1 BaKorinti 15
15
Idorok Anet-Isheshek ni iku
1Yɔkɔnɔng, ábaruneng, won in ki yiring yin ne ni ifɛ̀ itek fi in kin ki shara yin e, iyɔng fi ishan yin, ibereng yin ikuus ye gak. 2I yet nek ifɛ̀ itek e deng de fɛ́ ba da ki sheshek yin, ki ibereng yin gak ifɛ̀ fi in ki shara yin e me. Kɛ da anɔng awo, inɔɔk atsak yin isot abap.
3Nek ikyɛng fi in shan, ide de fi in ki nɔɔk yin, nek in wat kaakyi itek, fok, Anet-Isheshek ku nek anɛn yin, i se anɔng ni jɛk ni fumung Adakunom, 4ye ba ku nɛt ni rɛk, ba ku donong ni kunom kufɛ́ taat, kyɔn tɛ kufumung Adakunom fɛ̀, 5a ma tonong ice wu sak na aKefas, ngma ni kusɔk abe afaa me bà. 6Ama anɔng, a tonong ice wu sak ne bafi ikuus anakat atoon ni izen izining. Dot ayɛt ba se ni kutset yɔkɔnɔng, ngma ne anɔng bakak ba mi kus. 7A ma tonong ice wu sak na aYakubu, ama me kong sak ne batom ngma, 8Ama me ngma, a ma tonong ice wu sak ni imi, imi fi in se tɛ nggon fɛ́ ba tes izen dang nye.
9Nek imi wu in yet a wosong ayɛt batom e, da in kyem na ba di yes atom ngma awo, nek in zoot bafi ikuus Adakunom. 10Awɛt nek itek Adakunom wu fi i sak in yet ikyɛng fi in yet, itek wu sak ni imi se na abap awo. I sak, in ra kutomong ne agap in wat batom e ngma, da imi wu in di ra kutomong e awo, tit itek Adakunom e yɔng fi i se ayɛt hom. 11Nek anɔng, ke na yet imi fi in tsin shara ifɛ̀ itek e me yɛ kɛ iba ayi, ikyɛng e de fi in shara yit ngma, i yet ni na fi i di nɔɔk yin atsak.
Idoro nkom
12Ke yɔkɔnɔng fi in shara ifɛ̀ ye ba donong Anet-Isheshek ni iku, akyɛ sak fɛ́ bakak ayɛt yin nye fok vit idoro bafaben ɛ? 13Ke vit idoro bafaben, idɔng tonong fok ba mi donong Anet-Isheshek ni iku awo. 14Ke da ba mi donong Anet-Isheshek ni iku awo, ki ishara ifɛ̀ yit sot abap, ki inɔɔk atsak yin i sot abap bà. 15Ki i sot in nɔɔk yit kanu mbɔɔs naton Adakunom, nek in fɛ̀ yit fok Adakunom donong Anet-Isheshek ni iku. Awɛt ki i yet atsak, vit idoro bafaben, ki i sot Adakunom donong Anet-Isheshek ni iku awo. 16I fi iyet fok vit idoro bafaben, ki i sot ba mi donong Anet-Isheshek ni iku awo. 17Ke da ba donong Anet-Isheshek ni iku awo, ki inɔɔk atsak yin i sot abap, ki irēn resek yin ayɛt anɛn yin. 18I ti sot bayɔng fɛ́ ba kus ayɛt Anet-Isheshek mi wey. 19Ki ite iyɛ yit na Anet-Isheshek fi i yet nek kutset yɔkɔnɔng kyɛk, ki in sot yit ikyɛng angmishish in wat yit ishɛrɛp banet ngma.
20Awɛt atsak e yet, ba mi donong Anet-Isheshek ni iku, anɔng e tonong tsɛngtsɛng fok ba bi donong bayɔng fɛ́ ba man kus bà, ti icá akon imɛsɛng e. 21Kyɔn ti fi iku ne na anet awe, anɔng bà idoro bafaben ne na anet awe. 22Kyɔn tɛ ngma iku ne nek Adamu, kpaf anɔng bà ba bi donong ngma nkom nek Anet-Isheshek. 23Awɛt kaangan bi dorok ni izen wu; Anet-Isheshek yet afi imɛsɛng e, wat ama me, izen fɛ́ a bi bɛ́, ngma bayɔng fɛ́ ba yet bafuu bi ku kuus mo. 24Ama me kong ki igang e bɛ́, ama fɛ́ Anet-Isheshek mi wey ne naban-abik, nɛ bágwɔm nɛ bafi ice, na ma nabak Adakunom Ada igwɔm e.
25Nek i se gbing-gbing Anet-Isheshek na a ya igwɔm, sak ni izen fɛ́ Adakunom sak bafi ifa ni wu, ba sot aben atak wu. 26Afi ifa igang e fɛ́ ba da wey ni ye yet iku. 27Kyɔn ti i se ni fumung Adakunom ye, “Adakunom te kaakyi ikyɛng na aben atak wu.” Di yin, ke ba fɛ̀ fok, “Kaakyi ikyɛng” nawop wu, idɔng tonong fok Adakunom se ayɛt e awo, nek a yet iwu wu fɛ́ a te kaakyi ikyɛng e nawop Anet-Isheshek me. 28Ama fɛ́ Adakunom mi sak kaakyi ikyɛng nawop wu. Arim me ice wu da sak ice wu nawop Adakunom, ayɔng fɛ́ a sak kaakyi ikyɛng nawop wu, nɔng Adakunom bin ya igwɔm naton nkyɔrɔk ngma.
29Ki i fi yet fok vit idoro bafaben, akyɛ yet ikyɛng i sɛ sak na bayɔng fɛ́ ba ka ba ra abatisma azaton bayɔng fɛ́ ba mi tsang kus ɛ? Ki i yet atsak fok vit idoro bafaben, akyɛ sak ba ra banet abatisma azaton bayɔng fɛ́ ba mi kus e yɛ? 30Awɛt iyit, akyɛ sak fi in da te yit ice yit nanu kawɛy kaakyi izen ɛ? 31Ábaruneng, in yɛrɛ iku kaakye kunom. In fɛ̀ anɔng na katsak e, nek in tsot kugwɔm ni iyin, nek imoon yin ifidang ne Anet-Isheshek aYeso aTisa yit. 32Ki in kɔn ni inyam ayit na Afisa nek kuyiring anet awe, akyɛ da yet izang hom, ki vit idoro bafaben ɛ? Ke anɔng,
“Won ni in ya yit ni in sɔ yit,
nek katson in da kus yit.”#15:32 Ban di yin: AIshaya 22:13.
33Won ba bi ki wɔrɔk yin awo. “Kusot ne banet baduk beseng nggɔn ntek.” 34Bun yin ni nhwyɛ yin, da wosong yin iras inɛn. Nek bakak ayɛt yin da ba rēn Adakunom awo. In fɛrɛng anɔng nɔng i da bin fok yin nsum.
Kuri kurɔm fɛ́ ba bi doro ni iko
35Awɛt akak da kyem a nye irip fok, “Ba bi donong nkom anɛ? Akyɛ kuri nrɔm ko fɛ́ ba bi nes ɛ?” 36Kushɔp! Ikyɛng fi itup, kyem i tang awo, tit i ku ninyen. 37Ikyɛng fi itup iye ija kyɛk, da ngma kurɔm e yɔng fi ku da rasak ama me awo, ke na yet ica alikama kɛ ica ikyi ikak zɛɛt ayi. 38Awɛt Adakunom nesek ica me nrɔm fi iwu shim, kaakyi ica ni kuri kurɔm fi ku se kpaf ni iye. 39Inam ngma da i yet kuri kuzining e awo. Nfɛ́ banet awe se zɛɛt, nfi inyam se zɛɛt, nfi nanon se zɛɛt, nfi ìzos se zɛɛt bà. 40Nkyɔrɔk azanɛn di se, nkyɔrɔk azatse di se bà. Awɛt kusas nkyɔrɔk azanɛn se zɛɛt, kusas nkyɔrɔk azatse se zɛɛt bà. 41Kusas kunom se zɛɛt, kusas kufen se zɛɛt, ni kusas ádat se zɛɛt bà. Àdat akak sas zɛɛt aza akak.
42I se kpaf anɔng ni idoro bafaben. Kurɔm fɛ́ ba nɛt iko aben ti ija ku bush, ba donong iko vit ibush. 43Ba tup iko ayɛt kurat, awɛt ba donong iko ayɛt ízɔk. Ba tup iko ayɛt avit agap, awɛt ba donong iko ayɛt agap. 44Ba tup iko ayɛt kurɔm anet awe, awɛt ba donong iko ayɛt kurɔm abik.
Ke kurɔm anet awe di se, idɔng tonong fok, kurɔm abik di se bà. 45I se anɔng ni kufumung Adakunom ye, “Anet afi imɛsɛng e, Adamu, a sot ikyɛng itsɛt.”#15:45 Ban di yin: Imɛsɛng 2:7. Awɛt Adamu afi igang e, a yet Kabik fɛ́ ka nesek kutset. 46Ikyɛng fi i tun ne yet kurɔm, kabik da nɛ ka di kuus ama. 47Ba nye Adamu afi imɛsɛng e ni ntong azatse, awɛt afɛ́ faa me ne azanɛn. 48Banet fɛ́ ba yet bafɛ́ azatse ba se kpaf tɛ bayɔng fɛ́ ba ka ba nye ni nse anet awe. Awɛt bayɔng fɛ́ ba yet bafɛ́ azanɛn, ba se kpaf tɛ bayɔng fɛ́ ba ne azanɛn. 49Kyɔn ti fi in di se yit yɔkɔnɔng ayɛt nse anet awe, atuk kakak in bi se yit ayɛt nse bafɛ́ azanɛn.
50Ábaruneng, in tsin ki tak yin fok, kurɔm nɛ nasok da kyem inɔ ni igwɔm Adakunom awo, kɛ kurɔm fi ku bush ni ku ya itekari kurɔm fi da ku bush awo. 51Fok yin, in tsin ki tak yin atsak e fi i se ni nɛt ye: Da ngma yit fi in da kus yit awo, awɛt ngma yit ba bi shesheng nse yit, 52ta izining, tɛ i te kparam ayisi, ni i fɛp igba ifi igang e. Nek ba bi fɛp igba, na ba donong nkom ni kuri nrɔm fi da na bush awo, na ba shesheng nse nrɔm yit. 53Nek i se gbing-gbing na ba shesheng kurɔm kang fi ku bush sak ni kuyɔng fi ku bush awo, na ba tɛ ba shesheng kurɔm kang fi iku ni kuyɔng fi da ku ku awo. 54Izen fɛ́ ba shesheng kurɔm e kang fi ku bush ni kuyɔng fi da ku bush awo, ba tɛ ba shesheng kurɔm e kang fi ku ku ni kuyɔng fi da ku ku me awo, ni izen e me yɔng fi ifɛ̀ dɔng fi i se ni jɛk da shining ye, “Ba mi ngɔnɔng iku, ba mi ya awɛng naton iku.”#15:54 Ban di yin: AIshaya 25:8.
55“Wo iku! Iya awɛng ngɔn e akɛ?
Wo iku! Agap imaan banet ngɔn e akɛ?”#15:55 Ban di yin: AHosiya 13:14.
56Iku sɛ agap imaan banet ni inɛn, inɛn kong i sɛ agap ye ni Ntsi 57Awɛt ifeng sak na Adakunom, iwu fɛ́ a ki nesek yit awɛng ayɛt aTisa aYeso Kristi.
58Nek anɔng, ábaruneng hom, nyeseng yin gak, da ikyi ikak bi ki te digit yin awo. Nɔk yin ace yin ngma kaakyi izen ni ra kutomong aTisa, nek i rēn yin fok kutomong yin sak na aTisa yet kufɛ́ abap awo.
Currently Selected:
1 BaKorinti 15: IbaasNT
Highlight
Copy
Compare
Share
Want to have your highlights saved across all your devices? Sign up or sign in
© 2019 The Nigeria Bible Translation Trust and © 2019 Wycliffe Bible Translators, Inc.
