Rimluğo 16
16
P'avelen izi çalxalt'oğoynak' dirist'uğe yaq'absa
1İsəəl və̌x beşi xunçi Fiba çalxest'az. Beşi me xunçen K'enxreya şəhəre İsusa Çark'est'al k'inək' q'abulbit'oğoy icmin əşurxo taşalt'oğone köməybsa. 2Kot'o efi s'iya görə q'abulbanan, ak'est'anan efi Q'ončuğon c'ək'p'i İzi bit'oğoxun baksuna. İçu köməy lazım bakayin köməybanan, t'etər banan izi hik'k'ala eht'iyəc maq'an baki. Kot'in için gele amdarane köməybe, zuval içoğoy boş.
3P'risk'ila q'a Ak'ila dirist'uğ upanan, şoroxal zaxun barabar İsus Xrist'osi tapşurbi əşlə bex p'ap'esp'alt'oğoxunt'un. 4Za görə içoğoy elmoğo laxiyoroxe şorox, sa zu tezu şot'oğoy q'ədirə avabakalo, q'erəz azuk'axun İsusa Çark'est'al k'inək' q'abulbit'oğoy icmoğoy bitot'in şot'oğoy bit'oğo eyexun c'evtet'unksa. 5Şot'oğoy k'oya gireğala xunçi-viçimoğoval bitova zaxun dirist'uğ upanan.
Bezi muč'a dost' Ep'enet'al dirist'uğ upanan, Aziya bölginə Xrist'osa Çark'est'al k'inək' q'abulbiyo süft'ə şone bake.
6Mariyaynak'al dirist'uğez yaq'absa, və̌ynak' gelene biyo şot'in.
7Zallarik' içoğost'al iudey p'iyaxun bakalt'oğo, zaxun sagala türminə arśi Andronik'a q'a Yuniyal dirist'uğ upanan. Ap'ost'olxon şot'oğo şaat't'un çalxsa, zaxun běšt'un şot'oğon Xrist'osi laxi yaq'en tağalt'oğoxun bake.
8Amp'liyat'eynak'al dirist'uğez yaq'absa, İsusa laxi yaq'en tağalt'oğoxun bakala bezi ke viçey xətirə gelez çuresa.
9Urbana dirist'uğ upanan, şoval yaxun barabar Xrist'osi tapşurbi əşlə bex p'ap'esp'alt'oğoxune. Bezi muč'a dost' St'axisal dirist'uğez nex.
10Ap'elleseynak'ez dirist'uğ yaq'absa, İsusa Çark'est'al k'inək' q'abulbit'uxun oşa izi bel nu hari əş tene mandi şot'ay, ama p'urumal izi tağala yaq'axun tene c'eri şo. Arist'obulaxun sa k'ojin oq'a bakalt'oğoval dirist'uğ upanan.
11İçust'al iudey p'iyaxun bakala Gerodioneynak'al zaxun dirist'uğe bu. Nark'isaxun sa k'ojin oq'a bakalt'oğoy boş İsusen laxi yaq'en tağalt'oğoval dirist'uğez nex.
12 Q'ončuğoy s'iyal içoğo sal sa əşləxun qoş nu duğala T'rifena q'a T'rifosal zaxun dirist'uğ upanan. Bezi muč'a xunçi P'ersisal dirist'uğez nex, şot'inal Q'ončuğoynak' gele əşe biq'e.
13 Q'ončuğoy tapşurbi əşlə bex p'ap'espseynak' iz elmoğo laxala Rufeynak'al zaxun dirist'uğe bu, c'ək'eśi viçine şo. İzi nanal zaxun dirist'uğ upanan, zaynak' nanaluğe be şot'in.
14Asink'rit'a, Flegont'a, Germesa, P'at'roba, Germasa saal şot'oğoy bel gireğala mandi xunçi-viçimoğoval bitova zaxun dirist'uğ upanan.
15Filologusa q'a Yuliya, Nireya q'a izi xunça, Olimp'a saal şot'oğoy t'ǒğǒl bakala mandi Buxačuğon c'ək'p'i İzi bit'oğo dirist'uğez nex.
16Suna ak'at'an ç̌oyexun muçp'anan ki, efi Buxačuğoy külfətəxun baksuna ak'est'i bakanan. Miya İsusa Çark'est'al k'inək' q'abulbit'oğoy icmoğoxun bitot'uxun və̌ynak' dirist'uğe bu.
17Ay xunçi-viçimux, xoyinšezbsa, və̌x suna bast'un çureğalt'oğoxun, və̌x zombit'oğo fırıdi q'erəz cürə uk'alt'oğoxun və̌x běğanan. Amdarxo düz yaq'axun c'evksun çureğaloroxe şorox, metərt'oğoxun ə̌xil çurpanan. 18Mot'oğon beşi Q'ončux Xrist'osi tapşurbit'oğo bex p'ap'espseynak' təə, içoğoy tapaneynak't'un əşpsa. Amdarxoy xoşel eğala əyitmux pi, şot'oğoxun muč'a-muč'a əyitp'i usum feret'p'akalt'oğoy haq'ılat'un başq'sa şot'oğon. 19Düze, efi düz yaq'axun nu c'eysuna bitot'in avane, mot'o görəl gele mǔqzu. Ama p'urumal, běğanan ki, efi pulmux şaat'eynak' qay, piseynak' isə q'ic'q'an baki. 20T'e vədə yaynak' serluğ eçala Buxačuğon usumluğen Şeytana beşi turin oq'a laxi ç̌axç̌uxp'est'ale. Barta beşi Q'ončux İsusen İzi şaat'luğa və̌xun kammaq'anbi.
21Miya zaxun sagala əşp'ala T'imot'eyen q'a içoğost'al iudey p'iyaxun bakala Luk'iyan, Yasonen saal Sosip'at'ren və̌x dirist'uğt'un nex.
22Me namak' şi kiine śamesasa, şot'oxunal və̌ynak' dirist'uğe bu, yəni zaxun, Q'ončuğoy laxi yaq'en tağalt'oğoxun bakala efi viçi T'ert'inaxun.
23Za izi k'oya q'onağbi, İsusa Çark'est'al k'inək' q'abulbit'oğoy gireśi sagala arśes bakseynak' izi ç̌omxo qaypi Gayenal və̌x dirist'uğe nex. Şəhəri xəzninə běğala Erast'axun q'a İsusi laxi yaq'en tağala Kvart' viçəxunal və̌ynak' dirist'uğe bu. 24#16:24 Bəzi kiinśamurxost'a miya me əyitmuxal bune: "Barta beşi Q'ončux bakala İsus Xrist'osen İzi şaat'luğa və̌xun kammaq'anbi."
Buxačuğo alxışq'anbaki
25Alxışq'anbaki Buxačuğo, beşi ük'e metər sa věluğ laxi yax umud tadalone Şo! Bezi car sakala Mǔq Xavar mone, bezi karoozbi İsus Xrist'osi barada uk'alorox bito Buxačuğon baç̌usenxon yaxun c'ap' efiyoroxe, 26isəne ç̌oyel c'evksa. Şot'ay əmirene baki mo, Şot'in İçine çureśi ki, xavareçalxon Ǐvel Śamen p'ap'espsun çureśit'oğo azuk'xoy bitot'inq'an ibakes baki. İçoğoy ibakit'oğo věbakiyal İzi əyitenq'at'un taśi. 27Tək Buxačuxe Şo, müdrikxoxun müdrik bakalone, İsus Xrist'osi s'iya beşi muzel eçeri alxışyanbsa Şot'o həysəəl meyin oşa həmişəl! Ammen!
Currently Selected:
Rimluğo 16: udi
Highlight
Copy
Compare
Share
Want to have your highlights saved across all your devices? Sign up or sign in
© Translation Services International Ltd.