ᑎᐱᑦ ᐅᓂᑭᒧᐅᓇ 118
118
Psalm 118:1-2, 14-24 (Easter Sunday Year A, B, C)
Psalm 118:1-2, 19-29 (Palm Sunday Year C)
1ᐅ ᓂᓇᔅᑯᒥᐧᒄ ᑎᐸᔨᒋᒐᓱᐤ: ᐛᔅ ᒥᔽᑎᓯᐤ:
ᐛᔅ ᐅᒋᔅᑎᒪᒐᔨᒋᒐᐅᓐ ᑲᒋᒡ ᐱᒥᐱᔨᔪᐤ᙮
2ᐊᑯᔅ ᐊᑯ ᒐ ᐃᔅᒋᔄᒡ ᐃᔅᕋᐃᓪ ᐃᔪᒡ,
ᐅᒋᔅᑎᒪᒐᔨᒋᒐᐅᓐ ᑲᒋᒡ ᐊ ᐱᒥᐱᔨᒡ᙮
3ᐊᑯᔅ ᒥᓯᐛ ᐊᑎᓯᑦ ᐊᕋᓐ ᐊᑯ ᒐ ᐃᔅᒋᔄᑦ,
ᐅᒋᔅᑎᒪᒐᔨᒋᒐᐅᓐ ᑲᒋᒡ ᐊ ᐱᒥᐱᔨᒡ᙮
4ᐊᑯᔅ ᐊᓐᒡ ᑲ ᓇᓂᒋᔅᑐᐛᒡ ᑎᐸᔨᒋᒐᓱᐛ ᐊᑯ ᒐ ᐃᔅᒋᔄᒡ,
ᐅᒋᔅᑎᒪᒐᔨᒋᒐᐅᓐ ᑲᒋᒡ ᐊ ᐱᒥᐱᔨᒡ᙮
5ᓂᒋ ᓇᓂᑐᒪᐤ ᑎᐸᔨᒋᒐᓱᐤ ᑲ ᒥᑯᔅᑲᑕᔨᑎᒪᓐ:
ᑎᐸᔨᒋᒐᓱᐤ ᒪᒃ ᓂᒋ ᓂᔅᑯᒥᒄ,
ᓂᒋ ᑎᔨᒄ ᑭᔭ ᐊᓐᑕ ᐊ ᒥᓴᔨᒡ᙮
6ᑎᐸᔨᒋᒐᓱᐤ ᓂ ᐎᒋᐃᒄ;
ᓇᒪᐎᔾ ᓂᑭ ᑯᔅᑕᒋᓐ:
ᒐᒂᔪᐤ ᒐᒋ ᑐᑐᐅᑦ ᐃᔪᐤ ?
7ᑎᐸᔨᒋᒐᓱᐤ ᓂ ᐎᒋᐃᒄ ᐊᓯᒡ ᐊᓐᒡ ᑲ ᐎᒋᐃᒡ:
ᐊᑯᑕ ᒐ ᐅᒋ ᐛᐸᑎᒪᓐ ᒐᒋ ᑐᑐᐛᑭᓄᐅᒡ ᑲ ᐛᐧᑲᓯᒡ ᐊ ᐃᓯ ᓂᑐᐛᔨᑎᒪᓐ᙮
8ᐊᔪᐛᒃ ᒥᔽᓯᔪᐤ ᒐᒋ ᒪᒥᓯᑐᑐᐅᒃ ᑎᐸᔨᒋᒐᓱᐤ
ᐃᔅᐱᔅ ᐎ ᒐᒋ ᐊᔅᐸᔨᒧᑐᑐᐅᒃ ᐃᔪᐤ᙮
9ᐊᔪᐛᒃ ᒥᔽᓯᔪᐤ ᒐᒋ ᒪᒥᓯᑐᑐᐅᒃ ᑎᐸᔨᒋᒐᓱᐤ
ᐃᔅᐱᔅ ᐎ ᒐᒋ ᐊᔅᐸᔨᒧᑐᑐᐅᒂᐤ ᒋᓴᐅᒋᒪᓯᒡ᙮
10ᒥᓯᐛ ᑲ ᑕᑐᔅᑲᓇᓯᒡ ᐃᔪᒡ ᓂᒋ ᐛᔅᑲᔅᑲᑯᒡ:
ᒪᒃ ᐅᑦ ᐃᓯᓂᐧᑲᓱᐅᓂᒡ ᑎᐸᔨᒋᒐᓱᐤ ᓂᑭ ᓂᓱᐅᓇᒋᐊᐅᒡ᙮
11ᓂᒋ ᐛᔅᑲᔅᑲᑯᒡ; ᓂᐦᐃ, ᓂᒋ ᐛᔅᑲᔅᑲᑯᒡ:
ᒪᒃ ᐅᑦ ᐃᓯᓂᐧᑲᓱᐅᓂᒡ ᑎᐸᔨᒋᒐᓱᐤ ᓂᑭ ᓂᓱᐅᓇᒋᐊᐅᒡ᙮
12ᓂᒋ ᐛᔅᑲᔅᑲᑯᒡ ᒧᔭᒻ ᐊᒧᐅᒡ;
ᐊᔅᑐᐛᐅᒡ ᒧᔭᒻ ᑲᑲᓴᒋ ᓂᐱᓯᔭ ᐊᐎᑕᒡ,
ᐅᑦ ᐃᓯᓂᐧᑲᓱᐅᓂᒡ ᑎᐸᔨᒋᒐᓱᐤ ᓂᑭ ᓂᓱᐅᓇᒋᐊᐅᒡ᙮
13ᓇᔅᒡ ᔅᒋ ᑯᒋ ᑕᐧᑭᒥᓐ, ᒐᒋ ᐸᒋᓯᓂᔭᓐ:
ᒪᒃ ᑎᐸᔨᒋᒐᓱᐤ ᓂᒋ ᐎᒋᐃᒄ᙮
Psalm 118:1-2, 14-24 (Easter Sunday Year A, B, C)
Psalm 118:14-29 (Easter-2 Year C)
14ᑎᐸᔨᒋᒐᓱᐤ ᓂ ᒥᔅᑯᐅᓯᐅᓐ ᑭᔭ ᓂᓂᑭᒧᐅᓐ,
ᐊᔪᐤ ᑭᔭ ᓂᐱᒪᒋᐃᑯᓯᐅᓐ᙮
15ᒥᔽᔨᑎᒧᐎ ᐸᑕᑯᓱᐅᓂᔪᐤ ᑭᔭ ᐱᒪᒋᐃᑯᓱᐎ ᐸᑕᑯᓱᐅᓂᔪᐤ ᐸᑕᑯᓂᔪᐤ ᐎᒋᐛᐛᒡ ᐅᑯᐃᔅᑯᑕᑎᓯᐅᒡ:
“ᐅᒥᔪᐅᓂᒡ ᑎᐸᔨᒋᒐᓱᐤ ᓱᒋᑕᐊᐎ ᐊᔨᑎᒥᑭᓂᔪᐤ᙮
16ᐅᒥᔪᐎᓐ ᑎᐸᔨᒋᒐᓱᐤ ᐊᔅᐸᔨᑕᑯᓂᔪᐤ:
ᐅᒥᔪᐎᓐ ᑎᐸᔨᒋᒐᓱᐤ ᓱᒋᑕᐊᐎ ᐊᔨᑎᒥᑭᓂᔪᐤ᙮”
17ᓇᒪ ᓂᑭ ᓂᐱᓐ, ᒪᒃ ᓂᑭ ᐱᒪᑎᓯᓐ,
ᑭᔭ ᓂᑭ ᐎᑕᒺᓐ ᐅᑦ ᐊᑐᔅᒐᐅᓐ ᑎᐸᔨᒋᒐᓱᐤ᙮
18ᑎᐸᔨᒋᒐᓱᐤ ᓂᒋ ᐎᓴᑲᔅᑕᐅᒄ:
ᒥᒄ ᒪᒃ ᓇᒪᐎᔾ ᓂᐳᐅᓂᒡ ᓂ ᐅᒋ ᐃᓯ ᐱᔅᑎᓂᒄ᙮
Psalm 118:1-2, 19-29 (Palm Sunday Year C)
19ᐸᔅᒋᑕᓇᒧᐎ ᑯᐃᔅᑯᑕᑎᓱᐤ ᒋᒋᐃᔎᑕᒪ:
ᓂᑭ ᐱᒐᓐ,
ᓂᑭ ᒪᒥᒋᒪᐤ ᒪᒃ ᑎᐸᔨᒋᒐᓱᐤ:
20ᐅᔭᔪᐤ ᐅᒋᒋᐃᔎᑕᒻ ᑎᐸᔨᒋᒐᓱᐤ,
ᐊᑯᑕ ᒐ ᐃᓯ ᐱᒐᒡ ᐅᑯᐃᔅᑯᑕᑎᓯᐅᒡ᙮
21ᒋᑭ ᒪᒥᒋᒥᑎᓐ: ᐛᔅ ᔅᒋ ᓂᑐᑐᐅᓐ,
ᑭᔭ ᒋᑦ ᐊᐎᓐ ᓂᐱᒪᒋᐃᑯᓯᐅᓐ᙮
22ᐊᓐ ᐊᓯᓂᔾ ᑲ ᐊᑐᐛᔨᒥᑯᑦ ᑲᒪᓂᒐᓯᔨᒋ
ᓴᔅ ᓂᑲᓐ ᐊᐳᐤ ᐊ ᒋᒐᔭᔨᒡ᙮
23ᐅᔭᔪᐤ ᒋ ᐃᑐᑎᒻ ᑎᐸᔨᒋᒐᓱᐤ:
ᒋ ᒪᒥᔅᑲᓯᓇᓇᓄᐤ ᒪᒃ᙮
24ᐊᓄᒡ ᐅᔭᔪᐤ ᑲ ᒋᓯᑲᔨᒡ ᐊᔪᐅᒄ ᑲ ᐅᓯᑕᑦ ᑎᐸᔨᒋᒐᓱᐤ;
ᒋᑭ ᒥᔽᔨᑕᓇᓄᐤ ᑭᔭ ᒋᑭ ᓯᒋᔭᓯᓇᓄᐤ ᐊᓄᒡ ᒪᒂᒡ᙮
25ᐱᒪᒋᐃ ᐊᑯ, ᒋ ᐱᑯᓴᔨᒥᑎᓐ, ᐅ ᑎᐸᔨᒋᒐᓱᐤ:
ᐅ ᑎᐸᔨᒋᒐᓱᐤ, ᒋ ᐱᑯᓴᔨᒥᑎᓐ, ᐸᒋ ᐃᑎᓴᐊ ᐊᑯ ᐛᔪᑎᓯᐅᓐ᙮
26ᓱᐛᔨᑕᑯᓱᐤ ᐊᓐ ᑲ ᐸᒋ ᐃᑐᑕᑦ ᐅᑦ ᐃᓯᓂᐧᑲᓱᐅᓂᔨᒡ ᑎᐸᔨᒋᒐᓱᐛ:
ᔅᒋ ᒥᔽᒋᒥᑎᓇᓐ ᐎᒋᒡ ᐅᒋ ᑎᐸᔨᒋᒐᓱᐤ᙮
27ᒋᓴᒪᓂᑐᐤ ᑎᐸᔨᒋᒐᓯᐤ, ᑲ ᐛᐸᑎᔨᑕᐧᒄ ᐛᓴᔭᓯᐅᓂᔪᐤ:
ᒪᑯᐱᑎᒧᒄ ᐱᔅᑎᓂᒐᐅᓐ ᓴᔅᑎᒂᔭᐱᔾ ᐅᒋ, ᐊ ᐅᑦ ᐊᔅᑭᓄᐅᒡ ᐱᔅᑎᓂᒐᐤ ᐃᓴᒄ ᐅᑎ᙮
28ᒋᔾ ᓂᒋᓴᒪᓂᑐᒻ, ᒋᑭ ᒪᒥᒋᒥᑎᓐ ᒪᒃ:
ᒋᔾ ᓂᒋᓴᒪᓂᑐᒻ, ᒋᑭ ᐃᔅᐸᔨᑕᑯᐃᑎᓐ᙮
29ᐅ ᓂᓇᔅᑯᒥᐧᒄ ᑎᐸᔨᒋᒐᓱᐤ; ᐛᔅ ᒥᔽᑎᓯᐤ:
ᐛᔅ ᐅᒋᔅᑎᒪᒐᔨᒋᒐᐅᓐ ᑲᒋᒡ ᐱᒥᐱᔪᐤ᙮
Currently Selected:
ᑎᐱᑦ ᐅᓂᑭᒧᐅᓇ 118: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
