ᕈᒪᓇ 13
13
ᑕᓐ ᒋᐸ ᐃᓯ ᑭᓄᐛᐸᑎᒻ ᐊᐛᓐ ᑎᐸᔨᒐᐅᓂᔪᐤ
1ᒥᓯᐛ ᐊᐛᓐ ᓂᑐᐛᔨᑕᑯᓱᐤ ᒐᒋ ᓂᓇᐃᑕᐧᒃ ᑎᐸᔨᒐᐅᓂᔪᐤ ᐅᑕ ᐊᔅᒋᒡ᙮ ᒥᓯᐛ ᑎᐸᔨᒐᐅᓐ ᑲ ᑎᒂᒡ ᒋᓴᒪᓂᑐᐤ ᒋ ᐱᔅᑎᓂᒻ᙮ ᐎᔾ ᒋ ᐎᔅᑕᐤ ᒥᓯᐛ ᑎᐸᔨᒐᐅᓂᔪᐤ ᑕᓐ ᒐ ᐃᓯᓇᑯᓂᔨᒡ᙮ 2ᐊᐅᒄ ᐛᒋ ᐃᓯᓇᑯᓂᔨᒡ ᐊᐛᓐ ᐊ ᓂᔅᑯᔅᑕᐧᒃ ᑎᐸᔨᒐᐅᓂᔪᐤ ᓂᔅᑯᔅᑎᒻ ᒐᒂᔪᐤ ᒋᓴᒪᓂᑐᐛ ᐊᒋ ᐃᑎᓱᐛᑎᒥᔨᒋ ᒐᒋ ᑎᑯᓂᔨᒡ᙮ ᓂᔅᑯᔅᑕᒐ ᒪᒃ ᐊᐛᓐ ᑎᐸᔨᒐᐅᓂᔪᐤ ᒋᑭ ᐃᑐᑕᓱᐤ ᒐᒋ ᐃᓯᓇᑯᓂᔨᒡ ᒐᒋ ᐛᐛᓯᐊᑭᓄᐅᑦ᙮ 3ᐊᓐᒡ ᑯᐃᔅᒄ ᑲ ᐃᑎᒡ ᓇᒪ ᑎᑯᓂᔪᐤ ᒐᒋ ᑯᔅᑕᑕᔭᔨᒪᒡ ᐊᓂᔭᔪᐛ ᐎᓱᐛᐅᓇ ᑲ ᓇᑭᑐᐛᐸᑎᒥᔨᒋ᙮ ᐊᓐᒡ ᐊᐅᒄ ᐊᑲ ᒪᒧᔭᒻ ᐃᑎᒡ ᐊᐅᑯᓐᒡ ᐊ ᑎᑯᓂᔨᒡ ᒐᒋ ᑯᔅᑕᑕᔭᔨᒪᒡ᙮ ᐊᑲ ᐱᓯᒄ ᐛ ᑯᔅᑕᑕᔭᔨᒪᐅᑕ ᐊᓐ ᐎᓱᐛᐅᓇ ᑲ ᓂᓇᑭᑐᐛᔨᑕᐧᒃ ᑯᐃᔅᒄ ᐃᑎᔾ᙮ ᒋᑭ ᒋ ᐃᓯᓇᑯᓂᔪᐤ ᐛᐛᒡ ᒐᒋ ᒥᔪ ᐊᔨᒧᒥᔅᒃ᙮ 4ᐛᔅ ᒋᓴᒪᓂᑐᐤ ᐊᓂᔭᔪᐛ ᐅᑦ ᐊᐱᒋᐊᑭᓇ᙮ ᒋᑭ ᒥᔪᐱᔪᐛᓐ ᒪᒃ ᓂᓇᐃᑐᒥᑕ᙮ ᒧᔭᒻ ᒪᒃ ᐊᑲ ᒪᒧᔭᒻ ᐃᑎᔨᓇ ᑕᑈ ᒋᑭ ᑯᔅᑕᑕᔭᔨᒪᐤ ᐊᓐ ᐎᓱᐛᐅᓇ ᑲ ᓂᓇᑭᑐᐛᔨᑕᐧᒃ᙮ ᑕᑈ ᐛᔅ ᐊᓐ ᒋ ᒥᔭᑭᓄᐤ ᒐᒋ ᐛᐛᓯᐊᑦ ᐊᐛᔪᐛ ᐊᑲ ᒪᒧᔭᒻ ᑎᔨᒋ᙮ ᒋᓴᒪᓂᑐᐛ ᐊᓱ ᐊᐱᒋᐃᑯᐤ ᒐᒋ ᐛᐛᓯᐊᑦ ᐊᓂᔭᔪᐛ ᐊᑲ ᒪᒧᔭᒻ ᑎᔨᒋ᙮ 5ᒋ ᓂᑐᐛᔨᑕᑯᓯᓐ ᒐᒋ ᓂᓇᐊᔨᑎᒥᓐ ᑎᐸᔨᒋᒐᐅᓐ᙮ ᓂᓇᐃᑕ ᓇᒪ ᒥᒄ ᒐ ᐊᑲ ᒋ ᐛᐛᓯᐃᔅᒃ ᒋᓴᒪᓂᑐᐤ, ᐊᐅᒄ ᐃᑎᔾ ᒐᒋ ᒐᔅᑎᓇᐅᔨᓐ ᑕᑈ ᑯᐃᔅᒄ ᐊ ᐃᑎᔨᓐ᙮
6ᐊᐅᒄ ᑭᔭ ᐛᒋ ᓂᑐᐛᔨᑕᑯᓯᔨᓐ ᒐᒋ ᒋᓯᐧᑲᓱᔨᓐ ᓱᓇᔭᐤ᙮ ᒋᓴᒪᓂᑐᐛ ᐊᑐᔅᑯᐛᐅᒡ ᐊᓐᒡ ᑎᐸᔨᒐᐅᓂᒡ ᑲ ᐃᓯ ᐊᑐᔅᒐᒡ ᐊᐅᒄ ᒪᒃ ᐅᔭ ᐊ ᐃᓯ ᐊᑐᔅᒐᔅᑕᒡ᙮ 7ᑕᓐ ᒥᒄ ᐊ ᐃᓯ ᑎᑯᓂᒂ ᓱᓇᔭᔪᐤ ᐊ ᓂᑐᐛᔨᑕᑯᓯᔨᓐ ᒐᒋ ᒋᓯᐧᑭᒥᓐ, ᒋᓯᐧᑲ᙮ ᑕᓐ ᐊ ᐃᓯ ᓂᑐᐛᔨᑕᑯᓱᐅᓇ ᒐᒋ ᒋᔅᑕᔨᒥᑥᐤ ᐊᓐᒡ ᑎᐸᔨᒐᐅᓂᒡ ᑲ ᐃᓯ ᐊᑐᔅᒐᒡ ᒋᔅᑕᔨᒥᒡ ᑭᔭ ᒋᔾ᙮
ᑕᓐ ᒋᐸ ᐃᑐᑕᑐᓇᓄᐤ
Romans 13.8-14 (Proper-18 Year A)
8ᐊᑲᐎᔾ ᒋᑭ ᒥᓯᓇᐊᒧᐛᐤ ᐊᐛᓐ ᒐᒂᔪᐤ᙮ ᒥᒄ ᑕᓐ ᒧᔅ ᐊ ᐃᓯ ᐎᑕᑭᓄᐅᒡ ᒋᐸ ᐃᓯ ᓴᒋᐃᑐᓇᐛᐤ ᐊᐅᑯᓐ ᐊᓐ ᒋᐸ ᒥᓯᓇᐊᒪᑐᓇᐛᐤ᙮ ᒥᓯᐛ ᐛᐎᑐᒧᐛᐤ ᐊᐛᓐ ᒋᓴᒪᓂᑐᐛ ᐅᐎᓱᐛᐅᓂᔪᐤ ᐎᐧᑲᓂᓴ ᐊ ᓴᒋᐊᑦ᙮ 9ᐅᔭ ᐃᑎᓱᐛᐅᓇ, “ᐊᑲᐎᔾ ᐱᓯᒂᑎᓯ, ᐊᑲᐎᔾ ᓂᐸᐃ ᐊᐛᓐ, ᐊᑲᐎᔾ ᒋᒧᑎ, ᐊᑲᐎᔾ ᒧᔅᑕᓂᒧᐤ ᑯᑎᒃ ᐊᐛᓐ ᑕᓐ ᐊ ᐃᓯ ᐊᔭᑦ᙮” ᑯᑎᑲ ᒪᒃ ᐃᑎᓱᐛᐅᓇ ᐊ ᐃᑎᒂᒋ, ᒥᓯᐛ ᒪᒧᐤ ᒋᑭ ᒋ ᐃᓯ ᑭᓄᐛᐸᑕᑭᓄᐛ ᐊᓐᑕ ᐊᓐ ᐸᐃᒄ ᐃᑎᓱᐛᐅᓐ ᑲ ᐃᑎᓱᐛᒥᑲᒡ, “ᓴᒋᐃ ᒋᒡ ᐃᔪᐤ ᒧᔭᒻ ᒋᔾ ᐊ ᐃᔅᐱᔅ ᓴᒋᐃᓱᔨᓐ᙮” 10ᐊᐛᓐ ᐊ ᓴᒋᐊᑦ ᐎᒡ ᐃᔪᐛ ᓇᒪ ᓂᑕ ᒋᑭ ᐅᒋ ᐅᓂᑐᑐᐛᐤ᙮ ᐊ ᓴᒋᐊᑦ ᐊᐛᓐ ᐎᒡ ᐃᔪᐛ ᒥᓯᐛ ᐊᓂᔭᔪᐛ ᐃᑎᓱᐛᐅᓇ ᓂᓇᐃᑎᒻ᙮
Romans 13.11-14 (Advent-1 Year A)
11ᐊᐅᑯᓐ ᐅ ᒋᐸ ᐃᓯ ᐱᒪᑎᓯᓇᐛᐤ ᐊ ᒋᔅᒐᔨᑎᒪᒄ ᑕᓐ ᒐ ᐃᔅᐱᔨᒡ ᐊᑯ ᐎᐱᒡ᙮ ᐃᑕᔨᑕᑯᓐ ᐊᑯ ᑕᑈ ᒐᒋ ᐸᑯᐱᔭᒄ ᑭᔭ ᒐᒋ ᐊᓯᒐᔨᑎᒪᒄ᙮ ᐊᓐ ᐊ ᒋᓯᑲᒡ ᒐ ᐱᒪᒋᐃᑕᒄ ᒋᓴᒪᓂᑐᐤ ᐊᑐᐎᔅ ᐊᑯ ᐸᓱᓇᑯᓐ ᑲ ᐃᔅᐱᓯᓇᒂᒡ ᐊᓐᑕ ᓂᔅᑎᒻ ᑲ ᑕᑈᔭᔨᒪᐧᒄ ᒋᓴᔅ᙮ 12ᓴᔅ ᒐᑲᑦ ᐎᒪᐱᔪᐤ ᐊ ᑎᐱᔅᑲᒡ᙮ ᓴᔅ ᒋᑭ ᐅᑎᒋᐱᔪᐤ ᐊ ᒋᓯᑲᒡ᙮ ᐳᓂᑕᐤ ᐊ ᐃᑐᑎᒪᐧᒄ ᐊᓂᔭᔪᐛ ᒐᒂᔪᐛ ᑕᓐ ᐊ ᐃᓯ ᑐᑕᑭᓄᐅᒋ ᐅᓂᑎᐱᔅᒋᓯᐅᓂᒡ᙮ ᑐᑕᑕᐤ ᐊᓂᔭᔪᐤ ᒐᒂᔪᐛ ᒐ ᐎᒋᐃᑯᔭᐧᒄ ᒐᒋ ᓂᔅᑯᔅᑐᐛᐧᒄ ᒥᒋᒥᓂᑐᐤ ᐛᔅᑕᐅᓂᒡ ᐊ ᑕᔭᐧᒄ᙮ 13ᑯᐃᔅᒄ ᐃᓯ ᐱᒪᑎᓯᑕᐤ ᒐ ᓄᒂᒡ ᒪᒃ ᑕᑈ ᐛᔅᑕᐅᓂᒡ ᐊ ᐃᓯ ᐱᒪᑎᓯᔭᐧᒄ᙮ ᐊᑲᐎᔾ ᒋᑭ ᐅᒋ ᐎᒋᐃᐛᓇᓄᐤ ᐊ ᒥᔪᐧᑭᓱᓇᓄᐅᒡ, ᐊ ᐎᓂᓱᐤ ᐃᑎᓇᓄᐅᒡ ᑭᔭ ᐊᑲᐎᔾ ᐎᒋᐃᐛᑕᐤ ᐊᓐᑕ ᐊ ᒥᓇᓄᐅᒡ᙮ ᐊᑲᐎᔾ ᓂᓇᐧᑯᐤ ᒋᑭ ᐅᒋ ᐃᓯ ᐎᓂᓱᐤ ᐱᒪᑎᓯᓇᓄᐤ᙮ ᐊᑲᐎᔾ ᒋᑭ ᐅᒋ ᒋᐧᑲᒥᑐᓇᓄᐤ᙮ ᐊᑲᐎᔾ ᑭᔭ ᒋᑭ ᐅᒋ ᐅᑕᔨᒥᑐᓇᓄᐤ᙮ 14ᓂᔅᐱᑐᐛᐧᒄ ᐅᑎᐸᔨᒋᒐᐤ ᒋᓴᔅ ᙭ ᒐᒋ ᐅᒋ ᐛᐱᒪᒡ ᐊᐛᓐᒋ ᑕᓐ ᐊ ᐃᑕᔨᑕᑯᓯᔨᒋ᙮ ᐊᑲᐎᔾ ᐊᐱᑕᔨᑎᒧᒄ ᒋᔭᓱᐛᐤ ᒐᒋ ᐃᑐᑎᒪᒄ ᑕᓐ ᐊ ᐃᓯ ᒥᒋ ᓂᑐᐛᔨᑎᒧᒥᑲᒋ᙮
Currently Selected:
ᕈᒪᓇ 13: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
