Ams'i oç̌ala 2
2
Dəst'oğoy çurk'ala ga düzbsuni yön
1 Q'ončuğon Moiseya q'a Aarona pine: 2«Barta ı̌vel çadır bı̌yexq'an baki, israilluğon isə içoğoy çurk'ala ganu şot'ay hərrəmineq'at'un düzbi: hər soğo iz dəst'in boş. İçoğoy mani dəst'inəxun saal ailinəxun baksuna ak'est'ala nišana laxsunal eyexun maq'at'un c'evk'i.
3 İuday dəst'ə běğ c'eğalaç tərəfq'an baki, dəst'in izi nišanal bakeq'an. İuday tayfin kalo isə Amminadavi ğar Naxşonq'an baki. 4İuday tayfinaxun siyəyinə haq'eśi işq'arxoy say 74 600 tane. 5İssak'ari tayfinenal me dəst'in boş, İuday tayfin t'ǒğǒlq'an iz çurk'ala ganu düzbi. İzi kalo isə Śuari ğar Net'anelq'an baki. 6İssak'ari tayfinaxun siyəyinə haq'eśi işq'arxoy say 54 400 tane. 7Zevuluni tayfal mot'oğoy boş, İssak'ari tayfin t'ǒğǒlq'an baki. Me tayfin kalo isə Xeloni ğar Eliavq'an baki. 8Zevuluni tayfinaxun siyəyinə haq'eśi işq'arxoy say 57 400 tane. 9Metərluğen, İuday dəst'inə 186 400 tane bu. Yaq' c'eğat'an me dəst'ə běš tağale.
10Ruveni dəst'ə güney tərəfq'an baki, dəst'in izi nišanal bakeq'an. Tayfin kalo isə Şedeuri ğar Eliśurq'an baki. 11Ruveni tayfinaxun siyəyinə haq'eśi işq'arxoy say 46 500 tane. 12Simeoni tayfinenal iz çurk'ala ganu me dəst'in boş, Ruveni dəst'in t'ǒğǒlq'an düzbi. İzi kalo isə Śurişaddayi ğar Şelumielq'an baki. 13Simeoni tayfinaxun siyəyinə haq'eśi işq'arxoy say 59 300 tane. 14Gade tayfal mot'oğoy boş, Simeoni tayfin t'ǒğǒlq'an baki. Me tayfin kalo isə Deueli ğar Elyasafq'an baki. 15Gade tayfinaxun siyəyinə haq'eśi işq'arxoy say 45 650 tane. 16Metərluğen, Ruveni dəst'inə bito sagala 151 450 tane bu. Yaq' c'eğat'an me dəst'ə İuday dəst'in bač'anexun tağale.
17Yaq' c'eğat'an ǐvel çadıra Levin tayfinenq'an taşeri. Şorox tayfoğoy arane, bı̌yexq'at'un taśi. Barta bito içoğoy çurk'ala ganu mani q'aydinent'un çurpeysa, hat'e q'aydinenq'at'un yaq' taśi: hər soğo iz dəst'in boş. Hər dəst'in içu c'ək'p'est'ala nišanal bakeq'an.
18Efraimi dəst'ə běğ batk'alaç tərəfq'an baki, dəst'in izi nišanal bakeq'an. Efraimi dəst'in kalo isə Ammihudi ğar Elişamaq'an baki. 19Me tayfinaxun siyəyinə haq'eśi işq'arxoy say 40 500 tane. 20Menaşşeni tayfinen me dəst'in boş, Efraimi tayfin t'ǒğǒlq'an iz çurk'ala ganu düzbi. Tayfin kalo isə P'edahśuri ğar Gamlielq'an baki. 21Menaşşeni tayfinaxun siyəyinə haq'eśi işq'arxoy say 32 200 tane. 22Binyamini tayfal mot'oğoy boş Menaşşeni tayfin t'ǒğǒlq'an baki. Me tayfin kalo isə Gideoni ğar Avidanq'an baki. 23Binyamini tayfinaxun siyəyinə haq'eśi işq'arxoy say 35 400 tane. 24Metərluğen, Efraimi dəst'inə bito sagala 108 100 tane bu. Yaq' c'eğat'an xibimci şorox tağale.
25Dane dəst'ə q'uzey tərəfq'an baki, dəst'in izi nišanal bakeq'an. İzi kalo isə Ammişaddayi ğar Axiezerq'an baki. 26Dane tayfinaxun siyəyinə haq'eśi işq'arxoy say 62 700 tane. 27Aşeri tayfinen me dəst'in boş, Dane tayfin t'ǒğǒlq'an iz çurk'ala ganu düzbi. Tayfin kalo isə Ok'rani ğar P'agielq'an baki. 28Aşeri tayfinaxun siyəyinə haq'eśi işq'arxoy say 41 500 tane. 29Naft'alin tayfal mot'oğoy boş, Aşeri tayfin t'ǒğǒlq'an baki. Me tayfin kalo isə Enani ğar Axiraq'an baki. 30Naft'alin tayfinaxun siyəyinə haq'eśi işq'arxoy say 53 400 tane. 31Metərluğen, Dane dəst'inə bito sagala 157 600 tane bu. Yaq' c'eğat'an barta me dəst'ə axırınciq'an taśi. İz loxol içoğo c'ək'p'est'ala nišanal bakeq'an».
32Hametər, israilluğoxun içoğoy ailoğo görə siyəyinə haq'eśiyorox moroxe. Tayfoğo cöybaki dəst'oğoy boş bakalorox bito sagala 603 550 taney. 33Leviyox isə Q'ončuğon Moiseya pi k'inək' israilluğoxun sagala me siyəyinə tet'un haq'eśey.
34İsrailluğon içoğoy çurk'ala ganu düzbsuni yönəl, yaq' c'eğat'an taysuni yönəl Q'ončuğon Moiseya pi q'aydinen bit'un. Hər soğo iz əsiləxun, iz ailinəxun bakalt'oğoxun sagalaney, hər dəst'inal izi nišane buy.
Currently Selected:
Ams'i oç̌ala 2: udi
Highlight
Copy
Compare
Share
Want to have your highlights saved across all your devices? Sign up or sign in
© Translation Services International Ltd.