Məsəloox 5
5
Əxlagsuzluğaxun ə̌xil baka
1Bez ğar, bezi müdrikluğa fikir tada,
Bezi haq'ullu əyitmoğo ǔmǔxlaxa.
2T'e vədə q'amişaksuna ğaç̌eğalnu,
Avabaksunen əyitk'alnu.
3Q'ert'ay çuğoy muzexun uč'e barst'a,
İz exlət c'əyinəxun cügüne.
4Ama axırda ağune baksa,
P'ə̌tərəflu ğayin q'ılınc k'inək' ğayine baksa.
5Şot'ay turmoğon bisunane taşt'a,
Şot'ay lə̌ngurxon gərəmzinəne eşt'a.
6Yəşəyinşest'ala yaq'a fikir tene tast'a,
Şot'ay yaq' k'orine, sal içinal tene ava.
7Həysə, ay ğarmux, za ǔmǔxlaxanan,
Bezi ǰomoxun c'eğalt'oğo fikir tadanan.
8Metər çuğoxun ə̌xil baka,
Şot'ay k'ojin ç̌omo ı̌ša ma taki.
9Tene, vi cəyilluğaxunen bakon,
Vi ömürə zalımxon sərfbon.
10Vi bakalt'u q'ert'oğone ukon,
Vi q'azanc q'ert'ay k'oyane tağon.
11Vi ömüri axır p'ap'at'an,
Elmoğost'al hal nu mandat'an,
Vi bel t'api metəren uk'on:
12"Het'aynak'ez tərbiyinə nifrətbi,
Nəsyətxo het'aynak' tez q'abulbi!
13Bezi məəlimi əyitə tez běği,
Tərbiyə tadalxo tez ǔmǔxlaxi.
14İsəəl bütüm camaati piin běš,
Hörmətəxun bisti".
Vi çuğo ğaç̌ baka
15Təkc'ə vi orayini xenaxun,
Vi kərizi xenaxun ǔğə̌.
16Het'aynak'q'an vi orayini xe küçəmoğo,
Arxurxoy xe meydanxo bari taśi?
17Şorox saycə viq'an baki,
Q'ert'oğo ma payba.
18Barta vi orayin bərəkətluq'an baki,
Cəyil vədine vi lašk'oybaki çuğoxun mǔq yəşəyinşa!
19Vi çureğala maralen, gözəl ceyranen,
Həmişə va iz döşurxon boşevk'eq'an,
Şot'o çuresunen va finoğoy beq'an.
20Bez ğar, het'aynak' q'ert'ay çuğo bənd bakan,
Q'ert'ay çuğo q'ujbavax?
21Axıri amdarxoy yaq'mux Q'ončuğoy piin běše,
Şot'oğoy hər lə̌ngə yoxlayinşebsa.
22Şər amdar iz taxsıra görə biq'eğon,
İz günaxi torane ləc'üreğon.
23Tərbiyə nu baksunaxune biyon,
Kala q'ammaz baksunaxune yaq'a aç̌esp'on.
Currently Selected:
Məsəloox 5: udi
Highlight
Copy
Compare
Share
Want to have your highlights saved across all your devices? Sign up or sign in
© Translation Services International Ltd.
