ᑎᐱᑦ ᐅᓂᑭᒧᐅᓇ 34

Psalm 34:1-8 (Proper-14 Year B)

1ᒧᔅ ᓂᑭ ᒪᒥᒋᒪᐤ ᑎᐸᔨᒋᒐᓱᐤ:

ᐅᒪᒥᒋᒥᑲᓯᐅᓐ ᓇᓂᑎᒻ ᒋᑭ ᑎᒂᓂᔪᐤ ᓂᑐᓂᒡ᙮

2ᓂᑦ ᐊᒐᐧᒄ ᑎᐸᔨᒋᒐᓱᐛ ᒋᑭ ᐅᒋ ᒪᒥᑕᑯᒧᐤ:

ᑲ ᑎᐱᑕᔨᒧᒡ ᒋᑭ ᐸᑎᒧᒡ, ᑭᔭ ᒋᑭ ᓯᒋᔭᓱᐅᒡ᙮

3ᐅ ᐎᒋᐃᒄ ᐊ ᒋᔅᑕᒋᒥᒄ ᑎᐸᔨᒋᒐᓱᐤ,

ᐊᑯᔅ ᒪᒧᐤ ᒪᒥᑕᑯᑎᒺᑕᐤ ᐅᑦ ᐃᓯᓂᐧᑲᓱᐅᓐ᙮

4ᓂᒋ ᓇᓂᑐᐛᔨᒪᐤ ᑎᐸᔨᒋᒐᓱᐤ, ᓂᒋ ᓂᑐᑕᒄ ᒪᒃ,

ᑭᔭ ᓂᒋ ᐎᒂᒋᐃᒄ ᒥᓯᐛ ᓂᑯᔅᑕᒋᐅᓇ ᐅᒡ᙮

5ᒋ ᑭᓄᐛᐱᒪᐅᒡ, ᑭᔭ ᒋ ᐛᔅᑕᓂᒧᐛᐅᒡ;

ᐅᑕᔅᑎᒥᐧᑯᐛᐛ ᒪᒃ ᓇᒪᐎᔾ ᓴᒂᔨᒧᐅᓇᑯᓂᔪᐛ᙮

6ᐅ ᑲ ᒋᔅᑎᒪᑎᓯᑦ ᐃᔪᐤ ᒋ ᑕᑈᐤ, ᒋ ᓂᑐᑕᑎᑯᐤ ᑎᐸᔨᒋᒐᓱᐛ,

ᑭᔭ ᒋ ᐱᒪᒋᐃᑯᐤ ᒥᓯᐛ ᐅᑦ ᐊᔨᒥᓯᐅᓂᒡ ᐅᒋ᙮

7ᐅᑦ ᐊᓐᒋᓂᒪ ᑎᐸᔨᒋᒐᓱᐤ ᐛᔅᑲᑲᐳᐅᔅᑐᐛᔪᐛ ᒥᓯᐛ ᑲ ᓇᓂᒋᔅᑕᑯᑦ, ᐱᒪᒋᐃᐛᔪᐛ ᒪᒃ᙮

8ᐅ ᑯᒋᔅᑎᒧᒄ, ᐛᐸᑎᒧᒄ ᑭᔭ ᐊ ᒥᔽᑎᓯᑦ ᑎᐸᔨᒋᒐᓱᐤ:

ᓱᐛᔨᑕᑯᓱᐤ ᐊᓐ ᐃᔪᐤ ᑲ ᒪᒥᓯᑐᑐᐛᑦ᙮

Psalm 34:9-14 (Proper-15 Year B)

9ᐅ ᓇᓂᒋᔅᑕᐧᒄ ᑎᐸᔨᒋᒐᓱᐤ, ᒋᔨᐛᐤ ᐅᐸᔭᒋᓯᒪ:

ᐛᔅ ᓇᒪᐎᔾ ᐅᓂᓯᓂᔪᐛ ᐊᓂᔭ ᑲ ᓇᓂᒋᔅᑕᑯᑦ᙮

10ᒥᓯᐱᓱᐅᒡ ᒋᔅᑎᒪᑎᓯᐅᒡ, ᑭᔭ ᓄᑕᐧᑭᑕᐅᒡ:

ᐊᓐᒡ ᒪᒃ ᑲ ᓇᓂᑐᐛᔨᒪᒡ ᑎᐸᔨᒋᒐᓱᐛ ᓇᒪᐎᔾ ᒋᑭ ᓄᑕᐱᔪᐅᒡ ᒐᒂᔪᐤ ᑲ ᒥᔽᓯᔨᒡ᙮

11ᐊᔅᑎᒥᒄ, ᐊᐛᓯᑐᒄ, ᓂᑐᑐᐅᒄ:

ᒋᑭ ᒋᔅᑯᑎᒪᑎᓇᐛᐤ ᐅᓇᓂᒋᔅᑕᑯᓯᐅᓐ ᑎᐸᔨᒋᒐᓱᐤ᙮

12ᒐᒄ ᐃᔪᐤ ᑲ ᓂᑐᐛᔨᑕᐧᒃ ᐱᒪᑎᓯᐅᓂᔪᐤ,

ᑭᔭ ᑲ ᓴᒋᑕᑦ ᒥᒐᑐᐤ ᒋᓯᑲᐛ, ᒐᒋ ᐛᐸᑕᐧᒃ ᑲ ᒥᔽᓯᔨᒡ ?

13ᑭᓄᐛᔨᑕ ᒋᑕᔨᔾ ᑲ ᒪᔭᑎᒡ ᐅᒡ,

ᑭᔭ ᒋᑐᓐ ᒐ ᐊᑲ ᒋ ᒥᒋᐃᔨᒥᒥᑭᒡ᙮

14ᓂᑭᑕ ᑲ ᒪᔭᑎᒡ, ᑐᑕ ᒪᒃ ᑲ ᒥᔽᓯᒡ,

ᓇᓂᑐᐛᔨᑕ ᒋᔭᒪᔨᑎᒧᐅᓐ, ᓄᓱᔅᑲ ᒪᒃ᙮

Psalm 34:15-22 (Proper-16 Year B)

15ᑎᐸᔨᒋᒐᓱᐤ ᑭᓄᐛᐱᒪᐤ ᐅᑯᐃᔅᑯᑕᑎᓯᐛ,

ᑭᔭ ᓂᑐᑎᒺᐤ ᐅᒪᐅᓂᔪᐤ᙮

16ᑎᐸᔨᒋᒐᓱᐤ ᒋᔄᓯᔅᑐᐛᐤ ᐊᓂᔭ ᑲ ᒥᒋᑐᑎᒥᔨᒋ,

ᒐᒋ ᐳᓂ ᒋᔅᒋᑐᐛᑭᓄᔨᒋ ᐊᔅᒋᒡ᙮

17ᐅᑯᐃᔅᑯᑕᑎᓯᐛ ᒪᔪᐛ, ᑎᐸᔨᒋᒐᓱᐤ ᒪᒃ ᐸᑐᐛᐤ,

ᑭᔭ ᐎᐧᑯᒋᐊᐤ ᒥᓯᐛ ᐅᑦ ᐊᔨᒥᓯᐅᓂᔨᒡ ᐅᒡ᙮

18ᑎᐸᔨᒋᒐᓱᐤ ᐸᓱᐛᐱᒪᐤ ᐊᓂᔭ ᑲ ᐱᑯᑕᐊᔨᒋ;

ᐱᒪᒋᐊᐤ ᑭᔭ ᐊᓂᔭ ᑲ ᒋᔅᑎᒪᑎᓯᔨᒋ᙮

19ᒥᒐᓂᔪᐛ ᐅᒪᒂᔨᑕᒧᐅᓇ ᐅᑯᐃᔅᑯᑕᑎᓯᐤ:

ᒪᒃ ᑎᐸᔨᒋᒐᓱᐤ ᒥᓯᐛ ᐅᒋ ᐎᐧᑯᒋᐊᐤ᙮

20ᑭᓄᐛᔨᑎᒺᐤ ᒥᓯᐛ ᐅᔅᑭᓂᔪᐛ:

ᓇᒪ ᐛᐛᒡ ᐸᐃᒄ ᓇᑥᐱᔪᐛ᙮

21ᑲ ᒪᔭᑎᓂᔨᒡ ᒋᑭ ᓂᐸᐃᑯᐅᒡ ᐅᒥᒋᑥᐅᒡ:

ᐊᓐᒡ ᒪᒃ ᑲ ᐛᐧᑲᑕᒡ ᐅᑯᐃᔅᑯᑕᑎᓯᐛ ᒋᑭ ᒥᒋ ᐃᑕᔨᑕᑯᓱᐅᒡ᙮

22ᑎᐸᔨᒋᒐᓱᐤ ᐱᒪᒋᐃᒪᐤ ᐅᑦ ᐊᒐᐧᑯᔪᐛ ᐅᑦ ᐊᑐᔅᒐᔭᑭᓇ;

ᓇᒪᐎᔾ ᐊᐛᓐ ᒪᒃ ᑲ ᒪᒥᓯᑐᑐᐛᑦ ᒋᑭ ᒥᒋ ᐃᑕᔨᑕᑯᓱᐤ᙮

Currently Selected:

ᑎᐱᑦ ᐅᓂᑭᒧᐅᓇ 34: ᓇᔅᑲᐱ

Highlight

Copy

Want to have your highlights saved across all your devices? Sign up or sign in

ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ

Naskapi Development Corporation

Kawawachikamach, Québec G0G 2Z0 Canada

Canadian Bible Society

10 Carnforth Road, Toronto Ontario M4A 2S4 Canada

Learn More About ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ