Ijeremaya 5
5
Ebira odivi ọnị Anijerusarẹmị nịnị mẹ̀
1Ẹnẹyịmavara kà, ẹwụ nịnị Anijerusarẹmị, ọ̀ ngụ avaba ẹkụra awụ nịnị dị we re. Ngụ avaba orere awụ nịnị zị dị we re, àa nyị ọza anaa mẹ̀ ịsa ana vọrọ dị aa mẹ ịzẹyịza hi Ohomorihi. Àa nyị, ọnị Ẹnẹyịmavara vaa vagu wụ nịnị. 2Dị ụ daka aa yịị kà a nịnị ka waa hẹkẹ Ẹnẹyịmavara nịnị aanị, ireche u we che nịnị nị. 3Ịzẹyịza, Ẹnẹyịmavara vị enee sì ka aza ẹẹ mẹ ịzẹyịza. Ộ nya wụ nịnị ịsa, ama ụ yị ka wẹ yị wụ́ ịrẹyị nịnị. Ộ sị ụya rị wụ nịnị ama we yi ka wẹ yị kọsẹ nịnị. Anayọkatẹngụ ụ vị nịnị nị, ụ ka wẹ yị và hụụnị ebira odivi awụ nịnị. 4Ijeremaya ka, dị ọnị ro nị ka, aza ẹnẹnị ẹẹ daa ụya rị, ọnụra ẹ vị nị. Ẹnịnị ẹ yị yẹ ịsị Ohomorihi ẹnịnị ee sì, ọnị Ẹnẹyịmavara ee sị ka ẹnịị ọ̀ mẹ. 5Avọọ ọnị ee ne tu ọdọvịdị ẹnịnị dị ọnị ò pe wa ka ịrẹyị. Ịzẹyịza ẹnịnị ẹẹ yẹ ịsị Ẹnẹyịmavara Ohomorihi ee si ka ẹnịnị ọ̀ mẹ. Ama avaba ẹnịnị ẹ ka ẹnị ẹ yị dọ ka Ẹnẹyịmavara ọ nyị ọda ẹnịnị nị. Ee yi ka ẹnị ẹ yị wụ́ chire e. 6Ịsị idu nịnị vaa sị hụụnị iruku vaa wụ̀ wa ha ọ vị ọnọọ nị; dị akatapooro nịnị hụụnị ụnọmị va gara wa ha chẹkẹ-chẹkẹ. Dị ẹzụ e be wa ịnị ẹkụra, ọza anaa jịnẹ tụ ẹhẹ dị ọ na a ha agụvị ka ebira odivi ẹnịnị ọ sị dẹngụ baaba. Ụmẹ tụra ụmẹ ẹnịnị sịị ha hụrị oze Ohomorihi nị. 7Ẹnẹyịmavara kà, si ẹ vẹ ọnị ọnị aa sịị vagu ịvị aza anị ẹnẹnị? Ẹnịnị ẹ raa hụrẹ ọnị ụvọ, dị ẹ naa hẹkẹ ori ẹnẹ ẹ yị nyị ịsị ẹ vị nị. Ọ kà, ọnị ộ sị avaba ịsị e yee si yị wa, ama vị ẹ yị naa sẹ̀ ịrẹka dị ẹ yaa hara nọ ịnị eehi ọsẹrẹka nịnị nị. 8Ẹnịnị vị ana sị mẹẹ anka umaata araka ana a sị pa ẹtẹẹrẹ avọọ; ẹngụ ẹnịnị ẹ ma dọ. Ọzọza vị enee sì ose ọnọhụva kaara-kaara. 9Ẹnẹyịmavara kà, áá vọrọ ka asị ọnị sị ụya rị wa agụvị avaba ọsọnị, dị ọnị ọ̀ họ̀ oponu ịrẹyị ẹngụ anị ịrẹsụ ẹngụ ẹkụra ọnọnị? 10Ọ kà ọnị vaa tụ́ ọnịvị nịnị ka ẹ̀ na má ọchị ịvayịnị aza anị va ha; ama ẹnịnị ẹ yị vee vu wa ẹtẹ bemi-bemi. Ọ kà ọnị vaa kà a yị wa ka ẹ̀ na avọ́ ọchị ẹnịnị ha, agụvị ka ẹ yị vị ọnị ọ nyị avọ ẹnẹ. 11Ẹnẹyịmavara kà, Anisirẹrị ọnịrị Anijuda nịnị ẹ sị ọnị vene saka-saka.
Ẹnẹyịmavara ô yi Anisirẹrị nịnị tịtẹ
12Aza Ẹnẹyịmavara ê cheeche ka ẹ yị nyị ịsị ọ vaa mẹ ẹnị. Ẹ ka ẹ yị vaa mẹ ka à kụ ịrẹkụ ve tu ẹnị. Ẹ yị rẹ vaa mẹ ka ụngwẹ ọ̀ ngụ ẹkụra ẹnịnị. 13Ẹ ka ọnịsẹ nịnị vị anaa kụ ịrẹka ọọhẹ kẹnẹ, Ohomorihi ẹ yị tụ wa ụtụ. Ẹ ka avaba odivi ọnị ọnịsẹ nịnị aa kà a ka ọ vaa vẹ, vị ana vaa vẹ ịrẹsụ ẹnịnị. 14Ijeremaya ka, agụvị avọọ, dị Ẹnẹyịmavara Ohomorihi Ochẹtẹẹngụ va kà a yị ọnị ka, agụvị ẹngụ ịrẹyị ọnị aza ẹnẹnị aa kà aanị, ọnị vaa mẹ ka avaba ịrẹyị anị ọnị ọnị Ijeremaya vaa ka ọ̀ sị mẹẹ anka ịra avọọ, dị aza ẹnịnị ẹnị ẹ̀ sị mẹẹ anka ọkụ avọọ, dị ịra ọ̀ rị wa ịra va ha. 15Ẹwụ nịnị Anisirẹrị, Ẹnẹyịmavara ọ ra mẹ ka anẹkụra ene noze ẹ̀ kụ ịrẹkụ ve tu wu nịnị. Anẹkụra hụrị ụmọrụmọ, ana katẹngụ, dị wẹ yị wụ ẹkụra ẹnị ẹ yaa kà a vị nị. 16Ẹnya ịrẹkụ ẹnịnị vị ẹnya anaa wụ̀ ọza, avaba isoja ẹnịnị vị aza ẹkarị-ẹkarị. 17Ịsa ọnị ụ mẹ tụ ịnị aarẹ ọnịrị ịsọyịrị awụ nịnị vị ọnị ẹnịnị vee duu ha. Ezi ọnọrụ awụ nịnị ọnịrị ezi anẹẹ awụ nịnị vị ẹnẹ vaa wụ̀ vàa ha. Ịsụpa awụ nịnị vị ọnị e vee vú ẹtẹ beri ọchị ịvayịnị ọnịrị ọchị ihwigi awụ nịnị. Ẹkụra awụ nịnị ana jị ọvọ kara ọnị ụ vavọọ aa tụra eyi nịnị avọọ vị ọnị isoja ẹnịnị vee vú ẹtẹ. 18Ẹnẹyịmavara kà, ịjị ụmẹ ọnọọ ọọ vavọọ tu, ọnị ẹ yị vee vu aza anị ẹtẹ saka-saka. 19Ijeremaya ka, Ẹnẹyịmavara kà, ịjị ẹnịnị ee họ̀ use ka sị ẹ vẹ dị ọnị Ẹnẹyịmavara maanị mẹ, ọnị ọ̀ ka ẹ yị wa ka, anka ẹnịnị mẹ va ịrẹma anị naa hẹkẹ ori ọzọga-ọzọga ịnị ẹtẹ ẹnịnị avọọ, avọọ gẹdẹ-gẹdẹ ẹnịnị mẹ va naa hẹkẹ azọga ẹkụra ọsa nị.
Ohomorihi ộ kà aza anị ọ̀nọ̀
20Ẹnẹyịmavara kà, na nọ̀ọ yị evere Ijekọvụ avaba ẹtẹ Ijuda ka: 21#Ayị 6.9,10; Ezk 12.2; Ịmk 8.18Ẹwụ nịnị ọnụra ẹnẹẹ yị yẹ ịrẹyị aanị ẹ̀ wụ o, waa nyị eyi nịnị ama we yi si re ẹtẹ nịnị, waa nyị ụtọ nịnị ama wẹ yị sị wụ́ ịrẹyị nịnị. 22#Ijov 38.8-11Ẹnẹyịmavara kà, wẹ yị daba hí angwa anị nịnịị? Ayị anị ẹ yị daba hụrẹ ẹwụ nịnị ịnẹẹ? Ọnị ọ sị aarẹ tẹ ẹhwị ẹtẹ yị oku ka asị ọ zụ jịnẹẹ pooro nị. Enyi ini òkū ọ zụ jị ayị dị aa da gụgụrụgụ ama ẹ yị zụ jịnẹ ẹhwị ẹtẹ ọnọọ. 23Ama ẹwụ nịnị vị anayọkatẹngụ, vị ụụ kụ̀ụ hịrẹ ọza nịnị nị. Wa sị ha tụ awụ nịnị, wẹ yị kụkụ saasa ọnị nịnị. 24Ẹnẹyịmavara kà we yị ma daba ka a nịnị ka waa sị ụbanyị yị ọnị nịnị, ọnị anaa zụ̀ orihi yị wụ nịnị ịnị avaba ụmẹ, dị ọnị aa mẹ ka ịsị ịnị aarẹ awụ nịnị ọọ mẹ. 25Ọ kà ebira odivi awụ nịnị ọ raa mẹ ka asị ụ kuku re ịsa ọyịza ẹnẹnị nịnị. 26Aza edivi hi ịnị ẹngụ awụ nịnị ana vaka èe zi anka ọza enee bè inomi avọọ, ama ẹ sị ịrẹpa va hi ẹtẹ èe bè aza. 27Anka ozube mẹẹ hara inomi hi ịnị abọ (ajivogidi) avọọ, avọọ ẹ mẹ sị ebira odivi hara ogu hi ịnị eehi ẹnịnị, dị ẹ ta vara aza ẹbanyị nị. 28Ẹnịnị ẹ ta banyị dị ẹ ta swa nị. Ebira odivi ẹnịnị ẹ ma nyị ẹhwị. Ẹnịnị ẹ ma mẹ̀ ọkarẹyị ịzẹyịza yị ezi-oku nịnị ka ụ vị ò zee yị wa. Ẹnịnị ẹ ma mẹ ịzẹyịza hi aza anaa rị ụya. 29Ẹnẹyịmavara kà, áá vọrọ ka asị ọnị sị ụya rị wa ụvị ebira ẹnẹnị, dị ọnị ọ̀ họ̀ oponu ịrẹyị ẹngụ anị ịrẹsụ ẹngụ aza ẹnẹnị? 30Ọ kà, ịrẹyị odivi anaā za ọzaa zizi ọ sị mẹ ịnị ẹtẹ ọnọnị. 31Ọnịsẹ nịnị kụkụ èe cheeche; ohirẹsụ irehi Ohomorihi nịnị vị ana kụkụ a sị ọda ẹngụ ẹnịnị mẹ ịsị ẹ yaa mẹ, dị aza anị vavọọ yị si ọ ka a vavọọ mẹẹ nị. Ama sị ụ vaa mẹ nịnị ịnị ẹzẹtẹ anị kẹ?
Currently Selected:
Ijeremaya 5: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
Ijeremaya 5
5
Ebira odivi ọnị Anijerusarẹmị nịnị mẹ̀
1Ẹnẹyịmavara kà, ẹwụ nịnị Anijerusarẹmị, ọ̀ ngụ avaba ẹkụra awụ nịnị dị we re. Ngụ avaba orere awụ nịnị zị dị we re, àa nyị ọza anaa mẹ̀ ịsa ana vọrọ dị aa mẹ ịzẹyịza hi Ohomorihi. Àa nyị, ọnị Ẹnẹyịmavara vaa vagu wụ nịnị. 2Dị ụ daka aa yịị kà a nịnị ka waa hẹkẹ Ẹnẹyịmavara nịnị aanị, ireche u we che nịnị nị. 3Ịzẹyịza, Ẹnẹyịmavara vị enee sì ka aza ẹẹ mẹ ịzẹyịza. Ộ nya wụ nịnị ịsa, ama ụ yị ka wẹ yị wụ́ ịrẹyị nịnị. Ộ sị ụya rị wụ nịnị ama we yi ka wẹ yị kọsẹ nịnị. Anayọkatẹngụ ụ vị nịnị nị, ụ ka wẹ yị và hụụnị ebira odivi awụ nịnị. 4Ijeremaya ka, dị ọnị ro nị ka, aza ẹnẹnị ẹẹ daa ụya rị, ọnụra ẹ vị nị. Ẹnịnị ẹ yị yẹ ịsị Ohomorihi ẹnịnị ee sì, ọnị Ẹnẹyịmavara ee sị ka ẹnịị ọ̀ mẹ. 5Avọọ ọnị ee ne tu ọdọvịdị ẹnịnị dị ọnị ò pe wa ka ịrẹyị. Ịzẹyịza ẹnịnị ẹẹ yẹ ịsị Ẹnẹyịmavara Ohomorihi ee si ka ẹnịnị ọ̀ mẹ. Ama avaba ẹnịnị ẹ ka ẹnị ẹ yị dọ ka Ẹnẹyịmavara ọ nyị ọda ẹnịnị nị. Ee yi ka ẹnị ẹ yị wụ́ chire e. 6Ịsị idu nịnị vaa sị hụụnị iruku vaa wụ̀ wa ha ọ vị ọnọọ nị; dị akatapooro nịnị hụụnị ụnọmị va gara wa ha chẹkẹ-chẹkẹ. Dị ẹzụ e be wa ịnị ẹkụra, ọza anaa jịnẹ tụ ẹhẹ dị ọ na a ha agụvị ka ebira odivi ẹnịnị ọ sị dẹngụ baaba. Ụmẹ tụra ụmẹ ẹnịnị sịị ha hụrị oze Ohomorihi nị. 7Ẹnẹyịmavara kà, si ẹ vẹ ọnị ọnị aa sịị vagu ịvị aza anị ẹnẹnị? Ẹnịnị ẹ raa hụrẹ ọnị ụvọ, dị ẹ naa hẹkẹ ori ẹnẹ ẹ yị nyị ịsị ẹ vị nị. Ọ kà, ọnị ộ sị avaba ịsị e yee si yị wa, ama vị ẹ yị naa sẹ̀ ịrẹka dị ẹ yaa hara nọ ịnị eehi ọsẹrẹka nịnị nị. 8Ẹnịnị vị ana sị mẹẹ anka umaata araka ana a sị pa ẹtẹẹrẹ avọọ; ẹngụ ẹnịnị ẹ ma dọ. Ọzọza vị enee sì ose ọnọhụva kaara-kaara. 9Ẹnẹyịmavara kà, áá vọrọ ka asị ọnị sị ụya rị wa agụvị avaba ọsọnị, dị ọnị ọ̀ họ̀ oponu ịrẹyị ẹngụ anị ịrẹsụ ẹngụ ẹkụra ọnọnị? 10Ọ kà ọnị vaa tụ́ ọnịvị nịnị ka ẹ̀ na má ọchị ịvayịnị aza anị va ha; ama ẹnịnị ẹ yị vee vu wa ẹtẹ bemi-bemi. Ọ kà ọnị vaa kà a yị wa ka ẹ̀ na avọ́ ọchị ẹnịnị ha, agụvị ka ẹ yị vị ọnị ọ nyị avọ ẹnẹ. 11Ẹnẹyịmavara kà, Anisirẹrị ọnịrị Anijuda nịnị ẹ sị ọnị vene saka-saka.
Ẹnẹyịmavara ô yi Anisirẹrị nịnị tịtẹ
12Aza Ẹnẹyịmavara ê cheeche ka ẹ yị nyị ịsị ọ vaa mẹ ẹnị. Ẹ ka ẹ yị vaa mẹ ka à kụ ịrẹkụ ve tu ẹnị. Ẹ yị rẹ vaa mẹ ka ụngwẹ ọ̀ ngụ ẹkụra ẹnịnị. 13Ẹ ka ọnịsẹ nịnị vị anaa kụ ịrẹka ọọhẹ kẹnẹ, Ohomorihi ẹ yị tụ wa ụtụ. Ẹ ka avaba odivi ọnị ọnịsẹ nịnị aa kà a ka ọ vaa vẹ, vị ana vaa vẹ ịrẹsụ ẹnịnị. 14Ijeremaya ka, agụvị avọọ, dị Ẹnẹyịmavara Ohomorihi Ochẹtẹẹngụ va kà a yị ọnị ka, agụvị ẹngụ ịrẹyị ọnị aza ẹnẹnị aa kà aanị, ọnị vaa mẹ ka avaba ịrẹyị anị ọnị ọnị Ijeremaya vaa ka ọ̀ sị mẹẹ anka ịra avọọ, dị aza ẹnịnị ẹnị ẹ̀ sị mẹẹ anka ọkụ avọọ, dị ịra ọ̀ rị wa ịra va ha. 15Ẹwụ nịnị Anisirẹrị, Ẹnẹyịmavara ọ ra mẹ ka anẹkụra ene noze ẹ̀ kụ ịrẹkụ ve tu wu nịnị. Anẹkụra hụrị ụmọrụmọ, ana katẹngụ, dị wẹ yị wụ ẹkụra ẹnị ẹ yaa kà a vị nị. 16Ẹnya ịrẹkụ ẹnịnị vị ẹnya anaa wụ̀ ọza, avaba isoja ẹnịnị vị aza ẹkarị-ẹkarị. 17Ịsa ọnị ụ mẹ tụ ịnị aarẹ ọnịrị ịsọyịrị awụ nịnị vị ọnị ẹnịnị vee duu ha. Ezi ọnọrụ awụ nịnị ọnịrị ezi anẹẹ awụ nịnị vị ẹnẹ vaa wụ̀ vàa ha. Ịsụpa awụ nịnị vị ọnị e vee vú ẹtẹ beri ọchị ịvayịnị ọnịrị ọchị ihwigi awụ nịnị. Ẹkụra awụ nịnị ana jị ọvọ kara ọnị ụ vavọọ aa tụra eyi nịnị avọọ vị ọnị isoja ẹnịnị vee vú ẹtẹ. 18Ẹnẹyịmavara kà, ịjị ụmẹ ọnọọ ọọ vavọọ tu, ọnị ẹ yị vee vu aza anị ẹtẹ saka-saka. 19Ijeremaya ka, Ẹnẹyịmavara kà, ịjị ẹnịnị ee họ̀ use ka sị ẹ vẹ dị ọnị Ẹnẹyịmavara maanị mẹ, ọnị ọ̀ ka ẹ yị wa ka, anka ẹnịnị mẹ va ịrẹma anị naa hẹkẹ ori ọzọga-ọzọga ịnị ẹtẹ ẹnịnị avọọ, avọọ gẹdẹ-gẹdẹ ẹnịnị mẹ va naa hẹkẹ azọga ẹkụra ọsa nị.
Ohomorihi ộ kà aza anị ọ̀nọ̀
20Ẹnẹyịmavara kà, na nọ̀ọ yị evere Ijekọvụ avaba ẹtẹ Ijuda ka: 21#Ayị 6.9,10; Ezk 12.2; Ịmk 8.18Ẹwụ nịnị ọnụra ẹnẹẹ yị yẹ ịrẹyị aanị ẹ̀ wụ o, waa nyị eyi nịnị ama we yi si re ẹtẹ nịnị, waa nyị ụtọ nịnị ama wẹ yị sị wụ́ ịrẹyị nịnị. 22#Ijov 38.8-11Ẹnẹyịmavara kà, wẹ yị daba hí angwa anị nịnịị? Ayị anị ẹ yị daba hụrẹ ẹwụ nịnị ịnẹẹ? Ọnị ọ sị aarẹ tẹ ẹhwị ẹtẹ yị oku ka asị ọ zụ jịnẹẹ pooro nị. Enyi ini òkū ọ zụ jị ayị dị aa da gụgụrụgụ ama ẹ yị zụ jịnẹ ẹhwị ẹtẹ ọnọọ. 23Ama ẹwụ nịnị vị anayọkatẹngụ, vị ụụ kụ̀ụ hịrẹ ọza nịnị nị. Wa sị ha tụ awụ nịnị, wẹ yị kụkụ saasa ọnị nịnị. 24Ẹnẹyịmavara kà we yị ma daba ka a nịnị ka waa sị ụbanyị yị ọnị nịnị, ọnị anaa zụ̀ orihi yị wụ nịnị ịnị avaba ụmẹ, dị ọnị aa mẹ ka ịsị ịnị aarẹ awụ nịnị ọọ mẹ. 25Ọ kà ebira odivi awụ nịnị ọ raa mẹ ka asị ụ kuku re ịsa ọyịza ẹnẹnị nịnị. 26Aza edivi hi ịnị ẹngụ awụ nịnị ana vaka èe zi anka ọza enee bè inomi avọọ, ama ẹ sị ịrẹpa va hi ẹtẹ èe bè aza. 27Anka ozube mẹẹ hara inomi hi ịnị abọ (ajivogidi) avọọ, avọọ ẹ mẹ sị ebira odivi hara ogu hi ịnị eehi ẹnịnị, dị ẹ ta vara aza ẹbanyị nị. 28Ẹnịnị ẹ ta banyị dị ẹ ta swa nị. Ebira odivi ẹnịnị ẹ ma nyị ẹhwị. Ẹnịnị ẹ ma mẹ̀ ọkarẹyị ịzẹyịza yị ezi-oku nịnị ka ụ vị ò zee yị wa. Ẹnịnị ẹ ma mẹ ịzẹyịza hi aza anaa rị ụya. 29Ẹnẹyịmavara kà, áá vọrọ ka asị ọnị sị ụya rị wa ụvị ebira ẹnẹnị, dị ọnị ọ̀ họ̀ oponu ịrẹyị ẹngụ anị ịrẹsụ ẹngụ aza ẹnẹnị? 30Ọ kà, ịrẹyị odivi anaā za ọzaa zizi ọ sị mẹ ịnị ẹtẹ ọnọnị. 31Ọnịsẹ nịnị kụkụ èe cheeche; ohirẹsụ irehi Ohomorihi nịnị vị ana kụkụ a sị ọda ẹngụ ẹnịnị mẹ ịsị ẹ yaa mẹ, dị aza anị vavọọ yị si ọ ka a vavọọ mẹẹ nị. Ama sị ụ vaa mẹ nịnị ịnị ẹzẹtẹ anị kẹ?
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.