ᒪᕐᒃ 1
1
ᒠᓐ ᐅᓯᑲᐃᑕᒐᐤ ᑲ ᐃᓯ ᑭᒐᔅᒋᒧᑦ
ᒪᑎᔪᐤ 3.1-12; ᓗᒃ 3.1-18; ᒠᓐ 1.19-28
Mark 1.1-8 (Advent-2 Year B)
1ᐊᑯᑕ ᐅᑕ ᒐᒋᐱᔨᒡ ᒥᔽᒋᒧᐅᓐ ᐊ ᐊᔨᒧᒪᑭᓄᐅᑦ ᒋᓴᔅ ᙭ ᒋᓴᒪᓂᑐᐤ ᐅᑯᓴ᙮ 2ᒋ ᒥᓯᓇᐊᑕᐊᒻ ᐊᓂᔭ ᐅᒋᔅᒋᐛᐃᒐᓱᐤ ᐊᐃᓴᔭ ᑲ ᐃᓯᓂᐧᑲᓱᑦ ᐅᔭ ᐊᒋ ᐃᔅᒋᔄᔨᒋ ᒋᓴᒪᓂᑐᐛ,
ᓂ ᓂᑲᓂᑎᓴᐛᐤ ᓂᑦ ᐃᔨᒥᔅᑎᒪᒐᓯᒻ, ᒐ ᓂᑲᓐ ᐃᑐᑐᐛᑦ ᐊᐛᔪᐛ ᐊᔅᒋᒡ ᐊ ᑕᔨᒋ ᒐᒋ ᐊᔭᔅᑯᐎᔅᑕᔅᒋᔨᔅᒋ᙮
3ᐊᓐ ᐊᐛᓐ ᒐ ᐸᒋ ᓂᑲᓂᑎᓴᐅᒃ ᐊᓐᑕ ᐸᐧᑯᑎᔅᑭᒥᑲᒡ ᒋᑭ ᑕᑈᐤ ᐊ ᐃᔅᒋᔄᑦ, “ᐊᔭᔅᑯᐎᔅᑕᒺᐧᒄ ᐅᑎᐸᔨᒋᒐᐤ ᐅᒪᔅᑭᓇᒻ ᐊᓐᑕ ᒐ ᐱᒧᑕᑦ, ᑯᐃᔅᑯᒧᑕᐛᐧᒄ᙮”
Mark 1.4-11 (Epiphany-1 Year B)
4ᐊᐅᒄ ᒪᒃ ᐅ ᒠᓐ ᐅᓯᑲᐃᑕᒐᐤ ᑲ ᐊᔨᒧᒪᑭᓄᐅᑦ᙮ ᐊᓐᑕ ᒪᒃ ᐸᐧᑯᑎᔅᑭᒥᑲᒡ ᒋ ᑕᐤ ᐊ ᓯᑲᐃᑐᐛᑦ ᐊᐛᔪᐛ ᑭᔭ ᐊ ᑭᒐᔅᒋᒪᑦ᙮ ᒋ ᑭᒐᔅᒋᒪᐤ ᐊᐛᔪᐛ ᒐᒋ ᒂᔅᑲᑎᓯᔨᒋ ᑭᔭ ᒐᒋ ᓯᑲᐃᑐᐛᑭᓄᔨᒋ ᐊᑯ ᒪᒃ ᒋᓴᒪᓂᑐᐛ ᒐ ᐛᐸᔨᑎᒪᑯᒡ ᐅᒥᒋᑥᐅᓄᐛᐛ᙮ 5ᒥᒐᑦ ᐊᐛᔪᐛ ᐊᓐᑕ ᒍᑎᔭ ᐊᔅᒋᒡ ᑭᔭ ᒋᕈᓯᓕᒻ ᑲ ᑕᔨᒋ ᒋ ᐸᒋ ᓂᑐᑕᑯᐤ᙮ ᒧᓴ ᒋ ᐎᑎᒧᒡ ᑕᓐ ᑲ ᐃᓯ ᒥᒋᑐᑎᒧᐛᒂ ᑭᔭ ᒂ ᓯᑲᐃᑕᑯᒡ ᒠᓇ ᐊᓐᑕ ᒠᕐᑕᓐ ᓯᐱᒡ᙮ 6ᑲ ᒥᔅᑎ ᐱᔎᐅᑭᓇᔨᒋ ᐊᐛᓯᓴ ᐅᐱᐛᔪᐛ ᒋ ᐅᒋ ᐅᓯᑕᑭᓄᐅᔪᐛ ᒠᓐ ᐅᑦ ᐊᐱᒋᑕᐅᓇ, ᑭᔭ ᐱᓴᑭᓇᔭᐱᔪᐤ ᒋ ᐃᑕᔨᑕᑯᓂᔪᐤ ᐊᓂᔭ ᒐᒂᔪᐤ ᑲ ᐅᐱᒂᑕᐅᓂᑦ; ᑭᔭ ᒂᔅᑯᑎᓯᓴ ᑭᔭ ᑲᓯᐛᓯᐛᐳᔪᐤ ᐊᒧᐎᒋᔅᑐᓂᔨᒡ ᑲ ᑎᑯᓂᔨᒡ ᐊᔪᐅᒄ ᐅᔭ ᑲ ᐅᒥᒋᒥᑦ᙮ 7ᐊᐅᒄ ᒪᒃ ᐅᔭ ᑲ ᐃᓯ ᑭᒐᔅᒋᒪᑦ ᐊᐛᔪᐛ, “ᒋᑭ ᑎᑯᓯᓐ ᐊᐛᓐ ᐃᐛᒃ ᐊ ᒋᔅᑕᔨᑕᑯᓯᑦ ᐃᔅᐱᔅ ᓂᔾ, ᓇᒪ ᐛᐛᒡ ᓂᑦ ᐃᔅᐱᑕᔨᑕᑯᓯᓐ ᓂᔾ ᒐᒋ ᓄᐛᐱᔪᐅᔭᓐ ᒐᒋ ᐊᐱᐧᑯᓂᒧᒡ ᐅᒥᔅᒋᓇᔭᐱᔭ᙮ 8ᓂᐱᔾ ᓂᑦ ᐊᐱᒋᑕᓐ ᐊ ᓯᑲᐃᑕᑎᑯᒡ, ᐎᔾ ᒪᒃ ᑲ ᐸᔭᒋᓯᔨᒋ ᐊᒐᒂ ᒋᑭ ᓯᑲᐃᑕᑯᐛᐤ᙮”
ᒋᓴᔅ ᑲ ᓯᑲᐃᑐᐛᑭᓄᐅᑦ
ᒪᑎᔪᐤ 3.13-4.11; ᓗᒃ 3.21,22; 4.1-13
Mark 1.9-15 (Lent-1 Year B)
9ᒋᓴᔅ ᒪᒃ ᒋ ᑎᑯᓯᓐ ᒠᕐᑕᓐ ᓯᐱᒡ ᐊᓐᑕ ᓇᓴᕆᑎᒡ ᐊ ᐅᑐᑕᑦ ᐊᓐᑕ ᑲᓕᓕ ᐊᔅᒋᒡ ᑲ ᑎᑯᓂᔨᒡ᙮ ᒠᓇ ᒪᒃ ᒋ ᓯᑲᐃᑕᑯᐤ ᐊᓐᑕ ᒠᕐᑕᓐ ᓯᐱᒡ᙮ 10ᐃᔅᐱ ᒪᒃ ᑲ ᑭᐸᑦ ᒋᓴᔅ ᑎᐛᒡ ᒋ ᐛᐸᑎᒻ ᒋᒋᒋᓯᑯᔪᐤ ᐊ ᐅᒋ ᔪᑕᐱᔨᒡ ᑭᔭ ᑲ ᐸᔭᒋᓯᔨᒋ ᐊᒐᒂ ᐊ ᐸᒋ ᔭᓯᔅᑕᑯᑦ ᒧᔭᒻ ᐅᒥᒥᐤ ᐊ ᐃᓯᓇᑯᓯᔨᒋ᙮ 11ᒋᒋᒋᓯᑯᒡ ᒪᒃ ᒋ ᐅᒋ ᐸᑕᑯᓱᐤ ᐊᐛᓐ ᐊ ᐃᔅᒋᔄᑦ, “ᐊᐅᒄ ᒋᔾ ᓂᑯᔅ ᓇᔅᒡ ᑲ ᓴᒋᐃᑕᓐ᙮ ᓇᔅᒡ ᑕᑈ ᒋ ᓇᐊᔨᑎᒥᐃᔨᓐ᙮”
ᒋᓴᔅ ᑲ ᑯᒂᒋᐃᑯᑦ ᒥᒋᒥᓂᑐᐛ
12ᑎᐛᒡ ᒪᒃ ᐊᒐᒂ ᐸᐧᑯᑎᔅᑭᒥᑲᒡ ᒋ ᐃᑎᓴᐅᑯᐤ ᒋᓴᔅ᙮ 13ᐊᑯᑕ ᑲ ᑕᑦ ᓇᐎᔪᐛ ᒋᓯᑲᐛ ᐊ ᑯᒂᒋᐃᑯᑦ ᒥᒋᒥᓂᑐᐛ᙮ ᒋ ᑕᔪᐛ ᐊᓐᑕ ᐊ ᑯᔅᑕᑎᑯᓯᔨᒋ ᐊᐛᓯᓴ, ᒥᒄ ᒪᒃ ᐊᓐᒋᓇ ᒋ ᐸᒋ ᐎᒋᐃᑯᐤ᙮
ᐊᓂᔭᔪᐛ ᓂᔅᑎᒻ ᓇᐸᐛ ᒋᓴᔅ ᑲ ᐅᑎᓇᑦ ᒐ ᐅᒋᔅᒋᓄᐊᒧᐛᑭᓂᑦ
ᒪᑎᔪᐤ 4.12-22; ᓗᒃ 4.14,15; 5.1-11
Mark 1.14-20 (Epiphany-3 Year B)
14ᐸᑎᒪ ᒪᒃ ᒪᒂᒡ ᒠᓐ ᐅᓯᑲᐃᑕᒐᐤ ᑲᒪᑯᓄᐛᓯᐅᒋᐛᐱᒡ ᑲ ᑕᑦ ᒋᓴᔅ ᒋ ᐃᑐᑕᐤ ᐊᓐᑕ ᑲᓕᓕᒡ᙮ ᐊᑯᑕ ᐊᓐᑕ ᑲ ᑭᒐᔅᒋᒧᑦ ᐊ ᐛᐎᑕᐧᒃ ᒋᓴᒪᓂᑐᐛ ᐅᒥᔽᒋᒧᐅᓂᔪᐤ᙮ 15ᐊ ᐃᔅᒋᔄᑦ, “ᐊᐅᑯᐤ ᐛᑎᒋᐱᔨᒡ ᐊᓐ ᐊ ᒋᓯᑲᒡ ᐊ ᐸᓱᓇᑯᓂᔨᒡ ᒋᓴᒪᓂᑐᐤ ᐅᒋᓴᐅᒋᒪᐅᓐ᙮ ᒂᔅᑲᑎᓯᒄ, ᓂᑭᑎᒥᒄ ᒋᒥᒋᑥᐅᓄᐛᐛ, ᑕᑈᑎᒧᒄ ᒥᔽᒋᒧᐅᓐ᙮”
16ᐊ ᐊᑎ ᐱᒧᑕᑦ ᒪᒃ ᒋᓴᔅ ᐊᓐᑕ ᓯᓱᒡ ᑲᓕᓕ ᓴᑲᐃᑭᓂᒡ ᒋ ᐛᐱᒪᐤ ᑲ ᓄᑎᒪᓴᔨᒋ ᓴᐃᒥᓇ ᑭᔭ ᐊᓂᔭ ᐎᐧᑲᓂᓯᔪᐛ ᐊᓐᑎᕈᐊ᙮ ᒪᒂᒡ ᒋ ᓄᑎᒪᓴᔪᐛ ᐊᐃᐱᔭ ᐊ ᐊᐱᒋᐊᔨᒋ᙮ 17ᒋᓴᔅ ᒋ ᐃᑕᐤ ᐅᔭ ᓇᐸᐛ, “ᐸᑐᑕᒄ ᐸᒋ ᓇᓴᐅᒄ᙮ ᒋᑭ ᐃᑐᑕᑎᓇᐛᐤ ᐃᔪᒡ ᒐᒋ ᐱᑕᐅᔭᔭᒄ ᒧᔭᒻ ᐊ ᐃᓯ ᐱᑕᐅᔭᔭᒄ ᓂᒪᓯᒡ᙮” 18ᑎᐛᒡ ᒪᒃ ᒋ ᓂᑭᑕᐅᒡ ᐅᑦ ᐊᐃᐱᐛᐛ ᐊᑯ ᒂ ᐊᑎ ᐎᒐᐛᒡ ᒋᓴᓴ᙮
19ᐊᓂᔭ ᒪᒃ ᐊ ᐊᑎ ᐱᒧᑕᒡ ᒋᓴᔅ ᒋ ᐛᐱᒪᐤ ᒋᒥᓴ ᑭᔭ ᐎᐧᑲᓂᓯᔪᐛ ᒠᓇ, ᐊᓂᔭᔪᐛ ᓴᐱᑎᔨᒋ ᐅᑯᓯᔪᐛ, ᒪᒂᒡ ᐅᑦ ᐅᐤᑎᔨᒡ ᐊ ᑕᔨᒋ ᐊ ᐛᑎᓇᐃᐸᔨᒋ᙮ 20ᑎᐛᒡ ᒋ ᑕᑈᑕᐤ ᐎᔭᐱᒪᑦ᙮ ᐊᑯᑕ ᒪᒃ ᐊᓐᑕ ᐅᐤᑎᒡ ᑲ ᐅᒋ ᓂᑭᑕᒡ ᐅᑕᐎᐛᐛ ᓴᐱᑎᔨᒋ ᑭᔭ ᐊᓂᔭ ᐅᑦ ᐊᐱᒋᐊᑭᓄᐛᐛ ᐊᑯ ᒂ ᓇᓴᐛᒡ ᒋᓴᓴ᙮
ᓇᐸᐤ ᑲ ᐱᒋᔅᑲᑯᑦ ᒥᒋ ᐊᒐᒂ
ᓗᒃ 4.31-37
Mark 1.21-28 (Epiphany-4 Year B)
21ᐊᓐᑕ ᑲᐳᕐᓇᐊᒻ ᑲ ᐃᓯᓂᐧᑲᑕᔨᒡ ᐅᑕᓇᔪᐤ ᐊᑯᑕ ᑲ ᐃᑐᑕᒡ, ᐃᔅᐱ ᒪᒃ ᒥᓐ ᐊ ᒍᐤ ᐊᔭᒥᐊᐅᒋᓯᑲᔨᒡ ᒋᓴᔅ ᒋ ᐱᒐᐤ ᐊᓐᑕ ᐊᔭᒥᐊᐅᒋᐛᐱᒡ ᐊᑯ ᒂ ᒋᔅᑯᑎᒪᒐᑦ᙮ 22ᒋ ᒪᒥᔅᑲᑕᔨᑎᒥᐃᑯᐅᒡ ᒪᒃ ᐊᓂᔭ ᑕᓐ ᑲ ᐃᓯ ᒋᔅᑯᑎᒪᒐᔨᒋ, ᐛᔅ ᐊᐛᓐ ᓇᔅᒡ ᑲ ᐅᒋᒪᐛᔨᑕᑯᓯᑦ ᒋ ᐃᑎᑕᑯᓱᐤ᙮ ᓇᒪ ᐅᒋ ᐃᑎᑕᑯᓯᔪᐛ ᒧᔭᒻ ᐊᓂᔭ ᐎᓱᐛᐅᓂᔪᐤ ᑲ ᒋᔅᑯᑎᒪᒐᔨᒋ᙮
23ᓯᔅᒋᑯᒡ ᒪᒃ ᒋ ᐅᒋ ᐱᒐᐤ ᐊᓐᑕ ᒍᐤ ᐊᔭᒥᐊᐅᒋᐛᐱᒡ ᓇᐸᐤ ᒥᒋ ᐊᒐᒂ ᐊ ᐱᒋᔅᑲᑯᑦ ᐊ ᑕᑈᑦ᙮ 24ᒋ ᐃᔅᒋᔄᐤ, “ᐊᑲᐎᔾ ᐎᔭᔅᑐᑐᐅᓇᓐ, ᒋᔾ ᒋᓴᔅ ᓇᓴᕆᑎᒡ ᑲ ᐅᒋᔨᓐ᙮ ᒋ ᐸᒋ ᑎᑯᓯᓐ ᐊ ᒐᒋ ᓂᓱᐅᓇᒋᐃᔭᒡ ? ᒋ ᒋᔅᒐᔨᒥᑎᓐ ᐊᐛᓐ ᒋᔾ, ᐊᐅᒄ ᒋᔾ ᑲ ᐸᔭᒋᓯᑦ ᒋᓴᒪᓂᑐᐤ ᑲ ᐸᒋ ᐃᑎᓴᐛᑦ᙮” 25ᒋᓴᔅ ᒪᒃ ᒋ ᐎᑎᒧᐛᐤ ᐊ ᐃᑕᑦ, “ᐊᑯᔅ ᐊᑲ ᒋᔅᑐᐤ᙮ ᒪᒋ ᐸᒋ ᐎᐎᔾ ᒪᒃ ᐎᔭᒡ ᐅᒡ᙮”
26ᐊᓐ ᒪᒃ ᒥᒋ ᐊᒐᐧᒄ ᒋ ᐃᑐᑐᐛᐤ ᐊᓂᔭ ᓇᐸᐛ ᒐᒋ ᒥᔅᑎ ᐅᒋᐱᑎᑯᔨᒋ ᑭᔭ ᒋ ᒥᔅᑎ ᐊᓯᒂᔪᐛ ᐊᑯ ᒂ ᓂᑭᑕᑦ᙮ 27ᒥᓯᐛ ᒪᒃ ᐊᐛᓐ ᒋ ᒥᔅᑲᑕᔨᑎᒥᐃᑯᐤ ᐅᔭ ᑲ ᐃᔅᐱᔨᒡ ᐊᑯ ᒂ ᑯᒂᒋᒥᑐᒡ, “ᒐᒂᓐ ᒪᒃ ᐅ ? ᐅᔅᒋ ᒋᔅᑯᑎᒪᒐᐅᓐ ᐊ ? ᐊ ᐊᔭᑦ ᐅ ᓇᐸᐤ ᑎᐸᔨᒋᒐᐅᓂᔪᐤ ! ᐛᐛᒡ ᒥᒋ ᐊᒐᒂ ᑕᑈᑕᑯᐤ ᐊ ᐛᑎᓱᒪᑦ᙮”
28ᐊᑯᑕ ᒪᒃ ᑲ ᐊᑎ ᒥᓯᑕᐱᔨᒡ ᐊ ᐃᓯ ᐊᔨᒧᒪᑭᓄᐅᑦ ᒋᓴᔅ ᒥᓯᐛ ᐊᓐᑕ ᑲᓕᓕ ᐊᔅᒋᒡ ᐃᑕᒐ᙮
ᒥᒐᑦ ᐊᐛᔪᐛ ᑲ ᒥᓏᒋᐊᑦ ᒋᓴᔅ
ᒪᑎᔪᐤ 8.14-17; ᓗᒃ 4.38-41
Mark 1.29-39 (Epiphany-5 Year B)
29ᑎᐛᒡ ᒪᒃ ᒋ ᐎᐎᐤ ᐊᓂᔭ ᒍᐤ ᐊᔭᒥᐊᐅᒋᐛᐱᔪᐤ ᐊᑯ ᐊᓐᑕ ᓴᐃᒥᓇ ᑭᔭ ᐊᓐᑎᕈᐊ ᐎᒋᐛᔨᒡ ᒂ ᐃᑐᑕᑦ᙮ ᒋᒥᓴ ᑭᔭ ᒠᓇ ᒋ ᐎᒐᐅᑯᐤ᙮ 30ᐊᓂᔭ ᒪᒃ ᒪᒂᒡ ᓴᐃᒥᓐ ᐅᓯᑯᓴ ᒋ ᐊᐧᑯᓯᔪᐛ ᐊᒋ ᒋᓯᑕᐅᐱᔨᒋ᙮ ᐃᔅᐱ ᒋᓴᔅ ᑕᑯᓯᐧᒃ ᑎᐛᒡ ᒪᒃ ᐅᔭ ᒋ ᐎᑎᒧᐛᑭᓄᐤ᙮ 31ᒂ ᓂᑐᐛᐱᒪᑦ ᐊᓂᔭ ᐃᔎᐛ ᒂ ᐅᑎᓂᒺᑦ ᐅᑎᒋᔪᐤ, ᐊᑯ ᒂ ᐎᒋᐊᑦ ᐊᑎ ᓯᒥᑕᐱᔨᒋ᙮ ᒋ ᓂᑭᑎᑯᐤ ᒪᒃ ᐊᓐ ᐃᔎᐤ ᐊᓂᔭ ᑲ ᒋᓯᑕᐅᐱᔨᑦ᙮ ᒂ ᐱᓯᑯᑦ ᐊᑯ ᒂ ᐊᑎ ᐊᑐᔅᒐᑦ ᐊ ᒪᒥᔪᑐᑐᐛᑦ ᒋᓴᓴ᙮
32ᐃᔅᐱ ᒪᒃ ᐊᑎ ᐅᑕᑯᓯᔨᒡ ᑲᒋ ᐸᒋᓯᒧᑦ ᐱᓯᒻ, ᒋ ᐸᑐᐛᑭᓄᐤ ᒋᓴᔅ ᑲ ᐊᐧᑯᓯᔨᒋ ᐊᐛᔪᐛ ᑭᔭ ᐊᓂᔭ ᒥᒋ ᐊᒐᒂ ᑲ ᐱᒋᔅᑲᑯᔨᒋ᙮ 33ᒥᓯᐛ ᐊᐛᓐᒋ ᐊᓐᑕ ᐅᑕᓇᒡ ᑲ ᑕᒡ ᒋ ᐸᒋ ᒪᒧᐎᐅᒡ ᐊᓐᑕ ᐎᐎᑎᒥᒡ ᐊᓂᔭ ᒥᒋᐛᐱᔪᐤ᙮ 34ᒥᒐᑦ ᒪᒃ ᐅᔭ ᑲ ᐊᐧᑯᓯᔨᒋ ᒋ ᒥᓏᒋᐊᐤ ᒋᓴᔅ, ᒥᓯᐛ ᓂᓇᐧᑯᐤ ᑲ ᐃᑕᐧᑯᓯᔨᒋ ᑭᔭ ᒋ ᐎᐎᑎᓴᐛᐤ ᒥᒋ ᐊᒐᒂ᙮ ᓇᒪ ᐅᒋ ᐱᔅᑎᓇᐤ ᐅᔭ ᒥᒋ ᐊᒐᒂ ᒐᒋ ᐃᔨᒥᔨᒋ, ᐛᔅ ᒋ ᒋᔅᒐᔨᒥᑯᐤ᙮
ᒋᓴᔅ ᑲ ᑭᒐᔅᒋᒧᑦ ᑲᓕᓕᒡ
ᓗᒃ 4.42-44
35ᐎᐱᒡ ᒪᒃ ᒋᔭᒋᓴᐸᔭᒡ ᒋ ᐅᓂᐤ ᐊᑯ ᐊᓐᑕ ᐊᑲ ᐃᑕᓄᐎᒡ ᒂ ᐃᑐᑕᑦ, ᐊᑯᑕ ᐊᓐᑕ ᑲ ᐊᔭᒥᐊᑦ᙮ 36ᓴᐃᒥᓐ ᑭᔭ ᐅᐎᒐᐛᑭᓇ ᒋ ᓇᓂᑐᐛᐱᒪᐅᒡ ᒋᓴᓴ᙮ 37ᐃᔅᐱ ᒪᒃ ᒪᔅᑯᐛᒡ ᒋ ᐃᑕᐅᒡ, “ᒥᓯᐛ ᐊᐛᓐ ᒋ ᓇᓂᑐᐛᔨᒧᒄ᙮” 38ᒋ ᐃᑎᑯᐅᒡ ᒪᒃ, “ᑯᑎᑲ ᑭᔭ ᐅᑕᓇᐛ ᓇᑕᑕᐤ ᐊᓐᑕ ᒐᒋ ᑭᒐᔅᒋᒧᔭᓐ, ᐛᔅ ᐊᐅᒄ ᐛᒋ ᐸᒋ ᑎᑯᓯᓂᔭᓐ᙮”
39ᐊᑯ ᒪᒃ ᒥᓯᐛ ᒂ ᐃᑐᑕᑦ ᐊᓂᔭ ᑲᓕᓕ ᐊᔅᒋᔪᐤ ᐊ ᑭᒐᔅᒋᒧᑦ ᐊᓐᑕ ᒍᐤ ᐊᔭᒥᐊᐅᒋᐛᐱᒡ᙮ ᑭᔭ ᒋ ᐎᐎᑎᓴᐛᐤ ᓂᓇᐧᑯᐤ ᒥᒋ ᐊᒐᒂ ᒥᒐᑦ ᐊᐛᔪᐛ ᑲ ᐱᒋᔅᑯᐛᔨᒋ᙮
ᒋᓴᔅ ᑲ ᒥᓏᒋᐊᑦ ᓇᐸᐛ ᑲ ᐅᒥᒋᐛᔅᐱᓇᔨᒋ
ᒪᑎᔪᐤ 8.1-4; ᓗᒃ 5.12-16
Mark 1.40-45 (Epiphany-6 Year B)
40ᒋ ᐸᒋ ᓇᑎᑯᐤ ᒋᓴᔅ ᓇᐸᐛ ᐊ ᐊᔭᔨᒋ ᐊ ᒪᔭᑎᓂᔨᒡ ᐅᒥᒋᐛᔅᐱᓇᐅᓂᔪᐤ᙮ ᒋ ᐅᒋᒋᐧᑯᓂᐱᔪᐅᔪᐛ ᐊᓐᑕ ᐊ ᑕᑦ ᐊᑯ ᒂ ᓂᑐᑎᒪᑯᑦ ᒐᒋ ᒥᓏᒋᐊᑦ᙮ ᒋ ᐃᑎᑯᐤ, “ᐎ ᐸᒋ ᐎᒋᐃᓇ ᒋᑭ ᒋ ᐃᑐᑕᓐ ᒐᒋ ᐸᔭᒋᓯᔭᓐ᙮”
41ᒋᓴᔅ ᒪᒃ ᓇᔅᒡ ᒋ ᒋᔅᑎᒪᒐᔨᒪᐤ ᐊᑯ ᒂ ᓴᑐᐱᔨᑕᑦ ᐅᔅᐱᑐᓐ ᒂ ᑕᒋᓇᑦ ᐊ ᐃᑕᑦ, “ᒋ ᐎ ᐎᒋᐃᑎᓐ᙮ ᐸᔭᒋᓯ ᒪᒃ᙮” 42ᑎᐛᒡ ᒪᒃ ᒋ ᐅᒋ ᒥᔪᓇᑯᓱᐤ ᐊᓐ ᓇᐸᐤ ᐊᒋ ᒥᓏᒋᐊᑭᓄᐅᑦ ᐊᓂᔭ ᑕᓐ ᑲ ᐃᑕᔅᐱᓇᑦ᙮
43ᐊᑯ ᒋᓴᔅ ᒂ ᐃᑕᑦ ᐊᓂᔭ ᓇᐸᐛ ᓱᒃ ᐊ ᐃᔨᒪᐊᑦ, 44“ᓂᑐᑐᐎ ᒪ ᒐ ᐃᑎᑕᓐ, ᐊᑲᐎᔾ ᐊᐛᓐ ᒋᑭ ᐅᒋ ᐎᑎᒧᐛᐤ ᑕᓐ ᑲ ᐃᔅᐱᔨᓐ᙮ ᑎᐛᒡ ᓂᑐᐛᐱᒻ ᐊᔭᒥᐊᐅᒋᒪᐤ ᓇᔅᒡ ᒐ ᓂᑐ ᒋᔅᒐᔨᒥᔅᒃ᙮ ᐊᑯ ᒐ ᐱᔅᑎᓂᒥᓐ ᐊᓐ ᒋᐸ ᐱᔅᑎᓇᓐ ᐊᓂᔭ ᒧᓱᔅ ᑲ ᐃᑎᓱᐛᑦ ᒋᐸ ᐱᔅᑎᓇᑭᓄᐅᔪᐤ᙮ ᐊᑯᑕ ᒐ ᐅᒋ ᐛᐸᑎᔨᐛᔨᓐ ᑕᑈ ᐊ ᐸᔭᒋᓯᔨᓐ᙮” ᐊᑯ ᒂ ᒋᑎᓴᐛᑦ ᐅᔭ ᓇᐸᐛ᙮ 45ᒂ ᔅᑐᑕᑦ ᐅ ᓇᐸᐤ᙮ ᒥᒄ ᒪᒃ ᐃᔭᐱᒡ ᒋ ᐛᐎᑎᒧᐛᐤ ᒥᓯᐛ ᐊᐛᔪᐛ᙮ ᐅᔭ ᒪᒃ ᐊᒋ ᐃᑎᑦ ᓇᒪ ᐛᐛᒡ ᐅᒋ ᐱᒐᔪᐛ ᒋᓴᓴ ᐅᑕᓇᒡ ᐊᑲ ᒧᓯᐊᑭᓄᔨᒋ᙮ ᐊᑯ ᐊᓐᑕ ᐎᐎᑎᒥᒡ ᐊᓂᔭ ᐅᑕᓇᔪᐤ ᐊᑯᑕ ᒥᒄ ᑲ ᑕᑦ ᒋᓴᔅ ᐊᓐᑕ ᐊᑲ ᐃᑕᓄᐎᒡ᙮ ᐃᔭᐱᒡ ᒪᒃ ᒋ ᐸᒋ ᓂᑐᐛᐱᒥᑯᐤ ᐊᐛᔪᐛ ᓂᓇᐧᑯᐤ ᐊ ᐅᑐᑕᔨᒋ᙮
Currently Selected:
ᒪᕐᒃ 1: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
