ᑎᐱᑦ ᐅᓂᑭᒧᐅᓇ 10

1ᒐᒂᓐ ᐛᔪᐤ ᐛᒋ ᓂᐳᔨᓐ, ᐅ ᑎᐸᔨᒋᒐᓱᐤ ?

ᒐᒂᓐ ᐛᒋ ᑲᓱᔨᓐ ᒪᒂᒡ ᐊ ᐊᔨᒥᐅᒋᓯᑲᒋ ?

2ᐅᒥᒋᑥᐤ ᐅᒋᔅᑕᔨᒧᐅᓂᒡ ᓇᓇᐧᑲᒋᐊᐤ ᑲ ᒋᔅᑎᒪᑎᓯᔨᒋ᙮ ᐊᑯᔅ ᒋᑭ ᓇᒂᑎᑯᐅᒡ ᐅᑦ ᐃᑕᔨᑎᒧᐅᓄᐛᐛ ᑲᒋ ᐃᑕᔨᑕᒡ᙮

3ᐛᔅ ᐅᒥᒋᑥᐤ ᒪᒪᑕᑯᒧᐤ ᐊ ᐃᓯ ᐱᑯᓴᔨᒧᑦ ᐅᑕᐃᒡ,

ᑭᔭ ᒥᔽᒋᒪᐤ ᑲ ᐊᔅᐳᓂᓯᔨᒋ, ᐛᐧᑲᑕᐤ ᑎᐸᔨᒋᒐᓱᐛ᙮

4ᐅᒥᒋᑥᐤ, ᐊ ᒋᔅᑕᔨᒧᓇᑯᓯᑦ, ᓇᒪᐎᔾ ᓇᓂᑐᐛᔨᒪᐤ ᒋᓴᒪᓂᑐᐛ:

ᒋᓴᒪᓂᑐᐛ ᓇᒪᐎᔾ ᓇᔅᒡ ᑕᔪᐛ ᐅᒥᑐᓇᐃᒋᑭᓂᒡ᙮

5ᐅᑦ ᐃᓯᑥᐅᓇ ᒧᔅ ᐊᒂᑎᓂᔪᐛ;

ᒋᑎᐸᔅᑯᓂᒐᐅᓇ ᓇᒪᐎᔾ ᑕᐸᐸᑎᒻ:

ᒥᓯᐛ ᐅᐧᑲᑕᑭᓇ ᒪᒃ ᐳᑕᑕᐤ᙮

6ᒋ ᐃᔅᒋᔄᐤ ᐅᑕᐃᒡ, “ᓇᒪᐎᔾ ᓂᑭ ᐊᒋᐸᔨᐃᑯᐅᓐ:

ᐛᔅ ᓇᒪ ᓂᑕ ᓂᑭ ᐅᔅᑕᐱᔨᓐ᙮”

7ᐅᑐᓂᒡ ᓴᑭᔅᒋᓇᔪᐤ ᒪᒐᒋᒧᐛᐅᓂᔪᐤ, ᑭᔭ ᑭᑭᒋᔭᐅᓂᔪᐤ, ᑭᔭ ᐛᔭᓯᐃᐛᐅᓂᔪᐤ:

ᓯᐸ ᐅᑕᔨᔨᒡ ᑎᒂᓂᔪᐤ ᑭᔭᓯᐃᐛᐅᓂᔪᐤ ᑭᔭ ᓂᑐᐎᔾ ᒐᒂᔪᐤ᙮

8ᐊᐳᐤ ᐊᓐᑕ ᐊᑯ ᐃᑕᐅᓂᓯᒡ:

ᐊᑯ ᐊᓐᑕ ᓂᐸᐊᐤ ᐅᑯᐃᔅᑯᑎᐛ:

ᒋᒧᑦ ᑭᓄᐛᐱᒪᐤ ᑲ ᒋᔅᑎᒪᑎᓯᔨᒋ᙮

9ᒋᒧᑦ ᐊᔅᑲᒪᒐᐤ ᒧᔭᒻ ᒥᓯᐱᓱᐤ ᐅᐛᑎᑯᒡ:

ᐊᔅᑲᒪᒐᐤ ᒐᒋ ᑲᔅᑎᓇᑦ ᑲ ᒋᔅᑎᒪᑎᓯᔨᒋ,

ᑲᔅᑎᓇᐤ ᑲ ᒋᔅᑎᒪᑎᓯᔨᒋ, ᐃᔅᐱ ᐸᑕᐅᔭᒋ ᐅᑦ ᐊᐃᐱᒡ᙮

10ᐱᑎᐱᐤ, ᑭᔭ ᑎᐱᑕᔨᒧᐧᑲᓱᐤ,

ᒐᒋ ᐸᒋᓯᓂᔨᒋ ᑲ ᒋᔅᑎᒪᑎᓯᔨᒋ ᐅᒥᔅᑯᐅᓯᒪ ᐅᒋ᙮

11ᒋ ᐃᔅᒋᔄᐤ ᐅᑕᐃᒡ, “ᒋᓴᒪᓂᑐᐤ ᒋ ᐅᓂᒋᔅᒍᐤ:

ᑲᓱᐤ, ᓇᒪ ᓂᑕ ᒋᑭ ᐛᐸᑎᒻ᙮”

12ᐱᓯᑯᐤ, ᐅ ᑎᐸᔨᒋᒐᓱᐤ:

ᐅ ᒋᓴᒪᓂᑐᐤ, ᐅᐱᓂᔅᒐᔨ;

ᐊᑲᐎᔾ ᐅᓂᒋᔅᒋᑐᐅᒡ ᑲ ᑎᐱᑕᔨᒧᒡ᙮

13ᒐᒂᔪᐤ ᐛᒋ ᒪᔭᔨᒪᑦ ᐅᒥᒋᑥᐤ ᒋᓴᒪᓂᑐᐛ ?

ᒋ ᐃᔅᒋᔄᐤ ᐅᑕᐃᒡ, “ᓇᒪᐎᔾ ᓂᑭ ᐊᓏᔨᒥᒄ᙮”

14ᔅᒋ ᐛᐸᑕᓐ; ᐛᔅ ᒋ ᑭᓄᐛᐸᑕᓐ ᒥᒋᐃᑐᐅᓐ ᑭᔭ ᒥᒐᔨᒧᐛᐅᓐ,

ᒐᒋ ᑎᐸᐊᒥᓐ ᒋᑎᒋᔾ ᐅᒡ:

ᑲ ᒋᔅᑎᒪᑎᓯᑦ ᒋ ᐱᔅᑎᓂᑎᓱᔅᑕᒃ:

ᒋ ᐎᒐᐅᒡ ᐊᑲ ᐅᑕᐎᒡ᙮

15ᐱᑯᓂᒻ ᐅᔅᐱᑐᓐ ᑲ ᒥᒋᑥᑦ ᑭᔭ ᑲ ᒥᒋ ᐃᑎᑦ ᐃᔪᐤ:

ᓇᓂᑐᐛᐸᑎᒻ ᐅᒥᒋᑥᐛᓐ ᐸᑐᔅ ᐊᑲ ᒥᔅᑭᒧᑕ᙮

16ᑎᐸᔨᒋᒐᓱᐤ ᒋᓴᐅᒋᒪᐅᐤ ᑲᒋᒡ ᑭᔭ ᑲᒋᒡ:

ᐊᑲ ᐊᔭᒥᐊᒡ ᓂᓱᐅᓂᑎᓯᐅᒡ ᐅᑦ ᐊᔅᒋᔨᒡ ᐅᒡ᙮

17ᑎᐸᔨᒋᒐᓱᐤ, ᔅᒋ ᐸᑎᒺᓐ ᐅᓂᑐᐛᔨᑎᒧᐅᓄᐛᐤ ᑲ ᑎᐱᑕᔨᒥᓱᒡ:

ᒋᑭ ᐛᐛᓯᑕᐛᓐ ᐅᑕᐃᐛᐤ, ᒋᑭ ᐸᑎᒧᒥᑲᑕᓐ ᒋᑐᑭᔭ᙮

18ᒐᒋ ᒋᔅᐸᐛᑎᑥᐤ ᐊᑲ ᐅᑕᐎᒡ ᑭᔭ ᑲ ᐊᔨᒥᐊᑭᓄᐅᒡ,

ᐊᔅᒋᐎ ᐃᔪᐤ ᐊᑲ ᓂᑕ ᒥᓐ ᒐᒋ ᐊᔨᒥᐃᐛᑦ᙮

Currently Selected:

ᑎᐱᑦ ᐅᓂᑭᒧᐅᓇ 10: ᓇᔅᑲᐱ

Highlight

Copy

Want to have your highlights saved across all your devices? Sign up or sign in

ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ

Naskapi Development Corporation

Kawawachikamach, Québec G0G 2Z0 Canada

Canadian Bible Society

10 Carnforth Road, Toronto Ontario M4A 2S4 Canada

Learn More About ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ