Mathêu 24

Chuaq Jêxu Anoi Bìac Haq Wìh Hlài

(Mŏc 13:1–2; Luc 21:5–6)

1Chuaq Jêxu loh enh Hnem Cùh Waiq padon lam. 'Bài mangai hŏc tiaq patô ca Haq dìq ca bìac broq lem da Hnem Cùh Waiq. 2Mahaq Chuaq Jêxu doi ca wì: “Pì i hnoq dìq ca bìac 'mat ùh? Joq 'nàng Au doi ca pì, ùh jah i mòiq toq hmu leq ŏi raxon enh 'nhèq ca hmu 'noiq, ma ùh taclìh dŏng.”

3Jò Chuaq Jêxu 'nang ha'ngui ta wang Ôliu, mangai hŏc tiaq trùh crài ti Haq, bòch Haq: “Xìn Chuaq doi ca nhèn, jò leq bìac aih jah trùh? I ca teo patô leq đòiq patô ca nhèn bìac Ìh trùh hì ma atìq lùch?”

4Chuaq Jêxu tèu wì: “Thê pì wèq dađeh, apaq đòiq mangai leq padô 'nùt pì. 5Ma jah 'màng aih i bàc ngai lam trùh patìah ca hiniq Au, doi: ‘Au Crich.’ 'Màng aih padô 'nùt bàc ngai. 6Pì jah tàng anoi trùh bìac tajêh poh gùng haten, wa bàu anoi trong tajêh poh gùng hangai. Khòh wèq dađeh, apaq yùq crè, ma jah 'màng aih bìac aih phai trùh, mahaq 'nhòq trùh hi atìq lùch. 7Jàn cô ta'blêq ca jàn tau, Diac tau ta'blêq ca Diac tì. Bàc gùng i bìac pangot hrah wa taneh dalàc. 8Mahaq bìac aih toq baxèm jò nan xa càn.

9“Khoi èh, wì jah rùp càt pì, jêh đac pì, rìm Diac git ca pì taiq pì canòm ca hiniq Au. 10Jò aih bàc ngai ùh enh tiaq hòm, blòq dèh oh daq wa git ca dabau. 11'Bài mangai amòng capoch bàu loq adroi, jah padô 'nùt bàc ngai. 12Bìac dù jah bàc tam, 'màng aih bìac loq waq ca dabau pi i hòm. 13Mahaq mangai leq cajap manoh trùh lùch, jah dèch haq. 14Bàu Lem cô da Diac Boc Plình hi jah anoi hlài ca rìm jàn jàp ta crŏng taneh. Jò aih bìac atìq lùch da crŏng taneh jah trùh.

15“Jò pì jah hnoq bìac 'mèq 'mac hech hoch ŏi ta nòi Hadròih,#Đan 9:27; 11:31; 12:11. 'màng ca Đa-ni-ên mangai capoch thai Boc Plình khoi doi adroi, cabô leq đŏc phai hèm. 16Cabô 'nang ŏi ta gùng Juđia, cadàu tŏc ta wang beq. 17Mangai leq ŏi ta cùa hnem phai cadàu, apaq loh yŏc cùng hang ta hnem. 18Mangai leq ŏi ta đùng hadai, apaq hlài ta hnem yŏc eo. 19Ta 'bài hì aih nan xa am ca gu cadrì ŏi jiang wa ban con nga. 20Pì phai waiq khàn đòiq ùh nhet cadàu lam jò ralìm loq Hì Sabat. 21Jò aih jah i bìac nan xa càn, enh jò baxèm broq plình crŏng taneh trùh manàiq, 'nhòq lah i 'màng aih. Atìq ca aih xôq pi i hòm.

22“Tàng 'bài hì aih ùh yi 'biaq, ùh i mòiq ngai leq jah ŏi rìh, mahaq taiq mangai khoi jah ràih, 'bài hì aih khoi jah yi 'biaq. 23Jò aih, tàng i cabô doi ca pì: ‘Cô Crich ŏi ta cô,’ loq ŏi ta tau, ‘apaq lùi.’ 24Ma jah 'màng aih bàc Crich amòng wa mangai amòng capoch bàu Boc Plình broq trong halac càn. Tàng gleq jah, wì haq hadai lam padô 'nùt 'bài mangai khoi jah ràih. 25Cô, Au doi adroi am ca pì:

26“Tàng wì doi ca pì: ‘Haq ŏi ta nòi đùng hawit, apaq lam trùh.’ Cô, ‘Haq ŏi trom hnem.’ Apaq lùi. 27Ma jah 'màng aih, 'màng ca camlet xreo enh pah mat mahì loh trùh mat mahì mùt, bìac Con Mangai trùh hadai 'màng aih. 28Nòi leq i ngè cachìt, nòi aih bàc chìm cliang kèn tagop.

29“Atìq ca hì nan xa aih,

“ ‘tajòi 'mòi mat mahì loh ca clam,

mat khê pi 'ngah,

'bài halŏng clìh enh plình

wa cwìang itai ŏi ta plình dalàc.’#Êsai 13:10; 34:4.

30“Jò aih i teo Con Mangai mahno loh ŏi ta plình, dìq ca con mangai ŏi crŏng taneh loh ca mango, crò hmoi, jò hnoq Con Mangai loh ŏi ta yùc xam can cwìang itai 'ngah 'ngai càn. 31Haq thê 'bình plình hlôi dêh atêh ken, 'ràng tagop mangai Haq khoi ràih loh enh pôn pah dìq ca crŏng taneh.”

Bàu Alìah Bìac Long Pŏc

(Mŏc 13:28–31; Luc 21:29–33)

32Ngan bàu alìah ca long pŏc beq. Jò hamenh long loh hamŏng chet hla, aih pì loq ten trùh jò padrang. 33“ 'Màng aih jò pì hnoq bìac cô, pì loq Con Mangai ten trùh. Haq 'nang yòng enh gùng ca 'mang. 34Joq 'nàng Au doi ca pì: Xinoi cô ùh cwa adroi jò bìac tau 'nhòq trùh. 35Plình crŏng taneh cô èh jah hnhung, mahaq bàu Au capoch ùh jò leq hnhung.”

Hì wa Jò Chuaq Trùh

(Mŏc 13:32–37; Luc 17:26–30,34–36)

36“Mahaq hì wa jò aih, ùh i ca mangai leq jah loq. 'Bình Plình ŏi ta plình ùh loq, Con hadai ùh loq, toq Baq loq hêq. 37Tìah da hì Noah 'màng leq, hì da Con Mangai hadai 'màng aih. 38Ma jah 'màng aih adroi ca diac càn wì caq, wì ôq, wì ta'nèp ŏng mai, trùh hì Noah mùt ta bong, 39wa wì ùh 'nì cacleq trùh jò diac càn trùh, hapùih đac dìq ca mangai. Jò Con Mangai trùh, hadai 'màng aih. 40Jò aih i baiq ngai gu calô ŏi ta đùng, jah yŏc mòiq ngai, èh đòiq mòiq ngai ŏi hlài. 41I gu cadrì baiq ngai 'nang xai 'mau, jah yŏc mòiq ngai, èh đòiq mòiq ngai ŏi hlài.

42“ 'Màng aih phai rìu hmàng, pì ùh loq hì leq Chuaq da pì trùh. 43Pì loq, tàng craq hnem jah loq adroi jò leq mangai atùng padon mùt ta hnem haq, haq rìu ngan, ùh am pùng panàt mùt dèh ta hnem. 44'Màng aih, pì hadai phai padon, ma jah 'màng aih Con Mangai trùh ta jò pì ùh ngò.

45“Mangai leq broq hapŏng ma i manoh loq wèq dèh bàu wa rabiaq, craq haq thê haq wèq wì hapŏng ta hnem. Rìm hì haq padon am ca wì dahwèq caq troq jò. 46Xôq ramŏt ca hapŏng aih, jò craq haq trùh, hnoq haq broq 'màng aih. 47Joq 'nàng au doi ca pì, craq haq am ca hapŏng aih cwìang wèq dìq ca bìac craq haq. 48Mahaq tàng hapŏng dù hèm ta manoh: ‘Craq au dùnh men trùh,’ 49'màng aih, haq blai wì ma broq hapŏng pajùm ca haq, hi ôq wa caq ti mangai dù. 50Craq haq jah lam trùh ta hì haq ùh ngò wa jò haq ùh loq. 51Craq haq baxa haq hlàc hlac cađac haq enh gùng ŏi ti 'bài mangai bàu lem, manoh dù. Aih nòi i hmoi crò wa cadrit hanenh.”

Currently Selected:

Mathêu 24: HreB

Highlight

Copy