ᑎᐱᑦ ᐅᓂᑭᒧᐅᓇ 147

147

Psalm 147:1-11, 20c (Epiphany-5 Year B)

1ᒪᒥᒋᒥᐧᒄ ᑎᐸᔨᒋᒐᓱᐤ !

ᐛᔅ ᒥᔽᓯᔪᐤ ᐊ ᒪᒥᒋᒪᑭᓄᐅᑦ ᒋᒋᓴᒪᓂᑐᒥᓄᐤ ᐊ ᓂᑭᒧᓇᓄᐅᒡ:

ᐛᔅ ᒥᔽᔨᑕᑯᓐ, ᑭᔭ ᒪᒥᒋᒧᐛᐅᓐ ᒥᔽᓯᔪᐤ᙮

2ᑎᐸᔨᒋᒐᓱᐤ ᐅᓯᑕᐤ ᒋᕈᓯᓕᒥᔪᐤ;

ᒪᒧᐤ ᒪᐅᒋᐊᐤ ᑲ ᐎᐎᐛᐱᓇᑭᓄᐎᒋ ᐃᔅᕋᐃᓕᒡ᙮

3ᒥᓏᒋᐊᐤ ᑲ ᐱᑯᑕᐊᔨᒋ,

ᑭᔭ ᒪᑯᐱᑎᒺᐤ ᐊ ᒥᔄᑭᓂᐧᑲᑕᑭᓄᔨᒋ᙮

4ᐎᑎᒻ ᐊ ᐃᑎᓯᔨᒋ ᐅᒐᑭᑕᒂ:

ᐊᓯᓂᐧᑲᓱᔨᒋ ᐃᓯ ᓂᑐᒪᐤ᙮

5ᒋᔅᑎᓯᐤ ᑎᐸᔨᒋᒐᓱᐤ ᑭᔭ ᓇᔅᒡ ᑭᔅᒋᐅᐤ:

ᐅᓂᔅᑐᑎᒧᐅᓐ ᓇᒪᐎᔾ ᑕᐱ ᒋᔅᒐᔨᑕᒂᓂᔪᐤ᙮

6ᑎᐸᔨᒋᒐᓱᐤ ᐅᐱᓇᐤ ᑲ ᔪᔅᑲᑎᓯᔨᒋ:

ᒧᔅᑎᔅᑭᒥᒡ ᐃᓯ ᓂᒋᐛᐸᐛᐤ ᐅᒥᒋᑥᐛ᙮

7ᓂᑭᒧᔅᑕᐧᒄ ᑎᐸᔨᒋᒐᓱᐤ ᐊ ᓂᓇᔅᑯᒪᒄ;

ᐊ ᓂᑭᒧᔭᒄ ᐊᓯᑭᓇᔭᐱᔾ ᒋᔍᐛᐱᒋᑭᓂᒡ ᒪᒥᒋᒥᐧᒄ ᒋᒋᓴᒪᓂᑐᒥᓄᐤ,

8ᑲ ᐊᑯᓇᐊᐊᐧᒃ ᒋᓯᑯᔪᐤ ᑭᔅᑯᐅᓇ ᐅᒡ,

ᑲ ᒋᒧᓄᑕᑦ ᐊᔅᒋᒡ,

ᑲ ᓂᑕᐅᒋᑕᑦ ᒥᔅᑯᓯᔭ ᐱᔅᑯᑎᓇᒡ᙮

9ᒥᔭᐤ ᐊᐛᓯᓴ ᐅᒥᒋᒥᔪᐤ,

ᑭᔭ ᑲᐧᑲᒍᓯᓴ ᑲ ᐸᑕᑯᓯᔨᒋ᙮

10ᓇᒪᐎᔾ ᒥᔽᔨᑎᒥᐃᑯᐛᐤ ᑲᐸᐃᑭᔎᐛ ᐅᒥᔅᑯᐅᓯᐅᓂᔪᐤ,

ᓇᒪᐎᔾ ᒥᔽᔨᑎᒺᐤ ᐃᔪᐛ ᐅᔅᑲᑎᔪᐛ᙮

11ᑎᐸᔨᒋᒐᓱᐤ ᒥᔽᔨᒪᐤ ᐊᓂᔭᔪᐛ ᑲ ᓇᓂᒋᔅᑕᑯᑦ,

ᐊᓂᔭᔪᐛ ᑲ ᐊᔅᐸᔨᒧᔨᒋ ᐅᓱᐛᔨᒋᒐᐅᓂᒡ᙮

Psalm 147:12-20 (Christmas-2 Year B)

12ᒪᒥᒋᒻ ᑎᐸᔨᒋᒐᓱᐤ, ᐅ ᒋᕈᓯᓕᒻ;

ᒪᒥᒋᒻ ᒋᒋᓴᒪᓂᑐᒻ, ᐅ ᓴᐃᔭᓐ᙮

13ᐛᔅ ᒋ ᒥᔅᑯᐅᑕᐤ ᒋ ᒋᒋᐃᔎᑕᒪᐱᔎ;

ᒋ ᒥᔽᒋᒪᐤ ᒋᑦ ᐊᐛᓯᒥᓴ ᑲ ᐱᒋᔅᑲᔅᒋᔨᔅᒋ᙮

14ᒋᔭᒪᔨᑎᒧᐅᓂᒐᐤ ᒋᑦ ᐃᑕᐅᓂᒡ,

ᑭᔭ ᒋ ᓴᑭᔅᒋᓇᐃᒄ ᓇᔅᒡ ᒪᔪᓯᓯᔨᒋ ᐸᒂᓯᑭᓂᒥᓇ᙮

15ᐸᒋ ᐃᑎᓴᒻ ᐅᑦ ᐃᑎᓱᐛᐅᓐ ᐊᔅᒋᒡ:

ᐅᑦ ᐃᔨᒧᐅᓐ ᓇᔅᒡ ᒋᓯᐱᔪᐤ᙮

16ᒥᔨᐛᐤ ᑯᓇ ᒧᔭᒻ ᒪᔭᑕᓂᓴ ᐅᐱᐎᔭᐛ:

ᐛᓴᔄᑎᓴᐊᒻ ᐊᐊᒋᑯᑎᓂᔨᒡ ᒧᔭᒻ ᐱᐧᑯᑕᔪᐤ᙮

17ᐎᐎᑎᓴᐛᐤ ᐅ ᒥᔅᑯᒥᒪ ᒧᔭᒻ ᓯᔅᑲᒧᐅᓇ:

ᐊᐛᓐ ᒐᒋ ᐅᑎᔅᑯᐎᑲᐳᔅᑎᒺᑦ ᐅᒋᓯᓂᒥᔪᐤ ?

18ᒋ ᐃᑎᓴᐊᒻ ᐅᑦ ᐃᔨᒧᐅᓐ, ᐊᐸᐱᔨᑕᐤ ᒪᒃ:

ᔪᑎᓂᑕᐤ ᐊᑯ ᓂᐱᔭ ᐸᒥᒍᐅᒋ᙮

19ᐛᐸᑎᔭᐤ ᐅᑦ ᐃᔨᒧᐅᓐ ᒐᑭᐸ,

ᐅᑦ ᐃᑎᓱᐛᐅᓇ ᑭᔭ ᐅ ᑎᐸᔅᑯᓂᒐᐅᓇ ᐃᔅᕋᐃᓚ᙮

20ᓇᒪᐎᔾ ᐅᔭᔪᐤ ᒋ ᐃᓯ ᑐᑐᐛᐤ ᑯᑎᑲ ᐊ ᐃᑎᔅᑲᓇᓯᔨᒋ ᐃᔪᐛ:

ᑭᔭ ᐅᑎᐸᔅᑯᓂᒐᐅᓇ ᓇᒪᐎᔾ ᒋ ᒋᔅᒐᔨᑎᒥᔪᐛ᙮

ᒪᒥᒋᒥᐧᒄ ᑎᐸᔨᒋᒐᓱᐤ !

Currently Selected:

ᑎᐱᑦ ᐅᓂᑭᒧᐅᓇ 147: ᓇᔅᑲᐱ

Highlight

Copy

Want to have your highlights saved across all your devices? Sign up or sign in

ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ

Naskapi Development Corporation

Kawawachikamach, Québec G0G 2Z0 Canada

Canadian Bible Society

10 Carnforth Road, Toronto Ontario M4A 2S4 Canada

Learn More About ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ