Ams'i oç̌ala 23
23
Bileami samci kərəm israilluğoy barada Buxačuğoy əyitmoğon əyitpsun
1Bileamen Balaga pine: «Zaynak' memiya vǔğ dənə q'urban eçala ga düzbest'i, šamseynak'al vǔğ dənə arak' saal vǔğ dənə q'oç eğel eçest'a». 2Balagenal Bileami pi k'inək' bine. Şot'oğon hər q'urban eçala gala sa arak' q'a sa dənə q'oç eğelt'un q'urban eçeri. 3Oşa Bileamen Balaga pine: «Hun miya, me eçeri q'urbanxoy t'ǒğǒl çurpa, zu isə samal t'ǒǒx tağoz. Bərkə Q'ončux za ak'eśi İzi əyitə pine. Za k'ə uk'ayin, hari va avabakest'oz». Metər piyal şo ams'i sa təpinene laśi.
4Miya Buxačux Bileama ak'eśi, Bileamenal Şot'o pine: «Vǔğ dənə q'urban eçala gaz düzbest'i, hərt'ay loxolal sa arak' q'a sa dənə q'oç eğelez q'urban eçeri». 5Q'ončuğon isə Bileama k'ə upsun lazım baksuna zombi tapşurebi: «İsə taki, mot'oğo Balaga p'ap'esp'a». 6Bileam Balagi t'ǒğǒl qayebaki, hariyal Balaga q'a şot'oxun hari ağsaq'q'alxo eçeri q'urbanxoy t'ǒğǒl çurpine ak'i. 7Şo t'et'iya p'ap'ala k'inək' iz ǰomoxun Buxačuğon zombi əyitmuxe c'eri:
«Balagen, Moavi padçağen za Aramaxun,
Běğ c'eğala tərəf bakala buruxmoğoxune eçeri;
"Eki zaynak' İak'ova q'arğişp'a,
Me israilluğoy loxol q'arğiş śipa" pine.
8P'oy Buxačuğon nu ləənətbit'u zu hetər ləənətbaz?
Buxačuğon nu q'arğişbit'u zu hetər q'arğişbaz?
9Mone, q'ayoğoy belxun şot'oğoy loxolez běğsa,
Təpoğoy loxolxun şot'oğoz aksa!
Me azuk' iç sa ölkəne,
Sal sa azuk' şot'ay tay tene!
10İak'ovi nəsiləxun bakalt'oğo bǒq'ə̌lpsun q'ume dənoğo bǒq'ə̌lpsun k'inək'e:
Şot'oğoy bip' payaxun sunt'u tenan bǒq'ə̌lk'on!
Barta bez bisunal me düzgünt'oğoy bisunallarik'q'an baki,
Barta bez axıral mot'oğoy axırallarik'q'an baki!»
11Balagen Bileama pine: «Hun mo za k'ən bi? Zu va bez düşmənxoy loxol q'arğiş śipseynak'ez k'alpi, hun isə xeyir-bərəkəti şot'oğoxun kam nu baksunaxunen əyite!» 12Bileamen coğabe tadi: «Zu Q'ončuğon za pit'oğoz nex».
Bileami p'ə̌mci kərəm israilluğoy barada Buxačuğoy əyitmoğon əyitpsun
13T'e vədə Balagen şot'o pine: «Eki zaxun q'erəz gala tağen. T'et'iin azuk'a ak'es bakalnu, ama bitova təə, içoğoy çurk'ala gane sa t'ǒğə̌. Bezi əyitə oq'a ma saka, eki t'e ganuxun şot'oğo q'arğişp'a».
14Hametər, Balagen şot'o P'isk'a buruğoy bel bakala Śofim, yəni "běğala ga" uk'ala q'oruğane taşeri. Miya vǔğ dənə q'urban eçala ga düzbi, hərt'ay loxolal sa arak' q'a sa dənə q'oç eğelt'un q'urban eçeri. 15Bileamen Balaga pine: «Hun miya, me bok'osp'i q'urbanxoy t'ǒğǒl çurpa, zu isə samal běš taśi Buxačuğoxun əyitk'oz». 16Q'ončuxal Bileama ak'eśi şot'o k'ə upsun lazım baksuna zombi tapşurebi: «İsə taki, mot'oğo Balaga p'ap'esp'a».
17Bileam Balagi t'ǒğǒl qayebaki, hariyal şot'o eçeri q'urbanxoy t'ǒğǒl Moavi ağsaq'q'alxoxun sagala çurpine ak'i. Balagen şot'oxun xavare haq'i: «Q'ončuğon k'ə pi?» 18Bileameni ǰomoxunal Buxačuğon zombi əyitmuxe c'eri:
«Ay Balag, vi ǔmǔxxo qaypa ibaka!
Ay Śip'p'ori ğar, za ǔmǔxlaxa!
19Əfçiduğsun amdarxoy əşe,
Fikirə badalbsun - me dünyəni ədəte!
Buxačux isə İz pi əyiti loxol çurene,
Şot'ay əyit tadi bex nu p'ap'espsuna itenbakon!
20Şot'in xeyir-bərəkətə ene tadene,
Zu isə me əyitmux bez ǰomoxun barst'eynak'ez c'ək'eśe!
21İak'ovi nəsileynak' q'ı̌ tene bu,
İsrailluğoy belxun sa popal tene bital!
Şot'o görə ki, içoğoy Buxačux bakala Q'ončux içoğoxune,
Şot'ot'un padçağ pi k'ale!
22Çölnə öküzi zore tade şot'oğo Buxačuğon,
Misirəxune c'evk'e şot'oğo!
23İak'ovi nəsilə əfçibsun falçin əş tene,
İsrailluğo sal sa cadunen biteneq'sa!
Me azuk'a běği "mo Buxačuğoy əşe!" next'un.
24Běğa hetəre aslan k'inək' ěqesa,
Hetəre şir k'inək' amdarxoy loxol taysa!
İz kiyel baft'alt'u śark'amin,
Şot'ay p'iya xupi çark'est'amin kul tene haq'on!»
25T'e vədə Balagen Bileama pine: «Efa! Nə vi q'arğişbsunaz çuresa, nə xeyir-bərəkət k'alpsuna!». 26Bileamen isə "va tez pi ki, Q'ončuğon za k'ə uk'alesa, şot'o booz?" pine.
Bileami xibimci kərəm israilluğoy barada Buxačuğoy əyitmoğon əyitpsun
27T'e vədə Balagen Bileama metəre pi: «Va q'erəz sa gala taşoz! Banekon Buxačuğon şot'oğo vi t'et'iine çurpi q'arğişbsuna çuresa». 28Hametər, Balagen Bileama P'eor buruğoy bele taşeri. T'e ganuxun dirist' t'e xam ga ak'esay. 29Miya Bileamen Balaga pine: «Zaynak' memiya vǔğ dənə q'urban eçala ga düzbest'i, šamseynak'al vǔğ dənə arak' saal vǔğ dənə q'oç eğel eçest'a». 30Balagen Bileamen pi k'inək' bine, hər q'urban eçala gane loxolal sa arak' q'a sa dənə q'oç eğel q'urban šampi bok'osebi.
Currently Selected:
Ams'i oç̌ala 23: udi
Highlight
Copy
Compare
Share
Want to have your highlights saved across all your devices? Sign up or sign in
© Translation Services International Ltd.
