Roma 14

Maise Naeise Ei Hawemembe

1Ro miyae Wali Ondofolo Naei elele a huluinye nekatene naei waline rahe me u mokonatere kena wauwau koyate yore, mai kena rei mai yae ei annebombe. Naei u bene nekainye are aukaka yae okonnemae. 2Hi yae na hila rabo huluinye raman na bune-bune anende. Nebeibe hila rabo yambi kiyae na uwa hubaunge ofae reu wae mo na hului anende. 3Raman na bune-bune anende ro miyae, anei ro miyae naei a nene okoijae. Ofae reufe mo anende ro miyae, raman na bune-bune anele kiyae naei walire hului okoloijae, rabuhine ban Allah nare ei haweumi. 4Nebei ro miyae Allahle yebaei bubaeibe nekate. Hiwa yo naei yebaei bubaei naei walire hului kolommile naeise mayae mende ban sele. Nebei yebaei bubaei ruwende naei, enalonsande naei, na rowale isaei. Tuhan raman anate, aneikoi kenane ro miyaere ei haweyeumi ban, rabuhine Neyae na hingkin mokommile Nare hila rabo halenainyele.

5Hiwa yo yae hubainye, ya hiwa Allahre ei molomande naeise ya kaban yoni-yoni niyae. Hiwa yo hubainye, ya yoni-yoni nanemene Allahre eise molomande ya. Ya kaban naeise ro miyae nenaeijae naei u bene nekaimi ma hului kolonainyende hele. 6Nde yae ya mbai Allahre ei mom-mom ya kaban nenaeijae hokoukoke kiyae, Allahre eise molonnele naeise mokouboke. Nebei sului mbai nde yae raman na bune-bune anende kiyae, nenaeijae hokongkonde Allahre be hinennele naeise anende, rabuhine ban nebei raman yoni-yonire Allahre helen foi wennele. Ofae reufe mo anende kiyae, Allahre be hinennele naeise anende nane merau Allahre helen foi wennele. 7Ro miyae mbai na uwa mbai naeise wali enekeijae nane merau na u mbai naeise here omokoijae. 8Eyae wali nekande hee, Tuhande kena foise mokomande naeise nekemale. Eyae heremale hee, Tuhande kena foise mokomande. Nebeinye wali nekande, heremale eyae Tuhande holona ro miyaebe yaendeboke. 9Wali nekande ro miyae naei nane merau heraiboke ro miyae naei Tuhanbere enjembonde naeise, Yesus Wali Ondofolo herekera nebeisa aunguke. 10Nebeinye aka naei baeke naei, mai aka baeke Wali Ondofolore hila rabo mbaise halaube ya-ya wali ma hi nekate yore me onoyommimae nane merau aukaka yae okommimae! Rabuhine ban eyae nanemene Allah mere nommeyonde kendan wameran bene emahebende yo mo. 11Nebei are aeisaei, rabuhine ban Allahle homofaene nda wanen molaikoke:

“Tuhan mae nda a elele,

Reyae nana hesele wali nekalene,

Raei ro be ro yoinye ro miyae nemene fomene oro selen-selen menaitorongkonde

nane merau Reyae Allahbe nekalere a faeuko nanemene wo konaikonde.”#14:11 Yesaya 45:23

12Nebeinye na yaka yeuboke aei u nolo u kainya ro miyae na me u mokayekere Allahle ro be ro yoinye naeise naeise wo enaikonde.

13Allah aei walire hului kolommekonderene, men, aeise naeise hila rabo mbainye halaende ro miyae hibe u mekai beko mokomale belene, eyae u mekai harannele beko omokoi yae nekemale. 14Tuhan Yesus bele nekende huluinye reyae na hele yae elale, raman yoni-yoni anewande ranne Allah yae niki bele ro miyae yae me ebaei. Nebeibe ro miyae hi yae raman hiware anende naeise u mekai beko yae hubannelena, naei uware u mekai bekore yembonde. 15Weyae aneyae raman mae mokoungebonde hila rabo mbainye halaeube aka baeke na kena beko kondena, ro miyaere kena buhae heumile wali ma weyae enekei. Weyae aneyae raman mae mai aka baeke naei aerene Wali Ondofolo hereke Rore beko omokoijae. 16Nebei sului mbai, waei aka baeke mbai u mekai beko mokombondera hiwa yo yae Allahle holona ro miyae naeise a beko huwenate belene, waei me u mokole yae waei aka baekere beko omokoi. 17Allah merau raungehike hului Wali Ondofolole me kelee u keleene nekate wali ma, era hena are hakoyaimine ban, raman bu anatene ban, nebeibe Allahle Roh yae weume a hului nda wali ma nekemale: wali ijen bele, rei mai bele, kena foi bele nekemale. 18Nebei wali ma nekate yae Wali Ondofolole kaliare mokole kiyae Allahre kena foibe mokounge, nane merau hiwa yo yae nebei kiyaere ei hawenainyele.

19Nebeinye aengkele rei mai yae nekemale naeise nane merau Wali Ondofolo Naei a elelere na mekai yae hakomale naeise, kena u na maemae hele yae relemande. 20Raman aerene, Allah yae kaenewoume Wali Ondofolore hila rabo halende ro miyaere beko omokoijae. Raman yoni-yoni anemale na foi bangka mo. Nebeibe na beko fere, aneyae raman mae hiwa yore mokoumibonde beko bele inyaibonde. 21Naei foi sele Wali Ondofolore hila rabo mbainye halaenne yo na hila rabore bekobe mokoumibonde belene, nebei melen bele anggur bu bele raman ma hi bele mayae aneijae.

22Mai raman bele bu bele haraungeboke naeise Allah bele mo a elakoube, ro miyae hiwa bele eleijae. Ro miyae na kena u einye foi hubayeunge hului mokole kiyaere onomi foka yae hubannende. 23Nebeibe ro miyae kena u wauwau yae kole ramanbe benen rouke aneukokena, Allah nebei ro miyaere na kena une me nommiyonde, rabuhine ban nebei ro miyae Wali Ondofolo Naei a elelere hila rabo haleyeunge hului ban nebei raman bu aneukoke. Hila rabo haleyeunge hului ban mokole u mekaibe beko yeuboke.

Currently Selected:

Roma 14: setDBL

Highlight

Copy

Compare