1 Tẹsalonịka 2
2
Pọlụ Tẹsalonika Ḅụ Kọrị Kọrịnama
1Wamịna amịnapụ, ọmịnị ḅioju sọ nimi wararị mịnẹ wa ḅo ọ́ la ye mẹ papaa fa ye sọ-a. 2#Fịr 16.19-24; Fịr 17.1-9Tẹrẹmẹ wa ḅo Tẹsalonika la, ó nimi ḅara ḅụ, Filipayị ḅụ in si ḅara kẹ wamịnị na mịẹ tẹ wa guluguluma tẹ. Karakaraye tomi kpọma wamịnị na tụḅụrụ lamam ḅẹsọ, wamịna Tamụnọ ḅe ḅiokpọ kẹ wa pịrị tẹ wa kẹ ọ̀ ḅara ḅo Iḅi Oku mẹ ḍuko ọ́ pịrịm. 3Wa kẹ ọmịna tọrọkọ koromarị ye mẹ, mịẹ-irima, anịanịa si akuroma, anị ḅio ofori, wa pịkị aka na epele na kẹ ḅụụkụrọma tẹ kịnị toluma fama ḅẹ ḅo-a. 4Anie nakara, Tamụnọ ḅiiarị wa ẹkwẹn ḅẹ ḅara mie wa ẹkwẹn-arị, anie ọ̀ wa kẹ anị mịẹ na-iḅi apụ kịẹn tẹ Iḅi Oku mẹ kẹ wamịna ḅara sụa tẹ ẹrẹsị. Wa tomi ḅụụ-ḅẹlẹ ḅẹ ye ḍọkị tẹ mịẹ-a, kụma Tamụnọ ḅụụ-ḅẹlẹ ḅẹ ye, anie wamịna akuroma tọn ḍikiarị ḅọ ḅe. 5Ó nimi lama wararị mịnẹ wa ḅo ye mẹ ḅẹlẹ ḅịḅị kẹ ó furuma ḅẹ ẹkwẹn kọn, anịanịa ẹkwẹn-ḅịḅị kẹ wamịna ḅụụ ḅọị tẹ, nyana ye, nyana ye pọkọ-ta-a kuroma gbaịn tẹ ọmịna aị ọkị ḅẹ ḅo-a — Tamụnọ mie anị sime wa pịrị ḅara nimi ye. 6Wa gbọrụḅọ-sọ ḅịḅị ḅẹ boma nyana ḅẹ ḍọkị-a, ọmịnị-o, pịkị ja apụ-o, 7karakaraye wamịnị Kịrayịsị fịrịmẹnjịapụ, tẹ inetẹ ọmịna ḅara ye ḅii ḅa ḅẹsọ. Kụma wa ọmịnị na sime, sime sakị wa ịyọrọma ọmịnị na mịẹm, awọ ḍikiḍiki iyingiḅọ kẹ árị awọmẹ na mịẹ-mịẹ ḅara pembe ḅara. 8Wa nyana ọ́ pịrị ḅẹlẹma ẹrẹsị wa tẹlẹmam wa ọmịnị na Iḅi Oku mẹ ngẹrị nyana gboloma ma, kụma wamịna ḅara-kuḅu ḅẹ ḍumo mẹ sọ. Ọ́ wamịna ḅụ yela ye ḅakam! 9Wamịna amịnapụ, piki-pikiye-ofori ḅara ḅụ, wa kẹ nụnụ tẹ kọrịnama kọrị ḅara mẹ ọmịna ḅioḅọrọ-a. Eneḅaka na ḍin na wa nwẹn kẹ kọrịnama kọrịm, mịẹtẹ wa Tamụnọ ḅara ḅo Iḅi Oku mẹ ḍuko ọ́ pịrịarị sakị mẹ ḅụ wa ọmịna ḅụụ-fụkama ḅịa ḅara.
10Ọmịnị ḅarana nimi tẹ ḍuko ḅa, anie Tamụnọ sọ nimi ḅara, mịnẹ wa kẹ ọmịnị Kịrayịsị minini apụ ma na anga ḅara mẹ kpaịn tẹ, kura, tẹ ḅụụ ḅụ ḍuko ḅẹ ye ofori ḅara. 11Ó nimi wararị mịnẹ wa kẹ ọmịna ḅụ ḅẹḅọ-ḅẹḅọ mịẹ ḅara gbala ḍaḅọ kẹ amịna awọmẹ na mịẹ-mịẹ ḅara. 12Wa ọmịna ḅiokpọmam, wa ó dedemam, tẹ sakị mamgba ḍuko ọ́ pịrị kụrọmam, mịnẹ ọ́ Tamụnọ ḅioḅẹlẹmarị ḍumo ḅara kọn, anie ọ́ sịn-arị mịnẹ ó ḅo ori Ama-da tẹ ḅẹrẹtọn-arị ama mẹ na ori ebube na nyana ḅẹẹ ḅọ ḅe.
13Jen tẹ wa gotẹ sakị mamgba ịmịẹtẹ kẹ Tamụnọ ḅẹẹarị ye emi. Wa Tamụnọ oku mẹ kẹ ḅo ọ́ pịrị sakị, ọmịnị anị naa tẹ daa-ọkịm, tomina oku ḅara-a, kụma Tamụnọ oku ḅara, anie anị pịkị sime-ḅara. Kẹ gotẹ ọkọ ḍukoarị, Tamụnọ ọmịna ḅụ minini apụ ma ḅụụ ḅio kọrịnama kọrịarị. 14#Fịr 17.5Wamịna amịnapụ, ọmịna ḅụ paka gberie mẹ Judiya ḅụ Tamụnọ asọsị ma, tẹ sime Kịrayịsị Jizọsị pịrị apụ ma, ḅụ sọ pakam. Ọmịnị ama ḅẹ apụ ḅaa-ḅọkọ kẹ ọ́ ḍọkị ḅara mẹ anie ini sọ Juu-ḅẹ-apụ ḅara-ḅio tọrụsiẹrị ḅara, 15#Fịr 9.23,29; 13.45,50; 14.2,5,19; 17.5,13; 18.12anie KỊNỊNYANAḄỌ Jizọsị na ịkịankoroapụ ma na ḅaa tẹ pịkị wa ḅaa ḅẹ ḍọkịarị apụ ma. Ịna mịẹye Tamụnọ ḅụụ si la ḅara ḅakam! Ịn pịkị owu kẹ ḅẹḅọ-ḅẹḅọ paka ḅẹ ḍọkịarị! 16Wa ḅọrọma oku mẹ ḍuko Ja asịẹ ḅẹ apụ ma pịrịarị mẹ sọ ini anị dasịẹma ḅẹ ḍọkịm. Mị-ḅara ḅụ ịn gbọrsịḅị ịn mịẹ-mịẹ tẹ asi ma kịẹn-ḅịḅị karama gbasịma tẹ. Tẹ mịọkụ Tamụnọ ịganị, kunoma ḅụ, koro ḅo ini ọgọnọ gbana tẹ!
Pọlụ Ḅiiarị Ò Jen Kẹ Mu Ịn La
17Mịnapụ, anị kẹ wamịnị na simearị ḅara, wa boowa kala-sakị kịngẹ kẹ ọmịnị na ofori kụma, ḅioḅẹngbọ ḅụ-a sọ, anị kpọma wamịna ḅụụ yela tẹ wa pịkị sin ọmịnị ẹrị ḅẹ ḍọkị lamarị! 18Wa pịkịma ọ́ dama-ḅo ḅẹ ḅii lamam. Yẹrị ḅioju sọ, gbọrụ sakị nẹngị ye à nwẹn kẹ ḅo ḅẹ ḅọkọ ḍọkịm, kụma Ekwesu ḍụkụ wa pịrị-a. 19Anị ḅẹ kunoma ḅụ, ọmịnị ma — ja apụ-a — anie wamịna ḅiokpọ, wamịna ḅioḅẹlẹ, pịkị wa gotẹ owu-ḅara-iḅi kẹ ḅụụ boma ḅẹ apụ ma wa Nyanaḅọ Jizọsị tọrọkọ ḅụ, ò ḅo sakị. 20Tụkụmaye, ọmịnị ma anie wamịna ḅụụ-tọn, pịkị wamịna ḅioḅẹlẹ!
Currently Selected:
1 Tẹsalonịka 2: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria