ᑎᐱᑦ ᐅᓂᑭᒧᐅᓇ 92
92
1ᒥᔽᓯᔪᐤ ᒐᒋ ᓂᓇᔅᑯᒪᑭᓄᐅᑦ ᑎᐸᔨᒋᒐᓱᐤ,
ᑭᔭ ᐊ ᓂᑭᒧᓇᓄᐅᒡ ᒐᒋ ᒪᒥᒋᑕᑭᓄᐅᒡ ᒋᑦ ᐃᓯᓂᐧᑲᓱᐅᓐ, ᐅ ᒪᐅᒡ ᒋᔅᑎᓯᔨᓐ:
2ᒐᒋ ᓄᑯᑕᑭᓄᐅᒡ ᒋᓴᒋᐃᐛᐤ ᒋᓴᐛᑎᓯᐅᓐ ᒋᔭᒋᓴᐸᔭᒋ,
ᑭᔭ ᒋᑯᐃᔅᑯᑐᐅᓐ ᑕᑥᐤ ᐊ ᑎᐱᔅᑲᒡ:
3ᒋᔍᐛᐱᒋᑭᓂᒡ ᑲ ᐸᐃᑯᔪᐛᐸᑲᒧᒡ, ᑭᔭ ᓂᑭᒧᒋᑭᓂᒡ;
ᐊᓯᑭᓇᔭᐱᔾ ᒋᔍᐛᐱᒋᑭᓂᒡ ᐊ ᑯᔎᐛᑕᔨᑎᒧ ᐸᑕᑯᓯᒥᑲᒡ᙮
4ᐛᔅ ᒋᔾ, ᑎᐸᔨᒋᒐᓱᐤ, ᔅᒋ ᓯᒋᔭᐃᓐ ᒋᑦ ᐊᑐᔅᒐᐅᓐ ᐅᒡ:
ᓂᑭ ᒧᒋᒐᔨᑕᓐ ᒋᑦ ᐊᑐᔅᒐᐅᓂᒡ ᒋᑎᒋᒡ ᑲ ᐅᒋ ᐃᑐᑎᒥᓐ᙮
5ᐅ ᑎᐸᔨᒋᒐᓱᐤ, ᑕᑈ ᒋᔅᑕᔨᑕᑯᓇ ᒋᑦ ᐊᑐᔅᒐᐅᓇ !
ᑭᔭ ᐊᓯ ᒪᒥᑐᓇᔨᑎᒥᓐ ᓇᔅᒡ ᒋ ᐎ ᒥᒋᐛᔨᑕᓐ᙮
6ᑲ ᐊᒂᑎᓯᑦ ᐃᔪᐤ ᓇᒪᐎᔾ ᒋᔅᒐᔨᑎᒻ;
ᓇᒪ ᑭᔭ ᒋᔎᐧᑲᓐ ᓂᔅᑐᑎᒻ ᐅᔭᔪᐤ᙮
7ᐃᔅᐱ ᐅᒥᒋᑥᐅᒡ ᐊ ᓴᒋᓂᑕᐅᒋᒡ ᒧᔭᒻ ᒥᔅᑯᓯᔭ,
ᐃᔅᐱ ᑭᔭ ᒥᓯᐛ ᑲ ᒥᒐᑎᓯᐤ ᐃᑎᒡ ᐊ ᒥᔽᐱᒪᐅᓯᒡ;
ᒋᑭ ᐃᓂᔪᐤ ᒐᒋ ᓂᓱᐅᓇᑎᓯᒡ ᑲᒋᒡ᙮
8ᒪᒃ ᒋᔾ, ᑎᐸᔨᒋᒐᓱᐤ, ᒋ ᒪᐅᒡ ᒋ ᒋᔅᑎᓯᓐ ᑲᒋᒡ᙮
9ᐛᔅ, ᐛᐸᑕ, ᑲ ᐛᐧᑲᑎᔅᒡ, ᐅ ᑎᐸᔨᒋᒐᓱᐤ,
ᐛᔅ, ᐛᐸᑕ ᑲ ᐛᐧᑲᑎᔅᒡ ᒋᑭ ᓂᓱᐅᓇᑎᓯᐅᒡ;
ᒥᓯᐛ ᑲ ᒥᒐᑎᓱᐤ ᐃᑎᒡ ᒋᑭ ᐛᓯᔄᑎᓴᐛᑭᓄᐅᒡ᙮
10ᒪᒃ ᓂᑦ ᐊᔅᑭᓐ ᒋᑭ ᐃᔅᐸᒐᓄᐤ ᒧᔭᒻ ᐅᑦ ᐊᔅᑭᓇ ᐅᐸᔭᑯᑕᔅᑭᓄᐤ:
ᓂᑭ ᑐᒥᔅᑯᓂᑯᐅᓐ ᐅᔅᒋ ᐱᒥᔾ ᐅᒡ᙮
11ᓂᔅᒋᓯᑯᒡ ᓂᒋ ᐅᒋ ᐛᐸᑕᓐ ᐊ ᐃᑐᑐᐛᑭᓄᐅᒡ ᑲ ᐛᐧᑲᓯᒡ ᐊ ᐃᓯ ᓂᑐᐛᔨᑎᒪᓐ,
ᑭᔭ ᓂᑐᐅᑲᒡ ᓂᒋ ᐅᒋ ᐸᑕᓐ ᐊ ᐃᑐᑐᐛᑭᓄᐅᒡ ᐅᒥᒋᑥᐅᒡ ᑲ ᐱᓯᑯᔅᑐᐅᒡ ᐊ ᐃᓯ ᓂᑐᐛᔨᑎᒪᓐ᙮
12ᐅᑯᐃᔅᑯᑕᑎᓯᐤ ᒋᑭ ᒥᔪ ᓂᑕᐅᒍᐤ ᒧᔭᒻ ᐸᒪᑎᒄ;
ᒋᑭ ᓂᑕᐅᒍᐤ ᒧᔭᒻ ᒪᔅᒋᔅᑲᑎᒄ ᓚᐸᓇᓂᒡ᙮
13ᐊᓐᒡ ᑲ ᐊᔨᒋᑲᐳᐊᑭᓄᐅᒡ ᐅᒥᒋᐛᐱᒥᔨᒡ ᑎᐸᔨᒋᒐᓱᐛ,
ᒋᑭ ᐛᔪᒋ ᓂᑕᐅᒋᐅᒡ ᐅᒪᐛᒋᐃᑐᐅᒋᐛᐱᒡ ᒋᒋᓴᒪᓂᑐᒥᓄᐛ᙮
14ᐃᔭᐱᒡ ᒋᑭ ᒥᓂᓱᐅᒡ ᐊ ᒋᓴᐃᔪᐅᒡ;
ᒋᑭ ᐎᔨᔪᐅᒡ ᑭᔭ ᒋᑭ ᒥᔪ ᓂᑕᐅᒋᐅᒡ;
15ᒐᒋ ᐛᐸᑎᔨᐛᒡ ᐊ ᑯᐃᔅᑯᑎᔨᒋ ᑎᐸᔨᒋᒐᓱᐛ:
ᐎᔾ ᓂᒋᔅᑕᐱᔅᑯᒻ, ᓇᒪ ᑭᔭ ᓇᔅᒡ ᐱᒋᔅᑲᑯᐤ ᒥᒐᑎᓯᐅᓂᔪᐤ᙮
Currently Selected:
ᑎᐱᑦ ᐅᓂᑭᒧᐅᓇ 92: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
