1 Korintus 2

1Aka naei baeke naei, Allahle a faeufe hufembe naeise reyae mai bokore mekale heena ahuba huwamale baengko bele ma yae omokoiboi nane merau isaei hebaen bumana bele yae erenaisele wanen mae ekelei. 2Rabuhine ban raei a hokoukokale huluinye mai bokone erenekende hee nda a faeufe mo hufembere, Yesus Wali Ondofolo ohaline baikoke hereke yae ro miyae wali hena bona u mekai hubanainyende nibi mbai mokouboke, a hi hi mare ewei. 3Mai bokone ekale hee raei uwa yambi koloukeufe nane merau buhae hokoufeboke oro me oinyeu hineubokale kowale. 4-5Ro miyae naei isaei hebaen aerene ban nebeibe Allahle elae aerene mayae Wali Ondofolore hila rabo halennele naeise, nebei a usaei wasaei mare kelewamale. Ro miyae naei isaei hebaen hului yae kena yon-jon a yae reyae ehuwei, nebeibe Allahle Roh elaebe kelembokamale.

6Mai nolona Wali Ondofolole eisa uwa henaiboke yore meyae Allahle isaei hebaen kelaemmile, nebeibe nda kani kelana wali beko nibine orate yo naei isaei hebaen bele nda kani kelana rabuhi ban inyaibonde mere mokaimi yo naei isaei hebaen bele meyae ekeleikoi. 7Meyae nebei Allah yae nunne heraweuboke honoweke isaei hebaende huwayembe. Eyae na hului nene waewae bele nekemale naeise, nda kani kela Allah me enuleiboi heene Neyae nda isaei hebaen mokoungehake. 8Nda heena ondofolo yoni-yoni nemene Allahle isaei hebaen isian nekewate. Neyae naeisaei yae nekate yae, Tuhan nene waewae bele Kiyaere ohaline oboikoi sele. 9Nebeibe, Allahle homofaene nda wanen molaikoke,

“Allahre kena buhae haeinye yore Neyae relahi yae mokoungehake rambunde

ro miyae yae ijoko roko mbai ereiboi, angkaei yae oboroiboi,

nane merau ro miyae naei kena u eisa eyakaiboi nekeimeyate.”#2:9 Yesaya 64:4

10Allah meraufe raungehike nunne honayeke rambunbe Allahle Roh walora aere isaeyeumeboke, rabuhine ban Allahle Roh yae rambun yoni-yoni nemene fomene hameyeumine. 11Ro miyae u bene nekainye rambunde nebei ro miyae na kena u mo naeisaei nekele, hiwa yo isian. Nebei sului mbai Allahle u bene nekainye rambunde ro miyae yae isian, Allahle Roh mo Naeisaei. 12Allah yae nendon iwoume rambun yoni-yoni nanemene eyae isaeimabonde naeise, nda kani kelana wali beko nibine orate ro miyae naei isaei hebaen mae eyei, nebeibe Naei Rohbe ikeume. 13Allahle Roh bele yore Allahle Naei are huwammilere.#2:13 Homofae hena hiwa nda a ma molaikoke, “Allahle Roh yae weume are huwammi.” Ro miyae naei isaei hebaen hului yae maere ekelei, nebeibe Allahle Roh yae keleume. Meyae Allahle Roh a weume nibi huluinye Naei na hele a faeufe ikelewammi. 14Allahlena Roh ban ro miyae nebei Roh yae yakaumi are na hele elei, rabuhine ban nebei rambun yoni-yoni a bangka-bangka merau eraimi. Nebei ro miyae isaeyeiboi sului, rabuhine ban nebei rambun yoni-yoni Allahle Roh walora mo hamenaimile. 15Nebeibe Allahlena Roh bele ro miyae yae rambun nemene hamenaimile, nebeibe hiwa yo yae naei uware ehameikoi sului. 16Allahle homofaene nda wanen molaikoke,

“Ro miyae mbai sambai

Tuhande a usaei wennekonde naeise,

u benena nekainyere isaeyaeiboinye!”#2:16 Yesaya 40:13

Nebeibe Allahle Roh ikelewoume Wali Ondofolole rambunde isaeyele wanen, meyae isaeimale.

Currently Selected:

1 Korintus 2: setDBL

Highlight

Copy

Compare