ÚKLƆ́ KÚ ĀCOTƐ̄HƆ̄ 21
21
Iyāwu ŋmá Umílétɔ̄si ga Utáya
1Alɔ le ńŋmóó tá anyākwɔ́cɛ kú Ɛ́fēsɔsi, anɔ́ɔ alɔ nyɛ̄ɛ̄ á. Úgbéenyi ā le yɛ kpaakpa i tá ɔlíidɔ kú Ukósi. Oŋmɔ́ɔ̄cī nū alɔ gāājɛ Uródesi, anɔ́ɔ o ŋmá abɔ́ɔ ā alɔ gāājɛ Upátāra. 2Abɔ́ɔ alɔ le úgbéenyi éyi má nōo yɔ̄ ī ga Ufinísīya ā, anɔ́ɔ alɔ le tá ipú nū le yɛ á. 3Alɔ gā ɛga nɛ̄ alɔ le ɔlíidɔ kú Usáyíprɔ̄si má eyī, alɔ le gla anú abɔ̄lúfīyē le yɛ tá Usiríya. Alɔ le pɛ́ wāajɛ Utáya ɛga nɛ̄ úgbéenyi ā gáā kpó iyó báajɛ. 4Alɔ le ayíkpó ōhī má, anɔ́ɔ alɔ bá abɔ́ɔ mla uwá ɛ̄cī ahāapa. É bī ɔfú kú Alelékwū Ihɔ le da Upɔ́lu kóō nyɔ̄ Ujerúsālɛm ŋ́. 5Eko nɛ̄ ɛ̄cī nɛ̄ alɔ í yá abɔ́ɔ ā mɛ ā, alɔ nyɛ̄ɛ̄ gbɔɔ́ ō nyɔ̄. Anɔ́ɔ odúúdú uwā mɛ́mla anyā uwā mɛ́mla ayí uwā, lɛ alɔ bītá jāā gbéeko nɛ̄ alɔ le bɛ̄cɛ ŋmá igelī nɛ̄hi ā ga ɔkónu ísu, ɛga nɛ̄ alɔ le okwúukwu kpó kwajɛ le ɔkɔ gbā lɛ Ɔwɔicō. 6Anɔ́ɔ ɔnyɔɔnyɛ le ńŋmóō tá ɔ́mpa nū, anɔ́ɔ alɔ le tá ipú úgbéenyi abɔ̄ ācɛ ā kwúcē ga ɔlɛ́ ā.
Iyāwu ga Usísarīya
7Alɔ yɔ̄ ī yɛ gɔbū ipú iyāwu kú alɔ, ŋmá Utáya gā ajɛ Utolɛ́māyisi, ɛga nɛ̄ alɔ lɛ okónu hɛ́tū ayínɛ́ ā klla yɔ̄ mla uwá ɛ̄cī éyi. 8#Ācot 6.5; 8.5 Oŋmɔ́ɔ̄cī nū alɔ gbɔɔ́ kóō nyɔ̄ ajɛ Usísarīya. Alɔ yɛ tá ɔlɛ́ Ufílīpu otɔ́ɔna kú okōolɔhi, nōo kē wɛ éyi kú ipú ācɛ ahāapa nēe fu kéē kɔ̄ ɔdōlé ā nyɔ̄ í le gbɔga. 9Ó lɛ ayínɔ̄nyā ɛnɛ nēé lɛ ɔbá ŋ́, nēe kē ī mɛ́ɛbɛ. 10#Ācot 11.28 Abɔ̄ alɔ bá abɔ́ɔ ɛ̄cī alɛwa ā, ɔ̄comɛ́ɛbɛ éyi nēé hī ka Ágābɔsi gā ŋmá Ujudíya. 11Abɔ̄ ó gā ɛgiyí alɔ ā, ó kwú ɔkpōkwɛ́nyɔ́ kú Upɔ́lu ú, anɔ́ɔ ó lɛ iyī nū ikpó mɛ́mla abɔ̄ gbō. Anɔ́ɔ ó kahíníī, “Ɛ̄nyā wɛ ɔdā nɛ̄ Alelékwū Ihɔ ka á, ‘Ɛ́gɛ́nyā nɛ̄ ācɛ Ujíyu géē gbō ɔ̄cɛ nōo lɛ ɔkpókwɛ́nyɔ́ nyā ajɛ Ujerúsālɛm á, é klla géē je ɔ́ tū aílɔ́wá abɔ̄.’” 12Abɔ̄ alɔ le ɛ̄nyā pó ā, alɔ mɛ́mla ācɛ nēe bá abɔ́ɔ ā le ɔkɔ gbā lɛ Upɔ́lu ká ɔ̄ híī nyɔ̄ Ujerúsālɛm ŋ́. 13Anɔ́ɔ Upɔ́lu tóohi kahíníī, “Ɔdí nɛ̄ aá yɔ̄ ī yá ā, o jikwū ɛ́gɛ́nyā kú aá bīya um ɔtū nɛɛ? N le tútū, ó kóō lɛ um tū agbá ōfōōfūnū ŋ́, amáŋ ká n̄ gekwú dúú ipú Ujerúsālɛm ohígbū iyē kú Óndú Ujísɔ̄si.” 14Abɔ̄ alɔ í yá ɔdā dúú nōo gē pīya odo kú nū abɔ̄ glá ŋ́ má, alɔ habɔ̄ ɔ̄ tá, kē kahíníī, “Ɔdā nɛ̄ Óndú ā dɔɔ̄kā ā kóō le yá.”
Iyāwu ga Ujerúsālɛm
15Abɔ̄ alɔ bá abɔ́ɔ yɛɛ ā, alɔ le iyó kú alɔ tútū, anɔ́ɔ alɔ le yɛ tá Ujerúsālɛm. 16Ācɛ ōhī kú ayíkpó nēe ŋmá Usísarīya āa le yɛ mla alɔ. É le alɔ kpó nyɔ̄ ɔlɛ́ Uminásɔn, ɔ̄cɛ Usáyíprɔ̄si, nōo wɛ ɔ̄cocɛ̄lɔ̄ɔwɔicō ŋmá ajaajɛ ā gáā gbɔga. 17Eko nɛ̄ alɔ gā Ujerúsālɛm ā, ayínɛ́ ā mīyɛ alɔ lɔɔlɔhi.
Upɔ́lu lɛ ācɛ Ujíyu nōo wɛ ɔ́wá kú Ohɔ́nyɛtá ā ɔtū gbo
18Oŋmɔ́ɔ̄cī nū Upɔ́lu mɛ́mla alɔ le yɛ tá ɛgiyí Ujémīsi, ɛjɛ̄ɛ̄jī anyākwɔ́cɛ ā ké bá abɔ́ɔ. 19Upɔ́lu le okónu hɛ́ tū uwā, anɔ́ɔ ó gbɔɔ́ ō ka lɛ uwá ɔgbace ɔgbace ɔdā nɛ̄ Ɔwɔicō bī ɔ̄ yá ɔtāhɛ̄ aílɔ́wá ā. 20Abɔ̄ é le ɛlā kú nū pó ā, é cɛ̄tra Ɔwɔicō. Anɔ́ɔ é da ɔ́ kahíníī, “Ɔyínɛ́ alɔ, a lɔfú jé úlúúlā kú ācɛ Ujíyu nēe je pīya ācocɛ̄lɔ̄wɔicō ā, ā kē má ɛ́gɛ́nɛ̄ odúúdú uwā í bī Íne ā le hiijā ŋ́ mā a. 21É kē lɛ ɔ̄kā kú uwɔ kā uwā ka awɔ gē nwū odúúdú ācɛ Ujíyu nēe bá ɔtāhɛ̄ aílɔ́wá ā ɛlā kéē lɛ igbīhi cē kwu íne kú Umósīsi, ka a gē da uwá kéē híī hɛ́ ayí uwā apī ámāŋ ka o lɛ uculo kú ācɛ Ujíyu tū ŋ́ má. 22Ɔdí nɛ̄ alɔ géē yá mɛ́ɛ̄ ā? Ohígbū ka ó wɛ o piíí kéē géē pó piíí ka a gā ɛɛ́. 23#Áluk 6.13-21Ohígbū ɛ́gɔ́ɔmā ɔdā dúúmā nɛ̄ alɔ da uwɔ ā, lɛ ɔ̄ yá. Alɔ lɛ ācɛ ɛnɛ, nēe le oji ce. 24Nyɔ̄ mla uwá ga ipú Agblīihɔ-nɛ̄hi ā kéē lɛ aá iyē gwu ɛ́gɛ́nɛ̄ uculo ā lɛ ā, ká ā lɛ ije kú uwā gbā, cɛ́ɛ́ kéē lɛ ɛyí púla#21.24 Lɛyí kú uwā kpó púla (18.18) ó i lɛ ā, odúúdú ācɛ géē le jé ka ɔdā nēé da uwá lɛyíkwu uwɔ ā, wɛ ɛ̄kɛ̄mgbɛ̄, amáŋ ka awɔ abɔ̄yī uwɔ gē yēeyī ɛ́gɛ́nɛ̄ íne kú Umósīsi dɔɔ̄kā ā. 25#Ācot 15.29 Ɛjī kwɛjī lɛ aílɔ́wá nēe je pīya ācocɛ̄lɔ̄wɔicō ā nɛɛ, alɔ lɛ ɔkpá tá fu uwá yɔ̄ ī da uwá ka alɔ le ɔ́ miya kéē híī lé ɔdōlé dúúmā nēé le gwɛ́ɛya lɛ ɛcí gbɔbū ŋ, ámāŋ ka o lé oyī kú ɛbɛ́ ŋ́, ámāŋ ka o lé ɛbɛ́ dúú nēé le ɔ́ ɔkɔ nyacē gbuúlú le ɔ́ ŋmó ŋ́. É klla í lɛ iyī uwā tū ŋmá ajā ō gbo mɛ́mla ikpó ɔnyā ɔhá oōce.” 26Upɔ́lu lɛ ācɛ ā kpó, anɔ́ɔ oŋmɔ́ɔ̄cī nū ó lɛ anú mɛ́mla uwá iyē gwu. Anɔ́ɔ ó le yɛ tá ipú Agblīihɔ-nɛ̄hi ā gaá ka tɛ́ɛcɛ lɛ uwá ɛ̄cī nɛ̄ iyē nēé yɔ̄ ī gwu ā í mɛ ā mɛ́mla eko nēé géē gwɛ́ɛya ohígbū ɔnyɔɔnyɛ kú uwā a.
Unu egidi ajɛ Ujerúsālɛm nōo yá ɛ́ɛ́ nēé kwú Upɔ́lu ā
27Eko nēé le ɛ̄cī ahāapa ā yá jīla ā, ācɛ Ujíyu nēe ŋmá Ésiya ā le Upɔ́lu má ipú Agblīihɔ-nɛ̄hi ā. É le útú hɛ́ ɔtāhɛ̄ odúúdú ɛwa lɛyíkwu Upɔ́lu, anɔ́ɔ é le ɔ́ kwú. 28É dɛ̄gba kahíníī, “Ācɛ kú Ísrɛ̄lu, aá tá alɔ abɔ̄! Ɛ̄nyā wɛ ɔ̄cɛ nōo gē nwū ācɛ ɛlā ɛbɛɛbɛ lɛyíkwu ācɛ Ujíyu mla íne kú Umósīsi mɛ́mla Agblīihɔ-nɛ̄hi nyā á. Ɛ̄nɛ̄ o fíyɛ́ dúú ā, ó kē le ācɛ Ugríisi kpó wā ipú Agblīihɔ-nɛ̄hi nyā dúú, kē le ɛgotīihɔ nyā nyílá.” 29#Ācot 20.4É ka ɛ̄nyā ohígbū ka é tɛtɛ má Utrofímɔ̄si, ɔ̄cɛ Ɛ́fēsɔsi mɛ́mla Upɔ́lu ipu igelī, anɔ́ɔ é kpéyīce ka Upɔ́lu ɔ́ɔ kē le ɔ̄ bī wā ipú Agblīihɔ-nɛ̄hi ā nɛɛ. 30Útú le hɛ́ ɛga dóódu kú ipú igelī nɛ̄hi ā, anɔ́ɔ ācɛ gbɔɔ́ ō cīlɛ̄fú nɛ̄ɛ̄nɛ̄hi á. Ācɛ le inya pɛ́ kwu ŋmá ɛga dóódu gaá le Upɔ́lu kwú le ɔ́ pi wɛ̄ɛcɛ ŋmá ipú Agblīihɔ-nɛ̄hi ā, anɔ́ɔ ikpííkpó ɔ́ɔmā é le ɛjɛ̄ɛ̄jī aódūngwɔ̄wɛ kú Agblīihɔ-nɛ̄hi ā kpó kwu. 31Abɔ̄ é bá ī yá kéē gé ē ŋmó ɔ̄ ā, olɛhɔ̄ le táajɛ ahɔ̄ kú otrɛ̄yí kú ɔ́wá kú aícɔ́ɔja ka ācɛ ɛ́ɛ bá yɔ̄ ī cīlɛ̄fú ipú odúúdú igelī nɛ̄hi kú Ujerúsālɛm. 32Ikpííkpó ɔ́ɔmā ó lɛ aícɔ́ɔja mɛ́mla aótrɛ̄yí kú aícɔ́ɔja ofɛ̄hɔ̄ kpó, anɔ́ɔ é le kwu nyɔ̄ ɛgiyí uwā. Abɔ̄ é kē lɛ otrɛ̄yí mɛ́mla aícɔ́ɔja ā má ā, é mā ijē ō ŋmó Upɔ́lu tá. 33Otrɛ̄yí ā nyɔ̄ gaá le Upɔ́lu kwú, le ɔ́da je lɛ uwá kéē lɛ agbá ɛpa kpó kwu ɔ́. Ó le ɔ̄kā da ójila ā ɛdɔ ɔ̄cɛ nɛ̄ Upɔ́lu wɛ ā mɛ́mla ɔdā nōó yá ā. 34Ācɛ ōhī kú ipú ɛwa ā le ɔkɔ cɛyí le odée ka, ācɛ ɔhá kē le ɔdā ɔhá ka. Abɔ̄ otrɛ̄yí kú aícɔ́ɔja ā í lɔfú jé ɔdā nōo yá ā glá ŋ́ ohígbū ígbájí nōo yɔ̄ ā, ó lɛ ɔ́da je kéē lɛ Upɔ́lu bī ga ɔlɛ́ aícɔ́ɔja. 35Abɔ̄ ó gaá kwú ikpó ú ce agidigbé kú inu gáā ticō ā, aícɔ́ɔja ā kwú ɔ̄ ú cɔɔkɔ ohígbū ka ɛwa ā í tōō kwútū gɛ ŋ́. 36Ɛwa ā le yá klá uwá gē dɛ̄gba kahíníī, “Lɛ ɔ́ ŋmó, lɛ ɔ́ ŋmó!”
37Abɔ̄ é gáā bī Upɔ́lu ga ipú ɔlɛ́ aícɔ́ɔja ā, ó da otrɛ̄yí ā kahíníī, “N̄ lɛ ɔdée da uwɔ mɛ́ɛ̄ ŋŋ?” Anɔ́ɔ otrɛ̄yí ā da ɔ́ ɔ̄kā kahíníī, “Á jé ō ka ucē kú Ācɛ ugríisi nɛɛ? 38Ó wɛ awɔ wɛ ɔ̄cɛ Íjīpiti nōo tɛtɛ yá ká ācɛ kéē cāŋjɛ lɛyíkwu igɛ́mɛ́nti klla kē kpó ācoŋmácɛ úlā igwó ga ipú ígbíli ā ŋ́ nɛɛ?” 39Upɔ́lu tá ohi kahíníī, “N wɛ ɔ̄cɛ Ujíyu, nōo ŋmá Utásɔsi ipú Usilísiya, ɔ̄cɛ kú igelī ocɛgbá nɛ̄hi. N gē ba uwɔ kā ā lɛ ɛga je gā um ká n̄ lɛ ɛlā ka lɛ ācɛ nēe bá ā.” 40Otrɛ̄yí kú aícɔ́ɔja ā le ɛga je lɛ ɔ́, anɔ́ɔ Upɔ́lu māháyi icō agidigbé ā le abɔ̄ yá lɛ ācɛ ā pɛɛ. Anɔ́ɔ eko nɛ̄ odúúdú uwā mā uya ā, ó gbɔɔ́ ō kɛlā lɛ uwá ɔkɔ kú ucē kú ācɛ Ujíyu.
Currently Selected:
ÚKLƆ́ KÚ ĀCOTƐ̄HƆ̄ 21: IFBCL
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
Learn More About Ubáyíbu kú IdɔmaÚKLƆ́ KÚ ĀCOTƐ̄HƆ̄ 21
21
Iyāwu ŋmá Umílétɔ̄si ga Utáya
1Alɔ le ńŋmóó tá anyākwɔ́cɛ kú Ɛ́fēsɔsi, anɔ́ɔ alɔ nyɛ̄ɛ̄ á. Úgbéenyi ā le yɛ kpaakpa i tá ɔlíidɔ kú Ukósi. Oŋmɔ́ɔ̄cī nū alɔ gāājɛ Uródesi, anɔ́ɔ o ŋmá abɔ́ɔ ā alɔ gāājɛ Upátāra. 2Abɔ́ɔ alɔ le úgbéenyi éyi má nōo yɔ̄ ī ga Ufinísīya ā, anɔ́ɔ alɔ le tá ipú nū le yɛ á. 3Alɔ gā ɛga nɛ̄ alɔ le ɔlíidɔ kú Usáyíprɔ̄si má eyī, alɔ le gla anú abɔ̄lúfīyē le yɛ tá Usiríya. Alɔ le pɛ́ wāajɛ Utáya ɛga nɛ̄ úgbéenyi ā gáā kpó iyó báajɛ. 4Alɔ le ayíkpó ōhī má, anɔ́ɔ alɔ bá abɔ́ɔ mla uwá ɛ̄cī ahāapa. É bī ɔfú kú Alelékwū Ihɔ le da Upɔ́lu kóō nyɔ̄ Ujerúsālɛm ŋ́. 5Eko nɛ̄ ɛ̄cī nɛ̄ alɔ í yá abɔ́ɔ ā mɛ ā, alɔ nyɛ̄ɛ̄ gbɔɔ́ ō nyɔ̄. Anɔ́ɔ odúúdú uwā mɛ́mla anyā uwā mɛ́mla ayí uwā, lɛ alɔ bītá jāā gbéeko nɛ̄ alɔ le bɛ̄cɛ ŋmá igelī nɛ̄hi ā ga ɔkónu ísu, ɛga nɛ̄ alɔ le okwúukwu kpó kwajɛ le ɔkɔ gbā lɛ Ɔwɔicō. 6Anɔ́ɔ ɔnyɔɔnyɛ le ńŋmóō tá ɔ́mpa nū, anɔ́ɔ alɔ le tá ipú úgbéenyi abɔ̄ ācɛ ā kwúcē ga ɔlɛ́ ā.
Iyāwu ga Usísarīya
7Alɔ yɔ̄ ī yɛ gɔbū ipú iyāwu kú alɔ, ŋmá Utáya gā ajɛ Utolɛ́māyisi, ɛga nɛ̄ alɔ lɛ okónu hɛ́tū ayínɛ́ ā klla yɔ̄ mla uwá ɛ̄cī éyi. 8#Ācot 6.5; 8.5 Oŋmɔ́ɔ̄cī nū alɔ gbɔɔ́ kóō nyɔ̄ ajɛ Usísarīya. Alɔ yɛ tá ɔlɛ́ Ufílīpu otɔ́ɔna kú okōolɔhi, nōo kē wɛ éyi kú ipú ācɛ ahāapa nēe fu kéē kɔ̄ ɔdōlé ā nyɔ̄ í le gbɔga. 9Ó lɛ ayínɔ̄nyā ɛnɛ nēé lɛ ɔbá ŋ́, nēe kē ī mɛ́ɛbɛ. 10#Ācot 11.28 Abɔ̄ alɔ bá abɔ́ɔ ɛ̄cī alɛwa ā, ɔ̄comɛ́ɛbɛ éyi nēé hī ka Ágābɔsi gā ŋmá Ujudíya. 11Abɔ̄ ó gā ɛgiyí alɔ ā, ó kwú ɔkpōkwɛ́nyɔ́ kú Upɔ́lu ú, anɔ́ɔ ó lɛ iyī nū ikpó mɛ́mla abɔ̄ gbō. Anɔ́ɔ ó kahíníī, “Ɛ̄nyā wɛ ɔdā nɛ̄ Alelékwū Ihɔ ka á, ‘Ɛ́gɛ́nyā nɛ̄ ācɛ Ujíyu géē gbō ɔ̄cɛ nōo lɛ ɔkpókwɛ́nyɔ́ nyā ajɛ Ujerúsālɛm á, é klla géē je ɔ́ tū aílɔ́wá abɔ̄.’” 12Abɔ̄ alɔ le ɛ̄nyā pó ā, alɔ mɛ́mla ācɛ nēe bá abɔ́ɔ ā le ɔkɔ gbā lɛ Upɔ́lu ká ɔ̄ híī nyɔ̄ Ujerúsālɛm ŋ́. 13Anɔ́ɔ Upɔ́lu tóohi kahíníī, “Ɔdí nɛ̄ aá yɔ̄ ī yá ā, o jikwū ɛ́gɛ́nyā kú aá bīya um ɔtū nɛɛ? N le tútū, ó kóō lɛ um tū agbá ōfōōfūnū ŋ́, amáŋ ká n̄ gekwú dúú ipú Ujerúsālɛm ohígbū iyē kú Óndú Ujísɔ̄si.” 14Abɔ̄ alɔ í yá ɔdā dúú nōo gē pīya odo kú nū abɔ̄ glá ŋ́ má, alɔ habɔ̄ ɔ̄ tá, kē kahíníī, “Ɔdā nɛ̄ Óndú ā dɔɔ̄kā ā kóō le yá.”
Iyāwu ga Ujerúsālɛm
15Abɔ̄ alɔ bá abɔ́ɔ yɛɛ ā, alɔ le iyó kú alɔ tútū, anɔ́ɔ alɔ le yɛ tá Ujerúsālɛm. 16Ācɛ ōhī kú ayíkpó nēe ŋmá Usísarīya āa le yɛ mla alɔ. É le alɔ kpó nyɔ̄ ɔlɛ́ Uminásɔn, ɔ̄cɛ Usáyíprɔ̄si, nōo wɛ ɔ̄cocɛ̄lɔ̄ɔwɔicō ŋmá ajaajɛ ā gáā gbɔga. 17Eko nɛ̄ alɔ gā Ujerúsālɛm ā, ayínɛ́ ā mīyɛ alɔ lɔɔlɔhi.
Upɔ́lu lɛ ācɛ Ujíyu nōo wɛ ɔ́wá kú Ohɔ́nyɛtá ā ɔtū gbo
18Oŋmɔ́ɔ̄cī nū Upɔ́lu mɛ́mla alɔ le yɛ tá ɛgiyí Ujémīsi, ɛjɛ̄ɛ̄jī anyākwɔ́cɛ ā ké bá abɔ́ɔ. 19Upɔ́lu le okónu hɛ́ tū uwā, anɔ́ɔ ó gbɔɔ́ ō ka lɛ uwá ɔgbace ɔgbace ɔdā nɛ̄ Ɔwɔicō bī ɔ̄ yá ɔtāhɛ̄ aílɔ́wá ā. 20Abɔ̄ é le ɛlā kú nū pó ā, é cɛ̄tra Ɔwɔicō. Anɔ́ɔ é da ɔ́ kahíníī, “Ɔyínɛ́ alɔ, a lɔfú jé úlúúlā kú ācɛ Ujíyu nēe je pīya ācocɛ̄lɔ̄wɔicō ā, ā kē má ɛ́gɛ́nɛ̄ odúúdú uwā í bī Íne ā le hiijā ŋ́ mā a. 21É kē lɛ ɔ̄kā kú uwɔ kā uwā ka awɔ gē nwū odúúdú ācɛ Ujíyu nēe bá ɔtāhɛ̄ aílɔ́wá ā ɛlā kéē lɛ igbīhi cē kwu íne kú Umósīsi, ka a gē da uwá kéē híī hɛ́ ayí uwā apī ámāŋ ka o lɛ uculo kú ācɛ Ujíyu tū ŋ́ má. 22Ɔdí nɛ̄ alɔ géē yá mɛ́ɛ̄ ā? Ohígbū ka ó wɛ o piíí kéē géē pó piíí ka a gā ɛɛ́. 23#Áluk 6.13-21Ohígbū ɛ́gɔ́ɔmā ɔdā dúúmā nɛ̄ alɔ da uwɔ ā, lɛ ɔ̄ yá. Alɔ lɛ ācɛ ɛnɛ, nēe le oji ce. 24Nyɔ̄ mla uwá ga ipú Agblīihɔ-nɛ̄hi ā kéē lɛ aá iyē gwu ɛ́gɛ́nɛ̄ uculo ā lɛ ā, ká ā lɛ ije kú uwā gbā, cɛ́ɛ́ kéē lɛ ɛyí púla#21.24 Lɛyí kú uwā kpó púla (18.18) ó i lɛ ā, odúúdú ācɛ géē le jé ka ɔdā nēé da uwá lɛyíkwu uwɔ ā, wɛ ɛ̄kɛ̄mgbɛ̄, amáŋ ka awɔ abɔ̄yī uwɔ gē yēeyī ɛ́gɛ́nɛ̄ íne kú Umósīsi dɔɔ̄kā ā. 25#Ācot 15.29 Ɛjī kwɛjī lɛ aílɔ́wá nēe je pīya ācocɛ̄lɔ̄wɔicō ā nɛɛ, alɔ lɛ ɔkpá tá fu uwá yɔ̄ ī da uwá ka alɔ le ɔ́ miya kéē híī lé ɔdōlé dúúmā nēé le gwɛ́ɛya lɛ ɛcí gbɔbū ŋ, ámāŋ ka o lé oyī kú ɛbɛ́ ŋ́, ámāŋ ka o lé ɛbɛ́ dúú nēé le ɔ́ ɔkɔ nyacē gbuúlú le ɔ́ ŋmó ŋ́. É klla í lɛ iyī uwā tū ŋmá ajā ō gbo mɛ́mla ikpó ɔnyā ɔhá oōce.” 26Upɔ́lu lɛ ācɛ ā kpó, anɔ́ɔ oŋmɔ́ɔ̄cī nū ó lɛ anú mɛ́mla uwá iyē gwu. Anɔ́ɔ ó le yɛ tá ipú Agblīihɔ-nɛ̄hi ā gaá ka tɛ́ɛcɛ lɛ uwá ɛ̄cī nɛ̄ iyē nēé yɔ̄ ī gwu ā í mɛ ā mɛ́mla eko nēé géē gwɛ́ɛya ohígbū ɔnyɔɔnyɛ kú uwā a.
Unu egidi ajɛ Ujerúsālɛm nōo yá ɛ́ɛ́ nēé kwú Upɔ́lu ā
27Eko nēé le ɛ̄cī ahāapa ā yá jīla ā, ācɛ Ujíyu nēe ŋmá Ésiya ā le Upɔ́lu má ipú Agblīihɔ-nɛ̄hi ā. É le útú hɛ́ ɔtāhɛ̄ odúúdú ɛwa lɛyíkwu Upɔ́lu, anɔ́ɔ é le ɔ́ kwú. 28É dɛ̄gba kahíníī, “Ācɛ kú Ísrɛ̄lu, aá tá alɔ abɔ̄! Ɛ̄nyā wɛ ɔ̄cɛ nōo gē nwū ācɛ ɛlā ɛbɛɛbɛ lɛyíkwu ācɛ Ujíyu mla íne kú Umósīsi mɛ́mla Agblīihɔ-nɛ̄hi nyā á. Ɛ̄nɛ̄ o fíyɛ́ dúú ā, ó kē le ācɛ Ugríisi kpó wā ipú Agblīihɔ-nɛ̄hi nyā dúú, kē le ɛgotīihɔ nyā nyílá.” 29#Ācot 20.4É ka ɛ̄nyā ohígbū ka é tɛtɛ má Utrofímɔ̄si, ɔ̄cɛ Ɛ́fēsɔsi mɛ́mla Upɔ́lu ipu igelī, anɔ́ɔ é kpéyīce ka Upɔ́lu ɔ́ɔ kē le ɔ̄ bī wā ipú Agblīihɔ-nɛ̄hi ā nɛɛ. 30Útú le hɛ́ ɛga dóódu kú ipú igelī nɛ̄hi ā, anɔ́ɔ ācɛ gbɔɔ́ ō cīlɛ̄fú nɛ̄ɛ̄nɛ̄hi á. Ācɛ le inya pɛ́ kwu ŋmá ɛga dóódu gaá le Upɔ́lu kwú le ɔ́ pi wɛ̄ɛcɛ ŋmá ipú Agblīihɔ-nɛ̄hi ā, anɔ́ɔ ikpííkpó ɔ́ɔmā é le ɛjɛ̄ɛ̄jī aódūngwɔ̄wɛ kú Agblīihɔ-nɛ̄hi ā kpó kwu. 31Abɔ̄ é bá ī yá kéē gé ē ŋmó ɔ̄ ā, olɛhɔ̄ le táajɛ ahɔ̄ kú otrɛ̄yí kú ɔ́wá kú aícɔ́ɔja ka ācɛ ɛ́ɛ bá yɔ̄ ī cīlɛ̄fú ipú odúúdú igelī nɛ̄hi kú Ujerúsālɛm. 32Ikpííkpó ɔ́ɔmā ó lɛ aícɔ́ɔja mɛ́mla aótrɛ̄yí kú aícɔ́ɔja ofɛ̄hɔ̄ kpó, anɔ́ɔ é le kwu nyɔ̄ ɛgiyí uwā. Abɔ̄ é kē lɛ otrɛ̄yí mɛ́mla aícɔ́ɔja ā má ā, é mā ijē ō ŋmó Upɔ́lu tá. 33Otrɛ̄yí ā nyɔ̄ gaá le Upɔ́lu kwú, le ɔ́da je lɛ uwá kéē lɛ agbá ɛpa kpó kwu ɔ́. Ó le ɔ̄kā da ójila ā ɛdɔ ɔ̄cɛ nɛ̄ Upɔ́lu wɛ ā mɛ́mla ɔdā nōó yá ā. 34Ācɛ ōhī kú ipú ɛwa ā le ɔkɔ cɛyí le odée ka, ācɛ ɔhá kē le ɔdā ɔhá ka. Abɔ̄ otrɛ̄yí kú aícɔ́ɔja ā í lɔfú jé ɔdā nōo yá ā glá ŋ́ ohígbū ígbájí nōo yɔ̄ ā, ó lɛ ɔ́da je kéē lɛ Upɔ́lu bī ga ɔlɛ́ aícɔ́ɔja. 35Abɔ̄ ó gaá kwú ikpó ú ce agidigbé kú inu gáā ticō ā, aícɔ́ɔja ā kwú ɔ̄ ú cɔɔkɔ ohígbū ka ɛwa ā í tōō kwútū gɛ ŋ́. 36Ɛwa ā le yá klá uwá gē dɛ̄gba kahíníī, “Lɛ ɔ́ ŋmó, lɛ ɔ́ ŋmó!”
37Abɔ̄ é gáā bī Upɔ́lu ga ipú ɔlɛ́ aícɔ́ɔja ā, ó da otrɛ̄yí ā kahíníī, “N̄ lɛ ɔdée da uwɔ mɛ́ɛ̄ ŋŋ?” Anɔ́ɔ otrɛ̄yí ā da ɔ́ ɔ̄kā kahíníī, “Á jé ō ka ucē kú Ācɛ ugríisi nɛɛ? 38Ó wɛ awɔ wɛ ɔ̄cɛ Íjīpiti nōo tɛtɛ yá ká ācɛ kéē cāŋjɛ lɛyíkwu igɛ́mɛ́nti klla kē kpó ācoŋmácɛ úlā igwó ga ipú ígbíli ā ŋ́ nɛɛ?” 39Upɔ́lu tá ohi kahíníī, “N wɛ ɔ̄cɛ Ujíyu, nōo ŋmá Utásɔsi ipú Usilísiya, ɔ̄cɛ kú igelī ocɛgbá nɛ̄hi. N gē ba uwɔ kā ā lɛ ɛga je gā um ká n̄ lɛ ɛlā ka lɛ ācɛ nēe bá ā.” 40Otrɛ̄yí kú aícɔ́ɔja ā le ɛga je lɛ ɔ́, anɔ́ɔ Upɔ́lu māháyi icō agidigbé ā le abɔ̄ yá lɛ ācɛ ā pɛɛ. Anɔ́ɔ eko nɛ̄ odúúdú uwā mā uya ā, ó gbɔɔ́ ō kɛlā lɛ uwá ɔkɔ kú ucē kú ācɛ Ujíyu.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
Learn More About Ubáyíbu kú Idɔma