Məsəloox 31
31
Padçağ Lemueli nanay əyitmux
1Padçağ Lemueli əyitmux, iz nanan şot'o zombiyorox.
2K'ə uk'az, bez ğar, ay zaxun baki ğar,
Bezi afırığo q'a elasxo ibaki za tadeśi ğar?
3Vi zora çupuxxoy,
Vi bacarağa me padçağxo əfçibalt'oğoy loxol ma çark'est'a.
4Ay Lemuel, fi ǔğsun padçağxo tene yarayinşbsa,
Finağoy baksunal kalaluğbalt'oğoynak' tene.
5Tene, ǔği q'ayda-k'anuna eyexun c'evt'unk'on,
Fağırxoy haq'q'a pozmişt'unbon.
6Finağoybala içk'inə
Əzyətin q'a dərde boş bakalt'oğo tadanan,
7Barta ǔği içoğoy kəsibluğa eyexun c'evk'eq'at'un,
İçoğoy dərdəl ene maq'at'un eyex badi.
8Muzsuzt'oğoynak' vi ǰomo qaypa,
Bütüm eht'iyəci boş bakalt'oğoy haq'q'a q'orişa.
9Vi ǰomo qaypi düzgün divanba,
Kəsibxoy, fağırxoy haq'q'a q'orişa.
Şaat' çuux
10Şaat' çuux şina bə̌ğə̌bon?
Şo toyexlu ǰěnaxunal dəyərlune.
11İz işq'ari ük' şot'oxun arxayine,
T'e çuğoxun şot'in zərəl tene zap'k'al.
12İz ömüri axıral śirik' işq'areynak' pisluğ təə, şaat'luğe eşt'a.
13Xaye, kətani şaat't'une c'ək'e,
İz kiyexun hər əş ayesa.
14Toyeğala mal eçala gəmi k'inək'e,
Ə̌xiləxune iz šuma eşt'a.
15Üşenen hayest'a,
İz külfəteynak' ukune həzirbsa,
İz çuux nökərxoval tanest'a.
16Q'oruğa běği şot'o haneq'sa,
İz kiin q'azancen t'ulluğe lasaksa.
17Sal sa əşləxun qoş tene çure,
İz kulmoğo q'ašampi əşebsa.
18Aneksa ki, iz haq'i-toyst'un şaat'e taysa,
Üşeyal iz çirağ tene ašt'a.
19İz kulmoğon juk'e fırıst'a,
Milurxo iz kiyexun tene tərbsa.
20Kəsibxoynak' iz kul qaye,
Fağırxo kule biq'sa.
21Ǐǰe eysun iz ailineynak' q'ǐ tene.
Şot'aynak' ki, bitot'in toyexlu p'ə̌ q'at paltare lape.
22İz döşəyeynak' ç̌one ěbsa,
İz paltar tünd č'oč'ane, nəzik' kətanaxune.
23İz işq'ar şəhəri darvazin t'ǒğǒl hörmətlü amdare hesabbaksa,
T'e oç̌ali ağsaq'q'alxoxune arśi-hayst'a.
24Metər çuğon haq'i-toydalxo için ə̌ldi q'ayinşxo q'a
Kətan paltarxone toyst'a.
25Zor q'a şərəf içust'ane,
İz gələcəyeynak' tene q'ı̌bsa.
26Şot'in müdrikluğene əyite,
İz ǰomoxun düzgün maslaatxone c'eysa.
27İz ailin əşurxo yaq'axe taşt'a,
Tənbəlluğ hik'ə tene ava.
28İz əyloğon sa səsen şot'o alxışt'unbsa,
İz işq'arenal şot'o tərifebsa:
29"Şaat' çupuxxo gelene,
Ama vi tay butene".
30Çuğoy şaat' ak'esun hər şey upsun tene, gözəlluğ ams'i şeye,
Saycə Q'ončuğo çalxala çuuxe tərifə layiğ.
31Şot'o iz kiin haq'q'a tadanan,
Barta şəhəri darvazin t'ǒğǒl iz əşurxon şot'aynak' tərifq'an eçeri.
Currently Selected:
Məsəloox 31: udi
Highlight
Share
Copy
Want to have your highlights saved across all your devices? Sign up or sign in
© Translation Services International Ltd.