ᐃᑉᕈᐛ 10
10
ᒋᓴᔅ ᐊᐅᒄ ᑲ ᓇᐊᔨᑎᒥᐊᑦ ᒋᓴᒪᓂᑐᐛ ᒋᔭᓄᐤ ᐅᒋ
1ᓂᑭ ᐊᔨᒧᑕᓐ ᐊᑐᐎᔅ ᐊᓂᔭ ᒍᐤ ᐎᓱᐛᐅᓇ᙮ ᐊᓐᒡ ᐃᔪᒡ ᐅᔭ ᐎᓱᐛᐅᓇ ᑲ ᓂᓇᑭᑐᐛᔨᑎᒥᐃᑯᒡ ᐊᑯᑕ ᑲ ᐅᒋ ᒋᔅᒐᔨᑕᒡ ᑕᓐ ᒐ ᐃᔅᐱᔅ ᒥᔪᑐᑎᒧᐛᑦ ᒋᓴᒪᓂᑐᐤ ᐃᔪᐛ᙮ ᒥᒄ ᒪᒃ ᓇᒪ ᓇᔅᒡ ᐅᒋ ᒋᔅᒐᔨᑎᒥᐊᑭᓄᐅᒡ ᑕᓐ ᒐ ᐃᓯ ᐊᑐᐎᔅ ᒥᔪᑐᑎᒪᒐᑦ ᒋᓴᒪᓂᑐᐤ ᐊᓐᑕ ᓂᔅᑕᒥᒡ ᒋᓴᓴ ᐅᒡ᙮ ᓇᒪ ᐊᐛᓐ ᓇᔅᒡ ᐅᒋ ᐛᐸᔨᑎᒧᐛᑭᓄᐤ ᐅᒥᒋᑥᐅᓇ ᑭᔭ ᓇᒪ ᐊᐛᓐ ᓇᔅᒡ ᐅᒋ ᑯᐃᔅᑯᓇᑯᓱᐤ ᐊᓐᑕ ᐃᔅ ᒋᓴᒪᓂᑐᐛ ᐊ ᑕᔨᒋ ᒥᒄ ᐊᓂᔭ ᐊ ᓂᐸᐊᑭᓄᔨᒋ ᐊᐛᓯᓴ ᐊ ᒥᑐᔅᑕᐊᒪᓄᒡ ᐊᓯᑯᒻ ᐱᐳᓇ᙮ 2ᒧᔭᒻ ᐊᓐᒡ ᑲ ᐊᔭᒥᐊᔅᑐᐛᒡ ᒋᓴᒪᓂᑐᐛ ᓇᔅᒡ ᒋ ᐸᔭᒋᐊᑭᓄᐛᑯᐱᓇᓂᒡ ᑲ ᐛᐸᔨᑎᒧᐛᑭᓄᐎᒡ ᐅᒥᒋᑥᐅᓄᐛᐛ, ᓇᒪ ᒋᐸ ᐅᒋ ᒥᑯᔅᑲᑕᔨᑎᒥᐃᑯᐅᒡ ᐅᒥᒋᑥᐅᓄᐛᐛ ᐛᔅ ᓴᔅ ᒋ ᐛᐸᔨᑎᒧᐛᑭᓄᐎᒡ᙮ ᐊᑯ ᒪᒃ ᓇᒪ ᒋᐸ ᐅᒋ ᓂᑐᐛᔨᑕᑯᓱᐅᒡ ᒧᓯᓇᐤ ᒐᒋ ᒥᑐᔅᑕᐊᒪᒡ ᐊᐛᓯᓴ ᐊᒋ ᓂᐸᐊᑭᓄᔨᒋ᙮ 3ᒥᒄ ᒪᒃ ᐊᓯᑯᒻ ᐱᐳᓇ ᒋ ᒥᑐᔅᑕᐊᒪᐅᒡ ᐊᐛᓯᓴ ᐊᒋ ᓂᐸᐊᑭᓄᔨᒋ᙮ ᐅᔭ ᒪᒃ ᒧᔅ ᐊᒋ ᐃᑎᒡ ᓇᒪ ᐅᒋ ᐅᓂᒋᔅᒋᓯᑐᑎᒧᒡ ᐅᒥᒋᑥᐅᓄᐛᐛ᙮ 4ᑕᐸ ᐛᔅ ᐊᓐ ᓂᑕ ᒋᑭ ᒋ ᐛᐸᔨᑎᒧᐛᑭᓄᐤ ᐊᐛᓐ ᐅᒥᒋᑥᐅᓇ ᒥᒄ ᐊᓂᔭ ᐊᐛᓯᓴ ᐅᒥᐧᑯᔪᐤ ᐊ ᐊᐱᑎᓂᔨᒡ᙮
Hebrews 10.5-10 (Advent-4 Year C)
5ᐊᐅᒄ ᒪᒃ ᐛᒋ ᐃᔅᒋᔄᑦ ᒋᓴᔅ ᐃᔅᐱ ᒐ ᑎᑯᓯᐧᒃ ᐅᑕ ᐊᔅᒋᒡ,
“ᒋᓴᒪᓂᑐᐤ, ᓇᒪ ᒋ ᓂᑐᐛᔨᑕᓐ ᒥᑐᔅᑕᐊᒪᒐᐅᓐ ᑭᔭ ᐱᔅᑎᓂᒐᐅᓐ᙮ ᐊᐅᒄ ᐅ ᐛᒋ ᒥᔨᓐ ᐅ ᒥᔪᐤ ᑲ ᐊᔭᔭᓐ ᑕᐱᔅᑯᓐ ᓇᐸᐤ ᒐᒋ ᐃᓯᓇᑯᓯᔭᓐ᙮
6ᓇᒪ ᓂᑕ ᒋ ᐅᒋ ᒥᔽᔨᑕᓐ ᐊ ᐃᔎᓯᑭᓄᐎᒡ ᐊᐛᓯᓯᒡ ᑭᔭ ᐊ ᒥᑐᔅᑕᐊᒪᓄᐅᒡ ᒐᒂᓐ᙮
7ᔅᒋ ᐃᑎᑎᓐ ᒪᒃ, ‘ᒋᓴᒪᓂᑐᐤ, ᓂᒋ ᑎᑯᓯᓐ ᒐᒋ ᐃᑐᑎᒪᓐ ᒋᑦ ᐃᑕᔨᑎᒧᐅᓐ, ᒧᔭᒻ ᑕᓐ ᐊᑎᔅᑕᒡ ᒋᑦ ᐃᔨᒧᐅᓂᒡ ᓂᐸ ᐃᑎᓐ᙮’ ”
8ᐅᔭ ᑲ ᐃᔅᒋᔄᑦ ᒋᓴᔅ, “ᒋᓴᒪᓂᑐᐤ, ᓇᒪ ᒋ ᒥᔽᔨᑎᒥᐃᑯᓐ ᐅ ᐊ ᐃᑎᓇᓄᐅᒡ ᐊ ᒥᑐᔅᑕᐊᒪᓄᐅᒡ ᐊᐛᓯᓯᒡ ᑭᔭ ᐱᔅᑎᓂᒐᐅᓇ ᐊ ᒥᔨᑯᔨᓐ ᐊᓐᑕ ᒐᒋ ᐅᒋ ᐛᐸᔨᑎᒧᐛᑭᓄᐎᒡ ᐊᐛᓐᒋ ᐅᒥᒋᑥᐅᓄᐛᐛ᙮” ᒥᒄ ᒪᒃ ᐊᐅᑯᓐ ᐊᑎᔅᑕᒡ ᐎᓱᐛᐅᓐ ᒐ ᐃᑎᓇᓄᑯᐱᓇ᙮ 9ᒋ ᐃᔅᒋᔄᐤ ᑭᔭ ᒋᓴᔅ, “ᒋᓴᒪᓂᑐᐤ, ᓂᒋ ᑎᑯᓯᓐ ᒐᒋ ᐃᑐᑎᒪᓐ ᒋᑦ ᐃᑕᔨᑎᒧᐅᓐ᙮” ᐅᔭ ᒪᒃ ᑲ ᐃᔅᒋᔄᑦ ᐊᑯᑕ ᑲ ᐅᒋ ᐃᒐᓇᐧᒃ ᒋᓴᒪᓂᑐᐤ ᐊᓂᔭ ᐛᔅᑭᒡ ᓂᔅᑯᒧᐅᓂᔪᐤ ᐊᓐᑕ ᑲᒋ ᓂᑐᐛᔨᑕᑯᓂᔨᒡ ᐊᐛᓯᓴ ᒐᒋ ᒥᑐᔅᑕᐊᒪᓄᐎᒡ, ᐊᑯ ᒥᔅᑯᒡ ᒋᓴᓴ ᒂ ᐱᔅᑎᓂᒥᔨᒋ ᐅᐱᒪᑎᓯᐅᓂᔪᐤ᙮ 10ᐊᓂᔭ ᒪᒃ ᒋᓴᔅ ᓇᔅᒡ ᐊᒋ ᓂᓇᐃᑎᒺᑦ ᒋᓴᒪᓂᑐᐛ ᐅᑦ ᐃᑕᔨᑎᒧᐅᓂᔪᐤ, ᐸᐃᒂᐤ ᒋ ᐱᔅᑎᓂᒻ ᐅᐱᒪᑎᓯᐅᓐ, ᑲᒋᒡ ᒪᒃ ᐃᓯᓇᑯᓂᔪᐤ ᐅᔭ ᑲ ᐃᑎᑦ᙮ ᐅᔭ ᐊᒋ ᐃᑎᑦ ᐊᑯᑕ ᑲ ᐅᒋ ᐛᐸᔨᑎᒪᑯᐅᔭᐧᒄ ᒋᒥᒋᑥᐅᓄᐛ ᒐᒋ ᐃᓯᓇᑯᓱᐛᐧᒄ ᒧᔭᒻ ᐊᑲ ᓂᑕ ᐅᒋ ᒥᒋᑐᑎᒪᐧᒄ᙮
Hebrews 10.11-14,19-25 (Proper-28 Year B)
11ᒥᓯᐛ ᐊᔭᒥᐊᐅᒋᒪᐤ ᐊᓯᑯᒻ ᒋᓯᑲᐛ ᐊᑐᔅᒐᐤ ᒧᔅ ᐊ ᐸᐃᑯᓂᔨᒡ ᒐᒂᔪᐤ ᐊ ᐃᑐᑕᐧᒃ, ᒧᔅ ᐊ ᒥᑐᔅᑕᐊᒪᑦ᙮ ᐊᑎ ᒪᒃ ᐊᓂᔭ ᐊ ᐃᑐᑕᐧᒃ ᓇᒪ ᓂᑕ ᒋᑭ ᒋ ᐛᐸᔨᑎᒧᐛᑭᓄᐅᔪᐛ ᐊᐛᔪᐛ ᐅᒥᒋᑥᐅᓂᔪᐤ᙮ 12ᒥᒄ ᒪᒃ ᐃᔅᐱᔅ ᒋᓴᔅ ᑲ ᐱᔅᑎᓇᐧᒃ ᐅᐱᒪᑎᓯᐅᓐ, ᐊᐅᒄ ᒥᒄ ᐅ ᐱᔅᑎᓂᒐᐅᓐ ᑲ ᓂᑐᐛᔨᑕᒂᒡ ᐊᓐᑕ ᒐᒋ ᐅᒋ ᑲᒋᒡ ᐛᐸᔨᑎᒧᐛᑭᓄᐎᒡ ᐊᐛᓐᒋ ᐅᒥᒋᑥᐅᓄᐛᐛ᙮ ᓇᒪ ᒥᓐ ᑯᑎᒡ ᐱᔅᑎᓂᒐᐅᓐ ᐅᒋ ᓂᑐᐛᔨᑕᑯᓐ᙮ ᐊᓐᑕ ᒪᒃ ᒋᓴᒪᓂᑐᐤ ᐅᒥᔪᐅᓂᒡ ᐊᑯᑕ ᑲ ᐃᓯ ᐅᑎᓇᑭᓄᐅᑦ ᑲᒋᒡ ᒐᒋ ᐊᐱᑦ᙮ 13ᐊᑯᑕ ᒪᒃ ᐊᓐᑕ ᒧᔅ ᒐ ᑕᑦ, ᐊ ᐊᓱᐛᐱᑦ ᐸᑐᔅ ᒋᓴᒪᓂᑐᐛ ᒥᓯᐛ ᒋ ᐃᔅᐱᓴᐊᔨᒐ ᐊᓂᔭ ᑲ ᐛᐧᑲᑎᑯᑦ ᑭᔭ ᒋ ᐃᑐᑐᐛᔨᒐ ᒐᒋ ᓂᓇᐊᔨᑎᒥᔨᒋ ᐅᑎᐸᔨᒋᒐᐅᓐ᙮ 14ᐅᔭ ᒪᒃ ᒥᒄ ᐸᐃᒂᐤ ᐊᒋ ᐱᔅᑎᓇᐧᒃ ᐅᐱᒪᑎᓯᐅᓐ ᒋᓴᔅ ᐊᑯᑕ ᑲ ᐅᒋ ᐃᑐᑕᐧᒃ ᑲᒋᒡ ᒐᒋ ᐛᐸᔨᑎᒧᐛᑦ ᒋᓴᒪᓂᑐᐛ ᐅᑦ ᐃᔨᒥᔪᐛ ᐅᒥᒋᑥᐅᓂᔪᐤ ᑭᔭ ᒐᒋ ᑯᐃᔅᑯᓇᑯᓯᔨᒋ ᐊᓐᑕ ᒋᓴᒪᓂᑐᐛ ᐃᔅ ᐊ ᑕᔨᒋ᙮
15ᑭᔭ ᑲ ᐸᔭᒋᓯᑦ ᐊᒐᐧᒄ ᑭᔭ ᐎᔾ ᒋᑦ ᐃᔨᒥᐃᑯᓄᐤ ᐊ ᐎᑎᒪᑕᐧᒄ ᑕᑈ ᐊ ᑕᑈᒥᑭᓂᔨᒡ ᐅᔭ᙮ ᒋ ᐎᑎᒻ ᑕᓐ ᓴᔅ ᑲ ᐃᔅᒋᔄᑯᐱᓇᓂ ᒋᓴᒪᓂᑐᐛ᙮ ᒋ ᐃᔅᒋᔄᐤ,
16“ᒪᐅᔭᔪᐤ ᑲ ᐅᔅᑲᔨᒡ ᓂᔅᑯᒧᐅᓂᔪᐤ ᒐ ᒥᔨᒂᐤ ᐊᐛᓐᒋ ᐃᔅᐱ ᐅᑎᒋᐱᔨᑥᐛ ᐊᓂᔭᔪᐛ ᐊ ᒋᓯᑲᒋ᙮ ᐅᑕᐃᐛᒡ ᓂᑭ ᐱᑕᐊᒺᓐ ᓂᐎᓱᐛᐅᓇ ᑭᔭ ᐅᒥᑐᓇᔨᒋᑭᓂᐛᒡ ᓂᑭ ᒥᓯᓇᐊᒺᓐ᙮”
ᑭᔭ ᒋ ᐃᔅᒋᔄᐤ,
17“ᓇᒪ ᐊᑯ ᓂᑭ ᐅᒋ ᒪᒥᑐᓇᔨᑎᒥᐃᑯᐛᓐ ᐅᒥᒋᑥᐅᓄᐛᐛ ᐊᓂᔭ ᑕᓐ ᑲ ᐃᓯ ᒥᒋᑐᑕᒡ᙮”
18ᒥᓯᐛ ᒪᒃ ᐅ ᑕᑈᒥᑭᓐ᙮ ᐃᔅᐱ ᒋᓴᒪᓂᑐᐤ ᓇᔅᒡ ᐊ ᐛᐸᔨᑎᒪᒐᑦ ᒥᒋᑥᐅᓇ, ᓇᒪ ᒥᓐ ᒋᑭ ᐅᒋ ᓂᑐᐛᔨᑕᑯᓐ ᒐᒋ ᒥᑐᔅᑕᐊᒪᓄᒡ ᒥᒋᑥᐅᓐ ᐅᒡ᙮
ᑕᓐᑕ ᒐᒋ ᐅᒋ ᒥᒋᒪ ᓇᑎᐧᒄ ᒋᓴᒪᓂᑐᐤ
Hebrews 10.11-14,19-25 (Proper-28 Year B)
19ᓂᐧᑲᓂᓯᑐᒄ, ᐊᓂᔭ ᒋᓴᔅ ᐊᒋ ᐱᔅᑎᓇᐧᒃ ᐅᐱᒪᑎᓯᐅᓐ ᒐᒋ ᓂᐸᐊᑭᓄᐅᑦ ᒋᔭᓄᐤ ᐅᒋ, ᐊᑯ ᒪᒃ ᒥᒄ ᒐᒋ ᐃᓯ ᐱᒐᔭᐧᒄ ᐊᑲ ᓴᒋᓯᔭᐧᒄ ᐊᓐᑕ ᒪᐅᒡ ᐸᔭᐧᑭᓂᔨᒡ ᒋᓴᒪᓂᑐᐤ ᐊ ᑕᑦ᙮ 20ᐛᔅ ᒋᓴᔅ ᔅᒋ ᐃᒐᓂᒪᑭᓄᐤ ᐊᓂᔭ ᐊᑯᐛᑲᐃᑭᓂᔪᐤ ᒐᒋ ᓂᑐᐛᐱᒪᐧᒄ ᒋᓴᒪᓂᑐᐤ᙮ ᐊᓂᔭ ᐅᐱᒪᑎᓯᐅᓐ ᐊᒋ ᐱᔅᑎᓇᐧᒄ ᐊᑯᑕ ᑲ ᐅᒋ ᐃᑐᑎᒪᑕᐧᒄ ᐅᔭ᙮ ᐊᑯ ᒪᒃ ᒧᔭᒻ ᐊ ᒥᔨᑕᐧᒄ ᐊ ᐅᔅᑲᔨᒡ ᐱᒪᑎᓯᐅᓂᔪᐤ ᒐ ᐃᓯ ᐱᒪᑎᓯᐛᐧᒄ ᐃᓯᓇᑯᓂᔪᐤ᙮ 21ᐊᓐ ᒪᒃ ᐅᒋ ᐊᑯᑕ ᐛᒋ ᐊᔭᐛᐧᒄ ᐊ ᓱᒐᔨᑕᑯᓯᑦ ᒋᓴᐊᔭᒥᐊᐅᒋᒪᐤ, ᐊᐅᒄ ᐅ ᒋᓴᔅ, ᐊᓐ ᓇᑲᓂᔅᑯᐛᑦ ᒋᓴᒪᓂᑐᐛ ᐅᑦ ᐃᔨᒥᔪᐛ᙮ 22ᐊᑯ ᒪᒃ ᒐᒋ ᓇᑕᐧᒄ ᒋᓴᒪᓂᑐᐤ ᒋᓴᔅ ᐊ ᐅᒋᓴᐊᔭᒥᐊᐅᒋᒪᒥᔭᐧᒄ, ᓇᔅᒡ ᐊ ᑕᑈᑎᒪᐧᒄ ᒐ ᒥᔽᔨᑕᐧᒄ ᓇᑕᒂ, ᒐ ᐊᑲ ᐅᒋ ᐊᑐᐛᔨᒥᑕᐧᒄ᙮ ᒋᑭ ᒋ ᓇᑕᓄᐤ ᐛᔅ ᓇᔅᒡ ᔅᒋ ᐛᐸᔨᑎᒪᑭᓄᐤ ᒋᒥᒋᑥᐅᓄᐛ᙮ ᓇᔅᒡ ᒋ ᐸᔭᒋᑕᑭᓄᐛ ᒋᑕᐃᓄᐛ ᑭᔭ ᓇᒪ ᐊᑯ ᒋ ᒥᑯᔅᑲᑕᔨᑎᒥᐃᑯᐅᓇᓄᐤ ᑕᓐ ᑲᒋ ᐃᓯ ᒥᒋᑐᑎᒪᐧᒄ᙮ ᒋ ᐸᔭᒋᑕᑭᓄᐛ ᒋᔪᓄᐛ ᐊ ᒥᔽᑭᒥᒡ ᓂᐱᔾ ᐅᒋ᙮ 23ᓱᒃ ᒪᒃ ᓱᒋᑲᐳᐅᑕᐤ ᑕᓐ ᐊ ᐃᓯ ᒐᔅᑎᓇᑕᔨᑎᒪᐧᒄ, ᐊᑲᐎᔾ ᐊᓏᑎᒧᑕᐤ, ᐛᔅ ᒐᔅᑎᓇᔅ ᒋᑭ ᐃᑐᑎᒻ ᒋᓴᒪᓂᑐᐤ ᐊᓂᔭ ᑲ ᐃᔅᒋᔄᑦ ᒐ ᐃᑐᑕᐧᒃ᙮ 24ᑭᔭ ᒧᔅ ᒪᒥᑐᓇᔨᒥᑐᑕᐤ ᑕᓐ ᒐᒋ ᐃᓯ ᓯᒋᒥᑐᔭᐧᒄ ᒐᒋ ᐅᒋ ᓴᒋᐃᐛᔭᐧᒄ ᑭᔭ ᒐᒋ ᒥᔪᑐᑐᐛᐧᑯᒡ ᐊᐛᓐᒋ᙮ 25ᒥᒄ ᒪᒃ ᓇᒪ ᒋᑭ ᒋ ᐃᑐᑕᓇᓄᐤ ᐅ ᐊᑲ ᐎᒋᐃᐛᔭᒂ ᐊᓐᑕ ᐊ ᒪᒧᐎᒡ ᑲ ᑕᑈᑕᒡ᙮ ᑕᐅᒡ ᐊᓐᒡ ᐊᑲ ᐎᒋᐃᐛᒡ ᐊᓐᑕ ᐊ ᒪᒧᐎᔨᒋ ᑲ ᑕᑈᑎᒥᔨᒋ᙮ ᒋᐸ ᒪᒧᐎᓇᓄᐤ ᐊᓐᑕ ᒐᒋ ᐅᒋ ᓯᒋᒥᑐᔭᐧᒄ᙮ ᓇᔅᒡ ᒪᒃ ᐃᑕᔨᑕᑯᓐ ᐅ ᒐᒋ ᐃᑎᔭᐧᒄ ᐛᔅ ᒋ ᐛᐸᑕᓇᓄᐤ ᐊ ᐸᓱᓇᒂᒡ ᐊᓐ ᐊ ᒋᓯᑲᒡ ᒥᓐ ᒐ ᑎᑯᓯᐧᒃ ᙭᙮
26ᐊᑯ ᒪᒃ ᐊᓄᒡ ᐊ ᒋᔅᒐᔨᑎᒪᐧᒄ ᑕᑈᐅᓐ, ᐃᔭᐱᒡ ᒪᒃ ᒥᒋᑐᑎᒪᒂ ᐊ ᒋᔅᒐᔨᑎᒪᐧᒄ ᒪᒃ ᐊᑲ ᑯᐃᔅᒄ ᐃᑎᔭᐧᒄ, ᓇᒪ ᒋᑦ ᐊᐱᑕᔨᑎᒥᐃᑯᐛᓇᓄᐤ ᑕᓐ ᑲ ᐃᓯ ᐱᔅᑎᓂᓱᑦ ᒋᓴᔅ ᒋᔭᓄᐤ ᐅᒡ᙮ ᓇᒪ ᒋᑭ ᐅᒋ ᑎᑯᓐ ᒥᓐ ᑯᑎᒡ ᐱᔅᑎᓂᓱᐅᓐ ᐊᓐᑕ ᒐᒋ ᐅᒋ ᐛᐸᔨᑎᒪᑯᔭᐧᒄ ᒋᒥᒋᑥᐅᓄᐛ᙮ 27ᑎᑯᓂᔪᐤ ᒐ ᐃᓯ ᑯᔅᑕᑦ ᒋᓴᒪᓂᑐᐛ ᐊᓐ ᐊᐛᓐ ᐃᔭᐱᒡ ᑲ ᒥᒋᑐᑕᐧᒃ ᐊᑎ ᐊ ᒋᔅᒐᔨᑕᐧᒃ ᐊᑲ ᑯᐃᔅᒄ ᐃᑎᑦ᙮ ᒋᓴᒪᓂᑐᐛ ᒋᑭ ᑎᐸᔅᑯᓂᑯᐤ ᑭᔭ ᐃᔅᑯᑕᒡ ᒋᑭ ᐃᓯ ᓂᓱᐅᓇᒋᐊᑭᓄᐤ᙮ 28ᐅᑕ ᒪ ᐃᓯ ᑭᓄᐛᐸᑎᒧᒄ᙮ ᒧᔭᒻ ᐊᐛᓐ ᐊᑲ ᐅᒋ ᐊᐱᑕᔨᑎᒧᑯᐱᓇ ᒧᓱᓴ ᐅᐎᓱᐛᐅᓂᔪᐤ ᑭᔭ ᓂᓱ ᒪᒃ ᓂᔅᑐ ᐊᐛᔪᐛ ᐃᔅᒋᔄᔨᒐ ᑕᑈ ᐊᓂᔭ ᐊᒋ ᐃᑎᑯᐱᓇ, ᓇᒪ ᓇᔅᒡ ᒋᐸ ᐅᒋ ᒋᔅᑎᒪᒐᔨᒪᑭᓄᐤ ᑎᐛᒡ ᒥᒄ ᒋᐸ ᐃᓯ ᓂᐸᐊᑭᓄᐤ᙮ 29ᐊᑐᐎᔅ ᒪᒃ ᒋᑭ ᐃᑕᔨᑕᑯᓂᔪᐤ ᐊᓐ ᐊᐛᓐ ᐃᔭᐱᒡ ᑲ ᒥᒋᑐᑕᐧᒃ ᐊᑎ ᐊ ᒋᔅᒐᔨᑕᐧᒃ ᐊᑲ ᑯᐃᔅᒄ ᐃᑎᑦ᙮ ᐅᔭ ᐊ ᐃᑎᑦ ᒪᔭᔨᒪᐤ ᒋᓴᒪᓂᑐᐛ ᐅᑯᓯᔪᐛ᙮ ᒪᔭᔨᑎᒺᐤ ᐅᒥᐧᑯᔪᐤ ᑲ ᓯᒋᓂᑲᑕᔨᒡ ᒋᐱᔭᑎᑯᒡ ᑲ ᓂᐸᐊᑭᓄᔨᒋ᙮ ᒪᔭᔨᑎᒻ ᐊᓂᔭ ᑲ ᐅᔅᑲᔨᒡ ᓂᔅᑯᒧᐅᓂᔪᐤ ᐊᓂᔭ ᒋᓴᒪᓂᑐᐛ ᑲ ᐅᓯᑎᒧᐛᔨᒋ ᐅᑦ ᐃᔨᒥᔪᐛ᙮ ᐊᓐ ᐊᐛᓐ ᐅᔭ ᑲ ᐃᑎᑦ ᒪᔭᔨᒪᐤ ᑭᔭ ᑲ ᐸᔭᒋᓯᔨᒋ ᐊᒐᒂ ᐊᓐ ᑲ ᒋᔅᒐᔨᑎᒥᐃᑕᐧᒄ ᒋᓴᒪᓂᑐᐛ ᐅᓱᐛᔨᒋᒐᐅᓂᔪᐤ᙮ ᐅ ᐊᐛᓐ ᐃᓯᓇᑯᓂᔪᐤ ᑕᑈ ᒐᒋ ᐛᐛᓯᐊᑭᓄᐅᑦ᙮ 30ᐛᔅ ᒋ ᒋᔅᒐᔨᑕᓇᓄᐤ ᒋᓴᒪᓂᑐᐤ ᐊᒋ ᐃᔅᒋᔄᑦ,
“ᓂᔾ ᐊᐅᒄ ᒐ ᐛᐛᓯᐃᑎᑯᒡ ᑕᓐ ᐊ ᐃᓯ ᒋᔅᑕᔨᑕᑯᓯᔭᒄ ᒐᒋ ᐃᓯ ᐛᐛᓯᐃᑯᔭᒄ᙮”
ᑭᔭ ᒋ ᐃᔅᒋᔄᐤ ᒋᓴᒪᓂᑐᐤ,
“ᐅᑎᐸᔨᒋᒐᐤ ᒋᑭ ᑎᐸᔅᑯᓇᐤ ᐅᑦ ᐃᔨᒪ᙮”
31ᐃᔭᒂᒥᒄ᙮ ᑕᑈ ᑯᔅᑕᑕᔨᑕᑯᓂᔪᐤ ᒋᓴᒪᓂᑐᐤ, ᑲᒋᒡ ᑲ ᐱᒪᑎᓯᑦ, ᑕᓐ ᒐ ᐃᓯ ᐛᐛᓯᐊᑦ ᐊᐛᔪᐛ᙮
32ᓱᒃ ᒪᒃ ᒪᒥᑐᓇᔨᑎᒥᐃᑯᒄ ᓂᔅᑎᒻ ᑕᓐ ᑲ ᐃᓯ ᐸᑎᒪᒄ ᐊ ᐊᔨᒧᒪᑭᓄᐅᑦ ᙭᙮ ᒪᒥᑐᓇᔨᑎᒧᒄ ᑕᓐ ᑲ ᐃᓯ ᓱᒋᑲᐳᐅᔭᒄ ᑲ ᓂᓇᐧᑲᒋᐃᑯᐅᔭᒄ ᐃᔅᐱ ᑲ ᐱᒪᒋᐅᔭᒄ᙮ ᓇᔅᒡ ᑕᑈ ᒋ ᔭᐃᑎᓐ ᒋᑕᑈᑎᒧᐅᓄᐛᐤ᙮ 33ᓇᓂᑯᑎᓂᔾ ᔅᒋ ᓂᓇᐧᑲᒋᐃᑯᐅᓇᐛᐤ, ᑭᔭ ᐊᓐᑕ ᐊ ᒥᒐᑎᓇᓄᐅᒡ ᔅᒋ ᒪᔭᔨᒥᑯᓇᐛᐤ ᑭᔭ ᓇᒪ ᑯᐃᔅᒄ ᒋ ᐅᒋ ᐃᑐᑕᑯᐅᓇᐛᐤ ᑭᔭ ᔅᒋ ᐎᒋᑲᐳᔅᑐᐛᐛᐅᒡ ᐊᓐᒡ ᑯᑎᑭᒡ ᑲ ᓂᓇᐧᑲᑕᔨᑎᒥᐊᑭᓄᐎᒡ᙮ 34ᔅᒋ ᒋᔅᑎᒪᒐᔨᒪᐛᐅᒡ ᐊᓐᒡ ᑲᒪᑯᓄᐛᓯᐅᒋᐛᐱᒡ ᑲ ᑕᒡ ᐊᓐᒡ ᑲ ᑕᑈᑕᒡ ᐛᔅ ᑭᔭ ᒋᔨᐛᐤ ᐊᐅᑯᓐ ᒧᔭᒻ ᑲ ᐃᓯ ᓂᒋᔅᑭᒪᒄ᙮ ᐃᔅᐱᔅ ᑲ ᒪᑯᓂᑭᓄᐅᒋ ᒋᑦ ᐊᐱᒋᑕᐅᓄᐛᐛ ᐊ ᒪᔭᔨᒥᑯᔭᒄ ᔅᒋ ᒥᔽᔨᑕᓇᐛᐤ ᐛᔅ ᔅᒋ ᒋᔅᒐᔨᑕᓇᐛᐤ ᐊᑐᐎᔅ ᐊ ᒥᔽᒡ ᐊᓐ ᒐᒂᓐ ᑲ ᐃᓯ ᐊᔭᔭᒄ, ᑭᔭ ᑲᒋᒡ ᒐ ᑎᒂᒡ᙮
35ᐊᑲᐎᔾ ᐳᓂᒄ ᐊ ᑕᑈᑎᒪᒄ ᐛᔅ ᐊᑯᑕ ᒐ ᐅᒋ ᐊᔭᔭᒄ ᐊ ᐛᔪᑎᒡ ᑎᐸᐊᒪᑯᓯᐅᓐ᙮ 36ᒋ ᓂᑐᐛᔨᑕᑯᓯᓇᐛᐤ ᒐᒋ ᓯᐱᔪᐛᓯᔭᒄ ᑭᔭ ᒐᒋ ᐃᑐᑎᒺᒄ ᒋᓴᒪᓂᑐᐤ ᐅᑦ ᐃᑕᔨᑎᒧᐅᓐ ᑭᔭ ᒐᒋ ᒥᔅᑭᒺᒄ ᐊᓂᔭ ᑲ ᐃᔅᒋᔄᑦ ᒐᔅᑎᓇᔅ ᒐ ᒥᔨᑕᒄ᙮ 37ᐛᔅ ᐃᑎᔅᑕᐤ ᒋᓴᒪᓂᑐᐤ ᐅᑦ ᐃᔨᒧᐅᓂᒡ,
ᒪᔅᑕᔾ ᐛᐃᐱᔅᒋᔅ, ᐊᑯ ᐊᓐ ᒋᐸ ᑎᑯᓯᓄᐤ ᒐ ᑎᑯᓯᐧᒃ, ᓇᒪ ᒪᒃ ᒋᑭ ᐃᔭᐃᑯᐤ ᒐᒋ ᑎᑯᓯᐧᒃ᙮
38ᓂᑦ ᐃᔨᒥᒡ ᑲ ᑯᐃᔅᑯᑕᑎᓯᒡ ᒋᑭ ᑕᑈᑎᒧᒡ ᑭᔭ ᒋᑭ ᐱᒪᑎᓯᐅᒡ, ᒥᒄ ᒪᒃ ᐊᓐ ᐊᐛᓐ ᒐ ᒋᐛᑲᐳᒂ, ᓇᒪ ᓂᑭ ᐅᒋ ᒥᔽᔨᑎᒥᐃᒄ᙮
39ᓇᒪᔭᐅᒡ ᒪᒃ ᒋᔭᓄᐤ ᐊᐛᓐᒋ ᑲ ᒋᐛᑲᐳᐅᒡ ᑭᔭ ᑲ ᐅᓇᓯᓂᒡ᙮ ᒋ ᑕᑈᑕᓇᓄᐤ ᒋᔭᓄᐤ ᑭᔭ ᒋ ᐱᒪᒋᐅᓇᓄᐤ᙮
Currently Selected:
ᐃᑉᕈᐛ 10: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
