ᒪᑎᔪᐤ 19
19
ᒋᓴᔅ ᑲ ᐊᔨᒧᑕᐧᒃ ᐊ ᐛᐱᓂᑐᓇᓄᐎᒡ
ᒪᕐᒃ 10.1-12
1ᐃᔅᐱ ᒪᒃ ᒋᓴᔅ ᑲᒋ ᐎᑕᐧᒃ ᐅᔭ ᒋ ᔅᑐᑕᐤ ᐊᓐᑕ ᑲᓕᓕᒡ ᐅᒋ, ᐊᑯ ᐊᓐᑕ ᒍᑎᔭ ᐊᔅᒋᒡ ᒂ ᐃᑐᑕᑦ ᒂᔅᑕᒐᑲᒻ ᐊᓂᔭ ᒠᕐᑕᓐ ᓯᐱᔪᐤ᙮ 2ᒋ ᒥᒐᑎᔪᐛ ᒪᒃ ᐃᔪᐛ ᐊ ᓇᓴᐅᑯᑦ, ᐊᑯᑕ ᐊᓐᑕ ᑲ ᒥᓏᒋᐊᑦ᙮
3ᐱᔅᒐ ᒪᒃ ᐸᕆᓯᐊ ᒋ ᐸᒋ ᓂᑐᐛᐱᒥᑯᐤ ᐊ ᐎ ᑯᒂᒋᐃᑯᑦ᙮ ᒋ ᐃᑎᑯᐤ ᒪᒃ, “ᐎᑎᒧᐅᓇᓐ ᒪ, ᐃᑎᔅᑕᐤ ᐊ ᐎᓱᐛᐅᓂᒡ ᒐ ᐱᔅᑎᓇᑭᓄᐅᑦ ᓇᐸᐤ ᒐᒋ ᐛᐱᓇᑦ ᐎᐛ ?”
4ᐊᑯ ᒋᓴᔅ ᒂ ᐎᑎᒧᐛᑦ ᐊ ᐃᑕᑦ, “ᓇᒪᐎᔾ ᐊ ᒋ ᐅᒋ ᐃᔨᒥᑕᓇᐛᐤ ᒥᓯᓇᐃᑭᓂᒡ ᐊᓐᑕ ᑲ ᐃᑎᔅᑕᒡ, ᓂᔅᑎᒻ ᐃᔪᐛ ᑲ ᐅᓯᐊᑦ ᒋᓴᒪᓂᑐᐤ, ᓇᐸᐛ ᑭᔭ ᐃᔎᐛ ᒋ ᐅᓯᐊᐤ᙮ 5ᒋ ᐃᔅᒋᔄᐤ ᒪᒃ ᒋᓴᒪᓂᑐᐤ, ‘ᐅ ᐅᒋ, ᓇᐸᐤ ᒋᑭ ᓂᑭᑕᐤ ᐅᓂᒋᐃᒂ ᒐ ᐎᒋᒪᑦ ᐎᐛ ᑭᔭ ᒐ ᐸᐃᑯᐎᔭᓯᒡ᙮’ ᐊᔪᐅᒄ ᐅᔭ ᑲ ᐃᔅᒋᔄᒂ ᒋᓴᒪᓂᑐᐤ᙮ 6ᓇᒪ ᓴᔅ ᐊ ᓂᓯᒡ ᐊᐛᓐᒋ ᒋᑭ ᐅᒋ ᐃᓯᓇᑯᓱᐅᒡ, ᒪᒃ ᒥᒄ ᐊ ᐸᐃᑯᓯᑦ ᐊᐛᓐ ᒋᑭ ᐃᓯᓇᑯᓱᐅᒡ᙮ ᐊᓂᔭ ᒪᒃ ᐊᐛᔪᐛ ᒋᓴᒪᓂᑐᐤ ᑲ ᐸᐃᒂᐊᑦ, ᓇᒪ ᐊᐛᓐ ᒋᐸ ᐅᒋ ᑕᑎᐸᓇᐤ᙮”
7ᐊᑯ ᒂ ᐃᑎᑯᑦ ᐊᓂᔭ ᐸᕆᓯᐊ, “ᒐᒂᔪᐤ ᒪᒃ ᐛᒋ ᐎᔅᑕᑦ ᐅᔭ ᐎᓱᐛᐅᓂᔪᐤ ᒧᓱᔅ ᐊ ᐃᑎᔅᑕᔨᒡ, ‘ᓇᐸᐤ ᐎ ᐛᐱᓇᒐ ᐎᐛ ᔭᐃᑕᔾ ᓂᑲᓐ ᒋᑭ ᐎᑎᒧᐛᐤ ᒥᓯᓇᐃᑭᓂᔪᐤ ᐊ ᒥᔭᑦ, ᐊᑯ ᐃᔭᒄ ᒐ ᓂᑭᑕᑦ’ ?”
8ᐊᑯ ᒋᓴᔅ ᒂ ᐎᑎᒧᐛᑦ ᐊ ᐃᑕᑦ, “ᒧᓱᔅ ᔅᒋ ᐱᔅᑎᓂᑯᐛᐤ ᒐᒋ ᐛᐱᓂᒪᑯ ᒋᐅᐛᐛ ᐛᔅ ᒋ ᒋᔅᒐᔨᑎᒻ ᐊ ᓯᐱᑎᒺᒄ᙮ ᓇᒪ ᒪᒃ ᐎᔾ ᒋᓴᒪᓂᑐᐤ ᐅᒋ ᓂᑐᐛᔨᑎᒻ ᒐᒋ ᐃᓯᓇᑯᓂᔨᒡ ᐅᔅᑭᒡ ᐛᓯᐊᑦ ᓇᐸᐛ ᑭᔭ ᐃᔎᐛ᙮ 9ᒋ ᐎᑎᒪᑎᓇᐛᐤ ᒪᒃ, ᓇᐸᐤ ᐛᐱᓇᒐ ᐎᐛ ᐊᑲ ᒪᒃ ᐅᒋ ᐱᓯᒂᑎᓯᔨᒋ ᐊᓂᔭ ᐎᐛ, ᐊᓐ ᒪᒃ ᓇᐸᐤ ᐎᒋᒪᒐ ᑯᑎᑲ ᐃᔎᐛ ᐱᓯᒂᑎᓯᐤ ᐊᓐ ᓇᐸᐤ᙮”
10ᐊᑯ ᒂ ᐃᑎᑯᑦ ᐅᒋᔅᒋᓄᐊᒧᐛᑭᓇ, “ᐅ ᐊ ᐃᔅᐱᔪᐛᒂ ᓇᐸᐤ ᐎᐛ, ᐊᑯᔅ ᒥᔽᓱᐤ ᒐ ᐊᑲ ᒋ ᓂᐳᐅᓇᓄᐅᒡ᙮”
11ᐊᑯ ᒋᓴᔅ ᒂ ᐃᑕᑦ, “ᓇᒪ ᒥᓯᐛ ᐊᐛᓐ ᒋᑭ ᐅᒋ ᓂᔅᑐᑎᒻ ᐅᔭᔪᐤ ᒋᔅᑯᑎᒪᒐᐅᓂᔪᐤ, ᒥᒄ ᐊᓂᔭ ᐊᐛᔪᐛ ᒋᓴᒪᓂᑐᐤ ᑲ ᒥᔭᑦ ᒐᒋ ᓂᔅᑐᑎᒥᔨᒋ᙮ 12ᐱᔅᒐ ᒪᒃ ᐊᐛᓐᒋ ᓇᒪ ᒋᑭ ᒋ ᓂᐳᐅᒡ ᐛᔅ ᐊᐅᑯᓐ ᑲ ᐃᓯ ᐱᒪᑎᓯᒡ ᐊᑲ ᒪᒥᑐᓇᔨᑎᒥᐃᑯᒡ ᒐᒋ ᓂᐳᐅᒡ, ᐊᑯ ᑯᑎᑭᒡ ᓇᒪ ᐱᔅᑎᓇᑭᓄᐎᒡ ᒐᒋ ᓂᐳᐅᒡ ᐊᑯ ᑯᑎᑭᒡ ᐎᔨᐛᐤ ᐃᑕᔨᑎᒧᒡ ᒐ ᐊᑲ ᓂᐳᐅᒡ ᐛᔅ ᐃᑕᔨᑎᒧᒡ ᐃᐛᒃ ᒐᒋ ᐊᑐᔅᒐᔅᑕᒡ ᒋᒋᒋᓯᒄ ᐅᒋᒪᐅᓂᔪᐤ ᒥᒄ ᐊ ᐸᐃᑯᓯᒡ᙮ ᐊᓐ ᒪᒃ ᐊᐛᓐ ᑲ ᓂᔅᑐᑕᐧᒃ ᐅᔭ ᐊᑯᔅ ᒋᑭ ᐃᑐᑎᒻ᙮”
ᒋᓴᔅ ᑲ ᓱᐛᔨᒪᑦ ᐊᐛᓴ
ᒪᕐᒃ 10.13-16; ᓗᒃ 18.15-17
13ᒋ ᐸᓱᐛᐅᒡ ᒪᒃ ᐊᐛᓐᒋ ᐅᑦ ᐊᐛᓯᒧᐛᐛ ᐊᓐᑕ ᒋᓴᓴ ᐊ ᑕᔨᒋ ᐊᒋ ᓂᑐᐛᔨᒪᒡ ᒐᒋ ᑕᒋᓇᔨᒋ ᒐᒋ ᐊᔭᒥᐊᔅᑎᒧᐛᔨᒋ ᒪᒃ, ᒥᒄ ᒪᒃ ᐊᓐᒡ ᒋᔅᒋᓄᐊᒧᐛᑭᓐᒡ ᒋ ᒋᑕᐊᒧᐛᐅᒡ ᐊᓂᔭ ᐃᔪᐛ᙮ 14ᐊᑯ ᒋᓴᔅ ᒂ ᐃᑕᑦ, “ᐱᔅᑎᓇᐧᑯᒡ ᐊᐛᓯᒡ ᒐᒋ ᐸᒋ ᓇᓯᒡ ᐊᑲᐎᔾ ᐅᒋ ᒋᑕᐊᒧᐛᐧᑯᒡ, ᐛᔅ ᐅᔭ ᑲ ᐃᑕᔨᑕᑯᓯᒡ ᐊᐛᓐᒋ ᒋᒋᒋᓯᒄ ᐅᒋᒪᐅᓂᒡ ᐃᓯ ᑎᐸᔨᑕᑯᓱᐅᒡ᙮”
15ᒋᓴᔅ ᒂ ᑕᒋᓇᑦ ᐊᓂᔭ ᐊᐛᓴ ᐊᑯ ᒂ ᔅᑐᑕᑦ᙮
ᑲ ᐛᔪᑎᓯᑦ ᓇᐸᐤ
ᒪᕐᒃ 10.17-31; ᓗᒃ 18.18-30
16ᐸᐃᒂᐤ ᓇᐸᐤ ᒋ ᐸᒋ ᓂᑐᐛᐱᒪᐤ ᒋᓴᓴ ᐊ ᐃᑕᑦ, “ᒋᔅᑯᑎᒪᒐᓱᐤ, ᒐᒂᓐ ᒐᒋ ᐃᑐᑎᒪᓐ ᐊ ᒥᔽᓯᒡ ᒐᒋ ᐅᒋ ᐊᔭᔭᓐ ᑲᒋᒡ ᐱᒪᑎᓯᐅᓐ ?”
17ᐊᑯ ᒋᓴᔅ ᒂ ᐃᑕᑦ, “ᒐᒂᓐ ᐛᒋ ᑯᒂᒋᒥᔨᓐ ᒐᒋ ᐎᑎᒪᑕᓐ ᒐᒂᓐ ᒪᔽᓯᒡ ? ᓇᒪ ᐊᐛᓐ ᑕᐤ ᓇᔅᒡ ᒐᒋ ᒥᔪ ᐃᑎᑦ, ᒥᒄ ᒋᓴᒪᓂᑐᐤ᙮ ᐛ ᐃᔭᐅᓇ ᑲᒋᒡ ᐱᒪᑎᓯᐅᓐ ᒥᓯᐛ ᓂᓇᐃᑕ ᐎᓱᐛᐅᓇ᙮”
18ᐊᑯ ᐊᓐ ᓇᐸᐤ ᒂ ᐃᑕᑦ, “ᒐᒄ ᐎᓱᐛᐅᓇ ?” ᒋᓴᔅ ᒂ ᐎᑎᒧᐛᑦ ᐊ ᐃᑕᑦ,
“ ‘ᐊᑲᐎᔾ ᓂᐸᐃ ᐊᐛᓐ, ᐊᑲᐎᔾ ᐱᓯᒂᑎᓯ, ᐊᑲᐎᔾ ᒋᒧᑎ, ᐊᑲᐎᔾ ᒋᑭ ᓂᑎᔭᒋᒪᐤ ᐊᐛᓐ, 19ᒋᔅᑕᔨᒻ ᒍᑕᐎᔾ ᑭᔭ ᒋᑲᐎᔾ,’
ᑭᔭ
‘ᓴᒋᐃ ᒋᒡ ᐃᔪᐤ ᒧᔭᒻ ᒋᔾ ᐊ ᐃᔅᐱᔅ ᓴᒋᐃᓱᔨᓐ᙮’ ”
20ᐊᑯ ᐊᓐ ᓇᐸᐤ ᒂ ᐃᔅᒋᔄᑦ, “ᑲ ᐸᒋ ᐊᐛᓯᐅᔭᓐ ᓴᔅ ᓂᒋ ᓂᓇᐃᑕᓐ ᐅᔭ ᐎᓱᐛᐅᓇ᙮ ᒐᒂᓐ ᒪᒃ ᐃᔭᐱᒡ ᐊᔅᒄ ᓂᐸ ᐃᑐᑕᓐ ?”
21ᐊᑯ ᒋᓴᔅ ᒂ ᐃᑕᑦ, “ᓇᔅᒡ ᒥᓯᐛ ᒐᒂᓐ ᐛ ᐃᑐᑎᒧᐎᓇ ᒐᒋ ᑯᐃᔅᑯᑕᑎᓯᔨᓐ, ᐊᑕᐛᒐ ᒥᓯᐛ ᑕᓐ ᐊ ᐃᓯ ᐊᔭᔨᓐ, ᐊᑯ ᐊᓐ ᓱᓇᔭᐤ ᑲ ᒋᔅᑎᒪᑎᓯᒡ ᒐ ᒥᔨᑥᐤ᙮ ᐊᑯ ᒪᒃ ᒐ ᐊᔭᔨᓐ ᐛᔪᑎᓯᐅᓐ ᒋᒋᒋᓯᑯᒡ ᑲ ᑎᒂᒡ᙮ ᒋ ᐃᑐᑎᒥᓇ ᒪᒃ ᐅ ᐊᑯ ᒐ ᐸᑐᑕᔨᓐ ᒐ ᐸᒋ ᓇᓴᐎᔨᓐ᙮”
22ᐃᔅᐱ ᒪᒃ ᐱᔭᑕᐧᒃ ᐊᓐ ᓇᐸᐤ ᐅᔭᔪᐤ ᓇᔅᒡ ᑕᑈ ᒋ ᒥᒐᔨᑎᒻ ᐛᔅ ᓇᔅᒡ ᒋ ᐛᔪᑎᓯᐤ᙮
23ᐊᑯ ᒋᓴᔅ ᒂ ᐃᑕᑦ ᐊᓂᔭ ᐅᒋᔅᒋᓄᐊᒧᐛᑭᓇ, “ᑕᑈ ᒋ ᐎᑎᒪᑎᓇᐛᐤ, ᐊᐛᓐ ᑲ ᐛᔪᑎᓯᑦ ᑕᑈ ᒋᑭ ᐊᔨᒥᓂᔪᐤ ᒐᒋ ᐱᒐᑦ ᒋᒋᒋᓯᒄ ᒋᓴᐅᒋᒪᐅᓂᒡ᙮ 24ᒥᓐ ᐸᐃᒂᐤ ᓂᑭ ᐃᔅᒋᔄᓐ, ᐊᑐᐎᔅ ᐊᔨᒥᓂᔪᐤ ᐊᐛᓐ ᑲ ᐛᔪᑎᓯᑦ ᒐᒋ ᐱᒐᑦ ᒋᓴᒪᓂᑐᐛ ᐅᒋᓴᐅᒋᒪᐅᓂᔨᒡ ᐃᔅᐱᔅ ᐊᓐ ᐊᐛᓯᔅ ᑲ ᒥᔅᑎ ᐱᔎᐅᑯᓇᑦ ᒐᒋ ᓴᐳᔅᑲᐧᒃ ᐅᔅᑲᒋᐧᑯᔪᐤ ᐊᓐᑕ ᐊ ᐱᑯᓇᔭᐱᔅᑲᔨᒡ᙮”
25ᐃᔅᐱ ᒪᒃ ᐱᔭᑕᒡ ᐊᓐᒡ ᒋᔅᒋᓄᐊᒧᐛᑭᓐᒡ ᐅᔭ, ᓇᔅᒡ ᒋ ᓯᔅᒋᑯᒋᐃᑯᐅᒡ, ᐊᑯ ᒂ ᐃᔅᒋᔄᒡ, “ᐊᐛᓐ ᒪᒃ ᐊᑯ ᒐᒋ ᐱᒪᒋᐅᑦ ?”
26ᐊᑯ ᒋᓴᔅ ᑯᐃᔅᒄ ᑲ ᑭᓄᐛᐱᒪᑦ ᐊ ᐃᑕᑦ, “ᑕᓐ ᐊᓂᔭᔪᐛ ᒐ ᐊᑲ ᒋ ᐃᑐᑕᐧᒃ ᐃᔪᐤ ᐎᔾ ᒋᓴᒪᓂᑐᐤ ᒋᑭ ᒋ ᐃᑐᑎᒻ᙮”
27ᐊᑯ ᐱᑕᕐ ᒂ ᐃᔅᒋᔄᑦ, “ᑭᓄᐛᐸᑕ ᒪ᙮ ᓴᔅ ᒥᓯᐛ ᒐᒂᓐ ᓂᒋ ᓂᑭᑕᓇᓐ ᒐᒋ ᓇᓴᐅᑕᒡ᙮ ᐅ ᒪᒃ ᑲ ᐃᓯ ᐃᑐᑎᒪᒡ ᒐᒂᔪᐤ ᒪᒃ ᒐ ᒥᔨᒥᑦ ᒋᓴᒪᓂᑐᐤ ?”
28ᐊᑯ ᒋᓴᔅ ᒂ ᐃᑕᑦ, “ᒋᑭ ᒐᔅᑎᓇᐅᓇᐛᐤ, ᐃᔅᐱ ᐃᔪᐤ ᐅᑯᓯᓴᓐ ᐊᐱᒐ ᒋᓴᐅᒋᒪᐤ ᑕᑎᐳᐛᑭᓂᒡ ᒥᓐ ᐅᔅᑲᒐ ᐊᔅᒋᔾ, ᐊᑯ ᑭᔭ ᒋᔨᐛᐤ ᓂᒋᔅᒋᓄᐊᒧᐛᑭᓂᑎᒄ ᒐ ᐊᐱᔭᒄ ᓂᓱᓴᑉ ᐅᒋᒪᐤ ᑕᑎᐳᐛᑭᓇ, ᒐ ᑎᐸᔅᑯᓇᑯᒡ ᓂᓱᓴᑉ ᑲ ᐃᑎᔅᑲᓇᓯᒡ ᐃᔅᕋᐃᓪ ᐃᔪᒡ᙮ 29ᒥᓯᐛ ᐊᐛᓐ ᑲ ᓂᑭᑕᐧᒃ ᐎᒡ ᑭᔭ ᑲ ᓂᑭᑕᑦ ᐎᐧᑲᓂᓴ, ᐅᓂᒋᐃᒂ ᑭᔭ ᐅᑦ ᐊᐛᓯᒪ ᑭᔭ ᒪᒃ ᑲ ᓂᑭᑕᐧᒃ ᐅᑦ ᐊᔅᒋᔾ ᓂᔾ ᐅᒋ, ᐅᔅᑕ ᐸᐃᒄ ᒥᑕᓯᒥᑎᓄᐤ ᒋᑭ ᒋᐛᒥᔭᑭᓄᐤ ᑭᔭ ᑲᒋᒡ ᐱᒪᑎᓯᐅᓂᔪᐤ ᒋᑭ ᒥᔭᑭᓄᐤ᙮ 30ᒥᒄ ᒪᒃ ᒥᒐᑦ ᐊᓐᒡ ᐊ ᒋᔅᑕᔨᑕᑯᓯᒡ ᑲ ᐃᑕᔨᒪᑭᓄᐎᒡ ᓇᒪ ᒋᑭ ᐅᒋ ᒋᔅᑕᔨᑕᑯᓱᐅᒡ ᐊᓐᑕ ᒋᓴᒪᓂᑐᐛ ᐅᒋᓴᐅᒋᒪᐅᓂᔨᒡ ᑭᔭ ᒥᒐᑦ ᐊᓐᒡ ᑲ ᐃᑕᔨᒪᑭᓄᐎᒡ ᐊ ᐊᑲ ᒋᔅᑕᔨᑕᑯᓯᒡ ᒋᑭ ᒋᔅᑕᔨᑕᑯᓱᐅᒡ ᐊᓐᑕ ᒋᓴᒪᓂᑐᐛ ᐅᒋᓴᐅᒋᒪᐅᓂᔨᒡ᙮”
Currently Selected:
ᒪᑎᔪᐤ 19: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
