Ǐvel mə̌ğurxo 118
118
118-ci Ǐvel mə̌ğ
1 Q'ončuğo şükürbanan, şot'o görə ki, şaat' bakalone Şo,
Şot'ay yax çuresun həmişəluğe, nu badalbakala çuresune şo! #118:1 1 Hadis. 16:34; 2 Hadis. 5:13; 7:3; Ezr. 3:11; Ǐvel mə̌ğ. 100:5; 106:1; 107:1; 136:1; Yer. 33:11
2Barta israilluğon peq'at'un:
«Şot'ay yax çuresun həmişəluğe, nu badalbakala çuresune şo!»
3Barta Aaronaxun bakit'oğon peq'at'un:
«Şot'ay yax çuresun həmişəluğe, nu badalbakala çuresune şo!»
4Barta Q'ončuğoy laxi yaq'en tağalt'oğon peq'at'un:
«Şot'ay çuresun həmişəluğe, nu badalbakala çuresune şo!»
5 Q'ončuğoz k'alpi zu bez t'ar ğine,
Şot'inal za inebaki, bez kiyexun biq'i irəətluğane c'evk'i.
6 Q'ončuxe zaxun bakalo, q'ı̌bala ga butezax,
Axıri insanen za k'ə bese bakon? #118:6 Ǐvel mə̌ğ. 56:4,11; Əbr. 13:6
7 Q'ončuxe zaxun, Şone za kul biq'alo,
Ak'oz zu bez düşmənxoy biti ç̌axç̌uxesuna.
8İnsana umudbaksunaxunsa
Q'ončuğo bač'an tarast'un şaat'e.
9S'ila amdarxo umudbaksunaxunsa
Q'ončuğo bač'an tarast'un şaat'e.
10Bito azuk'xone bez loxol eysay,
Ama Q'ončuğon za kule biq'i, zuval şot'oğo ext'i t'ǒǒxez boseri.
11Haq'layinşt'unbsay şot'oğon za hər tərəfəxun,
Ama Q'ončuğon za kule biq'i, zuval şot'oğo ext'i t'ǒǒxez boseri.
12T'at'e veçinen haq'layinşala k'inək'e haq'layinşey şot'oğon za,
Ama q'ari śaś bok'i əfçibakala k'inək't'un əfçibaki şorox,
Şot'o görə ki, Q'ončuğon za kule biq'i, zuval şot'oğo ext'i t'ǒǒxez boseri.
13Za t'etərt'un lik't'i ki, bist'axzuy zu,
Ama Q'ončuğon za enefi.
14 Q'ončuxe za zorba balo, Şone za mə̌ğpest'alo,
Çark'est'ale Şo bezi! #118:14 C'eys. 15:2; İsa. 12:2
15Mǔq səsure c'eysa düz yaq'a bakalt'oğoy k'ojurxoxun,
Düşmənə turin oq'a laxiyoroxe şorox,
Ak'esedi Q'ončuğon şot'oğo İz yön kiin bes bakalt'oğo!
16Alabene Q'ončuğon İz kula,
Ak'esest'a İz yön kiin bes bakalt'oğo!
17Tez biyal, dirist' mandi
Q'ončuğoy biq'i əşurxo bayanboz zu.
18Bǐhi cazane zapest'i za Q'ončuğon,
Ama bisa tene barti.
19Qaypanan zaynak' xrame darvazoğo,
Düzgünluğeynak' qay bakala darvazooxe mo,
Bartanan baśi Q'ončuğo şükürbaz zu.
20Mone, Q'ončuğoy běš taşala darvazooxe mo,
Düzgünt'oğoy bayes bakala darvazooxe mo.
21Şükürezbsa Va, ay Q'ončux, inbaki Hun za,
Çark'est'alen baki Hun bezi!
22Barizap'k'alxon t'ǒǒx boseri ǰě
K'ojin binorina efala ǰěne baki.
23Mo Q'ončuğoy əşey,
Beş piin běš baki mat mandala əşe. #118:22-23 Mat'. 21:42; Mrk'. 12:10-11; Luk'. 20:17; Ap'ost'. 4:11; 1 P'y. 2:7-8;
24Mone, Q'ončuğone yax me ğina aksuna q'ısmatbi,
İsə ekinan mǔqbaken, beşi ç̌oyenq'an axšumpi barta!
25Ay Q'ončux, çark'est'a yax,
Barta beş niyətxo bexq'an p'ap'i, ay Q'ončux! #118:25 Mat'. 21:9; Mrk'. 11:9; İoan. 12:13
26Bəxt'əvəre Q'ončuğoy s'iyen eğalo,
Xeyir-bərəkətyan tast'a və̌x Q'ončuğoy xramaxun! #118:26 Mat'. 21:9; 23:39; Mrk'. 11:9; Luk'. 13:35; 19:38; İoan. 12:13
27Beşi Buxačuxe Q'ončux, beş piyel işiğ eçeriyone.
Eçanan axsibaya šameğala q'urbana,
Ğač'p'i q'urban eçala gane loxol bakala mǔq'ǒğoy #118:27 q'urban eçala gane loxol bakala mǔq'ǒğoy - běğa: C'eys. 27:2 t'ǒğǒl laxanan şot'o.
28Bez Buxačux Hunnu, Va şükürboz zu,
Vi s'iya alaboz, ay bez Buxačux!
29 Q'ončuğo şükürbanan, şot'o görə ki, şaat' bakalone Şo,
Şot'ay yax çuresun həmişəluğe, nu badalbakala çuresune şo!
Currently Selected:
Ǐvel mə̌ğurxo 118: udi
Highlight
Copy
Compare
Share
Want to have your highlights saved across all your devices? Sign up or sign in
© Translation Services International Ltd.
