ÚKLƆ́ KÚ ĀCOTƐ̄HƆ̄ 11

Upíta kɔkɔ kú iyē nū

1Ācotɛ̄hɔ̄ mɛ́mla ayínɛ́ nēe bá ɛga dóódu kú Ujudíya le pó ka aéwɔhá mīyɛ ɛlā kú Ɔwɔicō ā dúú ɛɛ́. 2Abɔ̄ ó i lɛ āa, eko nɛ̄ Upíta le tá Ujerúsālɛm ā, ācɛ ōhī kú ipú ācɛ nēe cɛ̄ɛ̄lā kú apī ō hɛ́ aílɔ́wá ā le ɔdā ka tū ɔ̄ kahíníī, 3“A le tá ɔlɛ́ kú aéwɔhá olufíyé gaá le gbɔga, a kōō le ɔdōlé lé mla uwá.” 4Anɔ́ɔ Upíta le ɛ́gɛ́nɛ̄ ɛjɛ̄ɛ̄jī ɛlā ā yá lɛ kpɛ́mm ŋmá ajaajɛ ā, kpó ka lɛ uwá. Ó kahíníī, 5“Abɔ̄ n yɔ̄ ī gbɔ̄ɔkɔ ipú igelī nɛ̄hi kú Ujɔ́pa ā, obócádēde kwú um ú, anɔ́ɔ n má odée yɔ̄ ī wāajɛ bɛ̄ɛka idɔngwu nɛ̄hi nēé bī ɔ̄ ɔ́kíkā ɛnɛ yɔ̄ ī wāajɛ ŋmá ɔkpáncō. Anɔ́ɔ ó gaá māhayi ɛgiyí um á. 6N leyī hɛ́ tū ɔ̄, anɔ́ɔ n má ɛbɛ́ ō lɛ ikpó ɛnɛ, ɛbɛ́ ɔlɛ́, mɛ́mla ɛbɛ́ ipácí, aɔ́dā ō lɛ ipú piyajɛ mɛ́mla ígbáanɔ kú ipácí. 7Anɔ́ɔ n pó ɔkɔ kú ɔ̄cɛ éyi yɔ̄ ī da um ka, ‘Cāŋjɛ Upíta, ŋmó ká ā klla lé.’ 8Amáŋ n ka, ‘ehée Óndú. Ohígbū ka ɔdā dúú nōo wɛ ɔdēlihɔ ámāŋ nōo blínyī í ga okónu kú um jéjéē ɛ́ɛ́ ŋ́.’ 9Anɔ́ɔ ɔ̄cɛ ā le ɛlā ka gā um igbo ɔmpa ŋmá ɔkpáncō ka amíyɔ̄ɔ̄ híī je ɔdā nōó tīihɔ ŋ́ nɛ̄ Ɔwɔicō le yá tīihɔ ka ɔdēlihɔ ŋ́. 10Ɛ̄nyā yá igbo ɛtá, anɔ́ɔ é kwú odúúdú nū ú cīgbīhi ga ɔkpáncō á. 11Eko nɛ̄ ɛ̄nyā í yá kwɛyí bōōbū ā, ācɛ ɛtá nēé tɛ̄hɔ̄ fu um ŋmá Usísarīya ā gāājɛ ɔlɛ́ ɛga nɛ̄ alɔ bá ā. 12Alelékwū Ihɔ ā da um ka amiyɔ̄ɔ̄ lɛ ɔtū ō bɛ́ɛpa ŋ́ ka n̄ nyɔ̄ mla uwá. Ayínɛ́ ɛhīlī nēé bá mbá ā tīkpó mla um ga Usísarīya, anɔ́ɔ alɔ le tá ɔlɛ́ Ukɔnélīyɔ̄si á. 13Ó le ɛ́gɛ́nɛ̄ ó má alelékwū-ōtɛ̄hɔ̄ háyi ipú inu ɔlɛ́ nū nōo da ɔ́ kóō lɛ ɛhɔ̄ tū ga Ujɔ́pa kéē lɛ Usáyímɔ̄n nēé hī ka Upíta ā hīgwú ā da alɔ. 14Ó da ɔ́ ka ɔ́ɔ géē hɛ́ anú mɛ́mla odúúdú ācɛ ɔlɛ́ nū tá lɛ ɔ́. 15Anɔ́ɔ Upíta da uwá kahíníī, “Eko nɛ̄ n gbɔɔ́ ō kɛlā ā, Alelékwū Ihɔ ā gaá ce uwá ɛyí bɛ̄ɛka ɛ́gɛ́nɛ̄ ó ce alɔ ɛyí eko aflɛ́yí ā. 16#Ācot 1.5Eko ɔ́ɔmā ā, anɔ́ɔ n le blakwu ɛlā nɛ̄ Óndú ā ka ka, ‘Ujɔ́ni bī éŋkpɔ̄ gē yá ācɛ ubatísim, amáŋ é géē bī Alelékwū Ihɔ lɛ yá aá ubatísim.’ 17Ó tá péee ka Ɔwɔicō le ɛdɔ ɛhi ékpó nōó kpó lɛ alɔ eko nɛ̄ alɔ cɛ̄ɛ̄lā kú Óndú Ujísɔ̄si Ohɔ́nyɛtá ā kpó lɛ aéwɔhá nēe bá mbá ā dúú ɛɛ́, ó lɛ ā, ɔnyɛ wɛ ami nɛ̄ n lɔfú tá Ɔwɔicō áafú glá!” 18Eko nēé le ɔdā nēe bá ā pó ā, okónu í hɛ́ uwā gɛ ŋ́. Anɔ́ɔ é cɛ̄tra Ɔwɔicō kahíníī, “Ɔwɔicō le ɛga je lɛ aéwɔhá ā dúú kéē pīyabɔ̄, cɛ́ɛ́ kéē yēeyī.”

Icɔ́ɔ́ci kú aéwɔhá ajɛ kú Ántīyɔ̄ku

19 # Ācot 8.1-4 Ācɛ ōhī kú ācocɛ̄lɔ̄wɔicō nēé pahila ohígbū oyáŋmó nōo gbɔɔ́ ohígbū Usitífin ā le pɛ́ jāā gaajɛ Ufinísiya mɛ́mla Usáyíprɔ̄si mɛ́mla Ántīyɔ̄ku, nyɔ̄ gē tɔ́ɔna kú Ɔ̄kōolɔhi ā lɛ ācɛ Ujíyu ōfōōfūnū. 20Amáŋ ācɛ ōhī kú uwā nēe wɛ ācɛ Usáyíprɔ̄si mɛ́mla Usayiríni ā, abɔ̄ é gā Ántīyɔ̄ku ā, é gbɔɔ́ ō tɔ́ɔna kú Ɔ̄kōolɔhi kú Óndú Ujísɔ̄si ā tɛ́ɛcɛ lɛ ācɛ Ugríisi #11.20 aɔ́kpá ōhī tá ka aílɔ́wá, ámāŋ ka ācɛ Ugríisi. dúú. 21Ɔfú kú Óndú yɔ̄ mla uwá, anɔ́ɔ ācɛ alɛwa nēe cɛ̄ ā kwú pīya tá Óndú ā ɔkwu á. 22Eko nɛ̄ icɔ́ɔci nēe bá Ujerúsālɛm ā lɛ ofu ɛlā kú uwā nyā pó ā. Anɔ́ɔ é lɛ Ubánābasi tū nyɔ̄ Ántīyɔ̄ku á. 23Eko nōó gā gaá lɛ úklɔ́ nɛ̄hi nɛ̄ Ɔwɔicō yá ā má ā, ɔtū he ɔ́ nɛ̄hi, anɔ́ɔ ó lɔfú tū odúúdú uwā iyē kéē háyi kli lɛ Óndú ā ŋmá ɔtū ékpó. 24Ohígbū kóō wɛ ɛ́nɛ́nɛ̄ ɔ̄cɛ, nōo le mu mla Alelékwū Ihɔ, ó kē cɛ̄ ɛlɔ̄ɔwɔicō. Anɔ́ɔ é le ācɛ alɛwa kpó wā gé lɛ Óndú ā á. 25Ubánābasi le tá Utásɔsi gaá dɔɔ̄kā Usɔ́lu. 26Eko nōó lɛ ɔ́ má ā, ó lɛ ɔ́ bī wā Ántīyɔ̄ku. Ipú iháyí odunkwulu é gē jīla tɔ̄há mla icɔ́ɔci, gē nwū ācɛ alɛwa ɛlā. Ajɛ Ántīyɔ̄ku nēé hī ayíkpó ā ka ācɔ̄lóhɔ́nyɛtá aflɛ́yí á.

É tū Ubánābasi mɛ́mla Usɔ́lu ɛhɔ̄ kéē bī ije nyɔ̄ Ujerúsālɛm

27Ɛplá ɔ́ɔmā nɛ̄ ācomɛ́ɛbɛ ōhī le pɛ́ ŋmá Ujerúsālɛm wā Ántīyɔ̄ku. 28#Ācot 21.10 Ɔ̄cɛ éyi kú uwā nōo lé ka Ágābɔsi ā cāŋjɛ le ka tɛ́ɛcɛ ŋmá ɔfú kú Alelékwū Ihɔ ka ɔkpɛtā nɛ̄hi ɔ́ɔ géē ŋmó odúúdú ɛcɛ. Ɔdā nyā le yá eko kú ɔcɛ́ nɛ̄hi Uklɔdíyɔsi. 29Anɔ́ɔ ayíkpó ā le miya ka ɔnyɔɔnyɛ ká ɔ́ɔ géē lɔfú tīyē, ɛ́gɛ́nɛ̄ ɔfú kú nū jɛ̄ lɛ ā, kóō lɛ ɔdā nēe í le tá ayínɛ́ nēe lā Ujudíya abɔ̄ ā tɛ̄hɔ̄ fu uwá. 30É kwú ɔdā nēé le tá uwā abɔ̄ ā ú tū Ubánābasi mɛ́mla Usɔ́lu ɛhɔ̄ fu anyākwɔ́cɛ ā.

Currently Selected:

ÚKLƆ́ KÚ ĀCOTƐ̄HƆ̄ 11: IFBCL

Highlight

Copy

Compare