ỊMATIYU 3
3
Ẹla Ohe nya ỊJọn Ọngọ Hụ Enyi Ohe
(ịMakị 1:1-8; iLuku 3:1-18; ịJọn 1:19-28)
1Ụka ọọwa, ịJọn ọngọ hụ enyi Ohe rụ kele ka ugbileji nya iJudiya juwa ya ẹla nya Ohe Oluhye ju angịlẹ wuu kị bọọ kele ka ụwa. 2Egbeju nya ẹla nya Ohe Oluhye ọlẹ ká ịJọn juwa ya jaa ri yẹkẹẹ, “Anụ yẹ irya da bwu ẹpwụ nya ịhọbịrị ịhọhọ nyanụ wuu mẹ. Chajị ụka nya ịpyị-adịrahụ nya epwoohe ju chwẹẹ lụmẹ lẹ.” 3ỊJọn ọwẹ, Ayịsaya ọlọmwụ nya Ohe Oluhye a yẹ ọmwụ chajị nyamwụ ụ-ụpwụ ọlẹ kọ da lẹ. Ọ yẹkẹẹ,
“Omyi nya ọngọhẹ lalẹẹ da ọna gboo u-ugbileji yẹkẹẹ,
‘Anụ angịnyị ehe wuu, anụ nwụ ọhịhị nyanụ rịrị kpakpakpa kọ pwoku ụgbẹyị nya ọhịhị nya Ọngọlahị mẹ.
Kanụ juwa la ọhịhị ọlẹ kọ la kpụrụrụ ị-ịlahị nya Ọngọlahị ọlẹ kọọ wẹẹ ka warị,
jaabwọ kị kaa nwụla ụgbẹyị ọchịpwụrụ bwu nya adịrahụ ọtụka-ọtụka nọ gbọọ mẹ.’ ”
4ỊJọn ọngọ hụ enyi Ohe kụrụ ịwụrụ ịlẹ kị kpa egbii nya ụnyịrẹ-ịkamẹlụ họ. Ugba nya iyo kem, ị kpa họ ugba ọ-chị ọhị nya ịJọn ọwẹ lẹ. Ang oriri nyamwụ ri ịyịrị bala inwa ọnẹnẹ. 5Ụka ọọwa, iru nya angịnyị lụmẹ-lụmẹ juwa kele ka ẹga nya ịJọn bwu iJerusalẹm bala ọpyị nya iJudiya wuu bala alepweji ịlẹ kị kụ dagaga ju Ihu ịJọdan wuu. 6Angịịwa ya ịhọbịrị ịlẹ kị họ dodehe je ịJọn. Ọọwa lẹ, ịJọn a hwaa enyi Ohe ẹ-ẹpwụ nya Ihu ịJọdan la ẹnyị nya Ohe Oluhye lẹlẹ.
7Ụka ká iru nya alegbeju nya ala iJuu ịhyẹ ịlẹ kị wụrụ ala ịFarịsii bala ala ịSadusii juwa ka ẹga nya ịJọn kọ ka hwaa enyi Ohe ịnyịnyị lẹ, ịJọn a byaa yẹkẹẹ, “Anụ angị byịbyị ọ-ọkịlẹtụ lala ịgbịjị ịwẹ lee! Oowo, a tị́ gbileenu ụbwọ ụ-ụrụ du kanụ lẹẹ yẹ gụrwẹ gụrwẹ hi agbama nya Ohe Oluhye tụtụm wẹẹ? 8Ọ hiigu. Ó-ri ịnyị lẹ aalẹ, anụ́-ụ juwa họ abwẹla ọnyịịla ọlẹ kọ ka mẹjẹ yẹkẹẹ, anụ nyị yẹ irya da bwu ẹpwụ nya ịhọbịrị ịhọhọ nyanụ wuu lẹ mẹ. 9Anụ pịrị ịlọnụ ju yẹkẹẹ, ịwa nyị tị́ kiji ri anyị nya Ebiraham riri lẹlẹ, ịwa nyị juwa ka be hi eje owuwu nya Ohe Oluhye u-uhye nya ịhọbịrị ịhọhọ nyịwa lẹ, ka! Chajị, m jam byinu yẹkẹẹ, ọ chị Ohe Oluhye kpẹẹ nyọka họ ká ajwọ ịlam-ịlam ka yẹ ri anyị nya Ebiraham myị́. 10Ị dọmwụ ya eje o-be ọwụ nọ ọ-ọmwụ nya okoji ọnyị myị ọnyị lẹ! Okoji ọlẹ kọ myị nwụ́ ugbe ọnyịịla ka aalẹ, Ọngọlahị ka kpa eje o-be ọwụ ọọwa hu okoji ọọwa latẹ latẹ, ene kọ ka hwọọ ju ka ẹpwụ nya ila wurum. 11Am lẹ, m jam kpa enyi ọlam-ọlam hụnụ enyi Ohe la ẹnyị nya Ohe Oluhye kọ ka ri ang o-ju ẹjẹẹ yẹkẹẹ, anụ yẹ irya da bwu ẹpwụ nya ịhọbịrị ịhọhọ nyanụ wuu lẹ. Ma, ọngọhẹ ọlẹ kọ wẹẹ ka warị ẹ-ẹkpẹ nyam lẹ, Olegu Ịgọgọ bala ila, ọ ka kpa hụnụ enyi Ohe lẹ. Ọngọọwa ri ọngọ ọtụka gụm lụmẹ kaka kpoye. Lẹ, ḿ dọmwụ chịla ị-ịlahị nyamwụ kpụ, m ka kpa ugbẹtẹ nyamwụ họọ kpong-kpong ka. 12Ọngọọwa kpa ọngịrị nya eje ọlala nyamwụ ụ-ụbwọ lala ụda ọ-kpa hịrị ang. Ụka kọ kpa ụda nya eje ọlala ọọwa hịrị angịnyị ehe kpá wuu lala igbi lẹ, ọ ka go ịlẹ kị ri ajẹ kpa kaka gu u-ube lẹlẹ. Ọọwa lẹ, ọ ka go ịlẹ kị ri ewoo nyaa kpa kaka ju ka ẹpwụ nya ila ọtụka ọlẹ kọ ka jẹ́-ẹ mịrị kpá ẹnẹnẹhẹ myị́ kaka pyịyọọ lẹlẹ.”
Enyi Ohe Ọhụhụ nya IJisọsị
(ịMakị 1:9-11; iLuku 3:21-22)
13Ụka ọọwa, iJisọsị bwu ịGalili kele ka Ihu ịJọdan ka ẹga nya ịJọn ọngọ hụ enyi Ohe, chajị ká ịJọn ka hwọọ enyi Ohe ụ-ụwa ịnyịnyị. 14Ịnọ, ịJọn juwa tịtọ kọ ka da enyi Ohe ọhụhụ nya iJisọsị ọọwa yi. Chajị, ọ byi iJisọsị yẹkẹẹ, “Ayịbahị, am a chịla kam ka wẹ ẹga nyang kaka hụ enyi Ohe lẹ. Ọọwa a jam wẹ ẹga nyam kam ka hụng enyi Ohe dachichi lẹlẹ?”
15IJisọsị wẹ byọọ yẹkẹẹ, “ỊJọn, ba kọ la ịnyị mẹ ẹnwa! Chajị ọ chịla kahị ka họ ang myị́ ang ọlẹ kọ ri abwẹla ọnyịịla nya Ohe Oluhye ọhọhọ jịra pyii lẹ.” Ọọwa lẹ, ịJọn a myị ju iJisọsị lẹlẹ. 16Ahyaahị ká ịJọn hụ iJisọsị enyi Ohe Ihu ịJọdan kpá lẹ, iJisọsị a gba kpehe bwu ẹpwụ nya enyi lẹlẹ. Ụka ọọwa, epwoohe wụrụ hwoo ha iJisọsị lẹ, ọ yẹ Olegu Ịgọgọ kọ juwa hireji bwu uhye la abwụma nya enewulo kaka kwọọ u-uhye lẹlẹ. 17Ịnyị lẹ, omyi ọhẹ a juwa ya ẹla bwu epwoohe yẹkẹẹ, “Ọngọlẹ ri Ọnyẹwẹ nyam ọlẹ ká ẹla nyamwụ hám lụmẹ. Ang myị́ ang nya ọhịhị nyamwụ wuu kpụm ịpyọ lụmẹ.”
Currently Selected:
ỊMATIYU 3: IBNO
Highlight
Copy
Compare
Share
Want to have your highlights saved across all your devices? Sign up or sign in
Igede Bible © The Bible Society of Nigeria, 2019.