Ibrani 5

1Imam kaban yoni-yoni ro miyae naei are Allahle elenete naeise, ro miyae u nolo u kaisa yaraikoke. Allahre inyainyele rambun nane merau ro miyae naei u mekai beko faeinyeiboise obo yoku bele nebei imam hili era akau erare Allahre ongkou wae ifelewainye. 2Nebei imam kaban ro miyaene nane merau u mekai beko belene, nebeinye ro miyae kobu bele Allah mokoungehake wali nibira wekate yo belere kena nime haba yae ei hawemmile. 3Nebei aerene ro miyae hiwa naei beko mokowatene mo ban nebeibe naei uwa naei beko mokowole bele obo yoku yae ongkoufe feleiboyole.

4Ro miyae hi nauwa imam kabande yembonde naei, nenaeijae nauware ekaeiboi sului. Nendahina Allah yae Harunde kaeneungekoke wanen, imam kabande yembonde ro miyaere Allah yae kaenennekonde. 5Nebei sului mbai imam kabande yembonde naeise, Yesus Wali Ondofolo Nauware Nenaei ekaeiboi. Allah Nenaeijae kaeuboke naeise nda a mekai yae weunge,

“Weyae Raei Kelu Fa

mana ya Reyae Waei Akore yeubokale.”#5:5 Mazmur 2:7

6Allahle homofae reufi hine Allah nda wanen eleukoke,

“Imam Melkisedekle wanen

Weyae imamde yeubonde rimolone yangkone nekewende.”#5:6 Mazmur 110:4

7Ro miyae uwa wanen mae Yesus nda kani kelane nekewole hee, here me eisa na hului hole molonnebondere Allahre ebeli kali rime bele a bele bowounge. Allah uwounge huluinye uwa haraungeboke nekewolene, Yesus naei ebeli bowounge are Allah boroungeboke. 8Yesus Allahle Kelu hororebe, beko hubawounge walora Allah weunge a huluinye nekendere Yesus isaeyeungekoke. 9Yesus na wali hiyei raneungebokera, ro miyae Neyae weumi a huluinye nekate yo nanemene naei wali hena bona no Kiyae, Yesus Niyae. 10Nane merau Allah yae Yesusre imam kabande raneujeke, imam kaban Melkisedekle wanen.

11Yesus imam kabande yeuboke naei mekaise meyae a helen mare isaeimamberebe, nebeibe mayae hasalere isaeyeiboinye yabi-yabi hele kelemangkombere. 12Na hele mayae hiwa yore kelemmile naei hee yeubokebe, nebeibe mayae namman sele hiwa yo naeisa na bemena kelewayembe a mbaibe isaeyembere kena kaube. Mayae wayeu fa wanen nimene namman anaube, raman elaere na hului ban. 13Nde namman nimene anele kiyae fa wayeu wanen u bene nekaimi, wali himalainyeboke yo yae me baemmile nibi are na foi yae isaeyeiboi. 14Raman elae ro miyae uwa henaiboyate yo naei. Nebei ro miyae na waline foi naei beko naei hului raisise nenaei nenaei isaeyaeiboke.

Currently Selected:

Ibrani 5: setDBL

Highlight

Copy

Compare