Roma 16

Ro Melaeyei-Melaeyeise

1Aei omi ken Febe, Kengkrea yone jemaatne kalia mokole kiyaere hakonnebombe naeise reyae riyamale. 2Yesus Naei eleuboke wekeumi holona miyae yae ei hawennele. Rambunde hakonnebombere rinyembena hakonnebombe, rabuhine ban neyae ro miyae helen hakowoumi nane merau rare hakowoufe.

3Priskile na molo Akwilale Yesus Wali Ondofolole kalia mbainye mokande yore raeinya ro melaeyemmibombe. 4Rare holere molonaisebondere naei uware erabuhi ban mae hubawainye. Nebei yo hakaisebokere helen foi weise reyae mo ban, aei aka baeke wa Yahudi ban ro miyae nanemene waimi.

5Nda yo Priskile Akwilale imaene eyarilaisiyele jemaatre raeinya ro melaeyemmibombe.

Aka baeke Epenetus reyae buhaere haenaele kiyaebe raeinya ro melaeyennebombe. Asia kanina Wali Ondofolore hila rabo halaeinye holona na bemena ro, Epenetus niyae.

6Maria mai naeise kalia elaekei sele relewounge kiyae bele raeinya ro melaeyennebombe.

7Nebeisa raei yoho mbainye kahili wa bee Andronikusle Yuniasle nanembainye kawane hebewande be bele raeinya ro melaeyemmibombe. Hokolo bee Wali Ondofolole abu ako nolone rore rowaimi yo, nane merau reyae namman mae hokolo bee Wali Ondofolore hila rabo halewoinye.

8Ampliatus reyae Tuhan eisa buhaere haenale kiyae bele raeinya ro melaeyennebombe.

9Urbanus Wali Ondofolole kalia mbainye mokande kahilire nane merau Stakhis buhaere haenale kiyaere raeinya ro melaeyemmibombe.

10Beko hubawounge hororebe namman Wali Ondofolo Naei a elelere hakounge kiyae Apeles bele raeinya ro melaeyennebombe.

Aristobulusle imae einye me baeiboke yore raeinya ro melaeyemmibombe.

11Herodion raei yoho mbai kahili kiyaere raeinya ro melaeyennebombe.

Narkisusle imae obe einya aei Tuhande hakainye yo bele raeinya ro melaeyemmibombe.

12Trifenale Trifosale aei Tuhanbe kalia elae hele releinye miyae beere raeinya ro melaeyemmibombe.

Aei Tuhanbe kali elae meumokoukoke miyae hi Persis buhaere haenale kiyae raeinya ro melaeyennebombe.

13Rufus Tuhanbe einye rore rainyeboke ro mbai nane merau nenake raei nake miyae wanen ma, na beene raeinya ro melaeyemmibombe.

14Asinkritus, Felgon, Hermes, Patrobas, Hermas nane merau hila rabo mbaise halaete aka baeke nanemene mbainye nekaube yo bele raeinya ro melaeyemmibombe.

15Filologusle, Yuliale, Nereus nemaenbe, Olimpas, nane merau Yesus Naei eleuboke wekeumi holona yo nanemene nangkele nekate yore raeinya ro melaeyemmibombe. 16Yesus Naei eleuboke wekeumi holona wanen yo yae aeise naeise ro foi yae melaeyemande.

Wali Ondofolole jemaat-jemaat nanemene mare ro melaeyayembe.

Ubene Nekei-Nekeise

17Aka naei baeke naei, reyae moi hurerembe jemaat einye maise naeise a horonatere mokaimi ro miyaere nane merau mare kelaeyengkombe Wali Ondofolole na hele a nenaei ma kelaeimi ro miyaere ijoko robommile, naei nolora uwa wemembe. 18Rabuhine ban nebei u mekai ma ro miyaebe aei Tuhan Wali Ondofolole kaliare mokate ban, nebeibe na bekore kena haehae kate more ei moloyainye. Isaei hebaen isaeyeiboi ro miyae holonare a yukaei-yukaei bele a moi-moi mokaimi bele yae ame-ame beyaimi.

19Ro miyae nanemene mayae Wali Ondofolo Naei a elelere hakaunge a boraikokene, raei kena roweisiyeufe. Nebeibe reyae kena kale foi mokombe naeise isaei hebaen bele ma yae uwa harannebombe, nebeibe me beko u beko mokombe naeisa kobu bele yae nekembe.

20Allah rei mai yeumi Kiyae na heki ban walobo yun kiyaele elae mohennebondera mai oro keleene menerulensinde.

Reyae ebeli banale Tuhan Yesus Wali Ondofolo yae mare kena buhae aere ban mae henembe.

21Timotius kalia mbainye mokonde kahili nane merau raei yoho mbainya kahili wa Lukiuslera, Yasonbera, Sosipaterlera mare ro melaeyayembe.

22Reyae Tertius, Paulus naeise nda homore moloukokale kiyae, aei Tuhanbe eisa mare ro melaeyamale.

23Gayus rare naei imaene ukeufe nekale kiyae nane merau nebei imaene arileisiyate jemaatna ro miyae nemene mare ro melaeyayembe.

Erastus nda yona roi mere ikileuboke kiyaele aei aka baeke Kwartusle mare ro melaeyayembe.

24Reyae ebeli bonale Tuhan Yesus Wali Ondofololena kena buhae aere ban mae mayae nanemene ei haungembe.#16:24 Homofae hena helen ayat 24 nangkele ban.

Allahre Buma Koloi-Koloise

25-26Aka naei baeke naei, reyae Wali Ondofolena a foi faeu foise huwengkokamale. Nebei a heki hele nunne honowate. Nebeibe nda hee yoho nemene Wali Ondofolore hila rabo halenainyele naeise, nane merau hakonainyele naeise, Allah Hubalo Mando yae Naei yenjo kayaayo naei homofaene ukeumi molaikoke, nane merau nda heene Wali Ondofolole naeise yakaumeboke. Nebei Allah na hului mokonembonde Wali Ondofolo Naei a elelere hila rabo elae yae halemembe, hakomembe. 27Allah Nembai sele isaei no hebaen no, hi bele ban. Yesus Wali Ondofolole walora Allahre huba ban haei ban hili hebenainyende! Amin.

Currently Selected:

Roma 16: setDBL

Highlight

Copy

Compare