ᒪᑎᔪᐤ 25
25
ᑲ ᐸᐃᑯᔪᐛᓯᒡ ᐃᔎᓯᒡ ᑲ ᑎᐸᒋᒪᑭᓄᐎᒡ
Matthew 25.1-13 (Proper-27 Year A)
1“ᒋᑭ ᐎᑎᒪᑎᓇᐛᐤ ᑕᓐ ᒐ ᐃᓯᓇᒂᒡ ᒋᒋᒋᓯᒄ ᒋᓴᐅᒋᒪᐅᓐ ᐃᔅᐱ ᐃᔪᐤ ᐅᑯᓯᓴᓐ ᑎᑯᓯᒐ ᒐ ᒋᓴᐅᒋᒪᐅᑦ᙮ ᒧᔭᒻ ᐸᐃᑯᔪᐤ ᐅᔅᒋᓂᒋᔎᓯᒡ ᐊ ᑕᐧᑯᓇᒡ ᐅᐛᔅᑕᓂᐱᒪᑭᓄᐛᐛ, ᐊ ᓂᑐᐤ ᓂᒋᔅᑯᐛᒡ ᐅᔅᒋᓂᐳᐛᓇ᙮ 2ᐱᑕᑕᒡ ᒪᒃ ᐅᒡ ᓇᒪ ᓇᔅᒡ ᐅᒋ ᐃᑈᐧᑲᐅᒡ, ᐊᑯ ᐊᓐᒡ ᑯᑎᑭᒡ ᐱᑕᑕᒡ ᒋ ᐃᑈᐧᑲᐅᒡ ᐎᔨᐛᐤ᙮ 3ᐊᓐᒡ ᒪᒃ ᐊᑲ ᓇᔅᒡ ᐃᑈᐧᑲᒡ ᒋ ᔅᑐᑕᐅᒡ ᐅᐛᔅᑕᓂᐱᒪᑭᓄᐛᐛ ᒥᒄ ᒪᒃ ᓇᒪ ᐊᔪᐛᒡ ᐅᒋ ᐊᔭᐛᐅᒡ ᐱᒥᔭ᙮ 4ᐊᑯ ᐊᓐᒡ ᑲ ᐃᑈᐧᑲᒡ ᐊᔪᐛᒡ ᒋ ᔅᑐᑕᐅᒡ ᐎᔨᐛᐤ ᐱᒥᔭ ᒐ ᐱᒋᐱᒪᒡ ᐊᓂᔭᔪᐛ ᐅᐛᔅᑕᓂᐱᒪᑭᓄᐛᐛ᙮ 5ᓇᒪ ᒪᒃ ᑎᐛᒡ ᐅᒋ ᑎᑯᓯᓄᐤ ᐊᓐ ᐅᔅᒋᓂᐳᐛᓐ᙮ ᒐᒃ ᒂ ᐎᓂᐸᒡ ᐊᓐᒡ ᐅᔅᒋᓂᒋᔎᓯᒡ, ᐊᑯ ᒐᒃ ᑲ ᑯᐎᐧᑯᓯᒡ᙮”
6“ᓴᔅ ᒪᒃ ᒋ ᐊᐱᑕᑎᐱᔅᑲᔪᐤ, ᒂ ᑕᑈᑦ ᐊᐛᓐ ᐊ ᐃᔅᒋᔄᑦ, ‘ᓴᔅ ᑎᑯᓯᓄᐤ ᐅᔅᒋᓂᐳᐛᓐ, ᐸᒋ ᓂᒋᔅᑯᐛᐧᒄ᙮’ 7ᑭᑈ ᒂ ᐅᓂᒡ ᐊᓐᒡ ᐸᐃᑯᔪᐤ ᐅᔅᒋᓂᒋᔎᓯᒡ, ᒂ ᐛᐛᓯᑕᒡ ᐅᐛᔅᑕᓂᐱᒪᑭᓄᐛᐛ᙮ 8ᐊᑯ ᐊᓐᒡ ᐊᑲ ᓇᔅᒡ ᐃᑈᐧᑲᒡ ᐅᔅᒋᓂᒋᔎᓯᒡ ᒂ ᐃᑕᒡ ᐊᓂᔭ ᑲ ᐃᑈᐧᑲᔨᒋ ᐅᔅᒋᓂᒋᔎᓴ, ‘ᐸᒋ ᒥᔨᓇᓐ ᒪ ᐊᐱᓯᔅ ᒋᐱᒥᒧᐛᐤ᙮ ᓴᔅ ᒐᑲᑦ ᐊᔅᑐᐛᐅᒡ ᓂᐛᔅᑕᓂᐱᒪᑭᓇᓐᒡ᙮’ ”
9“ᐊᑯ ᐊᓐᒡ ᑲ ᐃᑈᐧᑲᒡ ᐅᔅᒋᓂᒋᔎᓯᒡ ᒂ ᐃᑕᒡ ᐊᓂᔭ, ‘ᓇᒪ, ᓇᒪ ᒋᑭ ᐅᒋ ᐃᔅᐱᔨᓇᓄᐤ ᑕᐱᔅᑯᓐ ᒐᒋ ᐊᐱᒋᑕᔭᒄ ᐅ ᐱᒥᔾ᙮ ᐊᑕᐛᐅᒋᐛᐱᒡ ᐅᑎᓂᒪᓱᒄ ᐱᒥᔾ᙮’ 10ᐊᑯ ᐊᓐᒡ ᐊᑲ ᓇᔅᒡ ᐃᑈᐧᑲᒡ ᐅᔅᒋᓂᒋᔎᓯᒡ ᑲ ᐅᑎᓂᒐᒡ ᐱᒥᔪᐤ᙮ ᒪᒂᒡ ᒪᒃ ᐊ ᐃᔅᐱᔅ ᐊᑲ ᑕᒡ, ᒋ ᑎᑯᓯᓂᔪᐛ ᐊᓂᔭ ᐅᔅᒋᓂᐳᐛᓇ᙮ ᐊᓐᒡ ᒪᒃ ᐅᔅᒋᓂᒋᔎᓯᒡ ᑲ ᐊᔭᔅᑯᐎᒡ ᒋ ᐊᑎ ᐎᒐᐛᐅᒡ ᐊ ᐊᑎ ᐱᒐᔨᒋ ᐊᓐᑕ ᐊ ᒥᒋᓱᓇᓄᐎᒡ, ᐊᑯ ᒂ ᒋᐸᐛᑭᓄᐅᑦ ᐊᓐ ᔅᑐᐧᑭᓐ᙮”
11“ᐸᑎᒪ ᒪᒃ ᒂ ᐅᒋ ᑎᑯᓯᒡ ᐊᓐᒡ ᑯᑎᑭᒡ ᐅᔅᒋᓂᒋᔎᓯᒡ, ᐊᑯ ᒂ ᐃᔅᒋᔄᒡ, ‘ᐅᑎᐸᔨᒋᒐᐤ, ᐸᒋ ᐱᑎᑲᐃᓇᓐ᙮’ 12ᐊᑯ ᒂ ᐃᑎᑯᒡ ᐊᓂᔭ ᐅᔅᒋᓂᐳᐛᓇ, ‘ᑕᑈ ᒋᑦ ᐃᑎᓇᐛᐤ, ᓇᒪ ᒋ ᒋᔅᒐᔨᒥᑎᓇᐛᐤ᙮’ ”
13ᐊᑯ ᒋᓴᔅ ᒂ ᐊᑎ ᐃᔅᒋᔄᑦ, “ᐊᐅᒄ ᒪᒃ ᐅ ᐅᒋ ᑭᔭ ᒋᔨᐛᐤ ᒧᔅ ᒋᐸ ᐊᔭᔅᑯᐎᓇᐛᐤ ᐛᔅ ᓇᒪ ᒋ ᒋᔅᒐᔨᑕᓇᐛᐤ ᐊᓂᒪ ᐊ ᒋᓯᑲᒡ ᑭᔭ ᒪᒃ ᑎᐸᐃᑭᓐ ᐱᓯᒧᐧᑲᓂᒡ ᒪᒂᒡ ᒐ ᐸᒋ ᑎᑯᓯᐧᒃ ᐃᔪᐤ ᐅᑯᓯᓴᓐ᙮”
ᐅᒋᒪᐤ ᑲ ᐎᓴᒪᑦ ᓂᔅᑐ ᐅᑦ ᐊᐱᒋᐊᑭᓇ ᒐ ᓂᓇᑭᑐᐛᐸᑎᒥᔨᒋ ᐊᓂᔭ ᐊ ᐃᓯ ᑎᐱᔨᐛᐅᓯᑦ
ᓗᒃ 19.11-27
Matthew 25.14-30 (Proper-28 Year A)
14“ᒥᓐ ᒪᐅ ᒐ ᐃᓯᓇᒂᒡ ᒋᒋᒋᓯᒄ ᒋᓴᐅᒋᒪᐅᓐ ᑎᑯᓯᒐ ᐃᔪᐤ ᐅᑯᓯᓴᓐ᙮ ᒧᔭᒻ ᓇᐸᐤ ᐛᔪᐤ ᐊᔅᒋᒡ ᐊ ᐃᑐᑕᑦ, ᐊ ᐎᓴᒪᑦ ᒪᒃ ᐅᑦ ᐊᐱᒋᐊᑭᓇ ᐊᑯ ᐊᑕᑦ ᒐ ᓂᓇᑭᑐᐛᐸᑎᒥᔨᒋ ᐊᓂᔭ ᐊ ᐃᓯ ᑎᐱᔨᐛᐅᓯᑦ᙮ 15ᒋ ᒥᔭᐤ ᒪᒃ ᓱᓇᔭᔪᐤ ᐊ ᐱᑯᓴᔨᒪᑦ ᐊᔪᐛᒃ ᒐᒋ ᐅᓯᑎᒪᑯᑦ ᒐ ᐃᔅᐱᔅ ᐊᑲ ᑕᑦ᙮ ᒋ ᒪᑎᓂᒧᐛᐤ ᐊᓂᔭ ᐅᓱᓇᔭᓂᒻ ᒥᒄ ᐊᓂᔭ ᐊ ᐃᓯ ᐃᑕᔨᒪᑦ ᒐ ᐃᓯ ᑭᔅᒋᐅᔨᒋ ᐊ ᑭᓄᐛᔨᑎᒥᔨᒋ᙮ ᐸᐃᒄ ᒪᒃ ᐊᓂᔭ ᐊᐱᒋᐊᑭᓇ ᐱᑕᑕᒡ ᒐᓯᐱᔪᐤ ᓱᓇᔭᐱᔎ ᒋ ᒥᔭᐤ, ᐊᑯ ᐊᓂᔭ ᑯᑎᑲ ᓂᔄᐤ ᒐᓯᐱᔪᐤ, ᐊᑯ ᐊᓂᔭ ᑯᑎᑲ ᐸᐃᒂᐤ ᒐᓯᐱᔪᐤ ᒋ ᒥᔭᐤ᙮ ᐊᑯ ᒪᒃ ᒐ ᑐᑕᑦ᙮ 16ᐊᓐ ᒪᒃ ᐊᐱᒋᐊᑭᓐ ᐱᑕᑕᒡ ᒐᓯᐱᔪᐤ ᑲ ᒥᔭᑭᓄᐅᑦ, ᒋ ᒋᒋᒡ ᐊᑐᔅᒐᐛᒐᐤ ᐊᓂᔭ ᐅᓱᓇᔭᓂᒥᔪᐤ ᐊᑐᐎᔅ ᒐᒋ ᒪᐅᒋᑕᑦ᙮ ᒥᓐ ᒪᒃ ᐱᑕᑕᒡ ᒐᓯᐱᔪᐤ ᒋ ᒪᐅᒋᑕᐤ ᐊᓂᔭ ᓱᓇᔭᔪᐤ᙮ 17ᑭᔭ ᐊᓐ ᓂᔄᐤ ᒐᓯᐱᔪᐤ ᑲ ᒥᔭᑭᓄᐅᑦ, ᒥᓐ ᓂᔄᐤ ᒐᓯᐱᔪᐤ ᒋ ᒪᐅᒋᑕᐤ ᐊᓂᔭ ᓱᓇᔭᔪᐤ᙮ 18ᐊᓐ ᒪᒃ ᐊᐱᒋᐊᑭᓐ ᐸᐃᒂᐤ ᒐᓯᐱᔪᐤ ᑲ ᒥᔭᑭᓄᐅᑦ, ᒋ ᒧᓇᐊᒻ ᐊᓐᑕ ᐊᔅᒋᒡ ᐊᑯᑕ ᑲ ᑲᑕᑦ ᐊᓂᔭ ᐅᒋᒪᒪ ᐅᓱᓇᔭᓂᒥᔪᐤ᙮”
19“ᓇᐅᔅ ᒪᒃ ᓇᒪ ᐅᒋ ᑕᔪᐛ ᐊᓂᔭ ᐅᒋᒪᒧᐛᐛ ᐊᓐᒡ ᐊᐱᒋᐊᑭᓐᒡ ᒐᒃ ᒂ ᐸᒋ ᒋᐛᔨᒋ ᐊᑯ ᒂ ᑯᒂᒋᒧᑯᒡ ᑕᓐ ᑲ ᑐᑕᒡ ᐊᓂᔭ ᓱᓇᔭᔪᐤ ᑲ ᒥᔨᑯᒡ᙮ 20ᐊᓐ ᒪᒃ ᐊᐱᒋᐊᑭᓐ ᐱᑕᑕᒡ ᒐᓯᐱᔪᐤ ᑲ ᒥᔭᑭᓄᐅᑦ ᓱᓇᔭᔪᐤ ᒋ ᐸᒋ ᐱᒐᐤ, ᒂ ᒥᔭᑦ ᐊᓂᔭ ᐅᒋᒪᒪ ᐊᓂᔭ ᐱᑕᑕᒡ ᒐᓯᐱᔪᐤ ᓱᓇᔭᔪᐤ ᐊᑐᐎᔅ ᑲ ᒪᐅᒋᑕᑦ᙮ ᒋ ᐃᑕᐤ ᒪᒃ ᐊᓂᔭ ᐅᒋᒪᒧᐛᐛ, ‘ᐱᑕᑕᒡ ᒐᓯᐱᔪᐤ ᔅᒋ ᒥᔨᓐ ᓱᓇᔭᐤ, ᒥᓐ ᒪᒃ ᐱᑕᑕᒡ ᒐᓯᐱᔪᐤ ᐊᑐᐎᔅ ᓂᒋ ᒪᐅᒋᐊᐤ᙮’ ”
21“ ‘ᑕᑈ ᒋ ᒥᔪᑐᑕᓐ ᑭᔭ ᑕᑈ ᒋ ᒥᔪ ᐊᐱᑎᓯᓐ,’ ᒋ ᐃᑎᑯᐤ ᐊᓂᔭ ᐅᒋᒪᒪ᙮ ‘ᑯᐃᔅᒄ ᐊᒋ ᐃᓯ ᐊᑐᔅᒐᔅᑎᒥᓐ ᐊᓐ ᐊ ᐊᐱᓴᓯᒡ ᑕᓐ ᑲ ᐃᓯ ᐱᑯᓴᔨᒥᑯᔨᓐ ᐊᑯ ᐊᑐᐎᔅ ᐊ ᒥᓴᒋ ᒐᒂᔪᐛ ᒐ ᐱᔅᑎᓂᒪᑯᔨᓐ ᒐᒋ ᐅᒋᒪᐧᑲᑎᒥᓐ᙮ ᐊᔅᑎᒻ ᐸᒋ ᐱᒐ, ᒐ ᐸᒋ ᐎᒋᐃᔨᓐ ᑕᓐ ᐊ ᐃᓯ ᒥᔽᔨᑎᒪᓐ᙮’ ”
22“ᐊᑯ ᐊᓐ ᓂᔄᐤ ᒐᓯᐱᔪᐤ ᑲ ᒥᔭᑭᓄᐅᑦ ᓱᓇᔭᔪᐤ ᒋ ᐸᒋ ᐱᒐᐤ ᒂ ᐃᑕᑦ ᐊᓂᔭ ᐅᒋᒪᒪ, ‘ᓂᔄᐤ ᒐᓯᐱᔪᐤ ᔅᒋ ᐸᒋ ᒥᔨᓐ, ᒥᓐ ᒪᒃ ᓂᔄᐤ ᒐᓯᐱᔪᐤ ᐊᑐᐎᔅ ᓂᒋ ᒪᐅᒋᑕᓐ᙮’ 23‘ᑕᑈ ᒋ ᒥᔪᑐᑕᓐ ᑭᔭ ᐊᔪᐛᒡ ᑲ ᒥᔪ ᐊᐱᑎᓯᔨᓐ’ ᒋ ᐃᑎᑯᐤ ᐊᓂᔭ ᐅᒋᒪᒪ᙮ ‘ᑯᐃᔅᒄ ᐊᒋ ᐃᓯ ᐊᑐᔅᒐᔅᑎᒥᓐ ᐊᓐ ᐊ ᐊᐱᓴᓯᒡ ᑕᓐ ᑲ ᐃᓯ ᐱᑯᓴᔨᒥᑯᔨᓐ, ᐊᑐᐎᔅ ᐊ ᒥᓴᒋ ᒐᒂᔪᐛ ᒋᑭ ᐱᔅᑎᓂᒪᑯᐅᓐ ᒐᒋ ᐅᒋᒪᐧᑲᑎᒥᓐ᙮ ᐊᔅᑎᒻ ᐸᒋ ᐱᒐ, ᒐ ᐸᒋ ᐎᒋᐃᔨᓐ ᑕᓐ ᐊ ᐃᓯ ᒥᔽᔨᑎᒪᓐ᙮’ ”
24“ᐊᑯ ᐊᓐ ᐊᐱᒋᐊᑭᓐ ᐸᐃᒂᐤ ᒐᓯᐱᔪᐤ ᑲ ᒥᔭᑭᓄᐅᑦ ᒂ ᐸᒋ ᐱᒐᑦ, ᒂ ᐃᑕᑦ ᐊᓂᔭ ᐅᒋᒪᒪ, ‘ᐅᑎᐸᔨᒋᒐᐤ, ᒋ ᒋᔅᒐᔨᒥᑎᓐ ᐊᔨᒥᓯᐎ ᐃᔪᐎᓐ, ᑭᔭ ᐅᔅᑕ ᒥᔅᑎ ᐊ ᓂᑐᐛᔨᑎᒥᓐ ᐃᔅᐱᔅ ᐎ ᑕᓐ ᐊᔅᐱᔅ ᒥᔨᐛᔨᓐ᙮ 25ᔅᒋ ᑯᔅᑎᑎᓐ, ᐊᑯ ᑭᔭ ᑲ ᓂᑐ ᑲᑕᔭᓐ ᐊᓐ ᒋᓱᓇᔭᓂᒻ ᐊᓐᑕ ᐊᔅᒋᒡ᙮ ᒪᐅ ᒪᒃ ᒋᓱᓇᔭᓂᒻ ᑲ ᐸᒋ ᒥᔨᓐ᙮’ ”
26“ᐊᑯ ᒂ ᐃᑎᑯᑦ ᐊᓂᔭ ᐅᒋᒪᒪ, ‘ᑕᑈ ᑲ ᓄᑕᓯᔨᓐ ᑭᔭ ᑕᑈ ᑲ ᒥᒋᑯᐸᓇᐎᔨᓐ᙮ ᔅᒋ ᒋᔅᒐᔨᑕᓐ ᐅᔅᑕ ᒥᔅᑎ ᓇᑐᐛᔨᑎᒪᓐ ᐃᔅᐱᔅ ᐎ ᑕᓐ ᐊᔅᐱᔅ ᒥᔨᐛᔭᓐ᙮ 27ᒐᒂᓐ ᒪᒃ ᐛᒋ ᐊᑲ ᐅᒋ ᐊᔅᑕᔨᓐ ᐊᓐ ᓱᓇᔭᐤ ᐊᓐᑕ ᓱᓇᔭᐅᒋᐛᐱᒡ ᒐᒋ ᒪᐅᑕᐱᔨᒡ ? ᐊᑯ ᒪᒃ ᐃᔅᐱ ᒥᓐ ᑎᑯᓯᓂᔭᓐ ᓂᐸ ᒥᔅᑲᓐ ᑕᓐ ᑲ ᐃᔅᐱᔅ ᒪᐅᑕᐱᔨᒂ ᐊᓐ ᓂᓱᓇᔭᓂᒻ᙮’ ”
28“ᐊᑯ ᐊᓐ ᐅᒋᒪᐤ ᒂ ᐃᔅᒋᔄᑦ, ‘ᐅᑎᓂᒺᐧᒄ ᐊᓂᔭᔪᐤ ᐅᓱᓇᔭᐱᔅᑯᒪ, ᒐ ᒥᔭᒄ ᐊᓐ ᐊᐱᒋᐊᑭᓐ ᐸᐃᑯᔪᐤ ᑕᑥᐤ ᒐᓯᐱᔪᐤ ᑲ ᑕᑎᓯᔨᒋ ᐅᓱᓇᔭᐱᔅᑯᒪ᙮ 29ᒥᓯᐛ ᐊᐛᓐ ᑲ ᐊᔭᑦ ᒐᒂᔪᐤ ᐊᑐᐎᔅ ᒋᑭ ᑎᑯᓂᔪᐤ ᒐ ᐃᓯ ᒥᔭᑭᓄᐅᑦ᙮ ᒋᑭ ᐛᔪᑎᓯᔪᐤ ᒪᒃ᙮ ᐊᑯ ᐊᓐ ᐊᐛᓐ ᐊᑲ ᓇᔅᒡ ᐊᔭᑦ ᒐᒂᔪᐤ ᐛᐛᒡ ᐊᓂᔭ ᑕᓐ ᐊ ᐃᓯ ᐊᐱᓯᔅ ᐊᔭᑦ ᒋᑭ ᐅᑎᓇᑭᓄᐅᔪᐤ᙮ 30ᐅ ᒪᒃ ᐊᐱᒋᐊᑭᓐ ᐊᑲ ᐎᔭᔅ ᐃᑕᐱᑎᓯᑦ ᐊᓐᑕ ᐅᓂᑎᐱᔅᒋᓯᐅᓂᒡ ᐃᓯ ᐛᐱᓇᐧᒄ᙮ ᐊᑯᑕ ᐊᓐᑕ ᒐ ᒪᓄᐅᒡ ᑭᔭ ᒐ ᒪᒥᑥᔭᐱᑕᓯᓇᓄᐅᒡ ᒐ ᐃᔅᐱᔅ ᐎᓯᒐᔨᑕᑭᓄᐅᒡ᙮’ ”
ᑕᓐ ᒐ ᐃᓯ ᑎᐸᔅᑯᓇᑦ ᒥᓯᐛ ᐊᐛᔪᐛ ᐃᔪᐤ ᐅᑯᓯᓴᓐ
Matthew 25.31-46 (Proper-29 Year A; New Years Day Year B, C)
31“ᐊᓐᑕ ᒪᒃ ᓂᑲᓐ ᐃᔅᐱ ᐃᔪᐤ ᐅᑯᓯᓴᓐ ᑎᑯᓯᓐᒐ ᓇᔅᒡ ᐊ ᒋᔅᑕᔨᑕᑯᓯᑦ ᑭᔭ ᐊ ᓱᒐᔨᑕᑯᓯᑦ ᒥᓯᐛ ᐊᓐᒋᓇ ᐊ ᐸᒋ ᐎᒐᐛᑦ, ᐊᑯ ᒐ ᐊᐱᑦ ᐊᓐᑕ ᒋᓴᐅᒋᒪᐤ ᑕᑎᐳᐛᑭᓂᒡ ᐊᓐᑕ ᒐᒋ ᐅᒋ ᑎᐸᔅᑯᓇᑦ ᐊᐛᔪᐛ᙮
32ᐊᑯ ᒥᓯᐛ ᐊ ᐃᑎᔅᑲᓇᓯᔨᒋ ᐊᐛᔪᐛ ᒐ ᒪᒧᔨᒋ ᐊᓐᑕ ᐊ ᑕᑦ᙮ ᐊᑯ ᒐ ᑎᐸᓇᐊᑦ ᐅᔭ, ᒧᔭᒻ ᒪᔭᑕᓂᓯᐅ-ᐃᔪᐤ ᑲᒋ ᐃᑐᑐᐛᑦ ᒪᔭᑕᓂᓴ ᑭᔭ ᐊᓂᔭ ᑲ ᐊᐱᓯᓯᔨᒋ ᐊᐛᓯᓴ ᑲ ᐅᑦ ᐊᔅᑭᓂᓯᔨᒋ᙮ 33ᐅᒥᔪᐅᓂᒡ ᒋᑭ ᐊᔭᐤ ᐊᓂᔭ ᒪᔭᑕᓂᓴ ᐊᑯ ᐊᓂᔭ ᑯᑎᑲ ᑲ ᐅᑦ ᐊᔅᑭᓂᓯᔨᒋ ᑲ ᐊᐱᓯᓯᔨᒋ ᐊᐛᓯᓴ ᐊᓐᑕ ᐅᓂᔅᐸᒋᐅᓂᒡ ᒐ ᐊᔭᑦ᙮
34ᐊᑯ ᒐ ᐃᑕᑦ ᐊᓐ ᒋᓴᐅᒋᒪᐤ ᐊᓂᔭ ᐃᔪᐛ ᐊᓐᑕ ᐅᒥᔪᐅᓂᒡ ᐊ ᑕᔨᒋ, ‘ᐊᔅᑎᒧᒄ ᒋᔨᐛᐤ ᑲ ᓱᐛᔨᒥᑕᒄ ᓄᑕᐎᔾ᙮ ᐊᔅᑎᒧᒄ, ᐅᑎᓂᒧᒄ ᐊᓐ ᒋᓴᐅᒋᒪᐅᓐ ᐊᓐ ᑲ ᐊᓱᑎᒪᑯᐅᔭᒄ ᐃᔅᐱ ᒪᐅᒡ ᓂᔅᑎᒻ ᑲ ᐅᓯᑕᑭᓄᐅᒡ ᐅ ᐊᔅᒋᔾ᙮ 35ᐛᔅ ᑲ ᓯᐛᔨᔭᓐ, ᔅᒋ ᐊᓯᒥᓇᐛᐤ, ᑭᔭ ᑲ ᐎ ᒥᓂᔭᓐ, ᔅᒋ ᒥᓇᐃᓇᐛᐤ, ᑲ ᒪᓐᑕᐅᔭᓐ ᔅᒋ ᐱᑎᑲᐃᓇᐛᐤ᙮ 36ᐊᑲ ᐅᒋ ᐅᑦ ᐊᐱᒋᑕᐅᓂᔭᓐ, ᔅᒋ ᐛᑕᔅᐱᓯᓇᐛᐤ, ᑲ ᐊᐧᑯᓯᔭᓐ, ᔅᒋ ᑭᓄᐛᔨᒥᓇᐛᐤ, ᑭᔭ ᑲᒪᑯᓄᐛᓯᐅᒋᐛᐱᒡ ᑲ ᑕᔭᓐ ᔅᒋ ᒧᐱᔅᑐᐅᓇᐛᐤ᙮’
37ᐊᑯ ᒪᒃ ᒐ ᐃᑎᑯᑦ ᐊᓂᔭ ᑲ ᑯᐃᔅᑯᑕᑎᓯᔨᒋ, ‘ᐅᑎᐸᔨᒋᒐᐤ ᓇᒪ ᓂᑕ ᒋ ᐅᒋ ᐛᐱᒥᑎᓇᓐ ᐊ ᓯᐛᔨᓐ, ᒐᒋ ᐊᓯᒥᑕᒡ, ᒪᒃ ᐊ ᐎ ᒥᓂᔨᓐ, ᒐᒋ ᒥᓇᐃᑕᒡ᙮ 38ᑭᔭ ᓇᒪ ᓂᑕ ᒋ ᐅᒋ ᐛᐱᒥᑎᓇᓐ ᐊ ᒪᓐᑕᐎᔨᓐ, ᒐᒋ ᐱᑎᑲᐃᑕᒡ, ᒪᒃ ᐊᑲ ᐅᑦ ᐊᐱᒋᑕᐅᓂᔨᓐ, ᒐᒋ ᐛᑕᔅᐱᑕᒡ᙮ 39ᑭᔭ ᓇᒪ ᓂᑕ ᒋ ᐅᒋ ᐛᐱᒥᑎᓇᓐ ᐊ ᐊᐧᑯᓯᔨᓐ ᒪᒃ ᐊ ᒋᐸᐅᑯᔨᓐ, ᒐᒋ ᓇᒋ ᒧᐱᔅᑕᑕᒡ᙮’
40ᐊᑯ ᒋᓴᐅᒋᒪᐤ ᒐ ᐃᑕᑦ, ‘ᒋ ᐎᑎᒪᑎᓇᐛᐤ, ᐊᓂᔭᔪᐤ ᑕᓐ ᑲ ᐃᓯ ᐃᑐᑐᐛᒄ ᐸᐃᒄ ᐊᓐ ᓂᐧᑲᓂᔅ ᐊᑲ ᓇᔅᒡ ᐊᐱᑕᔨᑕᑯᓯᑦ ᑲ ᐃᑕᔨᒪᑭᓄᐅᑦ, ᓂᔾ ᔅᒋ ᐃᑐᑐᓇᐛᐤ᙮’
41ᐊᑯ ᒐ ᐃᑕᑦ ᐊᓂᔭᔪᐛ ᐅᓂᔅᐸᒋᐅᓂᒡ ᑲ ᑕᔨᒋ ᐊᓂᔭ ᑲ ᒥᒐᑎᓯᔨᒋ, ‘ᐊᐅᓯᒄ ᓇᑕ ᒋᔨᐛᐤ ᒋᓴᒪᓂᑐᐤ ᒐ ᐛᐛᓯᐃᑕᒄ ᐊᓐᑕ ᐃᔅ ᑲᒋᒡ ᒥᒋ ᐃᔅᑯᑕᒡ ᐊᓂᔭᔪᐤ ᑲ ᐃᓯ ᐊᔭᔅᑯᔅᑎᒧᐛᑭᓄᔨᒋ ᒥᒋᒥᓂᑐᐛ ᑭᔭ ᐅᑦ ᐊᐱᒋᐊᑭᓂᔪᐛ᙮ 42ᐛᔅ ᓂᒋ ᓯᐛᔨᓐ ᓇᒪ ᒪᒃ ᒋ ᐅᒋ ᐊᓯᒥᓇᐛᐤ, ᓂᒋ ᐎ ᒥᓐ ᓇᒪ ᒋ ᐅᒋ ᒥᓇᐃᓇᐛᐤ᙮ 43ᓂᒋ ᒪᓐᑕᐅᓐ, ᓇᒪ ᒋ ᐅᒋ ᐱᑎᑲᐃᓇᐛᐤ ᒋᒋᐛᐛᒡ, ᓇᒪ ᓂ ᐅᒋ ᐅᑦ ᐊᐱᒋᑕᐅᓐ, ᓇᒪ ᒋ ᐅᒋ ᐛᑕᔅᐱᓯᓇᐛᐤ᙮ ᓂᒋ ᐊᐧᑯᓯᓐ ᑭᔭ ᓂᒋ ᒋᐸᐅᑯᓐ ᓇᒪ ᒪᒃ ᒋ ᐅᒋ ᒧᐱᔅᑐᐅᓇᐛᐤ᙮’
44ᐊᑯ ᒪᒃ ᒐ ᐃᑕᒡ, ᐊ ᐃᓯ ᐎᑎᒧᐛᒡ, ‘ᐅᑎᐸᔨᒋᒐᐤ ᓇᒪ ᓂᑕ ᒋ ᐅᒋ ᐛᐱᒥᑎᓇᓐ ᐊ ᓯᐛᔨᓐ ᒪᒃ ᐊ ᐎ ᒥᓂᔨᓐ ᑭᔭ ᐊ ᒪᓐᑕᐎᔨᓐ ᑭᔭ ᐊᑲ ᐅᑦ ᐊᐱᒋᑕᐅᓂᔨᓐ, ᒪᒃ ᐊ ᐊᐧᑯᓯᔨᓐ ᑭᔭ ᐊ ᒋᐸᐅᑯᔨᓐ, ᐊᑲ ᒪᒃ ᐅᒋ ᐎᒋᐃᑕᒡ᙮’ 45ᐊᑯ ᒪᒃ ᒐ ᐃᑎᑯᒡ ᐅᑎᐸᔨᒋᒐᐛ, ‘ᑕᑈ ᒋ ᐎᑎᒪᑎᓇᐛᐤ ᐊᓐ ᐊᑲ ᐅᒋ ᐎᒋᐊᒄ ᐸᐃᒄ ᓂᐧᑲᓂᔅ ᐊᓐ ᐊᑲ ᓇᔅᒡ ᐊᐱᑕᔨᑕᑯᔅᑦ ᑲ ᐃᑕᔨᒪᑭᓄᐅᑦ, ᓂᔾ ᑭᔭ ᓇᒪ ᒋ ᐅᒋ ᐎᒋᐃᓇᐛᐤ᙮’ 46ᐊᐅᒄ ᒪᒃ ᐅᒡ ᑲ ᒥᒐᑎᓯᒡ ᒐ ᐃᑎᓴᐛᑭᓄᐎᒡ ᐊᓐᑕ ᑲᒋᒡ ᒐ ᐃᓯ ᓂᓇᐧᑲᑕᔨᒧᒡ, ᐊᑯ ᐊᓐᒡ ᑲ ᑯᐃᔅᑯᑕᑎᓯᒡ ᐊᓐᑕ ᑲᒋᒡ ᐱᒪᑎᓯᐅᓂᒡ ᒐ ᐃᑎᓴᐛᑭᓄᐎᒡ᙮”
Currently Selected:
ᒪᑎᔪᐤ 25: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
