OBADIA 1
1
Lalpan Edom a hrem dâwn
1Obadia inlârna hmuh chu. Lalpa Pathian chuan Edom chungchângah heti hian a ti:
Lalpa hnên ata thu kan hria a; hnamte zîngah palai tirh a ni, “Tho ula, indonaah amah do tûrin i thawk ang u,” tiin. 2“Ngai teh, hnamte zîngah ka titê tawh che a ni; nasa taka hmuhsitin i awm ta. 3Aw nang, lungpui keh kâra chênga, hmun sâng luahtu, ‘Tuin nge leiah mi tithla ang?’ ti rilrutu, i thinlung chaponain a bum ta che a ni. 4Mu angin sâng takah thlâwk chho mah la, i bu chu arsi zînga chheh pawh ni mah sela, chuta ta chu ka la thla ang che,” Lalpan a ti. 5“I hnênah rûkrute, phil hmangte zânah lo kal sela (tihboral i va ni dâwn nasa êm!), an duhtâwkin an ru lo vang em ni? I hnênah grêp seng khâwmtute lo kal sela, grêp seng tûr ṭhenkhat an hnutchhiah lo vang em ni? 6Esauva thilte zawn chhuah a nih tâk chu! A ro bâwm thuhrûkte dap chhuah a nih tâk chu! 7I lama ṭanghote zawng zawngin ramri hial an rawn thlen che a; mi inrem taka i awmpuite khân an bum che a, an hneh tawh che a ni. I chhang eitute khân i hnuaiah thang an kam a; amahah chuan hriat thiamna rêng a awm lo a ni. 8Chumi nîah chuan Edom ata mi fingte ka tiboralin, Esauva tlâng ata hriat thiamna ka tiboral lo vang em ni?” Lalpan a ti. 9Aw Teman, Esauva tlâng ata mi tin thah borala an awm vekna tûrin, i mi chakte chu nasa takin an zâm ang.
Edom hrem chhan
10I unaupa Jakoba chunga i pâwngnêkna avângin zahnain a khuh ang che a, kumkhuaa tihboralin i awm ang. 11Lehlama i din nia, mikhualten a sum an lâk bo nia, hnam dang mite a kulh kawngkhâra an lo luha, Jerusalem chunga ṭhum an vâwr lai khân, nang pawh anmahni zînga tel angin i awm kha. 12Amaherawhchu, i unaupa a chhiat laia a chhiatna ni chu thlîr suh la, Juda fate chungah an boral niin lâwm suh la; hrehawm niin chapo takin ṭawng hek suh. 13Ka mite an vânduai niin an kulh kawngkâah lût suh; a ni, an vânduai niin an tuarnate thlîr suh la, an vânduai niin an sum leh paite chungah in kutte nghat hek suh u. 14A mi ṭhenkhat tlân chhuakte that tûrin kawng ṭhuamah ding suh la; hrehawm nia a mi la awm chhunte chu mantîr suh.#Is 34.5-17; 63.1-6; Jer 49.7-22; Ezek 25.12-14; 35.1-15; Amos 1.11-12; Mal 1.2-5
Pathianin hnam tin ro a rel ang
15Hnam zawng zawng chungah Lalpa nî chu a hnai si a; i lo tih tawh ang bawkin i chungah tih a ni ang; i tih dân chu i lu chung ngeiah a lo lêt ang. 16Ka tlâng thianghlima in in tâk ang khân, hnam zawng zawngte chuan an in fo dâwn si a; a ni, an in ang a, an lem ang a, piang lo ang maiin an awm ang.
Israel-te hnehna
17Zion tlângah erawh chuan tlân chhuakte chu an awm ang a, a thianghlim ang; tin, Jakoba chhûngte chuan ro chante chu an chang ang. 18Jakoba chhûngte chu mei an ni ang a, Josefa chhûngte chu mei alh an ni ang; Esauva chhûngte chu buhpâwl an ni ang a; anmahni zîngah an alh ang a, an kâng ral vek ang, Esauva chhûngte chu a bâng rêng an awm lo vang,” Lalpa chuan a ti ta si a. 19Chhim lam mite chuan Esauva tlâng chu an chang ang a, ram phaia mite chuan Philistia ram an chang ang: Ephraima lo leh Samaria lo chu an chang ang: Benjamina chuan Gilead ram a chang ang. 20Kanaan mite zînga he Israela thlah sal tâng mipuite hian Zarephath ram thlengin an chang ang a; Sepharad rama Jerusalem khaw mi sal tângte chuan Chhim lam khawpuite chu an chang ang. 21Zion tlângah chuan Esauva tlâng rêlsak tûra chhan chhuaktute chu an chho vang a; tin, ram chu Lalpa ta a ni ang.
Currently Selected:
OBADIA 1: MIZOVBSI
Highlight
Share
Copy
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.