2 Tesalonika 2
2
Hubare Halennekonde Ya
1Aka Naei Baeke naei, aei Tuhan Yesus Wali Ondofolo benen mende ya naeise, nane merau Allah aere Yesusle bokone arilemmehinde naeise, meyae mare wayembe buhae ohokoyeijae. Ro hi miyae hi a mahi-mahi yae mare ungayembe 2aei Tuhan Yesus benen beufoke meke, nebeibe naei a oboroijae. Neyae ungayembe Allah yae Paulusle holonare nebei a yakaumiboke, Paulus naei nebei a elaeikokebe, nebei a homone molaikoke. 3Ro miyae naei ame-ame yanenate oboroyeijae, rabuhine ban Yesus benen emei heene, ro miyae nekai sele Allahle ako faeuko moi hainyate nane merau ro nansau fele#2:3 Markus 13:14 Allah yae yakanembonde. Nebei ro nansau fele Allah meraufe raungehike yane beko mokonembonde. 4Nebei ro nansau fele yakambonde heene Allah naei yokeijo na kaban selere yembonde. Neyae mende walobo holona yore nane merau nda kanina kelana eise moloyaimi rambun-rambunde are yae heraweumibonde. Naei me u na beko hele mokombonde nda niyae: Allahle imaebe enensinde, naei imae wanen mae nuwembonde, naei uware Allah yae elende. 5Bene nekenayembe nda abe mangkele nekewande hee reyae isaeyembokamale.
6Mana mayae maisaei nda ro nansau fele rahe yae aheyeungele. Aheyeunge kiyae mayae nane merau maisaei. Nebei ro nansau fele Allah yae merau raungehike ya mo yakambonde. 7Mana walobo yun nunda-nunda yae ro miyaere a moi-moi mokoyeumi Allahlena a weumire nukenainyebondere. Nebeibe nda ro nansau fele ahei-ahei aheyeunge kiyae na hibi ahennele, mende Allah yae aheyeunge kiyae enere wennende. 8Nebeisa mo, Allah yae nebei ro nansau felere yakannebonde. Nebei rore Yesus benen mende heene Naei eufou wae beko mokonnebonde, Na uwa wili halaman mae nda rore elae ban mokonnebonde.
9Nebei ro nansau fele menyakambonde heene, walobo yun nelae wake yennele me u mahi-mahi helen Allah mokole wanen mokonde. 10-11Nebei ro nansau fele naei me u walora Yesusre ehakoiboi ro miyaere ame-ame helen yanemmile. Nda ro miyae bekore enayaronde, rabuhine ban Wali Ondofolole na hele wali nibi are neyae kena ban. Nebei aerene Allahle elae walora nebei yore mokommibonde nda ro nansau fele a ame-ame elendere na hele yae elenate. 12Na huba mokoikoi yane nemene fomene a na helere ame-ame elenate nane merau bekore kena haehae konate yore Allah yae me wonnonde.
13Aka naei baeke naei Allah kena buhaere hembe yo, maei baka ranna huluinye ebeli einye roko helen Allahre mai naeise helen foi weyannele, rabuhine ban Allah na hele mare na bere hele elembokembene nda walora wali hena bona inyembe: Naei Roh yae mare mokonensambe Allahle yolo-yolo u mekai wanen nekembe, nane merau Wali Ondofolole na hele wali nibi a faeu mayae hila rabo halembe. 14Meyae Yesusle a foi faeu foi huwayengkokembe walora Allah mare kaenengkokembe wali hena bona yarongkombere, nane merau aei Tuhan Yesus Wali Ondofolo Naei nene waewae mayae na hului hubannele. 15Nebei aerene, aka naei baeke naei, mai hila rabo elaekei yae halemembe, nane merau maeinya kelewayembe a huluinye mo hakomembe mokomembe. Nda abe maei euwe yae uwayembe nane merau homone bele molowande.
Maise Naeise Ebeli Boi-Boi
16Aei Tuhan Wali Ondofolo Yesus bele aei Arai Allah bele aere kena buhaere heyeime Yore meyae ebeli bannele. Yesus yae kena buhae aere ban mae heyeume walora aei kena einya foi hubamande huba ban haei ban, nane merau wali hena emmayaronde naeise rabo elae halemale. 17Meyae ebeli bannele Neyae mai kena u hara roronembe, nane merau me u foi mokomembe naeise bele, a foi faeu foi elemembe naeise bele elae inyemembe.
Currently Selected:
2 Tesalonika 2: setDBL
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
