2 SAMUELA 1
1
Davidan Saula thih thu a hria
1Tin, heti hi a ni a, Saula thih hnuah Davida chu Amalek-ho rûn a lo haw a, Davida chu Ziglag khuaa ni hnih a awm hnu chuan, 2heti hi a ni a, a ni thum ni chuan ngai teh, mi pakhat an ṭanhmun ata Saula hnên aṭangin a puante pawt thlêrin a lua lei kai luam hi a lo kal a; tin, Davida hnên a lo thlen chuan leia bawkkhupin chibai a bûk a. 3Tin, Davida chuan a hnênah, “Khawi aṭanga lo kal nge i nih?” a ti a; tin, ani chuan a hnênah, “Israel mite ṭanhmun aṭangin ka rawn tlân chhuak a ni,” a ti a. 4Tin, Davida chuan a hnênah, “Eng angin nge thil a awm le? Min hrilh teh khai,” a ti a. Ani chuan a chhâng a, “Indona ata mite chu an tlânchhia a, mi tam tak chu an tlu a, an thi hlawm a; tin, Saula leh a fapa Jonathana-te pawh an thi ve asin,” a ti a. 5Tin, Davida chuan a hrilhtu tlangvâl hnênah chuan, “Engtin nge Saula leh a fapa Jonathana chu an thi tih i hriat?” a ti a.
6Tin, a hrilhtu tlangvâl chuan, “Eng emaw ti tiin Gilboa tlângah chuan ka lo awm hlauh va; tin, ngai teh, Saula chu a fei rinchhana ding ka hmu a; tin, tawlailîrte leh sakawr chung chuang mite chuan an rawn hnaih ta chiam mai a.#1 Sam 31.1-6; 1 Chr 10.1-6. 7Tin, a hnung lam a han hawi chuan mi han hmu a, mi han au va. Tin, keiin, ‘Heta hi ka awm e,’ tiin ka chhâng a. 8Tichuan, ka hnênah, ‘Tu nge i nih?’ mi ti a. Tin, keiin, ‘Amalek mi ka ni,’ tiin ka chhâng a. 9Tin, ani chuan ka hnênah, ‘Ka kiangah hian lo ding la, mi han that teh mai, ka la nung ting a, mangannain mi tlâkbuak ta si a,’ a ti a. 10Chutichuan, a kiangah chuan ka ding a, chutia tlu tawh dêr hnu chu a dam zo tawh lo rêng rêng ang tih ka hriat avângin ka that ta mai a, a lua lallukhum leh a bâna bânbun chu ka la a, ka pu hnênah hetah hian ka rawn la a ni,” a ti a.
11Chutichuan, Davida chuan a silhfênte chu a chelh a, a pawt thlêr ta a; chutiang bawk chuan a hnêna mi awm zawng zawng chuan an ti a. 12Tichuan, Saula leh a fapa Jonathana leh Lalpa mite leh Israela chhûngte chu an sûn a, an ṭah a, tlai lam thlengin chaw an nghei a, khandaiha tihhlum an nih tâk avângin. 13Tin, Davida chuan a hrilhtu tlangvâl hnênah chuan, “Khawi lam mi nge i nih?” a ti a. Tin, ani chuan, “Ram dang mi, Amalek mi fapa ka ni,” a ti a, a chhâng a. 14Tin, Davida chuan a hnênah, “Lalpa hriak thih tiboral tûra a chunga kut thlâk chu engtiziaa hlau lo nge i nih le?” a ti a. 15Chutichuan, Davida chuan tlangvâl pakhat a ko va, “Va hnaih la, va that rawh,” a ti a. Tin, a va sât a, a thi ta a. 16Tin, Davida chuan a hnênah, “I thisen chu nangma lû chung ngeiah awm rawh se; nangma ka ngeiin, ‘Lalpa hriak thih chu ka that a ni,’ tiin a puang si,” a ti a.
Davidan Saula leh Jonathana a sûn
17Tichuan, Davida chuan Saula leh a fapa Jonathana chu he ṭah hla hian a ṭah a; 18tin, thal kah hla chu Juda thlahte zirtîr tûrin a tîr hlawm a, ngai teh, Jasara buah ziak a ni.#Jos 10.13.
19“Aw Israel, i ropuina chu
i hmun sângahte an that a,
Mi liante an tlûk tâk hi!
20Gath-ah chuan hril suh ula,
Askelon kawtthlêrahte chuan
puang suh u;
Chuti lo chuan, Philistia fanute
an lâwm ang a,
Serh tan loh fanuho hlimin
an au dah rual ang e.
21Nangni Gilboa tlângte u,
In chungah dai leh ruah
tla suh se,
Thilhlan tûrte chhuah hek suh;
Chutah chuan mi lian phaw chu
mualpho takin an paih si a,
Saula phaw, hriak thih loh mi
phaw ang maiin.
22Thahte thisen aṭang leh
mi lian thau aṭangin
Jonathana thal chu a lêt lo va,
Saula khandaih chu a thlâwnin
a lêt ngai lo.
23Saula leh Jonathana nun dân
chu a duhawmin a mawi a,
An thih pawhin an inṭhen lo;
Mupuite aiin an chak zâwk a,
Sakeibakneite aiin an chak zâwk.
24Nangni Israela fanute u,
Saula chu ṭah rawh u,
Puan sen mawite a bân che u a,
In puanahte rangkachaka
cheimawinate beltu che u chu.
25Indo lai taka mi liante
an lo tlûk tâk mai chu!
I hmun sângahte
Jonathana an that ta.
26Ka unaupa Jonathan,
I chung thûah hian
ka mangang a ni;
Ka chungah i ṭha êm êm ṭhîn a,
I mi hmangaihna chu a mak a,
Hmeichhe hmangaihna
a khûm a ni.
27Mi liante chu an tlu a,
Indona thuamhnawte pawh
a boral zo ta!”
Currently Selected:
2 SAMUELA 1: MIZOVBSI
Highlight
Share
Copy
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.