ᑕᐃᑕᔅ 2

ᒥᔪ ᒋᔅᑯᑎᒪᒐᐅᓐ

1ᒋᔾ ᒪᒃ, ᐊ ᒋᔅᑯᑎᒧᐅᑥᐤ ᒋᐸ ᐎᑎᒧᐛᐅᒡ ᑕᓐ ᒐ ᐃᓯ ᐱᒪᑎᓯᒡ ᐊ ᐎ ᑯᐃᔅᑯᑕᑎᓯᒡ᙮ 2ᐎᑎᒧᐅᒡ ᐊᓐᒡ ᑲ ᒋᓴᐃᔪᐅᒡ ᒐᒋ ᓂᓇᑭᑐᐛᔨᑕᒡ ᑕᓐ ᐊ ᐃᑎᒡ, ᑭᔭ ᒐᒋ ᐃᑈᐧᑲᒡ, ᑭᔭ ᒐᒋ ᐃᓯ ᐱᒪᑎᓯᒡ ᒐᒋ ᐅᒋ ᒋᔅᑕᔨᒪᑭᓄᐎᒡ᙮ ᒋᐸ ᐎ ᓱᒋᑲᐳᐎᒡ ᑕᑈᑎᒧᐅᓂᒡ, ᑭᔭ ᓴᒋᐃᐛᐅᓂᒡ ᑭᔭ ᓯᐱᔪᐛᓯᐅᓂᒡ ᐃᔅ᙮

3ᑭᔭ ᐎᑎᒧᐅᒡ ᒋᓴᐃᔎᓯᒡ ᐅᐱᒪᑎᓯᐅᓄᐛᒡ ᒋᐸ ᓄᑯᓂᔪᐤ ᒋᓴᒪᓂᑐᐛ ᐊ ᐱᒪᑎᓯᔅᑐᐛᒡ᙮ ᓇᒪ ᒋᐸ ᐅᒋ ᐱᐸᒪᒋᒪᐅᒡ ᐊᐛᔪᐛ ᒐᒋ ᒥᒐᒋᒪᒡ, ᓇᒪ ᑭᔭ ᒋᐸ ᐅᒋ ᐎᒋᐸᐅᒡ, 4ᐃᔭᐱᒡ ᒋᐸ ᒋᔅᒋᓄᐊᒧᐛᐅᒡ ᐅᔅᒋᓂᒋᔎᐛ ᒐᒋ ᓴᒋᐊᔨᒋ ᐅᓇᐸᒥᔪᐛ ᑭᔭ ᐅᑦ ᐊᐛᓯᒥᔪᐛ᙮ 5ᑭᔭ ᒋᐸ ᒋᔅᒋᓄᐊᒧᐛᐅᒡ ᒐᒋ ᐃᑈᐧᑲᔨᒋ, ᒐᒋ ᐸᔭᒋ ᐱᒪᑎᓯᔨᒋ ᑭᔭ ᒐᒋ ᒥᔪ ᐊᐱᑎᓯᔨᒋ ᐊᓐᑕ ᐎᒋᔨᒡ, ᑭᔭ ᑯᐃᔅᒄ ᒐᒋ ᐃᑎᔨᒋ ᐊ ᓂᓇᐃᑐᐛᔨᒋ ᐅᓇᐸᒥᔪᐛ᙮ ᐅᔭ ᒪᒃ ᐃᑕᑎᓯᔨᒐ ᓇᒪ ᐊᐛᔪᐛ ᒋᑭ ᐅᒋ ᒥᒋ ᐊᔨᒧᑎᒥᔪᐛ ᒋᓴᒪᓂᑐᐛ ᐅᑦ ᐃᔨᒧᐅᓂᔪᐤ᙮

6ᑭᔭ ᓯᒋᒥᒡ ᐅᔅᒋᓂᒋᓱᐅᒡ ᒐᒋ ᐃᔭᒂᒥᒡ ᒥᓯᐛ ᑕᓐ ᐊ ᐃᑎᒡ᙮ 7ᒋᔾ ᒪᒃ ᑭᔭ ᒋᐸ ᐎ ᐛᐸᑎᔭᐅᒡ ᑕᓐ ᒐ ᐃᓯ ᒋᔅᒋᓄᐛᐱᒥᔅᒡ ᐊ ᒥᔪᑐᑎᒥᓐ ᒥᓯᐛ ᑕᓐ ᐊ ᐃᑎᔨᓐ᙮ ᐊ ᒋᔅᑯᑎᒪᒐᔨᓐ ᑭᔭ ᒋᐸ ᓄᑯᑕᓐ ᐊ ᐃᑈᐧᑲᔨᓐ ᑭᔭ ᑯᐃᔅᒄ ᒋᐸ ᐃᓯ ᒋᔅᑯᑎᒪᒐᓐ᙮ 8ᑯᐃᔅᒄ ᐃᓯ ᐃᔨᒥ, ᑭᔭ ᐊᓐᒡ ᑲ ᐊᑐᐛᔨᒥᔅᒡ ᓇᒪ ᒋᑭ ᐅᒋ ᒥᔅᑭᒧᒡ ᑕᓐ ᒐᒋ ᐃᓯ ᓂᑐᐎᔾ ᐃᑕᒋᒥᑕᐧᑯᒡ ᑭᔭ ᒐ ᓴᒂᔨᒧᐃᓱᒡ᙮

9ᓯᒋᒥᒡ ᐊᐱᒋᐊᑭᓐᒡ ᒐᒋ ᓂᓇᐃᑐᐛᒡ ᐅᒋᒪᒧᐛᐛ ᑭᔭ ᒥᓯᐛ ᒐᒋ ᐃᓯ ᓂᓇᐃᑎᒪᐊᒡ ᑭᔭ ᒐ ᐊᑲ ᒋ ᓂᓇᔎᐅᓯᐊᒡ 10ᒪᒃ ᒐᒋ ᑭᒐᒧᑎᒧᐛᒡ᙮ ᒋᐸ ᓄᑯᑕᐅᒡ ᐊ ᐃᔅᐱᔅ ᒥᔪ ᐊᐱᑎᓯᒡ ᑭᔭ ᐊᔅᐱᔅ ᑯᐃᔅᒄ ᐃᑎᒡ ᑭᔭ ᒐ ᒋᔅᑕᔨᑕᑭᓄᔨᒋ ᐊᓂᔭ ᑕᓐ ᐊ ᐃᓯ ᒋᔅᑯᑎᒪᒐᓄᐎᒡ ᒋᓴᒪᓂᑐᐛ ᒋᐱᒪᒋᐃᐛᒥᓄᐛ ᐊ ᐊᔨᒧᒪᑭᓄᔨᒋ᙮

Titus 2.11-14 (Christmas Year C)

11ᐛᔅ ᒋᓴᒪᓂᑐᐤ ᒋ ᐛᐸᑎᔨᐛᐤ ᐅᒋᓴᐛᑎᓯᐅᓐ ᒐᒋ ᐅᒋ ᐱᒪᒋᐅᑦ ᒥᓯᐛ ᐊᐛᓐ᙮ 12ᐅᒋᓴᐛᑎᓯᐅᓂᒡ ᒋ ᐅᒋ ᒋᔅᑯᑎᒪᑭᓄᐤ ᒐᒋ ᓂᑭᑎᒪᐧᒄ ᒥᒐᑎᓯᐅᓐ ᑭᔭ ᒐ ᐊᑲ ᒋ ᒥᒋ ᒧᔅᑕᓇᔨᑎᒪᐧᒄ ᒐᒂᓐ ᐅᑕ ᐊᔅᒋᒡ᙮ ᑭᔭ ᐅᒋᓴᐛᑎᓯᐅᓂᒡ ᒋ ᐅᒋ ᒋᔅᑯᑎᒪᑭᓄᐤ ᒐᒋ ᐃᔭᒂᒥᔭᐧᒄ ᑕᓐ ᐊ ᐃᑕᑎᓯᔭᐧᒄ, ᑭᔭ ᒐᒋ ᑯᐃᔅᑯᑕᑎᓯᔭᐧᒄ ᑭᔭ ᒐᒋ ᒋᓴᒪᓂᑐᐛᑎᓯᔭᐧᒄ ᐅᑕ ᐊᔅᒋᒡ ᐊ ᑕᐛᐧᒄ, 13ᐊᐅᒄ ᐊ ᐃᓯ ᐱᒪᑎᓯᔭᐧᒄ ᐊ ᐊᓱᐛᐸᑎᒪᐧᒄ ᒐᔅᑎᓇᔅ ᒐ ᐃᔅᐱᔨᒡ ᐊᓐ ᐊ ᓱᐛᔨᑕᒂᒡ ᐊ ᒋᓯᑲᒡ ᒐ ᑎᑯᓯᐧᒃ ᐊᓐ ᑲ ᓱᐧᑲᑎᓯᑦ ᒋᓴᒪᓂᑐᐤ ᑭᔭ ᒋᐱᒪᒋᐃᐛᒥᓄᐤ ᒋᓴᔅ ᙭ ᐊ ᐸᒋ ᓄᑯᓯᑦ ᐅᒋᔅᑕᔨᑕᑯᓱᐅᓂᒡ᙮ 14ᒋ ᐱᔅᑕᔨᒥᑎᓱᐤ ᙭ ᒋᔭᓄᐤ ᐅᒋ, ᒐᒋ ᐛᐸᔨᑎᒪᑯᐅᔭᐧᒄ ᒥᓯᐛ ᒋᒥᒋᑥᐅᓄᐛ ᑭᔭ ᒐᒋ ᐸᔭᒋᐃᑕᐧᒄ ᒥᒄ ᐎᔾ ᒐᒋ ᐊᔭᐅᑕᐧᒄ᙮ ᒋ ᓂᑐᐛᔨᒥᑯᓄᐤ ᓱᒃ ᒐᒋ ᐃᑕᔨᑎᒥᐃᑯᐅᔭᐧᒄ ᑯᐃᔅᒄ ᒐᒋ ᐃᑎᔭᐧᒄ᙮

15ᒋᔅᑯᑎᒧᐅᒡ ᐅᔭ ᒐᒂᔪᐤ ᑭᔭ ᐊᐱᒋᑕ ᐊᓐ ᑎᐸᔨᒋᒐᐅᓐ ᑲ ᒥᔨᑯᔨᓐ ᒐᒋ ᓯᒋᒥᑥᐤ, ᑭᔭ ᒐᒋ ᐎᑎᒧᐅᑥᐤ ᑕᓐᑕ ᐊ ᐅᓂᐱᔨᒡ᙮ ᐊᑲᐎᔾ ᐊᐛᓐ ᒋᑭ ᐅᒋ ᐎ ᐊᑐᐛᔨᒧᒄ᙮

Currently Selected:

ᑕᐃᑕᔅ 2: ᓇᔅᑲᐱ

Highlight

Copy

Want to have your highlights saved across all your devices? Sign up or sign in

ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ

Naskapi Development Corporation

Kawawachikamach, Québec G0G 2Z0 Canada

Canadian Bible Society

10 Carnforth Road, Toronto Ontario M4A 2S4 Canada

Learn More About ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ