ᐃᑉᕈᐛ 2
2
ᒋᓴᒪᓂᑐᐤ ᑲ ᐎᑕᐧᒃ ᑕᓐᑕ ᒐᒋ ᐅᒋ ᐱᒪᒋᐅᓇᓄᐎᒡ
1ᐊᐅᒄ ᒪᒃ ᐊᓐ ᐛᒋ ᐃᑕᔨᑕᒂᒡ ᐊᑐᐎᔅ ᒐᒋ ᒥᒪᒋᑯᓂᒪᐧᒄ ᐊᓐ ᑕᑈᐅᓐ ᑲ ᐃᓯ ᐸᑎᒪᐧᒄ ᒐ ᐊᑲ ᒋ ᒋᐛᑲᐳᐅᔭᐧᒄ᙮ 2ᐊᓐᑕ ᐛᔅᑭᒡ ᐊᓂᔭᔪᐤ ᑎᐸᒋᒧᐅᓂᔪᐤ ᑲᒋ ᐸᒋ ᐎᑕᒡ ᐊᓐᒋᓐᒡ ᒋ ᑕᑈᒥᑭᓂᔪᐤ᙮ ᐊᓐᒡ ᒪᒃ ᐊᐛᓐᒋ ᐊᑲ ᐅᒋ ᐊᐱᓯᑕᒡ ᒪᒃ ᐊᑲ ᐅᒋ ᓂᓇᐃᑕᒡ, ᒋ ᐛᐛᓯᐊᑭᓄᐅᒡ ᑕᓐ ᑲ ᐃᓯ ᒋᔅᑕᔨᑕᑯᓂᔨᒡ ᒐᒋ ᐃᑐᑐᐛᑭᓄᐛᑯᐱᓇ᙮ 3ᒋᔭᓄᐤ ᒪᒃ ᒧᔭᒻ ᐊᑲ ᐊᐱᑕᔨᑎᒪᒂ ᐊᓐ ᐱᒪᒋᐃᐛᐅᓐ ᐛ ᐃᓯ ᒥᔨᐛᑦ ᒋᓴᒪᓂᑐᐤ ᒋᔭᓄᐤ ᑭᔭ ᒋᑭ ᐛᐛᓯᐃᑯᓇᓄᐤ᙮ ᑕᐸ ᒋᑭ ᒋ ᒋᑎᓯᒧᓇᓄᐤ ᐃᔅᐱ ᐎ ᐛᐛᓯᐃᑯᐅᔭᒂ᙮ ᐎᔾ ᓂᔅᑎᒻ ᐅᑎᐸᔨᒋᒐᐤ ᒋᓴᔅ ᔅᒋ ᐎᑎᒪᑭᓄᐤ ᑕᓐᑕ ᒐᒋ ᐅᒋ ᐱᒪᒋᐅᔭᐧᒄ, ᓇᒪ ᒥᒄ ᐊᓐᒋᓐᒡ ᒋ ᐅᒋ ᐎᑎᒪᑭᓄᐅᒡ᙮ ᓇᓇᒐ ᒪᒃ ᑯᑎᑭᒡ ᐊᐛᓐᒋ ᔅᒋ ᐛᐸᑎᔨᑯᓄᐅᒡ ᐊ ᑕᑈᒥᑭᓂᔨᒡ ᐊᓂᔭ ᒥᔽᒋᒧᐅᓂᔪᐤ, ᐛᔅ ᐎᔨᐛᐤ ᐛᒋᒡ ᒋ ᐸᑐᐛᐅᒡ ᑕᓐ ᑲ ᐃᔅᒋᔄᔨᒋ ᒋᓴᓴ᙮ 4ᒋᓴᒪᓂᑐᐤ ᒪᒃ ᑭᔭ ᐎᔾ ᔅᒋ ᐛᐸᑎᔨᑯᓄᐤ ᐊ ᑕᑈᒥᑭᓂᔨᒡ ᐊᓂᔭ ᒥᔽᒋᒧᐅᓂᔪᐤ ᐊ ᒪᒥᔅᑲᒡ ᐃᑎᑦ ᑭᔭ ᒪᒥᔅᑲᒡ ᐛᐸᑎᔨᐛᐅᓇ ᐊ ᐛᐸᑎᔨᐛᑦ ᑭᔭ ᓂᓇᐧᑯᐤ ᐊ ᐃᓯ ᒪᒥᔅᑲᒡ ᐃᑐᑎᒪᒐᑦ᙮ ᑭᔭ ᒋ ᐃᑐᑐᐛᐤ ᑲ ᐸᔭᒋᓯᔨᒋ ᐊᒐᒂ ᒐᒋ ᒥᔭᔨᒋ ᐊᐛᔪᐛ ᓂᓇᐧᑯᐤ ᑭᔅᒋᐅᓇ, ᑕᓐ ᐊᓂᔭᔪᐛ ᐎᔾ ᒋᓴᒪᓂᑐᐤ ᐊ ᐃᑕᔨᑎᒥᐃᑯᑦ ᒐ ᐃᓯ ᒥᔨᐛᑦ᙮
᙭ ᐊᐅᒄ ᒐᒋ ᐱᒪᒋᐃᑕᐧᒄ ᓇᒪ ᐎ ᐊᓐᒋᓐᒡ
Hebrews 1.1-4; 2.5-12 (Proper-22 Year B)
5ᒥᓯᐛ ᒐᒂᔪᐛ ᑲ ᐊᔨᒧᑎᒪᓐ ᒐ ᐅᑎᒋᐱᔨᒋ ᓇᒪ ᐎ ᐊᓐᒋᓐᒡ ᒋᑭ ᐅᒋ ᐅᒋᒪᐧᑲᑎᒧᒡ᙮ 6ᔅᒋ ᒥᔨᑯᓇᓄᐤ ᒐᒋ ᒐᔅᑎᓇᑕᔨᑎᒪᐧᒄ ᐅ ᐛᔅ ᐃᑎᔅᑕᐤ ᐊᓐᑕ ᒋᓴᒪᓂᑐᐤ ᐅᑦ ᐃᔨᒧᐅᓂᒡ,
“ᑕᓐ ᐊ ᐃᓯᓇᑯᓯᑦ ᐃᔪᐤ ᐛᒋ ᓇᔅᒡ ᒋᒋᐛ ᐃᑕᔨᒥᑦ, ᒥᒄ ᐃᔪᐤ ᐅᑯᓯᓴᓐ ᐊᓐ, ᐃᔭᐱᒡ ᒪᒃ ᓇᔅᒡ ᒋ ᒥᔪ ᑭᓄᐛᔨᒪᐤ ?
7ᐛᐃᐱᔅᒋᔅ ᔅᒋ ᐃᑐᑐᐛᐤ ᐊᑐᐎᔅ ᒐᒋ ᑎᐱᑕᔨᑕᑯᓯᑦ ᐊ ᐃᑕᔨᑕᑯᓯᔨᒋ ᐊᓐᒋᓇ᙮ ᑭᔭ ᐃᔭᐱᒡ ᔅᒋ ᐃᑐᑐᐛᐤ ᒐᒋ ᒋᔅᑕᔨᑕᑯᓯᑦ᙮
8ᔅᒋ ᒥᔭᐤ ᒐᒋ ᐅᒋᒪᐧᑲᑕᐧᒃ ᒥᓯᐛ ᒐᒂᔪᐤ᙮”
ᐊᐅᒄ ᐅ ᐊᑎᔅᑕᒡ ᒋᓴᒪᓂᑐᐤ ᐅᑦ ᐃᔨᒧᐅᓂᒡ᙮ ᔅᒋ ᐎᑎᒪᑭᓄᐤ ᒪᒃ ᒋᓴᒪᓂᑐᐤ ᐅᑦ ᐃᔨᒧᐅᓂᒡ ᒥᓯᐛ ᒐᒂᔪᐤ ᐊᒋ ᒥᔨᑕᐧᒄ ᒐᒋ ᐅᒋᒪᐧᑲᑎᒪᐧᒄ᙮ ᓇᒪ ᑎᑯᓐ ᒐᒂᓐ ᒐ ᐊᑲ ᒋ ᐅᒋᒪᐧᑲᑎᒪᐧᒄ᙮ ᐊᓄᒡ ᒪᒃ ᐊᔅᒄ ᓇᒪ ᒋ ᐛᐸᑕᓇᓄᐤ ᒥᓯᐛ ᒐᒂᓐ ᒐᒋ ᐅᒋᒪᐧᑲᑎᒪᐧᒄ ᒋᔭᓄᐤ ᑲ ᐃᔪᐎᔭᐧᒄ ᐅᑕ ᐊᔅᒋᒡ᙮ 9ᒥᒄ ᒪᒃ ᒋ ᒋᔅᒐᔨᒪᓄᐤ ᐎᔾ ᒋᓴᔅ ᐊ ᐊᔭᑦ ᑎᐸᔨᒋᒐᐅᓂᔪᐤ ᒥᓯᐛ ᒐᒂᔪᐤ ᒐᒋ ᐅᒋᒪᐧᑲᑕᐧᒃ᙮ ᒋ ᐃᑐᑐᐛᑭᓄᐤ ᐛᐃᐱᔅᒋᔅ ᐊᑐᐎᔅ ᒐᒋ ᑎᐱᑕᔨᑕᑯᓯᑦ ᐊ ᐃᑕᔨᑕᑯᓯᔨᒋ ᐊᓐᒋᓇ᙮ ᐅᔭ ᒪᒃ ᒋ ᐃᑐᑐᐛᑭᓄᐤ ᒐᒋ ᓂᒋᔅᑲᐧᒃ ᓂᐳᐅᓂᔪᐤ᙮ ᐊᐅᒄ ᐅᔭ ᐛᒋ ᒥᔭᑭᓄᐅᑦ ᒐᒋ ᒋᔅᑕᔨᑕᑯᓯᑦ ᑭᔭ ᒐᒋ ᐃᔅᐸᔨᑕᑯᓯᑦ ᐊᓂᔭ ᐊᒋ ᓂᒋᔅᑲᐧᒃ ᓂᓇᐧᑲᑕᔨᒧᐅᓂᔪᐤ ᐃᔅᐱ ᑲ ᓂᐸᐊᑭᓄᐅᑦ᙮ ᐊᓂᔭ ᒪᒃ ᒋᓴᒪᓂᑐᐤ ᓇᔅᒡ ᐊᒋ ᓴᒋᐊᑦ ᐊᐛᔪᐛ ᐅᑕ ᐊᔅᒋᒡ ᐊᔪᐅᒄ ᐊᓂᔭ ᐛᒋ ᓂᐱᔅᑎᒧᐛᑦ ᒋᓴᔅ ᒥᓯᐛ ᐊᐛᔪᐛ᙮
10ᒋ ᐃᓯᓇᑯᓂᑯᐱᓇ ᑕᑈ ᒐᒋ ᓂᓇᐧᑲᒋᐊᑭᓄᐅᑦ ᒋᓴᔅ, ᐛᔅ ᐊᓂᔭ ᐊᒋ ᓂᓇᐧᑲᑕᔨᒧᑦ ᐊᑯᑕ ᑲ ᐅᒋ ᑐᑕᑯᑦ ᒋᓴᒪᓂᑐᐛ ᓇᔅᒡ ᒐᒋ ᒋᔅᑕᔨᑕᑯᓯᑦ ᒐᒋ ᐛᐸᔨᑎᒪᒐᑦ᙮ ᒋᓴᒪᓂᑐᐤ, ᐊᓐ ᒥᓯᐛ ᒐᒂᔪᐤ ᑲ ᐅᓯᑕᑦ ᑭᔭ ᑲ ᐃᑐᑕᐧᒃ ᒧᔅ ᒐᒋ ᑎᑯᓂᔨᒋ, ᒋ ᐱᔅᑎᓇᐤ ᒋᓴᓴ ᒐᒋ ᓂᓇᐧᑲᒋᐊᑭᓄᔨᒋ ᐛᔅ ᒋ ᓂᑐᐛᔨᒪᐤ ᐅᑯᓴ ᑲ ᒥᒐᑎᔨᒋ ᒐᒋ ᒋᔅᒐᔨᑎᒥᔨᒋ ᑕᓐ ᐊ ᐃᑕᔨᑕᑯᓂᔨᒡ ᐅᒋᔅᑕᔨᑕᑯᓱᐅᓐ᙮ ᒋᓴᔅ ᐊᐅᒄ ᐎᔭᐸᑎᔭᑦ ᐊᐛᔪᐛ ᑕᓐᑕ ᒐᒋ ᐅᒋ ᐱᒪᒋᐅᔨᒋ᙮
11ᒋᓴᔅ ᐛᐸᔨᑎᒧᐛᐤ ᐊᐛᔪᐛ ᒥᓯᐛ ᐅᒥᒋᑥᐅᓂᔪᐛ᙮ ᐃᑎᓯᓇᐤ ᒪᒃ ᐊᓐᑕ ᒋᓴᒪᓂᑐᐛ ᐊ ᑕᔨᒋ ᒐᒋ ᐃᓯ ᐱᒪᑎᓯᔨᒋ᙮ ᐊᓐᒡ ᒪᒃ ᒋᓴᒪᓂᑐᐛ ᑲ ᐱᒪᑎᓯᔅᑐᐛᒡ ᐸᐃᑯᐊᐅᒡ ᐅᑕᐎᐛᐛ᙮ ᐊᐅᒄ ᒪᒃ ᐊᓂᔭ ᐛᒋ ᐊᑲ ᓯᓴᒂᔨᒧᑦ ᒋᓴᔅ “ᓂᐧᑲᓂᓯᒡ” ᒐᒋ ᐃᓯᓂᐧᑲᑕᑦ ᐊᓂᔭᔪᐛ ᑲ ᐛᐸᔨᑎᒧᐛᑭᓄᐎᒋ᙮ 12ᒋ ᒋᔅᒐᔨᑕᓇᓄᐤ ᐅ ᐛᔅ ᐎᔾ ᒋᓴᔅ ᒋ ᐃᑕᐤ ᒋᓴᒪᓂᑐᐛ,
“ᒋᓴᒪᓂᑐᐤ, ᒋᑭ ᐊᔨᒧᒥᑎᓐ ᐊᓐᑕ ᓂᐧᑲᓂᓯᒡ ᐊ ᑕᒡ᙮ ᓂᑭ ᐎᑕᓐ ᐊᓐᑕ ᒪᒧᐤ ᑲ ᐊᔭᒥᐊᐛᑎᓯᒡ ᐊ ᑕᒡ ᑕᓐ ᑲ ᐃᑎᔨᓐ ᑭᔭ ᒋᑭ ᒪᒥᒋᒥᑎᓐ᙮”
13ᑭᔭ ᒋ ᐃᑕᐤ,
“ᓇᔅᒡ ᓂᑭ ᒐᔅᑎᓇᑕᔨᒪᐤ ᒋᓴᒪᓂᑐᐤ᙮”
ᐊᑯ ᒥᓐ ᒂ ᐃᔅᒋᔄᑦ,
“ᒪᐅᑕ ᐊ ᑕᔭᓐ, ᐊᑯᑕ ᑭᔭ ᐅᑕ ᐊ ᑕᒡ ᓂᑦ ᐊᐛᓯᒥᒡ ᐊᓂᔭᔪᐛ ᒋᓴᒪᓂᑐᐤ ᑲ ᐸᒋ ᒥᔨᑦ᙮”
14ᐃᔪᐛ ᐊᓂᔭᔪᐛ ᑲ ᐃᑕᑦ ᐊᓂᔭ ᑲ ᐃᔅᒋᔄᑦ ᓂᑦ ᐊᐛᓯᒥᒡ᙮ ᒋᓴᔅ ᑭᔭ ᐎᔾ ᒋᒋᐛ ᓇᔅᒡ ᐃᔪᐛ ᒋ ᐃᓯᓇᑯᓱᐤ ᑭᔭ ᓇᔅᒡ ᐃᔪᐛ ᒋ ᐃᑕᔨᑕᑯᓱᐤ᙮ ᐊᐅᒄ ᐅᔭ ᐃᔪᐛ ᐛᒋ ᑕᑦ ᒐᒋ ᓂᐱᑦ, ᒐᒋ ᐅᒋ ᓴᐧᑯᒋᐊᑦ ᒥᒋᒥᓂᑐᐛ, ᐊᓂᔭ ᑲ ᑎᐸᔨᑎᒥᔨᒋ ᓂᐳᐅᓂᔪᐤ᙮ 15ᒋᓴᔅ ᒋ ᓂᐳᐤ ᒐᒋ ᐊᐱᐧᑯᓇᑦ ᒥᒐᑦ ᐊᓂᔭ ᐊᐛᔪᐛ ᑲ ᒪᒋᒂᐱᐧᑲᑎᑯᔨᒋ ᐊ ᑯᔅᑎᒥᔨᒋ ᓂᐳᐅᓂᔪᐤ ᐃᔅᐱ ᑲ ᐱᒪᑎᓯᔨᒋ᙮ 16ᐛᔅ ᒋ ᒋᔅᒐᔨᑕᓇᓄᐤ ᒋᓴᔅ ᐊᑲ ᐅᒋ ᑎᑯᓯᐧᒃ ᐊᓐᒋᓇ ᒐᒋ ᐸᒋ ᐎᒋᐊᑦ᙮ ᒋ ᑎᑯᓯᓄᐤ ᒐᒋ ᐎᒋᐊᑦ ᐊᐛᔪᐛ, ᐊᓂᔭ ᐊᓂᔅᒐ ᑲ ᐸᒋ ᐱᒪᑎᓯᔨᒋ ᐊᑉᕋᐊᒪ ᐅᒋ ᐊ ᑕᔨᒋ᙮ 17ᐊᐅᒄ ᐊᓂᔭ ᐛᒋ ᓇᔅᒡ ᐃᔨᒡ ᒋ ᐃᓯᐊᑭᓄᐅᑦ᙮ ᒋ ᓂᑐᐛᔨᑕᑯᓱᐤ ᐎᐧᑲᓂᓴ ᒐᒋ ᓂᔅᐱᑐᐛᑦ ᐊᓐᑕ ᒐᒋ ᐅᒋ ᒋᓴᐊᔭᒥᐊᐅᒋᒪᐅᑦ ᒋᓴᒪᓂᑐᐛ ᐊ ᐊᑐᔅᑯᐛᑦ, ᑭᔭ ᒐᒋ ᐛᐸᔨᑎᒧᐛᑭᓄᔨᒋ ᐊᐛᔪᐛ ᐅᒥᒋᑥᐅᓂᔪᐛ᙮ 18ᒋᓴᔅ ᒋᑭ ᒋ ᐎᒋᐃᑯᓄᐤ ᒋᔭᓄᐤ ᑲ ᑯᒂᒋᐃᑯᐎᔭᐧᒄ, ᐛᔅ ᑭᔭ ᐎᔾ ᒋ ᓂᓇᐧᑲᑕᔨᒧᐊᑭᓄᐤ ᑭᔭ ᒋ ᑯᒂᒋᐊᑭᓄᐤ᙮
Currently Selected:
ᐃᑉᕈᐛ 2: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
