Rimluğo 1
1
1Xeyirq'an baki! İsus Xrist'osi nökər, Buxačuğon İzi Mǔq Xavara amdarxo p'ap'esp'eq'an pi c'ək'p'i ap'ost'ol P'avelene śame və̌ynak'. 2Buxačuğon xavareçalxo saturběš avabakest'i, Ǐvel Śame boş şot'oğoy muzin yax əyit tadi me Mǔq Xavar 3-4İzi Ğara, beşi Q'ončux bakala İsus Xrist'osa yax çark'est'eynak' me dünyəne yaq'absuni Mǔq Xavare. Sa amdar k'inək'e hari Şo me dünyəne, "Davidi nəsiləxune" pit'un çalxi Şot'o, ama Şot'ay Ǐvel Urufi zoren běyinbaksunen ak'esedi ki, Buxačuğoy Ğare Şo, ext'iyər İzi kiyel tadeśiyone! 5Şot'ine yax İzi şaat'luğa ak'est'i ap'ost'ol bakseynak' c'ək'p'est'e, c'ək'p'est'ene ki, taśi me Mǔq Xavara dünyəne bakala azuk'xoy bitot'u p'ap'esp'i Şot'ay s'iya alabayan. Amdarxonal Şot'o věbaki Şot'ay əyitenq'at'un taśi. 6Və̌nal bunan t'e c'ək'eśit'oğoy boş, İsus Xrist'osen tades bakala çark'esuna ak'it'oğoy siyəyin boşe efi s'iyur.
7Mone, Buxačuğoy ük'e bask'i, Şot'ay ı̌vel azuk' bakseynak' c'ək'eśi rimluğoynak'ez śame me namak'a. Barta beşi bitot'ay Bava bakala Buxačuğon q'a beşi Q'ončux bakala İsus Xrist'osen və̌xun İçoğoy şaat'luğa kammaq'at'unbi, barta və̌ynak' arxayinluğq'at'un eçeri.
P'aveli rimluğo aksun çuresun
8Samci, İsus Xrist'osi s'iya duği bezi Buxačuğo şükürezbsa ki, və̌n bunan - Mǔq Xavara věbakiyorox, şot'o q'abulbi İsusi laxi yaq'en tağalorox k'inək'e t'ap'esa efi bitot'ay s'i dirist' dünyəne! 9Buxačuğoy běšez nex və̌x me əyitə, İzi Ğare Mǔq Xavara parcbseynak' lazım bakayin lap bezi ük'ə c'evk'i tadala Buxačuğoy běšez nex ki, zu və̌x həmişə eyexez bast'a. 10Hər afırık'at'anal bezi əyiti bul şone baksa ki, Buxačuğon bartiyniy hari və̌x sa ği azk'oy. 11Və̌x t'etər aksunez çuresa ki... Nexzu eğaz Buxačuğon bezi ük'e laxi Urufen tadala xeyir-bərəkətəxun və̌xal tadaz ki, ost'aar çurpes bakanan. 12Metərluğen zu və̌st'a, və̌nal zast'a bakala věluğa ak'i beşi ük'ə buz k'inək' efes baken. 13Ay bezi xunçi-viçimux, və̌x qay uk'az: hema kərəm hayzerez ki, efi t'ǒğǒl eğoz, hər dəfəl het'u görənesa tene haq'esay. T'eq'ədər çurezğoy ki, mandi azuk'xost'a ak'it'u hari və̌st'al ak'az, bezi car sakala me Mǔq Xavaren və̌x mani yaq'e q'ončux bsuna bezi piin ak'az. #1:13 Ap'ost'. 19:21
14Bit'ot'uz p'ap'esp'i buq'on zu me Mǔq Xavara: şot'o k'alpit'inal ibakalane, nu k'alpit'inal, girke ç̌oya qaypit'inal, nu qaypit'inal. 15Şot'o görəl, za mandayin ğez eğon Rima, hari kiya bakalt'oğoval p'ap'esezbon me Mǔq Xavara.
16Tez ot'psa zu bezi car sakala me Mǔq Xavaraxun, axıri çark'est'es bakala zore bu me Mǔq Xavarast'a. Buxačuğoxun eğala zore mo, Mǔq Xavara q'abulbi věbakit'oğoy bitova - süft'ə iudeyxo, oşal q'erəz azuk'xoxun bakalat'oğo çark'est'ala sa zor. #1:16 Mrk'. 8:38 17Me Mǔq Xavaren ak'esest'a ki, İsus Xrist'osa věbaki Şot'o Çark'est'al k'inək' q'abulbsunene yax Buxačuğoy běš təmizə c'evk'es bakon, q'erəz hik'k'alen. Ǐvel Śame boşal bune mo: "İçust'a bakala věluğen yəşəyinşest'ale düzgün yaq'en tağalt'u". #1:17 Hab. 2:4
Buxačuğoy İçu nu çalxalt'oğoy loxol əcuğon biq'sun
18Aneksa Buxačuğon alaxun - serina avabaksun şot'o nu aksuna laxala buxačuxsuzt'oğoy biq'ala pis əşurxo q'a əşp'est'ala günaxxoy sayco cazasuz tene mandal, ak'est'ale şot'oğo Buxačuğon İzi əcuğoy k'ə baksuna. 19Axıri Buxačuğoy Şu baksuna avat'un şot'oğon, mot'o ak'es bakala pule tade şot'oğo Buxačuğon. 20Mot'aynak' Şot'o İçu aksun lazım bateneksa, Şot'ay həmişəluğ sa zore q'ončux baksuna q'a İçust'a bakala buxačuxluğa q'amişakseynak' Şot'ay yaratmişit'oğo aksun bəse baksa! Me dünyəni binorina laxi ğinaxun amdarxoy piin běše morox bito, şot'o görəl saycət'in maq'an pi ki, p'oy tez avabake. 21Şot'ay Şu baksuna avabaksun Şot'o Buxačux pi İzi s'iya nu alabiyorox, Şot'o nu şükürbiyoroxe şorox. Mot'ay gala ams'i-ams'i şeymoğoy loxol fikirbsun çurt'unpi, k'ač'i manst'una c'ək'p'i bayinq'una tarak'aloroxe baki şorox! #1:21 Ef. 4:17-18 22İçoğo haq'ullut'un ava, ama q'amişakala şey butet'ux: 23həmişə bakala Buxačuğoy kalaluğa efet'un, taśi p'uri k'ule oq'a tağala insani, q'uşurxoy, bip' turin loxol tarak'ala heyvanxoy q'a xoreğala heyvanxoy suraten bakala binik' buxačuxxot'un bul k'os'psa.
24Şot'o görəl Buxačuğon şot'oğo tərebi ki, barta taśeq'at'un içoğoy ǰomoy tüşen, barta batk'eq'at'un içoğoy murdarluği boş oč'in boş batk'ala k'inək'. Şot'oğonal burt'unqi içoğoy bədənen çureğalt'oğo bi samalal irit'p'un əşur biq'sa. 25Morox Buxačuğon yax ak'est'i serina efi əfçin qoşt'an t'it'aloroxe, hər şeya Yaratmişit'u - barta həysə Şot'o həmişəluğ alxışq'anbaki pi, oşal ammen uk'en - t'ǒǒxbi Şot'ay yaratmişit'oğo bul k'os'p'aloroxe. 26Hamot'o görəl Buxačuğon zap'epi İzi kula şot'oğoy loxolxun, şoroxal taysun lap irit'p'unt'un baki, t'emat'un yaq'nuxun c'eri ki, çupuxxon işq'arxo barti burt'unqi içan sunaxun baksa, 27işq'arxoval haketər: işq'aren işq'ari loxole q'erəz piin běğsa burqi, işq'ar çuğoxun bask'ala gala işq'ar işq'araxune bask'i. Ama zap't'unne mot'ay cazina şot'oğon. 28Buxačuğo çalxsun nu çureśiyoroxe şorox, Buxačuğonal zap'epi İzi kula şot'oğoy loxolxun, pine barta isə taśeq'at'un běyn mayal śirik't'un taysa içoğost'a bakala me haq'ılen, barta me irit'p'un əşurxo biq'i samalal batk'eq'at'un. 29İçoğoy boş murdarluğen buy, pis yaq'en tağal, tamaxkər, pis əşur biq'seynak' həzir, paxıl, amdar besp'al, əş galdal, amdar feret't'al, əfçiduğal q'a əyit laçuvk'ali soğot'un baki şorox. 30Exlət avuzbal, Buxačuğo nifrətp'al, ç̌oboç̌u, içoğoxun irəzi, bitot'ay loxol alaxun oq'a běğal, t'iyə̌mit'ay tura zap'k'al q'a nana-bavay ǰomo nu běğala sa amdarxot'un şorox. 31Nə içoğost'a haq'ıl tene bu, nəəl tadi əyiti loxol çurpsun hik'ə tet'un ava; nə içoğoxun q'erəz şuk'k'ala çurtet'unğon, nəəl şuk'k'aleynak' ük' tet'un bok'osp'on. 32İçanal avat'un ki, düzgün bakala Buxačuğoy biin extenest'a metər əşurxo, Şot'ay k'anuna görə mot'ay caza bisun baksunal avat'un, ama p'urumal kultet'un haq'sa günax əşp'est'unaxun, hələ sa içoğollarik't'oğoy bač'aneyal çurt'unne.
Currently Selected:
Rimluğo 1: udi
Highlight
Copy
Compare
Share
Want to have your highlights saved across all your devices? Sign up or sign in
© Translation Services International Ltd.