AMatiyu 23

AYeso tarak itees banet naton nggɔn bafi itees ntsi aMusa nɛ BaFarasi

1Ama anɔng, aYeso cɛɛt ni kudyɛng banet nɛ bafi imɛɛs wu, yɛ, 2“Bafi itees ntsi aMusa nɛ BaFarasi, ibá bá ba ka ba nɔk kukyem itees banet ntsi aMusa. 3Nek anɔng, nye yin ngma ikyɛng fi iba ki itees yin, di kuus yin itees e. Awɛt iyin bi di kuus yin nggɔn bá awo, nek iba nyes ikyɛng fɛ́ ba itees awo. 4Ba rosom banet adiring ares fɛ́ a wat agap ba, na ba ka ba saas e naton ace-mbɔk, wɛt ni iba raba dang ka ba ta mo itsambɔk na acet e ngma.

5“Kaakyi ikyɛng fɛ́ ba nye, ba nye mok banet ka ba di mo kyɛk: Ba rosom anyin-anyin alaw fɛ́ ba di jɛk Ifɛ̀ Adakunom na natii bá, ba tɛ ba di barasa agboo akpin asɔp bà.#23:5 Ba roos anyin-anyin alaw e nɛ ibarasa acɛk akpin na agboo akpin e, nɔng banet ba bin di tonong banet fok iba ba ba kuus Adakunom gyat yɛɛt. Nɔng banet bin di fok iba kuus Adakunom gyet awo. 6Ba tsɛsɛk narɔ isosok agbat banet na narɔ kuyak nɛ narɔ isosok naratek na narɔ inyis baYahuda, 7ba tsɛsɛk banet na ba ka ba nye ashow na narɔ ijik, na ba tɛ ba ka ba yes, ‘Anet itees.’

8“Awɛt iyin, i bi shim yin banet ki yes yin, ‘Anet itees’ awo, nek ngma yin i yet yin baruneng, anet itees yet azining kyɛk. 9Iyin bi yes yin anet akak azatse, ‘ada,’ awo nek iyin bɛ̀ yin Ada azining, ayɔng fɛ́ a se azanɛn. 10I bi won yin ba ki yes yin, ‘anet itees’ awo, nek Anet itees yin yet azining, Anet-Isheshek. 11Won ayɔng fɛ́ a wat ni iratek ayɛt yin, na a sot anet itomong yin. 12Nek ngma ayɔng fɛ́ a sok ice wu garang, ba da ku tik lɛɛ, wɛt ayɔng fɛ́ a tik ice wu lɛɛ, ba da ku sok garang.

13“Kawɛy se gung ni iyin Bafi itees ntsi aMusa nɛ BaFarasi! Bafɛ́ nanu nafifaa! I mi tɛnɛng yin banet irèn inɔs ni igwɔm azanɛn. Iyin ice yin, da i nɔ yin awo, da i won yin bayɔng fɛ́ ba shim inɔ me, na nɔ awo.#23:13 Afumung ijɛk akak afɛ́ ashon bɛ́ ibyat ifi 14 ane: Kawɛy se gung ni iyin bafi itees ntsi aMusa nɛ BaFarasi! Iyin bafɛ́ nanu nafifa! Itisik yin na nasa bakuma, ni ras yin awon asɔp, nɔng i di tonoso yin kukyem yin. Nek anɔng, ba bi ki nɔɔk yin izot makiyi!

15“Kawɛy se gung ni iyin bafi itees ntsi aMusa nɛ BaFarasi! Iyin bafɛ́ nanu nafifa! Iteng i kat yin ni mben zizɛɛt, ni tasak yin izek zizɛɛt, nek itsɛt yin anet azining kyɛk fɛ́ a da kuus ifɛ̀ itees yin, ama fi i mi ku sɛ yin, ni bang ku sak yin, na sot nggon ari irong aza yin.

16“Kawɛy se naton yin! Bakpatɔn fɛ́ ba kɔk bakak agbanding, nek i nye yin fok, ‘Ngma ayɔng fɛ́ a nye kushi ni Kutu Iya Adakunom Ntong, kushi me da ku yit awo, awɛt ayɔng fɛ́ a nɛ nye kushi nɛ ata asɛng afi kutu iya ntong e, ni kushi me ku ya.’ 17Iyin ashɔp ákpatɔn! Ingan deng de fi wat iratek ɛ? Ata asɛng e a? Kɛ Kutu Iya Adakunom Ntong e fi ku sak ata asɛng e di sot jɛrɛ yɛ? 18I ti tees yin banet fok, ‘Ngma anet fɛ́ a nye kushi ni kuta ashosh Adakunom, kushi da ku yit awo, tit anet fɛ́ a nye kushi naton ikyɛng fɛ́ ba nabak e wu, ti kushi me da ku ya mo.’

19“Iyin bakpatɔn! Ingan deng de i wat ɛ? Kunang e ko a? Kɛ kuta ashosh e ko fi ku saas kunang e sot jɛrɛ yɛ? 20Nek anɔng, ngma anet fɛ́ a nye kushi ni kuta ashosh Adakunom, a nye kushi ni kuta ashosh e ni ikyɛng fi i se ni iko. 21Ne ayɔng fɛ́ a nye kushi ni Kutu Iya Adakunom Ntong, a nye kushi naton ko nɛ Adakunom fɛ́ a se ayɛt ko. 22Ne anet fɛ́ a nye kushi nɛ kazanɛn, a nye kushi ni kuta igwɔm Adakunom nɛ anet fɛ́ a di sosok ni iko.

23“Kawɛy se gung ni iyin bafi itees ntsi aMusa nɛ BaFarasi! Iyin bafɛ́ nanu nafifaa! I nesek yin igbasak kamazɛng ni nfi nkpɛnɛng nseng ni nkpɛnɛng nwe, awɛt ni wosong yin dang nye yin nkyɔrɔk yɔng fi ntsi wɛt shim, nkyɔrɔk ti ina: ishɔt atsak ni ifoos angmishish ni iras atsak. Nkyɔrɔk nang ná, in se yɛɛt ni i nye yin ina, vit iwosong yin ida. 24Iyin bakpatɔn fi i kɔk yin bakak agbanding! I shirishi yin ashi kɔng i bi di ngɔnɔng yin katamun, ngma nɛ anɔng, ni ngɔs yin itsaap-igung.

25“Kawɛy se gung ni iyin, bafi itees ntsi aMusa nɛ BaFarasi! Bafɛ́ nanu nafifaa! Iyin kus yin nama aridɛ nɛ nama natsereng, awɛt nayɛt na mi shining ni imak ni ishim ice. 26Ngɔn akpatɔn aFarasi! Tung kusu kayɛt aridɛ nɛ kayɛt katsereng e ninyen, nɔng kama me da bin se cɛ́l bà.

27“Kawɛy se gung ni iyin, bafi itees ntsi aMusa nɛ BaFarasi! Bafɛ́ nanu nafifaa! Iyin se yin ti nrɛk fɛ́ ba di kpɛng kutɔp kukan ni na, fi in yet ntek amatse, awɛt nayɛt na mi shining na akup bafaben, ni nkyɔrɔk agbɛk-gbɛk e. 28I se kpaf anɔng, banet ki yɛrɛ yin tɛ banet atsak, awɛt ayɛt yin, ayɛ yin mi shining nɛ nanu nafifaa nɛ bafi ibeseng ntsi.

29“Kawɛy se gung ni iyin, bafi itees ntsi aMusa nɛ BaFarasi! Bafɛ́ nanu nafifa! Iyin noos yin batan arɛk atek, ni nye yin arɛk bafɛ́ atsak gyat. 30Ni nye yin fok, ‘Ki in kin fi in se yit ni izen badakop yit, ki in kin ka ba sɛ yit mo ifɛs batan e awo.’ 31Na anɔng wu, fi i di tonoso yin fok iyin yet yin nnon bayɔng fɛ́ ba kin fɛs batan e. 32Te yin nyɛk, i da ka gang yin kutomong badakop yin!

33“Iyin ahwyen! Iyin ánon ámazɛrɛ! Akyɛ de i da ro na ba ki te yin ari irong ɛ? 34Nek anɔng, imi fɛ̀ ni yin, in da ki tom yin batan nɛ bafi kutsitsɛng kutsik nɛ bafi itees. I da fɛs yin bakak ba, i da tegak yin bakak bà, i da tsosok yin bakak ayɛt ba na narɔ inyis, ni ka ba nesek in mgbang, nkum kuwɔp ku kà sak ni ku yá. 35Nek anɔng, ngma nasok banet atsak, fɛ́ ba ki mang fɛɛs, da se naton ace yin, ikyɛng fi iyit nkum izen inosong nasok anet atsak aHabila sak ni izen inosong nasok aZakariya arim aBerikiya, fi i kin ku fɛt yin nate kutu aJɛrɛ nɛ kuta ashosh Itu Iya Adakunom Ntong. 36Won in ki tak yin atsak, ngma nkyɔrɔk e da te naton kuzam kang.

AYeso nye kafa kawe naton aRushelima

37“Ye kaa! Banet aRushelima! Ye kaa! Banet aRushelima! Iyin fi i mi fɛɛs yin batan ni i mi woro yin batom Adakunom nɛ ata! Ite kamang fi imi da woso ki tusung yin tɛ anyinyon di famasa naban e na akufabak ye, ngma nɛ anɔng ni rayin. 38Di yin, nasa yin mi sot abát, vit anet ayɛt na. 39Wat in tsin fɛ̀ ni iyin, i bi ti i di di yin awo, ma atuk fi i fɛ̀ yin, ‘Awɛng Adakunom se naton ayɔng, fɛ́ a bɛ́s ni iyerek aTisa.’ ”

Currently Selected:

AMatiyu 23: IbaasNT

Highlight

Copy