ᑎᐱᑦ ᐅᓂᑭᒧᐅᓇ 19
19
Psalm 19 (Proper-22 Year A; Lent-3 Year B; Epiphany-3 Year C)
1ᒋᓯᒂ ᐎᑎᒧᒥᑭᓇ ᐅᒋᔅᑕᔨᑕᑯᓱᐅᓐ ᒋᓴᒪᓂᑐᐤ,
ᑭᔭ ᒧᓴ ᒋᓯᒄ ᐛᐸᑎᔨᐛᒥᑭᓐ ᐅᑭᔅᒋᐅ-ᐊᑐᔅᒐᐅᓐ᙮
2ᑕᑥᐤ ᐊ ᒋᓯᑲᒡ ᐃᔨᒥᒥᑭᓐ,
ᑭᔭ ᑕᑥᐤ ᐊ ᑎᐱᔅᑲᒡ ᐛᐸᑎᔨᐛᒥᑭᓐ ᒋᔅᒐᔨᑎᒧᐅᓐ᙮
3ᓇᒪᐎᔾ ᑎᑯᓐ ᐊ ᐃᓯ ᐃᔨᒥᓇᓄᐅᒡ ᑭᔭ ᒪᒃ ᐊ ᐃᓯ ᐃᔅᒋᔄᓄᐅᒡ,
ᐊᓐᑕ ᐊᑲ ᐸᑕᑯᓯᒥᑲᒡ᙮
4ᐊ ᐸᑕᒂᒡ ᐃᑐᑕᒥᑭᓐ ᒥᓯᐛᔅᑭᒥᑲᒡ,
ᑭᔭ ᑲ ᐃᔅᒋᔄᒥᑲᒡ ᐊ ᐃᔎᔅᑭᒥᑲᒡ᙮
ᐊᑯᑕ ᑲᒪᓄᑯᐛᑦ ᒋᓯᑲᐤ ᐱᓯᒺ,
5ᑲ ᓂᔅᐱᑐᐛᑦ ᐅᔅᒋᓂᐳᐛᓇ ᐊ ᐸᒋ ᐎᐎᔨᒋ ᐅᐱᔅᒋᒋᒋᐛᐱᓯᔨᒡ ᐅᒡ,
ᑭᔭ ᑲ ᒥᔽᑕᐧᒃ ᒧᔭᒻ ᑲ ᒥᔅᑯᐅᓯᔨᒋ ᐃᔪᐛ ᑲ ᑯᒂᔅᑭᔅᑕᔨᒐᔨᒋ᙮
6ᐊ ᐃᔎᔭᔨᒡ ᒋᓯᑯᒡ ᐅᒋ ᐸᒋ ᐃᔅᐱᔪᐤ,
ᑭᔭ ᒥᓐ ᐊ ᐃᔎᔭᔨᒡ ᐃᔅᐱᔅ ᐛᔅᑲᐱᔪᐤ:
ᒥᓯᐛ ᑕᑐᐤ ᒐᒂᔪᐤ ᑭᔭ ᒋᓯᓯᒻ᙮
7ᐅᑦ ᐃᑎᓱᐛᐅᓐ ᑎᐸᔨᒋᒐᓱᐤ ᐸᔭᐧᑭᓂᔪᐤ, ᐊᒐᐧᒄ ᐊ ᒂᔅᑲᑎᓯᔅᑲᑯᑦ:
ᐅᑎᐸᒋᒧᐅᓐ ᑎᐸᔨᒋᒐᓱᐤ ᒐᔅᑎᓇᑕᔭᔨᑕᑯᓂᔪᐤ, ᐊ ᑭᒐᑕᐛᔨᑎᒥᑯᒡ ᐊᑲ ᑭᒐᑕᐛᔨᑕᒡ᙮
ᐎᔾ ᒥᒄ ᑭᔅᒋᑕᐤ ᑯᐃᔅᒄ ᒐ ᐃᓯ ᑭᒐᔅᒋᒪᑦ,
ᐎᔾ ᓇᔅᒡ ᒥᓯᐛ ᐊ ᐃᓯ ᒥᔪᑥᐛᑎᓯᑦ᙮
8ᐅᑦ ᐃᑎᓱᐛᐅᓇ ᑎᐸᔨᒋᒐᓱᐤ ᑯᐃᔎᓂᔪᐛ, ᐊ ᒥᔽᔨᑎᒧᔅᑲᒐᔨᒋ:
ᐅᑭᒐᔅᒋᒧᐛᐅᓐ ᑎᐸᔨᒋᒐᓱᐤ ᐸᔭᐧᑭᓂᔪᐤ, ᐊ ᐛᐸᑎᔨᐛᒥᑭᓂᔨᒡ᙮
9ᐅᓇᓂᒋᔅᑕᑯᓯᐅᓐ ᑎᐸᔨᒋᒐᓱᐤ ᐸᔭᐧᑭᓂᔪᐤ, ᑲᒋᒡ ᐊ ᑎᑯᓂᔨᒡ:
ᐅᑎᐸᔅᑯᓂᒐᐅᓇ ᑎᐸᔨᒋᒐᓱᐤ ᑕᑈᒪᑭᓂᔪᐛ ᑭᔭ ᓇᔅᒡ ᑯᐃᔅᑯᑕᑎᓯᒥᑭᓂᔪᐛ᙮
10ᐊᔪᐛᒃ ᒧᔅᑕᓇᔨᑕᑯᓂᔪᐛ ᐃᔅᐱᔅ ᐎᔄᐅᓱᓇᔭᐱᔅᒄ,
ᓂᐦᐃ, ᐃᔅᐱᔅ ᒥᔅᑎ ᐊ ᒥᔪᓯᓯᑦ ᐎᔄᐅᓱᓇᔭᐱᔅᒄ:
ᐊᔪᐛᒃ ᐊᓯᐛᒡ ᐃᔅᐱᔅ ᑲᓯᐛᓯᐛᐳᔾ, ᑭᔭ ᐊᒧᐤ ᑲᓯᐛᓯᐛᐳᔾ᙮
11ᑭᔭ ᒪᒃ ᐊ ᑭᒐᔅᒋᒥᑯᑦ ᒋᑦ ᐊᑐᔅᒐᔭᑭᓐ:
ᑭᔭ ᐊ ᑭᓄᐛᔨᑕᑭᓄᐅᒡ ᒥᔅᑎ ᑎᐸᐊᒪᒐᐅᓐ ᑎᑯᓐ᙮
12ᐊᐛᓐ ᒐᒋ ᓂᔅᑐᑕᐧᒃ ᐅᐅᓂᑐᐅᓇ ?
ᐸᔭᒋᐃ ᓂᒋᒧᑦ ᒥᒋᐃᑐᐅᓇ ᐅᒡ᙮
13ᒋᑕᐊᒧᐤ ᑭᔭ ᒋᑦ ᐊᑐᔅᒐᔭᑭᓐ ᒐ ᐊᑲ ᒋ ᐊᐃᓴᒡ ᒥᒋᑐᑕᐧᒃ;
ᐊᑯᔅ ᐊᑲᐎᔾ ᓂᑭ ᑎᐸᔨᒥᑯᓐ,
ᐊᑯ ᒐ ᐸᔭᒋ ᐃᑕᑎᓯᔭᓐ ᒐ ᐊᑲ ᒋ ᒥᒋᑐᑎᒪᓐ᙮
14ᐊᑯᔅ ᓂᑦ ᐃᔨᒧᐅᓇ ᓂᑐᓂᒡ, ᑭᔭ ᐊ ᐃᓯ ᒪᒥᑐᓇᔨᑎᒪᓐ ᓂᑕᐃᒡ,
ᒋᑭ ᒥᔪᓇᑯᓇ ᐊ ᑭᓄᐛᐸᑎᒥᓐ,
ᐅ ᑎᐸᔨᒋᒐᓱᐤ, ᓂ ᒥᔅᑯᐅᓯᐅᓐ ᑭᔭ ᓂᐱᒪᒋᐃᐛᓯᒻ᙮
Currently Selected:
ᑎᐱᑦ ᐅᓂᑭᒧᐅᓇ 19: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
