Mencrer Xà 91
91
Pahpãm pê ampo kên pê me pahpytàr catê na mencrer
1Ỹhỹ me ikwỳ!
Quê ha me anõ mã, ampo kên pê amji pytàr to prãm na,
ca ha Pahpãm mã amji cajrẽn,
quê ha Pahpãm pê me pahcunea jõ Pahhiti pahtỳjti ata,
ihtỳj atête amtà.
Cwỳrjapê ca ha gapacta ne me pajõ Pahhiti pê mehcunea jirôa pê
ihpahtỳjti ata mã me amji jarẽn to,
2“Apê ipytàr catê,
ne apê ampo kên cunea pê itête gàmtàr catê,
ne apê ijõ Pahpãm,
na wa itỳj ate ijamãr na amji mã ato hane” hane.
3Quê ha Pahpãm ihtỳj
ampo kên pimxur te akên mã amẽn xà ata pê apytà,
ne atête axà te acuran xà ata pê amtà.
4Quê ha ihtỳj amji jarkwa pa,
ne ampo te ato kên xà ata pê apytà.
Quê ha ihhêj rũm cupê ampo jara, ne hara to apro,
quê ha nee ihkrac ri ampo acaxun nare.
5Cwỳrjapê quê ha nee amã caxwa ri ampo kên awỳr pra atajê cupa nare.
Ne quê ha ihprõt pê amcro kam ampo kêanre ata awỳr cato,
ca ha nee hũpate apu akrihkrit nare.
6Ne nee amji mã, por awcapàtkô kam,
hà kêanre picràn ata cupa nare,
ne nee amji mã amcro kam ampo te ame ato hamre xà ata cupa nare.
7Ne quê ha me mir ne me ty, ne awke rũm me ajxwỳ,
ne me tej mir ne me ty, ne awpôc rũm me ajhu cakrô,
quê ha nee ampo kên ato kên nare!
8Na ca ha cama xa ne ankrêre ne apu rĩt.
Ne ca ha atỳj Pahpãm te me hũpar nare me,
mehkrã kên te ampo kên ton atajê jahpan xà na,
cute ame to kên na me to ihtỳj tu na me hõmpu.
9-10Ate amji jarẽn to:
“Pahpãm catia pê ijõ Pahhiti ata pê ri,
por curi ipimxur xà ata,
ne cupêa ri itête hàmtàr catê!” hajỹr.
Cwỳrjapê quê ha nee ampo kên gũrkwa wỳr cator
ne jũ mã aton nare.
11He quê ha Pahpãm côjkwa kam cumã me hàpên catêjê mã harkwa ta,
quê ha harkwa kôt,
por ca jũ ri apu amõr xà ata kam me gamã,
ne me atête me hàmtàr to ipa.
12Ne quê ha me gamãr to hanea,
pom quê jũm xũmre pry kam kẽn te ihkra par tõc cupate,
ma hũhkra to, to huphê ne hamã he.
13Ca ha Pahpãm cãmtàa rũm
atỳj me acurê xwỳn pê rop jõkre hôhti me,
me cupê cagã kêanre pyràc atajê me,
me ajpu, ne me kam acuhhê, ne me tohjê.
Quê ha nee jũmjê itajê nõ ato kên nare.
14Na quê ha Pahpãm amji mã garẽn to:
“Wa ha itỳj me cumã ikĩnti itajê pytà.
Ne cute amji mã me ito ihhimpej atajê, wa ha itỳj mentête amtà!
15Ne quê ha kam ampo kên cato, quê ha imã amji cajrẽn,
wa ha kampa ne ramã curia cahê na xa,
ne pa ampo kên pê hũtà,
ne pa mehcunea te amji mã me hũpahti xà na me to,
quê ha amji mã me hũpa.
16Wa ha cute amji to ipijapar to irya na to,
ne cute amji to ipijapar xà ata kam,
ahnaa mã, wa ha itỳj hũtàr to ipa” hane.
Currently Selected:
Mencrer Xà 91: ram
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
