ᒪᑎᔪᐤ 17
17
ᒋᓴᔅ ᑲ ᒂᔅᒋᓇᑯᓯᑦ
ᒪᕐᒃ 9.2-13; ᓗᒃ 9.28-36
1ᑲᒋ ᐊᓱᑕᒡ ᑕᑐᐤ ᒋᓯᑲᐛ ᒪᒃ ᐃᔅᐱᔅ ᐊᑯ ᒋᓴᔅ ᑲ ᐃᑐᑕᐊᑦ ᐱᑕᕋ, ᒋᒥᓴ ᑭᔭ ᒠᓇ ᐊᓐᑕ ᐊ ᐃᔅᐱᑎᓇᔨᒡ ᐱᔅᑯᑎᓇᔪᐤ ᒥᒄ ᐎᔨᐛᐤ ᒐᒋ ᑕᒡ᙮ 2ᒪᒂᒡ ᒪᒃ ᐊ ᑭᓄᐛᐱᒪᒡ ᐊᓂᔭ ᒋᓴᓴ ᐅᑕᔅᑎᒥᐧᑯᔪᐤ ᒋ ᒂᔅᒋᓇᑯᓂᔪᐤ, ᒧᔭᒻ ᐱᓯᒺ ᒋ ᐃᔅᐱᔅ ᒋᐧᑲᔭᔅᑐᐛᔪᐤ ᑭᔭ ᐅᑦ ᐊᐱᒋᑕᐅᓇ ᓇᔅᒡ ᑕᑈ ᒋ ᐱᔭᑭᔅᒡ ᐛᐸᑭᓂᔪᐛ ᓇᔅᒡ ᐊ ᐛᔅᑐᐛᔨᒋ ᒋ ᐃᓯᓇᑯᓂᔪᐛ᙮ 3ᒋ ᐅᒋ ᐛᐱᒪᐅᒡ ᒪᒃ ᒧᓱᓴ ᑭᔭ ᐃᓚᐃᒐᔨᒋ ᐊ ᐃᔨᒪᐊᔨᒋ ᐊᓂᔭ ᒋᓴᓴ᙮ 4ᐊᑯ ᐱᑕᕐ ᒂ ᐃᑕᑦ ᐊᓂᔭ ᒋᓴᓴ, “ᐅᑎᐸᔨᒋᒐᐤ, ᓄᐛᒡ ᒥᔽᔨᑕᑯᓐ ᐅᑕ ᒐᒋ ᐃᑕᐛᐅᒋᐱᓇ᙮ ᓇᐊᔨᑎᒥᓇ, ᓂᑭ ᐅᓯᑕᓇᓐ ᓂᔅᑐ ᒥᒋᐛᐸ, ᐸᐸᐃᒄ ᒐ ᐊᔭᔭᒄ, ᒋᔾ, ᒧᓱᔅ ᑭᔭ ᐃᓚᐃᒐ᙮”
5ᒪᒂᒡ ᒪᒃ ᐊᔅᒄ ᐊ ᐃᔨᒥᑦ, ᑭᔅᑯᐅᓂᔎ ᓇᔅᒡ ᐊ ᐛᓱᓱᔨᒋ ᒋ ᐸᒋ ᐊᑯᒋᓂᔪᐛ ᐊᓐᑕ ᑎᐱᔅᑯᒡ ᐃᔅᐱᒥᒡ ᐊ ᑕᒡ, ᐊᓐᑕ ᒪᒃ ᑭᔅᑯᐅᓂᔅᑯᒡ ᒋ ᐅᒋ ᐸᑐᐛᐅᒡ ᐊᐛᔪᐛ ᐊ ᐃᔅᒋᔄᔨᒋ, “ᐊᐅᒄ ᐅ ᓂᑯᔅ ᑲ ᓴᒋᐃᒃ, ᑭᔭ ᓇᔅᒡ ᑲ ᓂᓇᐊᔨᑎᒥᐃᑦ᙮ ᓂᑐᑐᐛᐧᒄ᙮”
6ᐃᔅᐱ ᒪᒃ ᐊᓐᒡ ᒋᔅᒋᓄᐊᒧᐛᑭᓐᒡ ᐱᔭᑕᒡ ᐊᓂᔭ ᐸᑕᑯᓱᐅᓂᔪᐤ, ᒋ ᓴᒋᓱᐅᒡ᙮ ᐊ ᐃᔅᐱᔅ ᓴᒋᓯᒡ ᒪᒃ ᒋ ᐅᑎᑕᒧᓂᐱᔪᐅᒡ ᐊᓐᑕ ᐊᔅᒋᒡ᙮ 7ᐊᑯ ᒋᓴᓴ ᒂ ᐸᒋ ᓂᑐᐛᐱᒥᑯᒡ, ᐊᑯ ᒂ ᑕᒋᓂᑯᒡ ᐊ ᐃᑎᑯᒡ, “ᐱᓯᑯᒄ ᐊᑲᐎᔾ ᑯᔅᑕᒋᒄ᙮” 8ᐊ ᑎᔅᑎᓴᐱᒡ ᒪᒃ ᓇᒪ ᐊᐛᔪᐛ ᐅᒋ ᐛᐱᒪᐅᒡ ᒥᒄ ᒋᓴᓴ ᒋ ᐸᐃᑯᑲᐳᔪᐛ᙮
9ᒪᒂᒡ ᒪᒃ ᐊ ᓂᑎᒋᐛᒡ ᐊᓂᔭᔪᐤ ᐱᔅᑯᑎᓇᔪᐤ, ᒋᓴᓴ ᒋ ᐃᑎᑯᐅᒡ ᔭᐃᑕᔾ ᒐ ᐊᑲ ᐎᑎᒧᐛᒡ ᐊᐛᔪᐛ ᐅᔭ ᐛᐸᑎᔨᐛᐅᓂᔪᐤ ᑲ ᐛᐸᑕᒡ ᐸᑐᔅ ᒋ ᐅᓂᔅᑲᓇᑭᓄᔨᒐᓂ ᐃᔪᐤ ᐅᑯᓯᓴᓇ ᓂᐳᐅᓂᒡ ᐅᒡ᙮
10ᐊᑯ ᐊᓐᒡ ᒋᔅᒋᓄᐊᒧᐛᑭᓐᒡ ᒂ ᑯᒂᒋᒪᒡ ᐊᓂᔭ ᒋᓴᓴ, “ᒐᒂᔪᐤ ᐛᒋ ᐃᔅᒋᔄᒡ ᐊᓐᒡ ᑲ ᒋᔅᑯᑎᒪᒐᒡ ᐎᓱᐛᐅᓂᔪᐤ, ᓂᔅᑎᒻ ᐃᓚᐃᒐᔨᒋ ᒐ ᑎᑯᓯᓂᔨᒋ ᐊᔅᒄ ᐊᑲ ᑎᑯᓯᓂᔨᒋ ᙭ᑕ, ᐊᓐ ᑲ ᐅᑎᓂᑯᑦ ᒋᓴᒪᓂᑐᐛ ?”
11ᐊᑯ ᒋᓴᔅ ᒂ ᐃᑕᑦ, “ᑕᑈ ᐃᓚᐃᒐ ᓂᔅᑎᒻ ᒋᑭ ᑎᑯᓯᓄᐤ, ᒥᓯᐛ ᒐᒂᔪᐤ ᐊᑲ ᑯᐃᔅᑯᓇᑯᓂᔨᒡ ᒐ ᑯᐃᔅᑯᓇᑯᑕᑦ᙮ 12ᒥᒄ ᒪᒃ ᒋ ᐎᑎᒪᑎᓇᐛᐤ ᓴᔅ ᒥᓐ ᐊᒋ ᑎᑯᓯᐧᒃ ᐃᓚᐃᒐ ᒥᒄ ᓇᒪ ᐅᒋ ᓂᔅᑐᐅᓇᑯᐤ ᐃᔪᐛ᙮ ᒥᒄ ᒪᒃ ᐛ ᐃᑐᑐᐛᒡ ᒋ ᐃᑐᑐᐛᐅᒡ᙮ ᐊᐅᑯᓐ ᒪᒃ ᒧᔭᒻ ᒐ ᐃᔅᐱᔅ ᐎᓯᒐᔨᑎᒥᐊᒡ ᐃᔪᐤ ᐅᑯᓯᓴᓇ᙮”
13ᐃᔅᐱ ᒪᒃ ᑲ ᐸᑕᒡ ᐊᓐᒡ ᒋᔅᒋᓄᐊᒧᐛᑭᓐᒡ ᓴᔅ ᒥᓐ ᐊᒋ ᑎᑯᓯᓂᔨᒋ ᐃᓚᐃᒐᔨᒋ ᐊᑯ ᒂ ᒋᔅᒐᔨᑕᒡ ᐊᔪᑯᓐ ᐊᓂᔭ ᒠᓐ ᐅᓯᑲᐃᑕᒐᐛ ᑲ ᐊᔨᒧᒪᑭᓄᔨᒋ᙮
ᒋᓴᔅ ᑲ ᒥᓏᒋᐊᑦ ᓇᐸᓴ ᒥᒋ ᐊᒐᒂ ᐊᒋ ᐱᒋᔅᑲᑯᔨᒋ
ᒪᕐᒃ 9.14-29; ᓗᒃ 9.37-43
14ᐃᔅᐱ ᒪᒃ ᑲᐤ ᐛᑎᑕᒡ ᐊᓂᔭ ᐃᔪᐛ, ᓇᐸᐤ ᒋ ᐸᒋ ᓂᑐᐛᐱᒪᐤ ᐊᓂᔭ ᒋᓴᓴ, ᐊ ᐅᒋᒋᐧᑯᓂᐱᔪᐅᒡ ᐊᓐᑕ ᐊ ᑕᔨᒋ ᐊ ᐃᑕᑦ, 15“ᐅᑎᐸᔨᒋᒐᐤ, ᒋᔅᑎᒪᒐᔨᒻ ᓂᑯᔅ᙮ ᐅᒋᐱᑎᑯᐤ ᒪᓐ, ᓇᔅᒡ ᓂᓇᐧᑲᑕᔨᒧᐤ ᐛᔅ ᒥᒐᑥᐤ ᒪᓐ ᒥᑐᔅᑕᐱᔪᐤ ᐃᔅᑯᑕᒡ ᑭᔭ ᒥᒐᑥᐤ ᐱᑭᔅᑐᐛᐱᔪᐤ ᓂᐱᒡ ᒪᒂᒡ ᐊᓂᔭ ᐊ ᐅᒋᐱᑎᑯᑦ᙮ 16ᐊᑎ ᒪᒃ ᓂᒋ ᐃᑐᑐᐛᐅᒡ ᒋᒋᔅᒋᓄᐊᒧᐛᑭᓐᒡ, ᓇᒪ ᐅᒋ ᒥᓏᒋᐊᐅᒡ᙮”
17ᒋᓴᔅ ᒪᒃ ᒋ ᐃᑕᐤ ᐊᓂᔭ ᐃᔪᐛ ᐊᓐᑕ ᑲ ᑕᔨᒋ, “ᒋᔨᐛᐤ ᐃᔪᒡ ᐊᓄᒡ ᑲ ᐱᒪᑎᓯᔭᒄ ᐊᑲ ᐊᔭᔭᒄ ᑕᑈᑎᒧᐅᓐ ᑭᔭ ᐊᑲ ᒂᔅᑲᑎᓯᔭᒄ, ᑕᓐ ᒐ ᐃᔅᐱᔅ ᑕᔭᓐ ᐅᑕ ᐊ ᑕᔭᒄ ᐃᔭᒄ ᒐᒋ ᓂᔅᑐᑎᒪᒄ ? ᑕᓐ ᒐ ᐃᔅᐱᔅ ᐊᓱᐛᐱᒥᑎᑯᒡ ᐊᑯ ᒐᒋ ᐊᔭᔭᒄ ᑕᑈᑎᒧᐅᓐ ? ᐸᓱᐛᒄ ᐊᓐ ᓇᐸᔅ᙮” 18ᒋᓴᔅ ᒪᒃ ᒂ ᐃᔨᒪᐊᑦ ᐊᓂᔭ ᒥᒋ ᐊᒐᒂ ᐊ ᐃᑕᑦ ᒐᒋ ᓂᑭᑕᔨᒋ ᐊᓂᔭ ᓇᐸᓴ᙮ ᑎᐛᒡ ᒪᒃ ᒋ ᐎᐎᔪᐤ ᐊᓐ ᒥᒋ ᐊᒐᐧᒄ ᐊᑯ ᒂ ᐊᑎ ᒥᓏᑎᓯᑦ ᐊᓐ ᓇᐸᔅ᙮
19ᐊᑯ ᐊᓂᔭ ᐅᒋᔅᒋᓄᐊᒧᐛᑭᓇ ᑲ ᐸᒋ ᓂᑐᐛᐱᒥᑯᑦ ᑎᐸᓐ ᑲ ᐃᑐᑕᐃᑯᑦ ᐊᑯ ᒂ ᐃᑎᑯᑦ, “ᑕᓐᑕ ᐛᒋ ᐊᑲ ᐅᒋ ᐎᐎᑎᓴᐅᒋᑦ ᐊᓐ ᒥᒋ ᐊᒐᐧᒄ ?”
20ᐊᑯ ᒋᓴᔅ ᒂ ᐃᑕᑦ, “ᑭᑈ ᐊᓐ ᐊᑲ ᐃᔅᐱᓴᒡ ᒋᑕᑈᑎᒧᐅᓄᐛᐤ᙮ ᑕᑈ ᒋᑦ ᐃᑎᓇᐛᐤ ᐊᑎ ᒥᒄ ᐊᐱᓴᓯᒐ ᒋᑕᑈᑎᒧᐅᓐ ᒧᔭᒻ ᐊ ᐃᔅᐱᔅ ᐊᐱᓯᓯᑦ ᓂᑕᐅᒋᑕᑭᓐ ᒪᔅᑎᕐᑦ ᑲ ᐃᓯᓂᐧᑲᓱᑦ ᐃᔅᐱᓴᒐ, ᐱᔅᑯᑎᓇᐤ ᒋᑭ ᒋ ᐃᑎᓱᐛᑕᓐ, ‘ᓇᑕ ᐃᓯ ᐊᒋᑲᐳᐅᐤ᙮’ ᒋᑭ ᐱᓯᒋᐃᑯᓐ ᒪᒃ᙮ ᒥᒄ ᒐᒂᓐ ᐛ ᐃᑐᑎᒥᓐ ᒋᑭ ᒋ ᐃᑐᑕᓐ ᐊᔭᔨᓇ ᑕᑈᑎᒧᐅᓐ᙮ 21ᐊᑯ ᒪᒃ ᒥᒄ ᐊᔭᒪᐛᑎᓯᒐ ᑭᔭ ᐊᑲ ᐅᑎᓇᐧᒃ ᐊᐛᓐ ᒥᒋᒥᔪᐤ ᐊᑯᑕ ᒥᒄ ᒐᒋ ᐎᐎᔨᒋ ᐅᔭ ᑲ ᐃᑕᔨᑕᑯᓯᔨᒋ ᒥᒋ ᐊᒐᒂ᙮ ᓇᒪ ᒥᓐ ᑎᑯᓂᔪᐤ ᑕᓐ ᒐᒋ ᐃᑎᑦ ᐊᐛᓐ᙮”
ᒋᓴᔅ ᒥᓐ ᑲ ᐊᔨᒧᑕᐧᒃ ᒐ ᓂᐸᐊᑭᓄᐅᑦ
ᒪᕐᒃ 9.30-32; ᓗᒃ 9.43-45
22ᐃᔅᐱ ᒪᒃ ᒥᓯᐛ ᐊᓐᒡ ᒋᔅᒋᓄᐊᒧᐛᑭᓐᒡ ᑲ ᐸᒋ ᒪᒧᐎᒡ ᐊᓐᑕ ᑲᓕᓕᒡ, ᒋᓴᔅ ᒋ ᐃᑕᐤ, “ᓴᔅ ᐎᐱᒡ ᒋᑭ ᐱᔅᑎᓇᑭᓄᐎᒡ ᐃᔪᒡ ᑕᓐ ᐛ ᐃᑐᑐᐛᒡ ᒐᒋ ᐃᑐᑐᐛᒡ ᐃᔪᐤ ᐅᑯᓯᓴᓇ᙮ 23ᒋᑭ ᓂᐸᐊᑭᓄᐤ, ᒥᒄ ᒪᒃ ᓂᔅᑐ ᒋᓯᑲᐛ ᐃᔅᐱᔅ ᐊᑯ ᒐ ᐅᓂᑦ ᓂᐳᐅᓂᒡ ᐅᒡ᙮” ᓇᔅᒡ ᒪᒃ ᒋ ᒥᒐᔨᑎᒧᒡ ᐊᓐᒡ ᒋᔅᒋᓄᐊᒧᐛᑭᓐᒡ ᐃᔅᐱ ᐱᔭᑐᐛᒡ ᐊᓂᔭ ᐊ ᐃᔅᒋᔄᔨᒋ᙮
ᐊ ᒋᓯᐧᑲᓱᓇᓄᐅᒡ ᒋᓴᐊᔭᒥᐊᐅᒋᐛᐱᒡ
24ᐃᔅᐱ ᒋᓴᔅ ᑭᔭ ᐊᓂᔭ ᐅᒋᔅᒋᓄᐊᒧᐛᑭᓇ ᑕᑯᓯᓂᒡ ᐊᓐᑕ ᑲᐳᕐᓇᐊᒥᒡ, ᐊᓐᒡ ᑲ ᒪᒧᓴᒋᓇᒡ ᓱᓇᔭᔪᐤ ᐊᓐᑕ ᒋᓴᐊᔭᒥᐊᐅᒋᐛᐱᒡ ᒐ ᐃᓯ ᐊᐱᑎᓂᔨᒡ ᒋ ᐸᒋ ᓂᑐᐛᐱᒪᐅᒡ ᐊᓂᔭ ᐱᑕᕋ ᐊ ᐃᑕᒡ, “ᐱᔅᑎᓂᒻ ᐊ ᒋ ᒋᔅᑯᑎᒪᒐᓯᒧᐛᐤ ᐊᓂᔭ ᓱᓇᔭᔪᐤ ᐊᓐᑕ ᒋᓴᐊᔭᒥᐊᐅᒋᐛᐱᒡ ᒋᐸ ᐃᓯ ᐊᐱᑎᓂᔪᐤ ?”
25ᐊᑯ ᐱᑕᕐ ᐊᑕᑦ, “ᓂᐦᐃ᙮” ᐃᔅᐱ ᒪᒃ ᐱᑕᕐ ᐊ ᐊᑎ ᐱᒐᑦ ᐊᓂᔭ ᒥᒋᐛᐱᔪᐤ, ᐊᔅᒄ ᐊᑲ ᒋ ᐃᑕᑦ ᒐᒂᔪᐤ ᒋᓴᓴ ᒋ ᑯᒂᒋᒥᑯᐤ ᐊ ᐃᑎᑯᑦ, “ᓴᐃᒥᓐ, ᑕᓐ ᐊ ᐃᑕᔨᑎᒥᓐ ᒋᔾ᙮ ᐊᐛᓐ ᒋᐸ ᒥᔭᐤ ᓱᓇᔭᔪᐤ ᐊᓂᔭ ᒋᓴᐅᒋᒪᐛ ᐅᑕ ᐊᔅᒋᒡ ᑲ ᑕᔨᒋ ? ᐅᑦ ᐊᐛᓯᒪ ᐊ ᐊ ᑕᔨᒋ ᒋᐸ ᐅᒋᐱᔪᐤ ᓱᓇᔭᔪᐤ ᑭᔭ ᒪᒃ ᑯᑎᑲ ᐊᐛᔪᐛ ᐊ ᑕᔨᒋ ?”
26ᐊᑯ ᐱᑕᕐ ᒂ ᐃᑕᑦ, “ᐊᓂᔭᔪᐛ ᑭᑈ ᑯᑎᑲ ᐊᐛᔪᐛ ᐊ ᑕᔨᒋ ᒋᐸ ᐅᒋᐱᔪᐤ᙮” ᐊᑯ ᒂ ᐃᑎᑯᑦ ᒋᓴᓴ, “ᑭᑈ ᒥᔅᑯᒡ ᓇᒪ ᐅᑦ ᐊᐛᓯᒪ ᒋᑭ ᐅᒋ ᐱᔅᑎᓂᒥᔪᐛ ᓱᓇᔭᔪᐤ᙮ 27ᐊᑯ ᒪᒃ ᓇᒪᐎᔾ ᑭᑈ ᓂᑐᐛᔨᑎᑯᓐ ᓂᔾ ᒐᒋ ᐱᔅᑎᓂᒪᓐ ᓱᓇᔭᐤ ᐊᓐᑕ ᒋᓴᐊᔭᒥᐊᐅᒋᐛᐱᒡ ᐃᔅ᙮ ᒥᒄ ᒪᒃ ᓇᒪ ᒋᑭ ᐅᒋ ᐎ ᒋᔄᐊᓄᐅᒡ ᐊᓐᒡ ᐃᔪᒡ᙮ ᐊᑯᔅ ᒪᒃ ᒋᑭ ᐱᔅᑎᓇᓇᓄᐤ ᓱᓇᔭᐤ᙮ ᓇᓯᐸ ᒪᒃ ᓇᑕ ᒐ ᐱᑭᔅᑐᐛᐊᒥᓐ ᒋ ᑯᔅᑭᓐ᙮ ᐊᓐ ᒪᒃ ᓂᔅᑎᒻ ᓂᒪᔅ ᒐ ᐅᒋᒂᑎᑦ ᒐ ᐅᑎᓂᑦ, ᐊᓐᑕ ᒪᒃ ᐅᑐᓂᒡ ᒋᑭ ᒥᔅᑯᐛᐤ ᓱᓇᔭᐱᔅᒄ, ᒋᑭ ᐃᔅᐱᓴᐤ ᐊᓐᑕ ᑕᐱᔅᑯᓐ ᐊ ᓂᓯᔭᐧᒄ ᑕᓐ ᒋᐸ ᐃᓯ ᐱᔅᑎᓇᓇᓄᐤ ᓱᓇᔭᐤ᙮ ᒐ ᐃᑐᑕᔨᓐ ᓇᑕ ᒋᓴᐊᔭᒥᐊᐅᒋᐛᐱᒡ ᒐ ᐱᔅᑎᓂᒥᓐ ᐊᓐ ᒋᐸ ᐃᔅᐱᔅ ᒋᓯᐧᑲᓱᓇᓄᐤ᙮”
Currently Selected:
ᒪᑎᔪᐤ 17: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
