Mencrer Xà 42
42
Jũm xũmre ita hũrkwa pê ampỳa mã Pahpãm mã amji na increr xà
1Ỹhỹ, Inxũ Cati, ca ihhêj ne ipê ampỳa mã apa.
Pom côjkwa crà kam, carà mã hatuj xà jõ cô to kôrti,
ita na mã ite,
ne wa apê ampỳa mã apu ipa.
Na wa hacpỹa mã awỳr amji jaxàr to prãam to prãm,
mãr cu hipêr ajpẽn pupu, ne ajpẽn cahi na papa.
2Inxũ tĩr rohnỳtti mã ata, he ihhêj rũm apê cô,
ne imã ato kôar to kôr.
Ne jũ caxuw mã wa ha ajte awỳr icato,
ne ite ato acati prãmte imã akĩnti ita na amã amji jarẽ?
3Me icurê xwỳn catêjê me icukij to:
“Mẽr jõ ri mã côjkwa kam Apãm Cati ita?
Ihhêj ne hamreare” hane.
Cwỳrjapê ri imã amji kĩn nare, ne ipeacre,
ne wa ijàpàn nare kam, amcro me caxwa cunea kam amrã.
Mã ito cacô pit ajxwỳ.
Ne ito cacô pijaxwỳr ita pê ihhêj rũm ijõ,
wa to pit mã apà.
4Wa hãn ne ituwre na
mam ite ato amji kam ijapac xà atajê to amji japackre,
ne ijĩ cunea kam ikàj xà pyrentu.
Pê wa me ikjêjê jàhtôa to ajco amji kôt ipa,
ite me ato amji kam ijapac xà jũrkwa wỳr.
Ne me icuhtom pej pêa mã,
me imã amji kĩan kam me ipa,
ne ajco me icrear kam
apê Inxũ Catihti na me ato ijũjarẽn to me ipa.
Ata to wa amji japackre.
5Ne mẽr ampo na mã wa imã amji kĩn nare ne ikrihkrit ita na ipa?
Xà quê ha ajkĩ Inxũ Catihti ita hipêr itehcajpar nare?
Hãpà! Quê ha ihtỳj hacpỹa mã imã amji kĩnti na ito.
Cwỳrjapê wa ha hacpỹa mã Inxũ Cati to amji mã ihhimpej,
ne to amji japackre, ne to cati prãmte wa ha cumã:
“Apeaj to apej,
ne apê Inxũ Cati pê Pahpãm
pê ikên pê ipytàr catê rohnỳtti mã” hane.
6-7Wa Pahpãm jũrkwa me, me ikjêjê pê, ampỳa mã ipa,
ne Côpijapjêr jõ cô jatuj xà na kẽnti itajê kam ikrĩ.
Mã kẽn cati itajê pĩn, cô catia ne ikam ajxwỳ,
ne kypê hàhkrihkrit nare, ne tee icuran prãm.
Ita pê ihhêj rũm imã amji kĩn nare te ikam ipijaxwỳr.
Cwỳrjapê ri imã amji kĩn nare ita pê ihhêj rũm
ijĩ cunea kam ikàj xà,
ne Pahpãam te ri imã amji kĩn nare ita na iton,
na wa itỳj to amji japackre.
8Ne amcro cunea kam Pahpãm imã:
“Imã akĩn rohnỳtti mã” hajỹar to pyt.
Ne wa caxwa ri cumã cre, ne cumã:
“Mehcunea jirôa pê apeaj to apej” hane.
Ne itỳj cumã icakôc ne cumã:
“Apê ite amji kam ijapac xà xakat,
na ca ha atỳj ijamãr rohnỳtti mã” hane.
9Pahpãm pê ikên pê ipytàr catê, na wa cumã:
“Ca ihhêj ne ate ito gapac kêt!
Mã me icurê xwỳn catêjê ame ito kêanre,
wa imã amji kĩn nare kam ipa” hane.
10Mã amcro cunea kam me icurê xwỳn catêjê ame ina xwỳ,
ne me imãn to:
“Jõ ri mã Apãm Catihti ita?
Ihhêj ne hamreare ita kam,
jũ wỳr quê ha atehcajpa” hane.
Ne cute me imãn xà ita pê ihhêj ne ramã me icuran to mõ.
11Ne mẽr ampo na mã wa imã amji kĩn nare,
ne ikrihkrit ita na ipa?
Xà quê ha ajkĩ Inxũ Catihti ita hipêr itehcajpar nare?
Hãpà! Quê ha ihtỳj hacpỹa mã imã amji kĩnti na ito.
Cwỳrjapê wa ha hacpỹa mã Inxũ Cati to amji mã ihhimpej,
ne to amji japackre, ne to cati prãmte cumã:
“Apeaj to apej,
ne apê Inxũ Cati pê Pahpãm pê ikên pê ipytàr catê rohnỳtti mã” hane.
Currently Selected:
Mencrer Xà 42: ram
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
