ᒪᑎᔪᐤ 22
22
ᐊ ᓂᐳᐅᐤ ᒥᑯᓴᓄᐅᒡ ᑲ ᐊᔨᒧᑕᒡ
ᓗᒃ 14.15-24
Matthew 22.1-14 (Proper-23 Year A)
1ᐊᑯ ᒋᓴᔅ ᒥᓐ ᒂ ᐃᔨᒪᐊᑦ ᐊᓂᔭ ᐃᔪᐛ ᒋᔅᑯᑎᒪᒐᐤ ᑎᐸᒋᒧᐅᓂᔪᐤ ᐊ ᐊᐱᒋᑕᑦ᙮ 2“ᒋᑭ ᐎᑎᒪᑎᓇᐛᐤ ᑕᓐ ᐊ ᐃᑕᔨᑕᒂᒡ ᒋᒋᒋᓯᒄ ᒋᓴᐅᒋᒪᐅᓐ᙮ ᒧᔭᒻ ᒋᓴᐅᒋᒪᐤ ᐊᒋ ᐊᔭᔅᑯᐅᔅᑕᑦ ᐊ ᒥᓴᔨᒡ ᒥᑯᓴᓂᔪᐤ, ᐅᑯᓴ ᐊ ᒥᑯᓴᐊᑦ ᐊᒋ ᓂᐳᔨᒋ᙮ 3ᒋ ᐃᑎᓴᐛᐤ ᒪᒃ ᐊᐱᒋᐊᑭᓇ ᒐᒋ ᓂᑐᐛᐱᒪᔨᒋ ᐊᓂᔭ ᐊᐛᔪᐛ ᑲ ᐎᓴᒪᑭᓄᔨᒋ᙮ ᐊᑯ ᓇᒪ ᐅᒋ ᐎ ᑎᑯᓯᓂᔪᐛ ᐊᓂᔭ ᑲ ᐎᓴᒪᑭᓄᔨᒋ᙮”
4“ᐊᑯ ᒥᓐ ᑯᑎᑲ ᐊᐱᒋᐊᑭᓇ ᒂ ᐃᑎᓴᐛᑦ ᐃᔭᐱᒡ ᒐᒋ ᐎᓴᒪᔨᒋ ᐊᐛᔪᐛ᙮ ᒪᐅᔭᔪᐤ ᑲ ᐃᑎᓱᒪᑦ ᒐᒋ ᐃᔅᒋᔄᔨᒋ, ‘ᓴᔅ ᓂᒋ ᐃᓯ ᐃᑎᓐ ᒐ ᒥᑯᓴᔭᓐ᙮ ᓴᔅ ᒋ ᓂᐸᐊᑭᓄᐎᒡ ᒥᔅᑐᓯᒡ ᑭᔭ ᒥᔅᑐᓯᓯᒡ ᒐ ᒥᑯᓴᓄᐅᒡ ᑭᔭ ᓴᔅ ᒋ ᐃᓯ ᐎᔅᑕᓱᓇᓄᐤ᙮ ᐸᒋ ᑎᑯᓯᓂᒄ ᒪᒃ᙮’ ”
5“ᒥᒄ ᒪᒃ ᐊᓐᒡ ᑲ ᐎᓴᒪᑭᓄᐎᒡ ᓇᒪ ᐅᒋ ᐊᔭᐱᓯᑎᒧᒡ, ᐃᔭᒡ ᒋ ᐃᓯ ᔅᑐᑕᐅᒡ᙮ ᐸᐃᒄ ᐊᓐ ᐊᓐᑕ ᐅᓂᑕᐅᒋᑕᑭᓐ ᐊ ᑎᑯᓂᔨᒡ ᒋ ᐃᑐᑕᐤ᙮ ᐊᑯ ᒥᓐ ᑯᑎᒃ ᒋ ᐃᔭᑯᐱᓇ ᑕᓐ ᐊ ᐃᓯ ᐊᑕᐛᑦ᙮ ᐊᑯᑕ ᑲ ᐃᑐᑕᑦ ᐎᔾ᙮ 6ᐊᑯ ᐊᓐᒡ ᑯᑎᑭᒡ ᒂ ᒪᑯᓇᒡ ᐊᓂᔭ ᒋᓴᐅᒋᒪᐛ ᐅᑦ ᐊᐱᒋᐊᑭᓂᔪᐛ ᐊᑯ ᒂ ᒪᓯᐧᑯᐛᒡ, ᒂ ᐊᑎ ᓂᐸᐊᒡ᙮ 7ᐃᔅᐱ ᒪᒃ ᐊᓐ ᒋᓴᐅᒋᒪᐤ ᒐᔅᒐᔨᑕᐧᒃ ᐅᔭ ᐊᒋ ᐃᑎᓇᓄᐎᒡ ᒋ ᒥᔅᑎ ᒋᔄᓱᐤ᙮ ᐊᑯ ᒂ ᐃᑎᓴᐛᑦ ᐅᑦ ᐊᓯᒪᑭᓂᓯᒪ ᒐᒋ ᓂᐸᐊᔨᒋ ᐊᓂᔭ ᑲ ᓂᐸᐊᔨᒋ ᐅᑦ ᐊᐱᒋᐊᑭᓇ ᐊᑯ ᑭᔭ ᒂ ᐊᑎ ᐃᔎᓯᒺᑦ ᐊᓂᔭ ᐅᑦ ᐃᑕᐅᓂᔪᐤ᙮”
8“ᐊᑯ ᒥᓐ ᒂ ᐎᓴᒪᑦ ᑯᑎᑲ ᐅᑦ ᐊᐱᒋᐊᑭᓇ, ᒂ ᐃᑕᑦ, ‘ᓴᔅ ᐛᔅ ᐊᔭᔅᑯᔅᑕᐤ ᐊᓐ ᓂᐳᐅᐤ ᒥᑯᓴᓐ᙮ ᐊᓐᒡ ᒪᒃ ᑲ ᐎᓴᒥᒂᐤ ᓇᒪ ᐅᒋ ᐎ ᑎᑯᓯᓄᐅᒡ ᑭᔭ ᓇᒪ ᒋᔅᑕᔨᑕᑯᓱᐅᒡ ᐊᓐᑕ ᒐᒋ ᑕᒡ᙮ 9ᒪᒋᒄ ᒪᒃ ᐃᑐᑕᒄ ᐊᓐᑕ ᒪᔅᑭᓇᒡ ᐊᓐᑕ ᐊ ᐛᔪᑎᓯᒡ ᐃᔪᒡ ᒥᒄ ᑕᑐᐤ ᐊᐛᓐᒋ ᒐ ᐛᐱᒪᑯᒡ ᒐ ᐎᓴᒪᑯᒡ ᒐᒋ ᐸᒋ ᓇᒋ ᒥᑯᓴᒡ᙮’ 10ᐊᑯ ᐊᓐᒡ ᐊᐱᒋᐊᑭᓐᒡ ᒂ ᐃᑐᑕᒡ ᐊᓐᑕ ᒪᔅᑭᓇᒡ, ᐊᑯᑕ ᒪᒃ ᑲ ᐛᐱᒪᒡ ᒥᓯᐛ ᐊ ᐃᑕᔨᑕᑯᓯᔨᒋ ᐊᐛᔪᐛ, ᑲ ᒥᒋᑥᔨᒋ ᑭᔭ ᑲ ᑯᐃᔅᑯᑕᑎᓯᔨᒋ᙮ ᐊᔪᐅᒄ ᐅᔭ ᑲ ᐛᐎᓴᒪᒡ᙮ ᐊᑯ ᒪᒃ ᓇᔅᒡ ᑲ ᐊᑎ ᓴᑭᔅᒋᓇᓄᐎᒡ ᐊᓐᑕ ᐊᓂᔭ ᑲ ᒥᑯᓴᓄᐎᒡ᙮”
11“ᐃᔅᐱ ᒪᒃ ᐊᓐ ᒋᓴᐅᒋᒪᐤ ᐱᔭᒋ ᐱᒐᑦ ᒐᒋ ᐛᐱᒪᑦ ᐊᓂᔭ ᐊᐛᔪᐛ ᑲ ᑎᑯᓯᓂᔨᒋ, ᒋ ᐛᐱᒪᐤ ᐸᐃᒄ ᐊᓐᑕ ᓇᐸᐛ ᐊᑲ ᒧᔭᒻ ᐃᑕᔅᐱᓱᔨᒋ ᑕᓐ ᒋᐸ ᐃᑕᔅᐱᓱᔪᐛ ᐊ ᓂᐳᐅᓇᓄᐎᒡ᙮ 12ᐊᑯ ᒂ ᐃᑕᑦ ᐊᓂᔭ ᓇᐸᐛ, ‘ᓂᐎᒐᐛᑭᓐ ᑕᓐᑕ ᑲ ᐅᒋ ᐱᒐᔨᓐ ᐅᑕ ᐅ ᐊ ᒥᑯᓴᔭᓐ ᐊᑲ ᒪᒃ ᒧᔭᒻ ᐃᑕᔅᐱᓱᔨᓐ ?’ ᓇᒪ ᒪᒃ ᐅᒋ ᒋᔅᑐᐤ ᐊᓐ ᓇᐸᐤ᙮”
13“ᐊᑯ ᐊᓐ ᒋᓴᐅᒋᒪᐤ ᒂ ᐃᑕᑦ ᐊᓂᔭ ᐅᑯᐸᓇᒪ, ‘ᒪᑯᐱᑎᒺᐧᒄ ᐅᓯᑕ ᑭᔭ ᐅᑎᒋᔭ, ᒐ ᐃᓯ ᐛᐱᓇᒄ ᒪᒃ ᐎᐎᑎᒥᒡ ᐊ ᐃᓯ ᑭᔅᑎᐱᔅᑲᔨᒡ, ᐊᑯᑕ ᒐ ᑎᒂᒡ ᒪᐅᓐ ᑭᔭ ᒐ ᒪᒥᑥᔭᐱᑕᓯᓇᓄᐅᒡ᙮’ ”
14ᐊᑯ ᒋᓴᔅ ᒂ ᐊᑎ ᐃᔅᒋᔄᑦ, “ᒥᒐᑦ ᐊᐛᓐᒋ ᑕᑈᑕᑭᓄᐎᒡ, ᒥᒄ ᒪᒃ ᓇᒪ ᒥᒐᑦ ᐅᑎᓇᑭᓄᐎᒡ᙮”
ᒋᓴᐅᒋᒪᐤ ᓱᓇᔭᐤ ᐊ ᒋᓯᐧᑲᓱᓇᓄᐅᒡ
ᒪᕐᒃ 12.13-17; ᓗᒃ 20.20-26
Matthew 22.15-22 (Proper-24 Year A)
15ᐊᑯ ᒂ ᔅᑐᑕᒡ ᐊᓐᒡ ᐸᕆᓯᔨᒡ, ᒋ ᐃᔨᒥᑐᐅᒡ ᑕᓐᑕ ᒐᒋ ᐅᒋ ᐎᔭᓴᐊᒡ ᒋᓴᓴ ᐊ ᑯᒂᒋᒪᒡ ᒐᒂᔪᐤ᙮ 16ᒋ ᐃᑎᓴᐛᐅᒡ ᒪᒃ ᐅᒋᔅᒋᓄᐊᒧᐛᑭᓄᐛᐛ ᑭᔭ ᐊᕈᑕ ᐅᑦ ᐊᐱᒋᐊᑭᓂᔪᐛ ᐊᓐᑕ ᒋᓴᓴ ᐊ ᑕᔨᒋ᙮ ᐊᑯ ᐊ ᑕᒡ ᐊᓂᔭ ᒋᓴᓴ, “ᒋᔅᑯᑎᒪᒐᓱᐤ, ᒋ ᒋᔅᒐᔨᒥᑎᓇᓐ ᑕᑈ ᐊ ᑕᑈᒥᑲᒡ ᑕᓐ ᐊ ᐃᓯ ᒋᔅᑯᑎᒪᒐᔨᓐ ᑭᔭ ᒥᓯᐛ ᐸᐃᑯᓄᒡ ᐊ ᐃᓯ ᒋᔅᑯᑎᒧᐅᑥᐤ ᐊᐛᓐᒋ ᑕᓐ ᐊ ᐃᓯ ᓂᑐᐛᔨᒥᑯᒡ ᒋᓴᒪᓂᑐᐛ ᒐᒋ ᐃᓯ ᐱᒪᑎᓯᒡ᙮ ᓇᒪ ᓇᔅᒡ ᒐᒂᓐ ᒋᑦ ᐃᑕᔨᑎᒥᐃᑯᓐ ᑕᓐ ᒐ ᐊᑎ ᐃᑕᔨᑎᒥᐃᑯᒡ ᐊᐛᓐᒋ ᑕᓐ ᐊ ᐃᓯ ᒋᔅᑯᑎᒪᒐᐅᑦ, ᑭᔭ ᒥᓯᐛ ᐸᐃᑯᓄᒡ ᒋᑦ ᐃᑕᔨᒪᐅᒡ ᐊᐛᓐᒋ᙮ 17ᐊᑯ ᐎᑎᒧᐅᓇᓐ ᒪᒃ, ᑕᓐ ᐊᑕᔨᑎᒥᓐ, ᐃᑎᔅᑕᐤ ᐊ ᐎᓱᐛᐅᓂᒡ ᒐᒋ ᒥᔭᑭᓄᐅᑦ ᓯᓴᕐ ᕈᒻ ᒋᓴᐅᒋᒪᐤ ᐊᓂᔭ ᑎᐸᔨᒋᒐᐤ ᓱᓇᔭᔪᐤ ᑲ ᒋᓯᐧᑲᓱᔨᒋ ᐊᐛᔪᐛ ?”
18ᒪᒃ ᒋᓴᔅ ᒋ ᒋᔅᒐᔨᑎᒺᐤ ᓂᑎᒥᒄ ᐊᒋ ᐎᔨᑎᑯᑦ, ᐊᑯ ᐊᑕᑦ, “ᒋᔨᐛᐤ ᑲ ᐊᔭᒥᐊᐧᑲᓱᔭᒄ, ᒐᒂᓐ ᐛᒋ ᐎ ᐸᒋ ᑯᒂᒋᐃᔭᒄ ? 19ᐸᒋ ᐛᐸᑎᔨᒄ ᒪ ᓱᓇᔭᐱᔅᒄ ᒋᓴᐅᒋᒪᐤ ᐊ ᐸᒂᓂᒧᐛᑭᓄᐅᑦ᙮” ᐊᑯ ᒪᔨᑯᑦ ᓱᓇᔭᐱᔅᑯᔪᐤ᙮ 20ᐊᑯ ᐊᑕᑦ, “ᐊᐛᓐ ᒪᒃ ᐅᑕᔅᑎᒥᐧᒄ ᓄᑯᓂᔨᒡ ᐅᑕ ᑭᔭ ᐊᐛᓐ ᐅᔭ ᐅᑦ ᐃᓯᓂᐧᑲᓱᐅᓐ ᒪᓯᓇᑕᔨᒡ ?”
21ᐊᑯ ᐊ ᑎᑯᑦ, “ᓯᓴᕐ, ᕈᒻ ᒋᓴᐅᒋᒪᐤ ᐊᓂᔭ ᐅᑕᔅᑎᒥᐧᒄ ᑭᔭ ᐎᔾ ᐊᓐᑕ ᒥᓯᓇᑕᐛᑭᓄᐤ᙮” ᐊᑯ ᒋᓴᔅ ᐊᑕᑦ, “ᒥᔭᐧᒄ ᓯᓴᕐ ᐊᓂᔭ ᑕᐱᔨᐛᐅᓯᑦ ᓯᓴᕐ, ᑭᔭ ᒥᔭᐧᒄ ᒋᓴᒪᓂᑐᐤ ᐊᓂᔭ ᑕᐱᔨᐛᐅᓯᑦ ᒋᓴᒪᓂᑐᐤ᙮”
22ᐃᔅᐱ ᒪᒃ ᐱᔭᑐᐛᒡ ᐊᓐᒡ ᑲ ᐸᒋ ᐃᑎᓴᐛᑭᓄᐎᒡ ᐅᔭ ᐊ ᐃᑎᑯᒡ, ᓇᔅᒡ ᒋ ᒥᔅᑲᑕᔨᑎᒥᐃᑯᐅᒡ ᑕᓐ ᑲ ᐃᓯ ᐎᑎᒪᑯᒡ, ᒂ ᓂᑭᑕᒡ ᒪᒃ ᑭᔭ ᒋ ᔅᑐᑕᐅᒡ᙮
ᒋᓴᔅ ᑲ ᐃᔭᔨᒺᐛᐃᑯᑦ ᑲᐤ ᒐ ᐱᒪᑎᓯᓇᓄᐎᒡ
ᒪᕐᒃ 12.18-27; ᓗᒃ 20.27-40
23ᐊᓂᔭ ᒪᒃ ᐊ ᐸᐃᑯᓂᔨᒡ ᐊ ᒋᓯᑲᔨᒡ ᓴᑎᔪᓯᐊ ᒋ ᐸᒋ ᓂᑐᐛᐱᒥᑯᐤ ᒋᓴᔅ᙮ ᐊᐅᑯᓐ ᐊᓂᔭ ᑲ ᐃᔅᒋᔄᔨᒋ ᒧᔭᒻ ᐊ ᐳᓂᐱᒪᑎᓯᔨᒋ ᐊᐛᔪᐛ ᐅᑕ ᐊᔅᒋᒡ ᐊᑲ ᒥᓐ ᒐ ᐅᒋ ᐅᓂᔅᑲᔨᒋ᙮ 24ᒋ ᐃᑎᑯᐤ ᐊᓂᔭ ᓴᑎᔪᓯᐊ, “ᒋᔅᑯᑎᒪᒐᓱᐤ, ᒧᓱᔅ ᒋ ᒥᓯᓇᐊᒻ ᐅᔭ ᐎᓱᐛᐅᓂᔪᐤ᙮ ᐃᑎᔅᑕᔪᐤ ᒪᒃ, ‘ᓂᐱᒐ ᓇᐸᐤ, ᐊᑲ ᒪᒃ ᐅᒋ ᐊᔭᐛᒂ ᐊᐛᓴ, ᐊᓂᔭ ᐎᐧᑲᓂᓴ ᐊᓐ ᓇᐸᐤ ᑲ ᓂᐱᑦ ᒋᐸ ᐎᒋᒪᔪᐛ ᐊᓂᔭ ᐎᐛ᙮ ᐊᑯ ᒪᒃ ᒋᐸ ᐊᔭᐛᐅᒡ ᐊᐛᓴ ᐊᓂᔭ ᐅᔅᑕᓴ ᒐᒋ ᓂᑕᐅᒋᑎᒧᐛᑦ᙮’ ”
25ᐊᑯ ᐅᔭ ᒂ ᐃᓯ ᑎᐸᒋᒧᔅᑐᐛᒡ ᒋᓴᓴ ᐊᓐᒡ ᓴᑎᔪᓯᒡ, “ᒋ ᑕᐅᒡ ᐸᐃᒂᐤ ᓂᔄᐅᑕᒡ ᓇᐸᐅᒡ ᐊᒋ ᐎᐧᑲᓂᓯᑕᑐᒡ᙮ ᐊᑯ ᐊᓐ ᑲ ᐅᔅᑕᓯᒪᐅᑦ ᒂ ᓂᐳᑦ᙮ ᒋ ᐳᓂᐱᒪᑎᓯᐤ ᒪᒃ ᐊᑲ ᐅᒋ ᐊᔭᐛᒡ ᐊᐛᓴ᙮ ᐊᑯ ᐊᓂᔭ ᐎᐧᑲᓂᓴ ᑲ ᐅᒋ ᑕᒋᔅᑲᑯᑦ ᒂ ᐎᒋᒪᔨᒋ ᐊᓂᔭ ᐎᐛ᙮ 26ᒐᒃ ᒪᒃ ᑭᔭ ᐎᔾ ᐊᓐ ᐎᐧᑲᓂᓯᒪᐤ ᑲ ᐎᒋᒪᑦ ᐊᓂᔭ ᐎᐧᑲᓂᓴ ᐎᐎᔪᐛ ᒂ ᐳᓂᐱᒪᑎᓯᑦ᙮ ᓇᒪ ᑭᔭ ᐎᔾ ᐅᒋ ᐊᔭᐛᐤ ᐊᐛᓴ᙮ ᐊᑯ ᒥᓐ ᐊᓂᔭᔪᐛ ᐛᒋ ᑕᒋᔅᑲᑯᑦ ᐊᓐ ᐊᓄᒡ ᑲ ᐳᓂᐱᒪᑎᓯᑦ ᒂ ᐎᒋᒪᔨᒋ ᐊᓂᔭ ᐃᔎᐛ᙮ ᐊᐅᑯᓐ ᒧᔭᒻ ᑲ ᐊᑎ ᐃᔅᐱᔨᑦ ᑭᔭ ᐎᔾ ᐅ᙮ ᒋ ᐳᓂᐱᒪᑎᓯᐤ ᐊᑲ ᐛᐛᒡ ᐅᒋ ᐊᔭᐛᑦ ᐊᐛᓴ᙮ ᒐᒃ ᒥᓯᐛ ᐊᐅᑯᓐ ᒂ ᐊᑎ ᐃᓯᓇᑯᓯᒡ ᐊᓐᒡ ᓂᔄᐅᑕᒡ ᐎᐧᑲᓂᓯᒪᐅᒡ᙮ ᒥᓯᐛ ᒋ ᐎᒋᒪᐅᒡ ᐊᓂᔭᔪᐛ ᐃᔎᐛ ᑭᔭ ᒥᓯᐛ ᒋ ᐊᑎ ᐳᓂᐱᒪᑎᓱᐅᒡ ᐊᑲ ᐅᒋ ᐊᔭᐛᒡ ᐊᐛᓴ᙮ 27ᒐᒃ ᑭᔭ ᐎᔾ ᐊᓐ ᐃᔎᐤ ᒂ ᐳᓂᐱᒪᑎᓯᑦ᙮”
28ᐃᔅᐱ ᒪᒃ ᑲᒋ ᐃᓯ ᑎᐸᒋᒧᔅᑐᐛᒡ ᒋᓴᓴ ᐊᓐᒡ ᓴᑎᔪᓯᒡ ᐊᑯ ᒂ ᑯᒂᒋᒪᒡ, “ᐃᔅᐱ ᐅᑎᒋᐱᔨᒐ ᒐᒋ ᐅᓂᔅᑲᒡ ᐊᓐᒡ ᑲ ᐳᓂᐱᒪᑎᓯᒡ ᐊᐛᓐ ᒐ ᐎᐅᑦ ᐊᓂᔭ ᐃᔎᐛ, ᐛᔅ ᒥᓯᐛ ᐊᓐᒡ ᓂᔄᐅᑕᒡ ᐎᐧᑲᓂᓯᒪᐅᒡ ᒋ ᐎᒋᒪᐅᒡ ᐊᓂᔭ ᐃᔎᐛ ?”
29ᐊᑯ ᒋᓴᔅ ᐊᑕᑦ, “ᒋ ᐅᓂᐱᔨᓇᐛᐤ᙮ ᓇᒪ ᒋ ᒋᔅᒐᔨᑕᓇᐛᐤ ᑕᓐ ᐊ ᐃᑎᔅᑕᔨᒡ ᒋᓴᒪᓂᑐᐤ ᐅᑦ ᐃᔨᒧᐅᓐ ᑭᔭ ᓇᒪ ᒋ ᒋᔅᒐᔨᑎᒺᓇᐛᐤ ᒋᓴᒪᓂᑐᐤ ᐅᒥᔅᑯᓯᐅᓐ ᐅ ᑲ ᐃᓯ ᑯᒂᒋᒥᔭᒄ᙮ 30ᐛᔅ ᐃᔅᐱ ᐅᑎᒋᐱᔨᒐ ᒐ ᐅᓂᔅᑲᒡ ᐊᓐᒡ ᑲ ᐳᓂᐱᒪᑎᓯᒡ, ᑕᐸ ᒋᑭ ᐅᒋ ᓂᐳᐅᒡ ᑭᔭ ᓇᒪ ᒋᑭ ᐅᒋ ᓂᐳᐊᑭᓄᐅᒡ, ᐛᔅ ᐊᓂᔭ ᐊ ᐃᑕᔨᑕᑯᓯᔨᒋ ᒋᓴᒪᓂᑐᐤ ᐅᑦ ᐊᓐᒋᓂᒪ ᒋᒋᒋᓯᑯᒡ ᐊ ᑕᔨᒋ ᐊᐅᑯᓐ ᒧᔭᒻ ᒐ ᐃᑕᔨᑕᑯᓯᒡ᙮ 31ᐊᑯ ᒪᒃ ᐊᓐ ᐎ ᒐ ᐅᓂᔅᑲᒡ ᐊᓐᒡ ᑲ ᓂᐱᒡ, ᓇᒪᐎᔾ ᐊ ᒋ ᐅᒋ ᐃᔨᒥᑕᓇᐛᐤ ᑲ ᐃᑎᑕᒄ ᒋᓴᒪᓂᑐᐤ, ᒥᓐ ᒐ ᐅᓂᔅᑲᔨᒋ ᒥᓯᐛ ᐊᓂᔭ ᑲ ᐳᓂᐱᒪᑎᓯᔨᒋ᙮ 32ᒋ ᐃᑕᐤ, ‘ᐊᐅᒄ ᓂᔾ ᐅᒋᓴᒪᓂᑐᒧᐛᐛ, ᐊᑉᕋᐊᒻ, ᐊᐃᓯᒃ ᑭᔭ ᒐᑭᑉ᙮’ ᓇᒪ ᐅᒋᓴᒪᓂᑐᒥᑐᑕᑯᐤ ᒋᓴᒪᓂᑐᐤ ᐊᓂᔭ ᑲ ᓂᐱᔨᒋ ᒥᒄ ᐊᓂᔭ ᑲ ᐱᒪᑎᓯᔨᒋ᙮”
33ᐃᔅᐱ ᒪᒃ ᐊᓐᒡ ᐃᔪᒡ ᐱᔭᑐᐛᒡ ᐅᔭ ᐊ ᐃᔅᒋᔄᔨᒋ, ᒋ ᒥᔅᑲᑕᔨᑎᒥᐃᑯᐅᒡ ᐊᓂᔭ ᐊ ᐃᓯ ᒋᔅᑯᑎᒪᒐᔨᒋ᙮
ᐊᓐ ᒪᐅᒡ ᒐᔅᑕᔨᑕᒂᒡ ᐃᑎᓱᐛᐅᓐ
ᒪᕐᒃ 12.28-34; ᓗᒃ 10.25-28
Matthew 22.34-46 (Proper-25 Year A)
34ᐃᔅᐱ ᒪᒃ ᐊᓐᒡ ᐸᕆᓯᔨᒡ ᐱᔭᑕᒡ ᐊᒋ ᒋᐳᑐᓇᐛᔨᒋ ᒋᓴᓴ ᐊᓂᔭ ᓴᑎᔪᓯᐊ, ᐊᑯ ᒂ ᒪᒧᐎᒡ ᒪᒧᐤ ᒂ ᓂᑐᐛᐱᒪᒡ ᒋᓴᓴ᙮ 35ᐸᐃᒄ ᒪᒃ ᐊᓐᑕ ᐊ ᑎᓯᒡ ᐊᓐᒡ ᐸᕆᓯᔨᒡ, ᑲ ᒋᔅᑯᑎᒪᒐᑦ ᐎᓱᐛᐅᓂᔪᐤ ᐊ ᐃᑕᐱᑎᓯᑦ, ᒋ ᐎ ᓇᓂᑐᐤ ᐎᔭᓴᐊᐤ ᒋᓴᓴ, ᐊ ᑯᒂᒋᒪᑦ ᒐᒂᔪᐤ᙮ 36ᒋ ᐃᑕᐤ ᒪᒃ, “ᐊ ᑕᑎᒋ ᐃᑎᓱᐛᐅᓇ ᒋᓴᒪᓂᑐᐤ ᑲ ᐎᔅᑕᑦ, ᑕᓐ ᒪᐅᒡ ᐊ ᒋᔅᑕᔨᑕᒂᒡ ?”
37ᐊᑯ ᒋᓴᔅ ᐊᑕᑦ, “ ‘ᓴᒋᐃ ᐅᑎᐸᔨᒋᒐᐤ ᒋᒋᓴᒪᓂᑐᒻ, ᒥᓯᐛ ᒋᑕᐃᒡ, ᑭᔭ ᒥᓯᐛ ᒋᑦ ᐊᒐᐧᑯᒡ ᑭᔭ ᒥᓯᐛ ᒋᒥᑐᓇᔨᒋᑭᓂᒡ᙮’ 38ᐊᐅᒄ ᐅ ᒪᐅᒡ ᓇᑲᓇᔨᑕᒂᒡ ᑭᔭ ᒪᐅᒡ ᒐᔅᑕᔨᑕᒂᒡ ᐃᑎᓱᐛᐅᓐ᙮ 39ᐊᓐ ᒪᒃ ᐃᑎᓱᐛᐅᓐ ᒥᓐ ᒪᐅᒡ ᒐᔅᑕᔨᑕᒂᒡ ᐊᐅᒄ ᐅ ᑲ ᐃᔅᒋᔄᒥᑲᒡ, ‘ᓴᒋᐃ ᒋᒡ ᐃᔪᐤ ᒧᔭᒻ ᒋᔾ ᐊ ᐃᔅᐱᔅ ᓴᒋᐃᓱᔨᓐ᙮’ 40ᐊᐅᒄ ᒪᒃ ᐅᔭ ᓂᓱ ᐃᑎᓱᐛᐅᓇ ᐊᓐᑕ ᒐᒋ ᐅᒋ ᓂᓇᑭᑐᐛᔨᑎᒥᐃᑯᐛᒄ ᐊᓂᔭ ᒧᓱᔅ ᐃᑎᓱᐛᐅᓂᔪᐤ ᑲ ᒥᔭᑭᓄᐅᑦ ᑭᔭ ᑕᓐ ᑲ ᐃᓯ ᒋᔅᑯᑎᒪᒐᒡ ᐅᒋᔅᒋᐛᐃᒐᓱᒡ᙮”
ᐊᐛᓐ ᐅ ᙭
ᒪᕐᒃ 12.35-37; ᓗᒃ 20.41-44
41ᒪᒂᒡ ᒪᒃ ᒪᒧᐤ ᐊ ᐸᒋ ᑕᔨᒋ ᐊᓂᔭᔪᐛ ᐸᕆᓯᐊ, ᒋᓴᔅ ᒋ ᑯᒂᒋᒪᐤ, 42“ᑕᓐ ᐊ ᐃᑕᔨᒪᒄ ᙭ ? ᐊᐛᓐ ᐊᓂᔭ ᐅᑯᓴ ? ᐊᐛᔪᐛ ᐊ ᑕᔨᒋ ᑲ ᐅᒋ ᐊᓂᔅᒐ ᐱᒪᑎᓯᑦ ?” ᐊᑯ ᒂ ᐃᑎᑯᑦ, “ᑎᐱᑦ ᐊ ᑕᔨᒋ ᒋ ᐅᒋ ᐊᓂᔅᒐ ᐱᒪᑎᓯᐤ᙮”
43ᐊᑯ ᒋᓴᔅ ᐊᑕᑦ, “ᒐᒂᔪᐤ ᒪᒃ ᐅᑎᐸᔨᒋᒐᐤ ᐛᒋ ᐃᓯᓂᐧᑲᑎᑯᑦ ᑎᐱᑕ ? ᐛᔅ ᑎᐱᑦ, ᑲ ᐸᔭᒋᓯᔨᒋ ᐊᒐᒂ ᒋ ᒥᔨᑯᐤ ᒐᒋ ᐃᔅᒋᔄᑦ,
44ᐅᑎᐸᔨᒋᒐᐤ ᒋ ᐃᑕᐤ ᓂᑎᐸᔨᒋᒐᓯᒪ,
ᐅᑕ ᐸᒋ ᐊᐱᔾ ᓂᒥᔪᐅᓂᒡ ᐸᑐᔅ ᒋ ᓴᐧᑯᒋᐃᒂᐛ ᐊᓐᒡ ᑲ ᐅᐧᑲᑎᔅᒡ᙮
45ᐊᑯ ᒪᒃ ᑎᐱᑦ ‘ᓂᑎᐸᔨᒋᒐᓯᒻ’ ᐊᒋ ᐃᓯᓂᐧᑲᑕᑦ ᐊᓂᔭᔪᐛ ᙭ᑕ, ᑕᓐᑕ ᒐᒋ ᐅᒋ ᐅᑯᓯᑐᑐᐛᑦ ?” 46ᓇᒪ ᒪᒃ ᐊᐛᔪᐛ ᐅᒋ ᐎᑎᒪᑯᐤ ᒋᓴᔅ᙮ ᐊᓐᑕ ᒪᒃ ᐅᒋ ᐊᓂᔭ ᑲ ᒋᓯᑲᔨᒡ ᓇᒪ ᒥᓐ ᐊᐛᔪᐛ ᐅᒋ ᑯᒋᑕᔪᐛ ᒐᒋ ᑯᒂᒋᒥᑯᑦ ᒐᒂᔪᐤ᙮
Currently Selected:
ᒪᑎᔪᐤ 22: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
