ᕈᒪᓇ 10
10
1ᓂᐧᑲᓂᓯᑐᒄ, ᒋᒋᐛ ᐊ ᐃᓯ ᐱᑯᓴᔨᒧᔭᓐ ᓂᑕᐃᒡ ᑭᔭ ᒋᒋᐛ ᐊ ᐃᓯ ᓂᑐᑎᒧᐅᒃ ᒐᒂᔪᐤ ᒋᓴᒪᓂᑐᐤ ᐊᐅᒄ ᒐᒋ ᐱᒪᒋᐅᒡ ᓂᒡ ᐃᔅᕋᐃᓪ ᐃᔪᒡ᙮ 2ᐛᔅ ᑕᑈ ᓂᑭ ᒋ ᐃᑕᒋᒪᐅᒡ ᑕᑈ ᐊ ᐎ ᓇᐊᔨᑎᒥᐊᒡ ᒋᓴᒪᓂᑐᐛ ᒥᒄ ᒪᒃ ᓇᒪ ᓂᔅᑐᑎᒧᒡ ᑕᓐᑕ ᒐᒋ ᐅᒋ ᓇᐊᔨᑎᒥᐊᒡ᙮ 3ᐊᑲ ᐅᒋ ᒋᔅᒐᔨᑕᒡ ᑕᓐᑕ ᑯᐃᔅᑯᑕᑎᓯᐅᓂᒡ ᐛᒋ ᐃᓯ ᑭᓄᐛᐱᒥᑯᔨᒋ ᐊᐛᔪᐛ ᒋᓴᒪᓂᑐᐛ ᐊᑯ ᐎᔨᐛᐤ ᑎᐸᓐ ᑲ ᑯᒋᑕᒡ ᒐᒋ ᑯᐃᔅᑯᓇᑯᐃᓱᒡ ᒋᓴᒪᓂᑐᐛ ᐃᔅ ᐊ ᑕᔨᒋ᙮ ᐊᑯ ᒪᒃ ᓇᒪ ᐱᔅᑕᔨᒥᑎᓱᔅᑎᒧᒡ ᐊᓂᔭ ᑕᓐ ᑲ ᐃᑎᔅᑕᔨᒡ ᒋᓴᒪᓂᑐᐛ ᒐ ᐃᑎᔨᒋ ᐊᐛᔪᐛ ᐅᑯᐃᔅᑯᑕᑎᓯᐤ ᒐᒋ ᐃᓯ ᑭᓄᐛᐱᒪᑭᓄᔨᒋ᙮ 4ᑲ ᑎᑯᓯᐧᒃ ᙭ ᒋ ᐃᑐᑎᒻ ᐎᓱᐛᐅᓂᔪᐤ ᒐ ᐊᑲ ᒋ ᐊᐱᑕᔨᑕᑯᓂᔨᒡ, ᑭᔭ ᒥᓯᐛ ᐊᓂᔭᔪᐛ ᒐ ᑕᑈᔭᔨᒥᑯᒂ ᐊᐅᑯᓂ ᐊᓂᔭᔪᐛ ᐅ ᑯᐃᔅᑯᑕᑎᓯᐤ ᒐ ᐃᓯ ᑭᓄᐛᐱᒥᑯᔨᒋ ᒋᓴᒪᓂᑐᐛ᙮
ᒥᓯᐛ ᐊᐛᓐ ᑲ ᑕᑈᑕᐧᒃ ᒋᑭ ᐱᒪᒋᐅᐤ
Romans 10.5-15 (Proper-14 Year A)
5ᒧᓱᔅ ᒋ ᐊᔨᒧᒪᐤ ᐊᓂᔭᔪᐛ ᐊᐛᔪᐛ ᐊ ᓂᓇᐊᔨᑎᒥᔨᒋ ᒋᓴᒪᓂᑐᐛ ᐅᐎᓱᐛᐅᓂᔪᐤ ᑲ ᐎ ᐅᒋ ᑯᐃᔅᑯᑕᑎᓯᐃᓱᔨᒋ ᒋᓴᒪᓂᑐᐛ ᐃᔅ ᐊ ᑕᔨᒋ᙮ ᒋ ᐃᑕᐤ, “ᐊᓐ ᐊᐛᓐ ᒐ ᑎᐸᑐᑎᒧᒂ ᑕᓐ ᐊ ᐃᑎᓱᐛᒥᑭᓂᔨᒡ ᐎᓱᐛᐅᓂᔪᐤ ᐊᔪᐅᒄ ᐊᓂᔭ ᒐ ᐃᓯ ᐱᒪᑎᓯᑦ᙮” 6ᒪᐅ ᒪᒃ ᐊ ᐃᓯ ᐊᔨᒧᑕᒡ ᒋᓴᒪᓂᑐᐤ ᐅᑦ ᐃᔨᒧᐅᓂᒡ ᑕᑈᑎᒧᐅᓂᒡ ᐊ ᐅᒋ ᑯᐃᔅᑯᑕᑎᓯᐊᑭᓄᐅᑦ ᐊᐛᓐ, ᐊᑲᐎᔾ ᒋᑭ ᐅᒋ ᐃᑕᔨᑎᒻ ᐊᐛᓐ ᒋᒋᒋᓯᑯᒡ ᒋᑭ ᐃᑐᑕᐤ ᐊᐛᓐ ᒐᒋ ᐸᓱᐛᑦ ᙭ᑕ ᒐᒋ ᐊᔨᒧᑎᒪᑯᐅᐛᐧᒄ ᐱᒪᒋᐃᑯᓯᐅᓂᔪᐤ᙮ 7ᐊᑲᐎᔾ ᑭᔭ ᒋᑭ ᐅᒋ ᐃᑕᔨᑎᒻ ᐊᐛᓐ ᑕᒥᒡ ᐊᓐᑕ ᐊᔅᒋᒡ ᐊᓐᑕ ᐊ ᑕᒡ ᑲ ᓂᐱᒡ ᒋᑭ ᐃᑐᑕᐤ ᐊᐛᓐ ᐊᓐᑕ ᒐᒋ ᐅᑐᑕᐊᑦ ᙭ᑕ ᒐᒋ ᐊᔨᒧᑎᒪᑯᐛᐧᒄ ᐱᒪᒋᐃᑯᓯᐅᓂᔪᐤ᙮
Romans 10.8-13 (Lent-1 Year C)
8ᒪᐅ ᐊ ᐃᓯ ᐊᔨᒧᑕᒡ ᑕᑈᑎᒧᐅᓂᒡ ᐊ ᐅᒋ ᑯᐃᔅᑯᑕᑎᓯᐊᑭᓄᐅᑦ ᐊᐛᓐ, ᒋᓴᒪᓂᑐᐤ ᐅᐱᒪᒋᐃᐛᐤ ᒥᔽᒋᒧᐅᓐ ᒋ ᐸᓱᐛᐱᒥᑯᓇᐛᐤ᙮ ᒋᑭ ᒋ ᐎᑕᓐ ᐊ ᑕᑈᒥᑲᒡ ᑭᔭ ᒋᑭ ᒋ ᐅᑎᓇᓐ ᒋᑕᐃᒡ᙮ ᐊᐅᒄ ᒪᒃ ᐅ ᐊ ᐃᓯ ᐛᐎᑎᒪᒡ᙮ 9ᐃᔅᒋᔄᔨᓇ ᙭ ᐊᐅᒄ ᐅᑎᐸᔨᒋᒐᐤ ᑭᔭ ᒋᑕᐃᒡ ᑕᑈᑎᒥᓇ ᑕᑈ ᐊᒋ ᐅᓂᔅᑲᓂᑯᑦ ᒋᓴᒪᓂᑐᐛ ᓂᐳᐅᓂᒡ ᐅᒋ ᒋᑭ ᐱᒪᒋᐅᓐ᙮ 10ᐛᔅ ᐅᑕᐃᒡ ᑕᑈᑎᒻ ᐊᐛᓐ ᙭ᑕ ᐊᒋ ᓂᐱᔨᒋ ᑭᔭ ᐊᒋ ᐅᓂᔅᑲᓂᑯᔨᒋ ᒋᓴᒪᓂᑐᐛ ᓂᐳᐅᓂᒡ ᐅᒋ᙮ ᐊᐅᒄ ᒪᒃ ᐅ ᐊᐛᓐ ᐅᔭ ᐃᓯ ᑕᑈᑕᒐ ᐅᑯᐃᔅᑯᑕᑎᓯᐤ ᒐ ᐃᓯ ᑭᓄᐛᐱᒥᑯᑦ ᒋᓴᒪᓂᑐᐛ᙮ ᒧᓴ ᐊ ᐎᑕᐧᒃ ᐊᐛᓐ ᙭ᑕ ᐊ ᐅᑎᐸᔨᒋᒐᐎᔨᒋ ᐊᑯᑕ ᐛᒋ ᐱᒪᒋᐃᑯᑦ ᒋᓴᒪᓂᑐᐛ᙮ 11ᐃᑎᔅᑕᐤ ᒋᓴᒪᓂᑐᐤ ᐅᑦ ᐃᔨᒧᐅᓂᒡ, “ᐊᓐ ᐊᐛᓐ ᒐ ᑕᑈᔭᔨᒪᒂ, ᓇᒪ ᓂᑕ ᒋᑭ ᐅᒋ ᐃᑕᔨᑎᒻ ᓴᒐᔾ ᐊᓂᔭ ᐊ ᑕᑈᔭᔨᒪᑦ᙮” 12ᒥᓯᐛ ᒪᒃ ᐊᐛᓐ ᐊᔨᒧᒪᑭᓄᐤ ᐅᑕ, ᐛᔅ ᐸᐃᑯᓄᒡ ᐃᓯ ᑭᓄᐛᐱᒪᑭᓄᐎᒡ ᒍᐤ ᑲ ᐃᑎᔅᑲᓇᓯᒡ ᑭᔭ ᐊᑲ ᒍᐤ ᐃᑎᔅᑲᓇᓯᒡ᙮ ᐸᐃᑯᓱᐤ ᐊᓐ ᐅᑎᐸᔨᒋᒐᐤ ᒥᓯᐛ ᐊ ᐃᓯ ᑎᐸᔨᒋᒐᑦ᙮ ᒥᓯᐛ ᒪᒃ ᐊᓂᔭᔪᐛ ᑲ ᓂᑐᑎᒪᑯᑦ ᒐᒋ ᐎᒋᐊᑦ ᒋᑭ ᓱᐛᔨᒪᐤ᙮ 13ᐛᔅ ᐃᑎᔅᑕᐤ ᒋᓴᒪᓂᑐᐤ ᐅᑦ ᐃᔨᒧᐅᓂᒡ, “ᐊᐛᓐ ᒐ ᑕᑈᑕᒂ ᐅᑎᐸᔨᒋᒐᐛ ᒐᒋ ᐎᒋᐃᑯᑦ ᒋᑭ ᐱᒪᒋᐊᑭᓄᐤ᙮”
14ᑕᓐᑕ ᒪᒃ ᒐᒋ ᐅᒋ ᑕᑈᑕᒡ ᐊᑲ ᐅᒋ ᑕᑈᔭᔨᒪᒡ᙮ ᑕᓐᑕ ᒐᒋ ᐅᒋ ᑕᑈᔭᔨᒪᒡ ᐊᑲ ᐅᒋ ᐸᑕᒡ ᒐᒋ ᐊᔨᒧᒪᑭᓄᔨᒋ ᐊᓐᑕ ᐊ ᑕᒡ᙮ ᑕᓐᑕ ᒐᒋ ᐅᒋ ᐊᔨᒧᑎᒧᐛᑭᓄᐎᒡ ᐊᑲ ᐃᑎᓴᐊᒧᐛᑭᓄᑥᐛ ᐊᐛᔪᐛ ᒐᒋ ᐊᔨᒧᑎᒪᑯᒡ ᐊᐛᔪᐛ ᐅᔭ ᐅᑎᐸᔨᒋᒐᐛ᙮ 15ᑕᓐᑕ ᒐᒋ ᐅᒋ ᑭᒐᔅᒋᒧᒡ ᐊᐛᓐᒋ ᐊᑲ ᒋᑎᓴᐛᑭᓄᑥᐛ᙮ ᐛᔅ ᐃᑎᔅᑕᐤ ᒋᓴᒪᓂᑐᐤ ᐅᑦ ᐃᔨᒧᐅᓂᒡ,
ᓄᐛᒡ ᒥᔽᔨᑕᑯᓂᔪᐤ ᑕᑯᓯᒂᐎ ᐅᒡ ᒥᔽᒋᒧᐅᓂᔪᐤ ᑲ ᐸᑕᒡ᙮
16ᐊᑎ ᒪᒃ ᐊᒋ ᑕᔨᒋ ᐊᓂᔭᔪᐛ ᑲ ᐃᑎᓴᐊᒧᐛᑭᓄᐎᒡ ᒐᒋ ᐛᐎᑎᒪᑯᒡ ᒥᔽᒋᒧᐅᓂᔪᐤ ᐊᓐᒡ ᒍᐤ ᐃᔪᒡ ᓇᒪ ᒥᓯᐛ ᐅᒋ ᑕᑈᑎᒧᒡ᙮ ᐊᐅᒄ ᒪᒃ ᐅᔭ ᐊᓂᔭᐧᑲ ᐅᒋᔅᒋᐛᐃᒐᓱᐤ ᐊᐃᓴᔭ ᑲ ᐊᔨᒧᑕᐧᒃ ᑲ ᐃᔅᒋᔄᑦ,
ᐅᑎᐸᔨᒋᒐᐤ, ᐊᑐᐎᔅ ᐊ ᐊᐛᓐ ᑕᑈᑎᒻ ᑕᓐ ᐊ ᐃᓯ ᐛᐎᑎᒪᒡ ?
17ᐊ ᐸᑕᒡ ᐊᐛᓐᒋ ᙭ᑕ ᐊ ᐊᔨᒧᒪᑭᓄᔨᒋ ᐊᑯᑕ ᐛᒋ ᑕᑈᑕᒡ᙮ ᐊ ᑭᒐᔅᒋᒧᓇᓄᐅᒡ ᒪᒃ ᐊᑯᑕ ᐊ ᐊᔨᒧᒪᑭᓄᐅᑦ ᙭᙮
18ᒥᒄ ᒪᒃ ᓂ ᐎ ᑯᒂᒋᒐᒧᓐ, ᓇᒪᐎᔾ ᐊ ᒪᒃ ᙭ᑕ ᐅᒋ ᐊᔨᒧᑎᒧᐛᐊᑭᓄᐎᒡ ᒍᐤ ᐃᔪᒡ ? ᓂᐦᐃ, ᑭᑈ ᑲ ᐊᔨᒧᑎᒧᐛᑭᓄᐎᒡ᙮ ᐛᔅ ᐃᑎᔅᑕᐤ ᒋᓴᒪᓂᑐᐤ ᐅᑦ ᐃᔨᒧᐅᓂᒡ,
ᒥᓯᐛ ᐊ ᐃᔅᐱᑎᔅᑭᒥᑲᔨᒡ ᐊᔅᒋᒡ ᒋ ᐛᐎᑎᒧᒡ ᐊᓂᔭ ᒥᔽᒋᒧᐅᓂᔪᐤ᙮ ᓇᔅᒡ ᓇᑕ ᐊ ᐃᔎᔭᔨᒡ ᐅᔭ ᐊᔅᒋᔪᐤ ᒋ ᐸᑕᑯᓂᔪᐤ ᐅᑦ ᐃᔨᒧᐅᓄᐛᐤ᙮
19ᒥᓐ ᑯᑎᒡ ᒐᒂᓐ ᓂ ᐎ ᑯᒂᒋᒐᒧᓐ, ᓇᒪᐎᔾ ᐊ ᒪᒃ ᐅᒋ ᓂᔅᑐᑎᒧᒡ ᐃᔅᕋᐃᓪ ᐃᔪᒡ ᒥᔽᒋᒧᐅᓂᔪᐤ ? ᐊᐅᒄ ᐅᔭ ᒧᓱᔅ ᑲ ᓂᑲᓐ ᐊᔨᒧᑕᐧᒃ ᐊᓐᑕ ᑲ ᐃᑎᔅᑕᔨᒡ,
ᒋᑭ ᐃᑐᑕᑎᓇᐛᐤ ᒐᒋ ᐅᑕᔨᒪᑯᒡ ᐊᓐᒡ ᐊᑲ ᑲ ᐅᑦ ᐃᔨᒥᑐᑐᐛᑭᓄᐎᒡ, ᑭᔭ ᒋᑭ ᒋᔄᐃᑎᓇᐛᐤ ᐊ ᐸᐃᑯᔅᑲᓇᓯᒡ ᐃᔪᒡ ᐊᑲ ᑭᒐᑕᐛᔨᑕᒡ ᐊ ᐊᐱᒋᐃᒂᐤ᙮
20ᐊᓂᔭᐧᑲ ᐊᐃᓴᔭ ᑯᐃᔅᒄ ᒋ ᐎᑎᒻ ᐅᔭ ᐊᒋ ᐃᔅᒋᔄᑯᐱᓇᓂ ᒋᓴᒪᓂᑐᐛ,
ᓂᒋ ᒥᔅᑲᑯᒡ ᐊᓐᒡ ᐊᑲ ᐛᐛᒡ ᓇᓂᑐᐛᔨᒥᒡ᙮ ᓂᒋ ᓄᑯᓯᔅᑐᐛᐅᒡ ᐊᓐᒡ ᐊᑲ ᓇᓂᑐ ᒋᔅᒐᔨᒥᒡ᙮
21ᒪᐅᔭ ᐊ ᐃᓯ ᐊᔨᒧᒪᑦ ᒋᓴᒪᓂᑐᐤ ᐃᔅᕋᐃᓪ ᐃᔪᐛ,
ᐃᔅᑭᓐ ᒋᓯᑲᐛ ᓂᒋ ᓱᐅᓂᔅᒐᔨᔅᑐᐛᐅᒡ ᐊᓐᒡ ᐊᑲ ᓂᓇᐃᑐᐅᒡ ᑭᔭ ᑲ ᐊᓏᑕᒡ᙮
Currently Selected:
ᕈᒪᓇ 10: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
