Ibrani 2

1Nebeinye Allah yae Naei Kelule walora a uwoumene, nebei are nou hemande hele. Nandolo yae yobounge wi enene hebele kiyaele a elae ban yeiboyole wanen Allah ukeume a elae ban yembondera u benera nundenaimekonde belene, nebei are nou hemande hele. 2Malaikat yoni-yonire ukaimi Musale walora wali heere foloukoke are asasi kaikoke yo bele hubara haeisa eyanei yo bele nebei a huluinye ehee bukulu hayaimikoke. 3Nebei mekai bewatene, Allah yae ikeume holera molommebonde nibi na foi sele a faeufe moi bulemandena, Allah aere me nommeyonde hele. Nebei a faeu na bemere Tuhan Yesus Nenaeijae isaeiwoumi. Nebeisa angkaei borowate yo aei bokore mekate yae elewate nebei a faeufe na hele. 4Naei kaliare mokate ro miyae walora iwau yoni-yoni emere-emere emekai bele mokowate nane merau Naei kena koukoke huluinye Naei Rohle meli mekai ro miyaere wahewoumi walora Allah kelewoumi nebei a faeu na hele.

Yesus Na Aka Baeke Wanen Mokouboke

5Eyae are elande kani kela neme ennenulengkonde Kiyae mere enaimimokonde naeise malaikat yoni-yonire Allah ekinyeiboi. 6Allahle homofae einye ro hi nda wanen haraungeboke moloukoke,

“Allah,

ro miyae yoni-yoni bele naei orona mena bele me ebaei ban yobe nekate,

nebeibe Weyae nare ijoko foi sele roboyamae.

7Weyae ro miyaebe mokoumibokae

malaikat yoni-yoni nekate anuwaufa ebi fere ane oumiraufikae.

Nare hilire enaimihebende naeise

nane merau bere enaimihinende naeise

mokoumibokae.

8Nane merau Weyae nuleubokae yoni-yoni

naei me kelee u keleene orulenaibondere mokoumibokae.”#2:8 Mazmur 8:4-6

Allah mokoumiboke rambun nemene fomene ro miyae naei me kelee u keleene nekenate, nebeibe nda hee rambun nemene fomene ro miyae naei me kelee u keleene nekatere eyae ijoko ereiboi. 9Nebeibe nda hee Yesus ijokore erannele Kiyae. Ya na fofo hele Allah yae mokoungeboke malaikat yoni-yoni nekate anuwaufa are oungeraufike. Nebeibe nda hee Neyae beko hubawoungera hereke benen waleubokene, Ondofolo yae Nare hili hebeyainye nane merau be hineyainye. Allah kena buhae aere ban mae heumi u mekai ma nekelene, ro miyae aerene Yesus hereke. 10Allahle kena foise mokonnele naeise nemene fomene yaeiboke, nane merau Allahle elae wake walora nemene fomene yaeiboke. Allahle u mekai huluinye na mekai yae mokonnelene, Naei ukeunge meke ro miyaere hole molommile Kiyae wali hiyei ranembonde naeise, beko hubawounge. 11Ro miyaere mokommile Allahre kena foise mokonainyele u mekai wanen nekenate Kiyae bele, nebei u mekai ma nekate ro miyae bele, Ako mbai. Nebei aerene Yesus fe ban sele nebei ro miyaere Naei aka baeke wa yae elele. 12Yesus yae Allahre weunge,

“Reyae, Weyae wende abe

Raei aka baekere eremisaeyende

nane merau jemaat u nolo u kainye

koi bae yae Ware ei ereimolote.”#2:12 Mazmur 22:22

13Nane merau Yesus yae eleukoke:

“Reyae kena elae eisubawanale Allah Naei elele a huluinye mokorende.”#2:13a Yesaya 8:17

Benen Yesus yae Allahre weunge,

“Eremobo, Reyae nane merau Rare kinyeufeboke kelu omi bele ndane hebande.”#2:13b Yesaya 8:18

14-15Walobo yun here mere ikileuboke kiyaere beko mokonnebonde naeise, nane merau ro miyae na wali koko herere fe faeimeyate yo Neyae na hului nebei fera hayemmikonde naeise, Allahle kelu omi melen u ha u mbai yae Yesus yeuboke. 16Na yaka yeuboke Yesus malaikat yoni-yonire hakoumi ban, nebeibe Abrahambe orona mena yae me baeumi yore hakoumi. 17Yesus ro miyaere yanekoi yase yae ei hawemmile nane merau Allah a weunge hului mokole imam kabande yembonde naeise, nane merau nibi mbai mokombonde ro miyae naei beko bako mokaimekere Allah faeinyemmibonde naeise, nebei me u mokombondere Yesus Na aka baeke wanen mbainye yembonde hele. 18Yesus Naei uware umalire hubainyehike heene beko hubawoungene, Neyae na hului umalire hubanaimiyende yore hakommiyende.

Currently Selected:

Ibrani 2: setDBL

Highlight

Copy

Compare