Ntomong Batom 22

1“Ábaruneng nɛ badada, fok yin ikyɛng fi in da fɛ̀ nek itɛnɛng ice hom.” 2Ni izen fɛ́ ba fok a tsin cɛɛt ni iba ni ilem Aram, ba bang te yuu.

ABulus fɛ̀ ni iba: 3“Imi yet afɛ́ aYahuda, kutes aTarsus ni mben aKilikiya, imi rasak azeng ni wɔp kang. In sɛ itees makiyi ni bɔk aGamaliyel, naton ntsi badakop yit. In bi iyɛ ngash kutomong Adakunom kpaf ti iyin di tonoso yin atut. 4Imi nesek banet ikuus Irèn yeng iyɔm sak ikok kutset bá, in yisik, ngma batek nɛ banyining ni in tsees e ari inyang, 5agbat àware nɛ kazumung bashɔn ice ba da fɛ̀ ey ikyɛng fi in cɛɛt. In man nin shashan afumung ni bɔk bá sak na baruneng fɛ́ ba se na aDamaskos, in tse azɔng nek iyisik bafi ikuus e, ni in tses ni iba na aRushelima ti nnon inyang, nɔng ba ka ba nesek iyɔm.

6“Bakat kate inom, ngmash ni in ta na aDamaskos, ni izen izining, mgbey ne azanɛn in di faam. 7In wat in kpa aben, in fok kutɔ fɛ̀ ni imi, ‘AShawulu! AShawulu! Akyɛ sak fi i di nesek iyɔm ɛ?’

8“Imi ku rip yɛ, ‘ATisa, ngɔn yet angan ɛ?’

“A fɛ̀ ni imi, ‘Imi yet aYeso anet aNazaret, ayɔng fi ngɔn tsin ku nesek iyɔm.’ 9Bafidang itseet in di mgbey e, awɛt ba kyem ba fok kutɔ ayɔng fɛ́ a cɛɛt ni imi awo.

10“Imi ku rip yɛ, ‘Akyɛ fi in da nye aTisa yɛ?’

“ATisa fɛ̀ ni imi, ‘Dorok, tseng sak na aDamaskos. Azɔng wu fɛ́ ba da ka tak ikyɛng fɛ́ ba mi sak fi i da ra.’ 11Bafidang itseet hom, di kɔk ni bɔk sak na aDamaskos, nek mgbey kurong e di te akpatɔn.

12“Anet akak fɛ́ ba ku yes Ananiyas, bɛ́ a di di. A yet anet ikuus ntsi Adakunom, anet fɛ́ baYahuda fɛ́ ba se azɔng ku nesek iratek makiyi. 13A bɛ́ a nyeseng ni fam in, a fɛ̀ ni imi, ‘Aruneng aShawulu, sɛ ayisi ngɔn!’ Ni izen izining, in wat in kpa yɛrɛ.

14“A ma fɛ̀ ni imi, ‘Adakunom badakop yit, mi da kasa nek ni i rēn kushim wu, nek i di di aJɛrɛ me, ni i di fok ifɛ́ nanu wu. 15Ngɔn da sot kanu icɛɛt wu, sak na banet ngma naton ikyɛng fi i mi di, ni ikyɛng fi i fok. 16Ngɔn sha ngɔn akyɛ? Dorok, ba tse ba da ra abatisma, ikusu anɛn ngɔn, ni irèn iyes iyerek wu.’

17“Ni izen fi in bun na aRushelima, in se ni ira awon ni itu iya Adakunom ntong, nda-abik wat in di sok, 18in di aTisa na tsin cɛɛt, a fɛ̀ ni imi, ‘Nye ziri da won aRushelima yɔkɔnɔng, nek ba da nɔɔk atsak ikyɛng fi ngɔn da ka ba tak azaton hom awo.’

19“Imi fɛ̀ ni wu, ‘ATisa, banet bang rēn fok imi teng ni in kuus narɔ inyiis baYahuda, nek itosok ni ites bayɔng fɛ́ ba nɔɔk atsak ni ngɔn ari inyang. 20Ama anɔng, ni izen fɛ́ ba kin nosong nasok aIstifanus, imi kin nyeseng azɔng ayɛt irun ama ikyɛng fɛ́ ba kin nye, ni itosok ares bayɔng fɛ́ ba kin se ni ifɛt wu.’

21“Ama anɔng, aTisa fɛ̀ ni imi, ‘Tseng, imi da ka tom yik-yik sak ni Ícɛn-iduk.’ ”

ABulus nggon mben aRoma

22Kudyɛng banet e woso di wes ato ni wu ma sak ni kucɛɛt wu kang. Ama anɔng, ba ta ntɔ bá ye, “Na ba wey na anet yong azatse! I se gyat na ba won ayong ni kutset awo!”

23Ni izen fɛ́ ba se ni itang nkun, na ba woro ares bá naton, na ba tang ntong naton, 24agbat-agbat batsom e fɛ̀ na ba nɔ na aBulus ni wɔp batsom. A sak fok na ba ku nye ahwyereng, nɔng ba bin sɛ ba di rēn ikyɛng fi isak banet e di tang nkun ni wu anɔng. 25Ni izen fɛ́ ba mi ku rosom ba da kpa ku zim, aBulus fɛ̀ na akɔk-ashon batsom e fɛ́ a se ni nyeseng azɔng, “Ntsi nɔɔk irèn na ba hwyereng nggon mben aRoma dang na ba ka ka tsɛɛt ishɔt ɛ?”

26Ni izen fɛ́ akɔk-ashon batsom e fok anɔng, a tse a sɛ agbat-agbat batsom e, a tse a ku tak. A ku rip, “Akyɛ fi ngɔn da nye yɛ? Anet yong yet nggon mben aRoma.”

27Agbat-agbat batsom e tse a se aBulus, a ku rip ye, “Di tak, ngɔn yet nggon mben aRoma yɛ?”

ABulus fɛ̀ ni wu, “Ey.”

28Agbat-agbat batsom e fɛ̀ ni iwu, “Imi fɛt itsɔm dot in da ni in di sɛ kusot nggon mben.”

Awɛt aBulus fɛ̀ ni wu, “Imi ba di tes ayɛt de.”

29Nek anɔng, bayɔng fɛ̀ ba tsɛt ba kpa ku nyes nrisim e, wat ba kɔrɔk kurɔm. Agbat-agbat batsom e ice wu nnyim ku yit, ni izen fɛ́ a rēn fok iwu mi rosom aBulus nggon mben aRoma ni ndun.

ABulus ashon kazumung bashɔn

30Akatson, nek agbat-agbat batsom e shim a rēn kpaf ikyɛng fi isak baYahuda di tang nkun na aBulus, a sak ba ku bisik ndun, a sak agbat àware, nɛ kazumung bashɔn na ba nyim. A tun aBulus, a sak na a nyeseng ashon bá.

Currently Selected:

Ntomong Batom 22: IbaasNT

Highlight

Copy