fịrịmẹnjịapụ na, ịn kẹ sida sịn-arị opu sịn-aḅiri na, akanịapụ na, ḍụḅarị warị nama apụ tẹ ama-da gbọrụ warị nama Devidi pịrị apụ ma na kẹ Devidi fịrịma. 12Devidi nwẹnị tọnma nimi mịnẹ KỊNỊNYANAḄỌ ḅe ori amadaḅọ sọ Izirẹlị pịrị mẹ mịẹ kuroma tẹ, anie mịẹ tẹ ori atomi Izirẹlịapụ ma sịḅị ẹrẹsị ori ori ama-da kụrọ mẹ saakị-gelema tẹẹ.
13Devidi Jeruselemu ḅụ ja ereme na ịgwam, pịkị sime ọ̀ ḅụụ pịrịm ori Hẹbụrọnị ḅụ sime tẹ ḅo sakị, tẹ ịn ja owiapụ-awọmẹ na, eremịna-awọmẹ na iyi Devidi pịrịm. 14Anịsakị mịna awọmẹ ma anie arị apụ ma tẹ Jeruselemu ḅụ ini iyi ọ̀ pịrị apụ ma ẹrẹ: Samuha na, Sobabụ na, Netanị na, Sọlọmọnị na, 15Iba na, Ẹlịsua na, Nẹfẹgi na, Jafịya na, 16Ẹlịsama na, Ẹlayada na, Ẹlịfẹlẹtị na.
Ịn Filisiteniapụ Ma Ḅụ Nyana Owu-ḅara-iḅi
17Filisiteniapụ ma naam mịnẹ ịn pulo kẹ Devidi sịḅị sara tẹ ori amadaḅọ sọ Izirẹlị pịrị tẹ, tẹso, Filisiteniapụ mamgba nwẹnị iwo Devidi ḍọkị ḅẹ mu; kụma Devidi anị gbolomaye naam tẹ ideri kụrọ tẹ ḅọị anga mẹ mum. 18Mịọkụ Filisiteniapụ ma Rẹfayimu ḅẹ tụndụ ogboku mẹ ḅo tẹ wasama sime tẹẹ. 19Devidi nwẹnị KỊNỊNYANAḄỌ ḅe ḅịḅị gbela, “Arị iwo mu owu kẹ Filisiteniapụ ma paka mọ? Ị́ ịn kẹ ị̀ ḅara-ḅio suu ḅarị mọ?”
KỊNỊNYANAḄỌ ḅe nwẹnị Devidi ḅẹẹ, “Iwo muu, kẹ gotẹ ọkọ ḅẹẹarị, gbarị-a ḅara ḅụ à Filisiteniapụ ma kẹ ị́ ḅara-ḅio ḅụ ị́ pịrị ḅa.”
20Devidi nwẹnị Balị Pẹrazimu ḅo, tẹ Devidi nwẹnị anịjụ ịn nẹngịma; tẹ ọ̀ nwẹnị ḅẹẹ, “KỊNỊNYANAḄỌ ḅe ye kan toluarị opu minji ye kan tolu ḅara kẹ ị̀ na fịya-a apụ ma kan toluma tẹ ị̀ tọrọkọ. Anịẹrẹsị ịn kẹ anịjụ mẹ kuro ẹrẹ Balị-perazimu.” 21Filisiteniapụ ma nwẹnị ịna akpokobịa ma koroma-so anịjụ, tẹ Devidi na ori atomi na nwẹnị arị dogi-so.
22Filisiteniapụ ma nwẹnị anịsọ siin Rẹfayimu ḅẹ tụndụ ogboku mẹ ḅụ wasama tẹ sime. 23Tẹ Devidi KỊNỊNYANAḄỌ ḅe ḅịḅị gbela tẹso, ọ̀ nwẹnị ḅẹẹ, “Ị́ iwo mu ḅịa; mẹnjị ịn kana ịna ọḅụjụ mu, tẹ ịn kẹ balịsamụ sịn opu asịn ma na dama-dama ḅụ ḅo ịn ponomaa. 24Anịsakị ịn kẹ balịsamụ sịn opu asịn ma asịḅị ọgọnọ mẹnjị ḅụọ fie tẹ ị́ naa tẹso tẹrẹmẹ mie í virikama ị́ ḅụụ saakị ḅarịye; kẹ gotẹ ọkọ ḅẹẹarị, anịsakị ḅụ KỊNỊNYANAḄỌ ḅe ị́ tọrọkọ tarị mu Filisiteniapụ ma ọmụ-ogbo mẹ ḅaa tẹ.” 25Tẹ Devidi KỊNỊNYANAḄỌ ḅe wẹrịtẹ tọn ọ̀ pịrị tẹ ḅara mịẹm, tẹ Geba ḅụ Filisiteniapụ ma ḅaa nwẹnị mu Geza lam.
Currently Selected:
2 Samụẹlị 5: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria