BaGalati 1

AShow

1Kufumung ijɛk kang ne ni imi, aBulus, atom aYeso. Iyes hom ne na banet kɛ anet akak awo, tit na aYeso Kristi nɛ Ada Adakunom, fɛ́ a donong aYeso ni iku, 2na baruneng fi in se yit gung.

In jɛk yit iko sak na bafi ikuus

fɛ́ ba se na aGalati.

3Won itek ni kusonong kukyang fi ku nes na Ada yit Adakunom nɛ aTisa aYeso Kristi, ni ku sot kufiin, 4iwu fɛ́ a nɔɔk ice wu nek anɛn yit, nɔng a bin tun yit mo ni ibɔk kuzam kumaan e kang, kpaf ni ishim Ada nɛ Adakunom yit. 5Won iratek ni isot ifuu ayɛ na ayɛ. Anɔng.

Ifɛ̀ itek ikak zɛɛt di se awo

6A di te yɔɔt makiyi, fi i mi wat itirik yin ayɔng fɛ́ a ki yes yin nek itek fi ines na Anet-Isheshek, ni tirik yin sak ni ifɛ̀ ikak iduk e, 7idɔng fi da iyet ifɛ̀ itek awo. I se wɛshɛk fok banet bakak tsin ki boroso yin na ba shim ba ki tes natse ni ifɛ̀ itek ifɛ́ Anet-Isheshek. 8Awɛt in shim in fɛ̀, ke iyit kɛ na ayɛt atomaza ayi fɛ́ a ne azanɛn, a bɛ́ a ki shara yin ifɛ̀ itek ikak zɛɛt ni idɔng fi iyit man ki shara yin ne, won itsɛɛt ishɔt iku ifi ayɛ na ayɛ ni i ku ya! 9Kyɔn ti fi in mi di fɛ̀ yit, won in tin bang fɛ̀ ane: kɛ akak tsin tɛ ki shara yin Ifɛ̀ ikak zɛɛt ni idɔng fi i mi shan yin, won itsɛɛt ishɔt iku ifi ayɛ na ayɛ ni i ku ya!

10In tsin tsɛt ikɔrɔk nhwyɛ banet a, kɛ in kɔrɔk nhwyɛ Adakunom ɛ? Ke iyin di yin fok, in tsin shim in tɛrɛk banet iyɛ yɛ? Ki in fi in rēn shim in tɛrɛk banet iyɛ, ki in yet asam Anet-Isheshek awo.

Adakunom yes aBulus

11Ábaruneng, imi shim ni i rēn yin fok, ifɛ̀ itek fi in shara, yet idɔng fɛ́ anet awe nye awo. 12Imi shan ifɛ̀ me na anet akak awo, kɛ akak wu a di tees ide awo, tit aYeso Kristi ice wu fɛ́ a di tonong ide.

13Nek iyin man fok yin kusot fi in nye ayame ni nggɔn baYahuda, ni kuri izoot fi in nesek bafi ikuus Adakunom makiyi, fi in tsɛt in fuut iye. 14In tsang ya kashon ni nggɔn baYahuda aza bafi kuzam hom, in bi iyɛ ingash ni rosok amok badakop yit makiyi. 15Awɛt ni izen fɛ́ Adakunom, iwu fɛ́ a di kasa neme ni ites hom, a di yes nek itek wu, ayɛt ishim wu, 16a di tonong Ari wu, nɔng in da shara ifɛ̀ wu ayɛt Ícɛn-iduk, imi tsin in tɔ na anet akak awo. 17Kɛ in ngarak sak ni aRushelima nek in tsin di bayɔng fɛ́ ba tsang sot batom-aYeso ashon in awo, tit in di berem sak na Arabiya in da ni in bun na aDamaskos.

18Ama ayɛ ataat, in ngarak sak na aRushelima nɔng in bin rēn aBitrus, in sot azɔng ni iwu nkɔs kusɔk abe toon. 19In di akak ayɛt batom-aYeso me awo tit aYakubu aruneng aTisa yit. 20Won in ki tak yin ashon Adakunom fok, ikyɛng fi in tsin ki jɛk yin ne yet mbɔɔs awo. 21Ama anɔng, in tse na aSiriya nɛ aKilikiya. 22Ni izen e yɔng, imi ice hom vit anet fɛ́ a di rēn ayɛt bafi ikuus Anet-Isheshek fɛ́ ba se ni mben aJudiya. 23Ikyɛng fɛ́ ba foos kyɛk yet: “Anet yɔng fɛ́ a tsang ki nesek yit mgbang, a se ni ishara inɔɔk atsak fɛ́ a tsɛt ifuut e.” 24Ba tere Adakunom nek imi.

Currently Selected:

BaGalati 1: IbaasNT

Highlight

Copy

Compare