ᐊᑈᔅᑕᓇᒡ 27
27
ᑈᓪ ᒋ ᐃᔅᒋᒪᐤ ᐊᓐᑕ ᕈᒥᒡ
1ᐃᔅᐱ ᒪᒃ ᑲ ᐎᔭᔨᑕᑭᓄᐅᒡ ᐃᑕᓕ ᒐ ᐃᔅᒋᒪᔭᒡ, ᐸᐃᒄ ᐊᓯᒪᑭᓂᓯᐤ ᐅᒋᒪᐤ ᒍᓕᔭᔅ ᐊ ᐃᓯᓂᐧᑲᓱᑦ ᒋ ᐃᑎᓱᒪᑭᓄᐤ ᒐᒋ ᓂᓇᑭᑐᐛᔨᒪᑦ ᐊᓂᔭ ᑈᓚ ᑭᔭ ᐊᓂᔭᔪᐛ ᑯᑎᑲ ᐊᐛᔪᐛ ᑲ ᒪᑯᓇᑭᓄᔨᒋ᙮ ᐅ ᒪᒃ ᒍᓕᔭᔅ ᐸᐃᑯ ᒥᑕᓯᒥᑎᓄᐤ ᒋ ᐃᑕᑎᓯᔪᐛ ᐊᓯᒪᑭᓂᓴ ᐊ ᓂᑲᓂᔅᑯᐛᑦ ᕈᒻ ᐊ ᐃᓯ ᒥᓯᓇᓱᔨᒋ᙮ 2ᐊᑯ ᒂ ᐳᓯᔭᒡ ᐊ ᒥᓴᒡ ᐅᐤᑦ ᐊᓐᑕ ᐊᑦᕋᒥᑎᔭᒻ ᐊ ᐅᒋᐱᔨᒡ᙮ ᓴᔅ ᒋ ᐊᔭᔅᑯᔅᑕᑭᓄᐤ ᐊᓐᑕ ᐊᐃᓴ ᐊᔅᒋᒡ ᒐᒋ ᐃᔅᐱᔨᒡ ᐊᑯᑕ ᒪᒃ ᑲ ᐃᓯ ᒋᑕᓯᔭᒡ᙮ ᐊᕆᔅᑕᕐᑲᔅ ᒪᒃ ᐊ ᐃᓯᓂᐧᑲᓱᑦ ᓇᐸᐤ ᐊᓐᑕ ᒪᓯᑐᓂᔭ ᐊᔅᒋᒡ ᐊᓂᔭ ᐅᑕᓇᔪᐤ ᑕᓴᓗᓇᐃᑲ ᑲ ᐃᓯᓂᐧᑲᑕᔨᒡ ᐊᒋ ᐅᒋᑦ ᐊᐅᒄ ᐅ ᑭᔭ ᑲ ᐎᒋ ᐳᓯᐃᒥᑦ᙮
3ᐊᓐ ᒪᒃ ᐎᔭᐸᒡ ᓴᐃᑐᓂᒡ ᓂᒋ ᒥᓯᑲᓇᓐ᙮ ᒋ ᒥᔪᑐᑐᐛᐤ ᒪᒃ ᐊᓂᔭ ᑈᓚ ᐊᓐ ᐊᓯᒪᑭᓂᓯᐤ ᐅᒋᒪᐤ ᒍᓕᔭᔅ᙮ ᒋ ᐱᔅᑎᓇᐤ ᒐᒋ ᓂᑐᐛᐱᒪᔨᒋ ᐎᒐᐛᑭᓂᔪᐛ, ᑭᔭ ᒐᒋ ᒥᔭᑭᓄᔨᒋ ᑕᓐ ᐊ ᐃᓯ ᓂᑐᐛᔨᑎᒥᔨᒋ ᒐᒂᔪᐤ᙮ 4ᐊᓐᑕ ᒪᒃ ᓴᐃᑐᓂᒡ ᐊᑯᑕ ᒥᓐ ᒂ ᐅᒋ ᐳᓯᔭᒡ᙮ ᐊᑯ ᒪᒃ ᐊᓐ ᐊᒋ ᓇᑲᔭᓯᔭᒡ ᐊᑯ ᐊᓐᑕ ᐊ ᑎᐱᓄᐛᒡ ᐊᓐ ᒥᓂᔅᑎᒄ ᓴᐃᐳᕋᔅ ᑲ ᐃᓯᓂᐧᑲᑕᒡ ᐊᑯᑕ ᑲ ᐃᑕᔅᑎᒥᑎᓱᔭᒡ᙮ 5ᐊᑯ ᐊᓐᑕ ᑲ ᐃᓯ ᐊᓱᐊᒪᒡ ᐊᓐ ᐎᓂᐸᒄ ᓂᒋ ᐅᑎᑕᐊᓇᓐ ᐊᓂᔭᔪᐛ ᐊᔅᒋᔭ ᓯᓕᓯᔭ ᑭᔭ ᐸᒻᐱᓕᔭ ᑲ ᐃᓯᓂᐧᑲᑕᒋ, ᐊᑯ ᐊᓐ ᒪᐃᕋ ᑲ ᐃᓯᓂᐧᑲᑕᒡ ᐅᑕᓇᐤ ᐊᓐᑕ ᓚᐃᓯᔭ ᐊᔅᒋᒡ ᑲ ᑎᒂᒡ ᐊᑯᑕ ᒂ ᒥᓯᑲᔭᒡ᙮ 6ᐅᑕ ᒪᒃ ᐅᔭ ᐅᑕᓇᔪᐤ ᐊᑯᑕ ᑲ ᒥᔅᑲᐧᒃ ᐊᓐ ᐊᓯᒪᑭᓂᓯᐤ ᐅᒋᒪᐤ ᐅᐤᑎᔪᐤ ᐊᓐᑕ ᐊᓕᒃᓴᓐᑕᕆᔭ ᐊ ᐅᒋᐱᔨᒡ, ᐊᓐᑕ ᐃᑕᓕ ᐊ ᐃᔅᐱᔨᒡ, ᐊᑯᑕ ᒪᒃ ᐊᓐ ᒂ ᐳᓯᐃᑯᐅᔭᒡ᙮
7ᒥᒐᑐᐤ ᒋᓯᑲᐛ ᒪᒃ ᐸᐧᑲᒡ ᒥᒄ ᓂᒋ ᐱᒪᔅᑎᒥᑎᓱᓇᓐ, ᓂᒋ ᐊᔨᒥᐅᓇᓐ ᐊ ᐎ ᒥᓯᑲᔭᒡ ᐊᓐᑕ ᐊᓐ ᓯᓇᐃᑕᔅ ᑲ ᐃᓯᓂᐧᑲᑕᒡ ᐅᑕᓇᐤ, ᐊᑯᑕ ᐊᓐ ᑲ ᐅᑎᒡ᙮ ᐊᑯ ᒪᒃ ᐊᓐ ᐊᓐᑕ ᐊ ᐅᑎᒡ, ᐃᔭᒡ ᑲ ᐃᑕᔅᑎᒥᑎᓱᔭᒡ᙮ ᐊᓐᑕ ᐊ ᑎᐱᓄᐛᒡ ᐊᓐ ᒥᓂᔅᑎᒄ ᑯᕆᑦ ᑲ ᐃᓯᓂᐧᑲᑕᒡ ᐊᑯᑕ ᑲ ᐃᑕᓯᔭᒡ, ᒂ ᐊᑎ ᓯᓱᑕᐛᒪᒡ ᐊᓐ ᑲ ᒥᔅᑕᐛᔭᐱᔅᑲᒡ ᓴᓪᒧᓂ ᑲ ᐃᓯᓂᐧᑲᑕᒡ᙮ 8ᐃᔭᐱᒡ ᓂᒋ ᐊᔨᒥᐅᓇᓐ ᐊᑎ ᒥᒄ ᐊ ᓱᑕᐛᐊᒪᒡ᙮ ᒥᓇᐅᔅ ᐃᔭᐱᒡ ᓂᒋ ᒥᓯᑲᓇᓐ ᐊᓐᑕ ᐊᓐ ᒥᔪ ᐛᓴᐤ ᑲ ᐃᓯᓂᐧᑲᑕᒡ, ᓇᒪ ᐛᔪᐤ ᐊᓐᑕ ᐊᓐ ᐅᑕᓇᐤ ᓚᓯᔭ ᑲ ᐃᓯᓂᐧᑲᑕᒡ᙮
9ᒥᒐᑐᐤ ᒋᓯᑲᐛ ᓂᒋ ᑕᓇᓐ ᐊᓐᑕ ᑲ ᐃᔅᐱᔅ ᒋ ᒥᒋᒋᓯᑲᒡ᙮ ᒐᒃ ᒂ ᐅᑎᒋᐱᔨᒡ ᐊᓐᑕ ᐊ ᑯᔅᑕᑎᑯᒡ ᒐᒋ ᐳᓯᓇᓄᐅᒡ, ᓴᔅ ᐊ ᑎᒂᒋᓐ᙮ ᐊᑯ ᑈᓪ ᑲ ᐃᔭᒂᒥᒪᑦ ᐊᓂᔭ ᐊᓐᑕ ᐊ ᒥᓴᔨᒡ ᐅᐤᑎᔪᐤ ᑲ ᑕᔨᒋ᙮ ᒋ ᐃᔅᒋᔄᐤ, 10“ᓂ ᐛᐸᑕᓐ ᑕᓐ ᒐ ᐃᓯ ᑯᔅᑕᑎᑯᒡ ᒥᓐ ᒐᒋ ᐳᓯᔭᐧᒄ᙮ ᒋᑭ ᒋ ᐅᓂᑕᓇᓄᐤ ᒐᒂᔪᐛ ᑭᔭ ᐅ ᐊ ᒥᓴᒡ ᐅᐤᑦ᙮ ᐛᐛᒡ ᑭᔭ ᒋᑭ ᒋ ᓂᓱᐅᓇᑎᓯᓇᓄᐤ᙮” 11ᐊᑯ ᒥᒄ ᐊᓐ ᐊᓯᒪᑭᓂᓯᐤ ᐅᒋᒪᐤ ᐅᔅᑕ ᐊᓂᔭ ᐊ ᒥᓴᔨᒡ ᐅᐤᑎᔪᐤ ᐅᒋᒪᐛ ᑭᔭ ᐊᓂᔭ ᑲ ᑎᐱᔨᐛᐅᓯᔨᒋ ᐊᓂᔭ ᐅᐤᑎᔪᐤ ᒋ ᓂᑐᑐᐛᐅᐤ ᑕᓐ ᐊ ᐃᔅᒋᔄᔨᒋ, ᐊᑯ ᓇᒪ ᐅᒋ ᐊᔭᐱᓯᑐᐛᐤ ᑕᓐ ᑲ ᐃᔅᒋᔄᔨᒋ ᑈᓚ᙮ 12ᑭᔭ ᐊᓐᑕ ᐊᓂᔭ ᐊ ᐊᑯᑎᓂᔨᒡ ᐅᐤᑎᔪᐤ ᑲ ᑕᒡ, ᓇᒪ ᓇᔅᒡ ᐅᒋ ᒥᔽᔪᐤ ᐊ ᐱᐳᓂᔨᒡ ᐎ ᒐᒋ ᐊᑯᑎᓂᔨᒡ ᐅᐤᑎᔪᐤ᙮ ᐊᑯ ᒪᒃ ᐊᔪᐤ ᒐᑲᑦ ᒥᓯᐛ ᐊᓐᒡ ᓇᐸᐅᒡ ᒋ ᐎ ᐳᓱᐅᒡ, ᐊᓐᑕ ᐊ ᐎ ᐃᔅᒋᒪᒡ ᐱᓂᑭᔅ ᑲ ᐃᓯᓂᐧᑲᑕᔨᒡ ᐅᑕᓇᔪᐤ᙮ ᐊᓐᑕ ᒥᓂᔅᑎᒄ ᑯᕆᑦ ᑲ ᐃᓯᓂᐧᑲᑕᒡ ᐊᑯᑕ ᑲ ᑎᒂᒡ ᐅ ᐅᑕᓇᐤ᙮ ᒋ ᒥᔽᐤ ᐊᓐᑕ ᐊ ᓇᐅᔅᑕᑭᓄᐅᒋ ᐊ ᒥᓴᔨᒋ ᐅᐤᑕ ᐊ ᐱᐳᒡ᙮ ᐅ ᒪᒃ ᐅᑕᓇᐤ ᐃᑐᐤ ᐊᓐᑕ ᐃᔅ ᓴᐅᓄᑕᒡ ᑭᔭ ᒋᐛᑎᓄᒡ ᒋ ᐃᓯ ᓄᑯᓐ᙮ ᒋ ᐃᑕᔨᑎᒧᒡ ᒪᒃ ᒐᒋ ᐅᑎᑕᐊᒡ ᐊᓂᔭ ᐅᑕᓇᔪᐤ ᐱᓂᑭᔅ ᑲ ᐃᓯᓂᐧᑲᑕᔨᒡ ᐊᓐᑕ ᒐᒋ ᐱᐳᓂᑕᒡ᙮
ᑲ ᒥᔅᑎᔪᑎᒡ ᐎᓂᐸᑯᒡ
13ᐃᔅᐱ ᒪᒃ ᒐ ᒋᐛᔭᓯᒡ, ᐊᓐᑕ ᓴᐅᓄᒡ ᐊ ᐅᑎᓂᔨᒡ, ᐊᑯ ᒂ ᐃᑕᔨᑕᒡ ᐊᓐᒡ ᓇᐸᐅᒡ ᒥᓐ ᒐᒋ ᒋᑕᓯᒡ᙮ ᐊᑯ ᒂ ᐅᒋᐱᑕᒡ ᐊᓂᔭ ᐳᓂᓯᓇᐸᒋᑭᓂᔪᐤ ᐊᑯ ᒂ ᐊᑎ ᓯᓱᑕᐛᐊᒡ ᐊᓂᔭ ᒥᓂᔅᑎᑯᔪᐤ ᑯᕆᑦ ᑲ ᐃᓯᓂᐧᑲᑕᔨᒡ᙮ 14ᒐᒃ ᒪᒃ ᒋ ᒥᔅᑎ ᐸᒋ ᔪᑎᓐ᙮ 15ᐊᓐ ᒪᒃ ᓂᒋ ᑕᐛᐅᑯᓇᓐ ᐅ ᐊ ᒥᔅᑎᔪᑎᒡ ᐊᑯ ᓇᒪ ᐅᒋ ᒥᔪᐱᔪᐤ ᒐᒋ ᐃᔨᒥᐃᑭᓄᐅᒡ᙮ ᐊᑯ ᑭᑈ ᒂ ᐳᓂᑕᔭᒡ ᐊ ᐎ ᐃᔨᒥᐃᒪᒡ, ᒥᒄ ᑲ ᓇᒧᓇᓯᔭᒡ᙮
16ᐃᔅᐱ ᒪᒃ ᓴᐅᓄᒡ ᐊᓐ ᒥᓂᔅᑎᒄ ᑲᐊᐅᑕ ᑲ ᐃᓯᓂᐧᑲᑕᒡ ᐊ ᐊᑎ ᑕᔭᒡ ᐊᑯᑕ ᑲ ᑎᐱᓄᐛᒡ᙮ ᐊᑯ ᒥᒄ ᑲ ᐊᔨᒥᐃᑯᔭᒡ ᐊ ᐎ ᐳᓯᑕᔭᒡ ᐊᓐ ᒥᔅᑎᑯᐅᑦ ᐊᓐᑕ ᐊᓐ ᐊ ᒥᓴᒡ ᐅᐤᑎᒡ ᒐᒋ ᐊᒂᐱᐧᑲᑕᒡ᙮ 17ᐃᔅᐱ ᒪᒃ ᑲ ᐳᓯᑕᒡ ᐊᓂᔭ ᐅᐤᑎᔪᐤ ᐊᓐᑕ ᐊ ᒥᓴᔨᒡ ᐅᐤᑎᒡ ᐊᑯ ᐊᓐᒡ ᓇᐸᐅᒡ ᒥᓯᐛ ᐊᓐᑕ ᑲ ᒪᒋᒂᐱᐧᑲᑕᒡ ᓯᐸ ᐊᓂᔭ ᐅᐤᑎᔪᐤ ᒐ ᐊᑲ ᒋ ᐱᒂᐊᓂᔨᒡ᙮ ᐃᔅᐱ ᒪᒃ ᒥᓐ ᐊ ᐊᑎ ᐎᔪᐊᒪᒡ ᒋ ᑯᔅᐱᓇᔨᑎᒧᒡ ᒐᒋ ᑕᒋᑎᓂᔨᒡ ᐊᓂᔭᔪᐛ ᐅᑦ ᐅᑐᐛᐛ ᓯᓱᒡ ᐊᓐᑕ ᐊᓂᔭ ᐊᔅᒋᔪᐤ ᓕᐱᔭ ᑲ ᐃᓯᓂᐧᑲᑕᔨᒡ ᑲ ᐸᒋ ᐛᓯᐸᒂᔨᒡ᙮ ᐊᑯ ᒂ ᐊᓯᐱᑕᒡ ᐊᓂᔭ ᐅᐱᒪᓱᐅᓄᐛᐤ ᒥᒄ ᒐᒋ ᐊᑎ ᓇᒧᓇᓯᒡ᙮ 18ᒥᓐ ᒪᒃ ᐎᔭᐱᓂᔨᒡ ᐊᑯ ᑲ ᐱᑭᔅᑐᐛᐱᓇᒡ ᐊᓂᔭᔪᐛ ᒐᒂᔪᐛ ᑲ ᐳᓯᑕᒡ ᑲ ᐃᔅᐱᔅ ᐛᓴ ᒋ ᒥᔅᑎᔪᑎᓂᔨᒡ᙮ 19ᒥᓐ ᒪᒃ ᐎᔭᐱᓂᔨᒡ ᐊᑯ ᓇᑎᓇᒡ ᒥᓯᐛ ᒐᒂᔪᐛ ᐊ ᐃᑕᐱᑎᓂᔨᒋ ᐊᓐᑕ ᐊ ᒥᓴᔨᒡ ᐅᐤᑎᒡ ᒂ ᐸᐱᑭᔅᑐᐛᐛᐱᓇᒡ᙮ 20ᒐᒃ ᒥᒐᑐᐤ ᒋᓯᑲᐛ ᓇᒪ ᓂ ᐅᒋ ᐛᐱᒪᓇᓐ ᐱᓯᒻ ᑭᔭ ᐅᒐᑭᑕᐧᑯᒡ, ᐱᓯᒄ ᐊ ᒥᒋᒋᓯᑲᒡ ᑭᔭ ᐊ ᒥᔅᑎᔪᑎᒡ᙮ ᒐᒃ ᒥᓯᐛ ᐊ ᑎᓯᔭᒡ ᓇᔅᒡ ᓴᔅ ᓂᒋ ᐃᑕᔨᑕᓇᓐ ᒐ ᓂᓱᐅᓇᒋᐅᔭᒡ᙮
21ᒐᒃ ᓇᐅᔅ ᓇᒪ ᐅᒋ ᒥᒋᓱᐅᒡ ᐊᓐᒡ ᓇᐸᐅᒡ᙮ ᐊᑯ ᑈᓪ ᒂ ᐃᔨᒪᐊᑦ᙮ ᒋ ᐃᔅᒋᔄᐤ ᒪᒃ, “ᓇᐸᑐᒄ, ᐊᑯᔅ ᒪᒃ ᒋ ᓂᑐᑐᔭᒂᒂ ᑲ ᐃᔭᒂᒥᑎᑯᒡ, ᐊᑯᔅ ᐊᓐᑕ ᑯᕆᑦ ᒋ ᐃᑕᐛᐛᐅᒂ, ᑭᔭ ᓇᒪ ᒋᐸ ᐅᒋ ᐃᔅᐱᔅ ᐅᓂᑎᓇᓄᐤ ᒐᒂᔪᐛ ᑭᔭ ᓇᒪ ᒋᐸ ᐅᒋ ᐱᒂᐊᓐ ᐅ ᒋᑦ ᐅᑎᓄᐤ᙮ 22ᐊᓄᒡ ᒪᒃ ᐃᔭᐱᒡ ᒋ ᐎ ᓯᒋᒥᑎᓇᐛᐤ ᒐᒋ ᓱᒋᑕᐊᔭᒄ, ᐛᔅ ᓇᔅᒡ ᓂ ᒋᔅᒐᔨᑕᓐ ᐊᑲ ᐛᐛᒡ ᐸᐃᒄ ᒐ ᓂᓱᐅᓇᑎᓯᔭᒃ᙮ ᒥᒄ ᐅ ᐊ ᒥᓴᒡ ᐅᐤᑦ ᒋᑭ ᓂᓱᐅᓇᑎᓐ᙮ 23ᐛᔅ ᐊᓐ ᒋᓴᒪᓂᑐᐤ ᑲ ᑎᐸᔨᒥᑦ ᐊᓐ ᑲ ᐊᔭᒥᐊᔅᑐᐅᒃ, ᐅᑦ ᐊᓐᒋᓇᒪ ᓂᒋ ᐸᒋ ᓂᑐᐛᐱᒥᑯᔪᐛ ᑕᐱᔅᑲᔨᒡ᙮ 24ᐊᑯ ᒂ ᐃᓯᑦ ᐊᓐ ᐊᓐᒋᓐ, ‘ᑈᓪ, ᐊᑲᐎᔾ ᑯᔅᑕᒋ, ᐛᔅ ᒋᑭ ᐅᑎᔅᑯᑲᐳᔅᑐᐛᐤ ᓯᓴᕐ ᐊᓐᑕ ᕈᒥᒡ ᑲ ᑕᑦ ᒐᒋ ᑎᐸᔅᑯᓂᔅᒃ᙮ ᑎᑯᓂᔪᐤ ᑭᔭ ᑕᓐ ᐊ ᐃᓯ ᒥᔪᑐᑎᒪᔅᒃ ᒋᓴᒪᓂᑐᐤ, ᒥᓯᐛ ᒋᑭ ᐱᒪᑎᓯᐅᒡ ᐊᓐᒡ ᑲ ᐎᒐᐅᑥᐤ᙮’ ” 25ᐊᑯ ᒪᒃ ᑈᓪ ᒂ ᐊᑎ ᐃᑕᑦ ᐊᓂᔭ ᓇᐸᐛ, “ᓱᒋᑕᐊᒄ ᒪᒃ, ᐛᔅ ᓇᔅᒡ ᓂ ᑕᑈᔭᔨᒪᐤ ᒋᓴᒪᓂᑐᐤ ᑕᑈ ᒥᓯᐛ ᒐ ᐃᔅᐱᔨᒡ ᑕᓐ ᑲ ᐃᑎᑯᒡ ᒐ ᐃᔅᐱᔨᒡ᙮ 26ᐊᑯ ᒥᒄ ᓯᓱᒡ ᐊᓐᑕ ᒥᓂᔅᑎᑯᒡ ᒋᑭ ᐃᓯ ᐊᒂᔭᐅᑯᓇᓄᐤ᙮”
27ᐃᔅᐱ ᒪᒃ ᓂᓱ ᒥᓇᔅᑕᑭᓇ ᑲ ᐃᔅᐱᔅ ᔪᑎᒡ, ᐊᓐ ᒪᒃ ᑕᐱᔅᑲᒡ, ᐊᔅᒄ ᒥᒄ ᓂ ᐱᐸᒪᔅᑎᒥᑯᓇᓐ ᐊᓐ ᐊ ᒥᔅᑎᔪᑎᒡ ᐊᓐᑕ ᐊᓐ ᐎᓂᐸᒄ ᐊᑦᕆᔭ ᑲ ᐃᓯᓂᐧᑲᑕᒡ᙮ ᓴᓯᑲᓐ ᒪᒃ ᐃᔭᐱᑕᑎᐱᔅᑲᔨᒡ ᐊᓐᒡ ᓇᐸᐅᒡ ᐊᓐᑕ ᐊ ᒥᓴᔨᒡ ᐅᐤᑎᒡ ᑲ ᐊᑐᔅᒐᒡ ᒋ ᒧᓯᑕᐅᒡ ᐊ ᐸᓱᐛᐸᑎᒧᐅᒋᒡ ᐊᔅᒋᔪᐤ᙮ 28ᐊᑯ ᑲ ᓂᑐ ᒋᔅᒐᔨᑕᒡ ᑕᓐ ᐊ ᐃᔅᐱᑕᑎᒥᔨᒡ ᐊᓐᑕ᙮ ᐊᐱᓯᔪᐤ ᒋ ᐊᐱᒋᑕᐅᒡ ᐊᓂᔭ ᐊ ᐃᓯ ᓂᑐ ᒋᔅᒐᔨᑕᒡ᙮ ᐊ ᑯᓯᑯᓂᔨᒡ ᒐᒂᔪᐤ ᒋ ᒪᑯᐱᑎᒧᒡ ᐊᓐᑕ ᐊ ᐅᓂᔎᐸᑭᓂᔨᒡ ᐊᓂᔭ ᐊᐱᓯᔪᐤ, ᐊᑯ ᒂ ᐱᑭᔅᑐᐛᐊᒡ᙮ ᒐᒂᔪᐤ ᐅ ᐸᐃᑯ ᒥᑕᓯᒥᑎᓄᐤ ᒥᓐ ᓂᓱᔪᐤ ᒥᓯᑦ ᒋ ᐃᔅᐱᑕᑎᒥᔪᐤ᙮ ᐛᐃᐱᔅᒋᔅ ᒪᒃ, ᐊᑯ ᒥᓐ ᒂ ᓂᑐ ᒋᔅᒐᔨᑕᒡ᙮ ᐸᐃᑯᔅᑕᐤ ᑕᑐᔪᐤ ᒥᓯᑦ ᐊᑯ ᒋ ᐃᔅᐱᔅ ᒋᔅᑲᑎᒥᔪᐤ᙮ 29ᐊᓂᔭ ᒪᒃ ᐊ ᑯᔅᐱᓇᔨᑕᒡ ᒐᒋ ᐱᔅᑕᐱᔅᒋᑎᓂᔨᒡ ᐊᓂᔭ ᐅᐤᑎᔪᐤ, ᓇᐤ ᐊᓂᔭᔪᐛ ᐳᓂᓯᓇᐸᒋᑭᓇ ᒋ ᐱᑭᔅᑐᐛᐊᒧᒡ, ᒐᒋ ᒥᒪᒋᒪᐅᑕᔨᒡ ᐊᓂᔭ ᐅᐤᑎᔪᐤ᙮ ᐊᑯ ᒂ ᐊᔭᒥᐊᒡ ᐎᐱᒡ ᒐᒋ ᐛᐸᓂᔨᒡ᙮ 30ᐱᔅᒐ ᒪᒃ ᐊᓐᒡ ᓇᐸᐅᒡ ᐊᓐᑕ ᐊ ᒥᓴᔨᒡ ᐅᐤᑎᒡ ᑲ ᐊᑐᔅᒐᒡ ᒋᒧᑦ ᒋ ᐎ ᑭᐸᐅᒡ ᐊᓂᔭ ᐅᐤᑎᔪᐤ᙮ ᐊᑯ ᑲ ᐱᔅᑲᐱᒐᓴᒡ ᐊᓂᔭ ᑲ ᐊᐱᓴᓯᔨᒡ ᐅᐤᑎᔪᐤ ᐊᓐᑕ ᐊ ᒥᓴᔨᒡ ᐅᐤᑎᒡ ᑲ ᑎᑯᓂᔨᒡ᙮ ᒧᔭᒻ ᒪᒃ ᒥᒄ ᐊ ᐎ ᐱᑭᔅᑐᐛᐊᒡ ᐳᓂᓯᓇᐸᒋᑭᓂᔪᐤ ᐊᓐᑕ ᓂᔅᑕᒧᑕᑯᒡ ᐊᓂᔭ ᐅᐤᑎᔪᐤ, ᐊᐅᑯᓐ ᑲ ᐃᑎᒡ᙮ 31ᐊᑯ ᑈᓪ ᒂ ᐃᑕᑦ ᐊᓂᔭ ᐊᓯᒪᑭᓂᓯᐤ ᐅᒋᒪᐛ ᑭᔭ ᐊᓂᔭ ᐊᓯᒪᑭᓂᓴ, “ᓇᒪ ᐛᒋ ᐸᐃᒄ ᒋᑭ ᐅᒋ ᐱᒪᑎᓯᓇᐛᐤ ᓂᑭᑎᒪᒂ ᐅ ᐊ ᒥᓴᒡ ᐅᐤᑦ᙮” 32ᐊᑯ ᒪᒃ ᐊᓐᒡ ᐊᓯᒪᑭᓂᓯᒡ ᑎᐛᒡ ᒂ ᐱᔅᒋᓴᒡ ᐊᓂᔭᔪᐛ ᐊᐱᓴ ᑲ ᐅᒋ ᒪᑯᐱᑕᔨᒡ ᐊᓂᔭ ᐅᐤᑎᔪᐤ, ᐊᑯ ᒂ ᐱᔅᑎᓇᒡ᙮
33ᓴᔅ ᒪᒃ ᒐᑲᑦ ᒋ ᐛᐱᓂᔪᐤ᙮ ᐊᑯ ᑈᓪ ᒂ ᓯᒋᒪᑦ ᒥᓯᐛ ᒐᒋ ᒥᒋᓱᔨᒋ, ᐊ ᐃᑕᑦ, “ᓴᔅ ᓇᐅᓴᑉ ᒋᓯᑲᐛ ᑲ ᐃᔅᐱᔅ ᐊᓱᐛᐸᑎᒪᒄ ᑕᓐ ᒐ ᐃᓂᒂ ᑭᔭ ᑲ ᐃᔅᐱᔅ ᐊᑲ ᐅᒋ ᒥᒋᓱᔭᒄ᙮ 34ᒋ ᓂᑐᐛᔨᒥᑎᓇᐛᐤ ᒪᒃ ᐊᑯ ᒐᒋ ᒥᒋᓱᔭᒄ᙮ ᒋ ᓂᑐᐛᔨᑕᑯᓯᓇᐛᐤ ᒐᒋ ᒥᒋᓱᔭᒄ ᒐᒋ ᐱᒪᑎᓯᔭᒄ᙮ ᑕᐸ ᐛᐛᒡ ᐸᐃᒄ ᐊ ᑎᓯᔭᒄ ᒐᒂᓐ ᒋᑭ ᐅᒋ ᐃᔅᐱᔨᓇᐛᐤ, ᓇᒪ ᐛᐛᒡ ᐸᐃᒄ ᐅᐱᔎᐅᓐ ᒋᑭ ᐅᒋ ᐅᓂᑕᐤ ᐊᐛᓐ᙮” 35ᐃᔅᐱ ᒪᒃ ᑲ ᐃᔅᒋᔄᑦ ᐅᔭ ᑈᓪ, ᐊᑯ ᐛᑎᓇᑦ ᐸᒂᓯᑭᓇ, ᒂ ᓂᓇᔅᑯᒪᑦ ᒋᓴᒪᓂᑐᐛ ᐅᑎᔅᑯᐤ ᒥᓯᐛ ᐊᓂᔭᔪᐛ ᓇᐸᐛ ᐊ ᑕᔨᒋ, ᒂ ᐸᒂᓇᑦ ᐊᓂᔭ ᐸᒂᓯᑭᓇ, ᐊᑯ ᒂ ᒧᐛᑦ᙮ 36ᐊᑯ ᒥᓯᐛ ᒂ ᐊᑎ ᓱᒋᑕᐊᒡ ᐊᓐᒡ ᓇᐸᐅᒡ ᑭᔭ ᒥᓯᐛ ᐎᔨᐛᐤ ᒋ ᐊᑎ ᒥᒋᓱᐅᒡ᙮ 37ᒪᒧᐤ ᒪᒃ ᓂᓱ ᒥᑕᓯᒥᑎᓄᐤ ᒥᓐ ᓂᔄᐅᑕᒡ ᑕᑐᔪᐤ ᐊᓱ ᐊᓱᑕᒡ ᓂᒋ ᑕᑎᓯᓇᓐ ᐊᓐᑕ ᐊ ᒥᓴᒡ ᐅᐤᑎᒡ᙮ 38ᐃᔅᐱ ᒪᒃ ᒥᓯᐛ ᐊᐛᓐ ᑲ ᑕᐱᔅᑯᔨᑦ, ᐊᑯ ᒂ ᐱᑭᔅᑐᐛᐱᓇᑭᓄᐎᒡ ᐸᒂᓯᑭᓂᒡ, ᐊᑐᐎᔅ ᒐᒋ ᔭᐧᑲᒡ ᐊᓐ ᐊ ᒥᓴᒡ ᐅᐤᑦ᙮
ᑲ ᐱᒂᐊᒡ ᓂᑦ ᐅᐤᑎᓇᓐ
39ᐃᔅᐱ ᒪᒃ ᐎᔭᐸᒡ, ᐊᓐᒡ ᑲ ᐊᑐᔅᒐᒡ ᐊᓐᑕ ᐊ ᒥᓴᔨᒡ ᐅᐤᑎᔪᐤ ᓇᒪ ᐅᒋ ᓂᔅᑐᓂᒧᒡ ᑕᓐᑕ ᐊ ᑕᔭᒡ᙮ ᐊᑯ ᒂ ᐛᐸᑕᒡ ᐊᓐᑕ ᐊ ᐸᒋ ᐛᓴᐊᔨᒡ ᐊ ᐃᔭᑲᐅᓯᔨᒡ, ᐊᑯ ᒂ ᐃᑕᔨᑕᒡ ᐊᓐᑕ ᒐᒋ ᐃᓯ ᓇᑎᑭᒪᐱᔨᒡ᙮ 40ᐊᑯ ᑭᑈ ᒂ ᐱᔅᒋᓴᒡ ᐊᓂᔭ ᐳᓂᓯᓇᐸᒋᑭᓂᔪᐤ ᑭᔭ ᒂ ᐊᐱᐧᑯᓇᒡ ᐊᓂᔭ ᑲ ᒪᑯᐱᑕᒡ ᐊᓐᑕ ᐊ ᐅᒋ ᒥᓄᐃᑭᓄᐎᒡ ᐊᓂᔭ ᐅᐤᑎᔪᐤ᙮ ᐊᑯ ᒂ ᐅᐸᔅᑯᐊᒡ ᐱᒪᓱᐛᑭᓂᔪᐤ ᐊᓐᑕ ᓂᔅᑕᒧᑕᑯᒡ ᓯᓱᒡ ᒐᒋ ᐃᑕᐅᑯᒡ᙮ 41ᐊᑯ ᒥᒄ ᐊᓐ ᐊ ᒥᓴᒡ ᐅᐤᑦ ᐊᓐᑕ ᓂᔅᑕᒧᑕᑯᒡ ᒂ ᑕᒋᑎᒡ ᐊ ᒥᑕᒂᔪᐛᒡ ᐊᑯ ᑲ ᒋᑭᒧᑎᒡ ᐊᓐᑕ, ᐊᑯ ᒂ ᐊᑎ ᐱᒂᐊᒡ ᐊᓐᑕ ᐅᑕᒡ ᐛᔅ ᐊᒋ ᒪᒥᓯᑎᒡ ᑭᔅᑭᓂᒡ᙮
42ᐊᑯ ᐊᓐᒡ ᐊᓯᒪᑭᓂᓯᒡ ᒥᓯᐛ ᑲ ᐎ ᓂᐸᐊᒡ ᐊᓂᔭᔪᐛ ᓇᐸᐛ ᑲ ᑭᓄᐛᔨᒪᒡ ᑲ ᒪᑯᓇᑭᓄᔨᒋ, ᐊᑲ ᑭᑈ ᓂᑐᐛᔨᒪᒡ ᒐᒋ ᒋᑎᓯᒧᔨᒋ, ᐛᔅ ᒋᐸ ᒋ ᐱᑭᔅᑐᐛᒂᔅᑯᑎᔪᐛ ᐊᓐᑕ ᓂᐱᒡ, ᑭᔭ ᐊᓐᑕ ᒐᒋ ᐃᓯ ᓇᑎᑭᒪᒥᔨᒋ᙮ 43ᐊᓐ ᒪᒃ ᐊᓯᒪᑭᓂᓯᐤ ᐅᒋᒪᐤ ᒋ ᐎ ᐱᒪᒋᐊᐤ ᑈᓚ ᐊᑯ ᒂ ᒋᑕᐊᒧᐛᑦ ᐊᓂᔭ ᐊᓯᒪᑭᓂᓴ ᑲ ᐎ ᓂᐸᐊᔨᒋ ᐊᓂᔭ ᓇᐸᐛ᙮ ᐊᑯ ᒂ ᐃᑎᓱᐛᑦ ᐊᓂᔭ ᑲ ᓂᑕᐅᒋᒪᐎᔨᒋ ᓂᔅᑎᒻ ᒐᒋ ᐱᑭᔅᑐᐛᒂᔅᑯᑎᔨᒋ ᒐᒋ ᓇᑎᑭᒪᒥᔨᒋ᙮ 44ᑭᔭ ᐊᓐᒡ ᑯᑎᑭᒡ ᐊᐅᑯᓐ ᒋᐸ ᐃᑐᐅᒡ ᑭᔭ ᐎᔨᐛᐤ ᐊ ᒪᒋᑯᒡ ᓂᐱᐧᑲᑎᑯᒡ ᒪᒃ ᑯᑎᒋᔪᐤ ᒐᒂᔪᐤ ᐊᓐᑕ ᐅᒋ ᐊ ᒥᓴᒡ ᐅᐤᑎᒡ ᐊᒋ ᐱᒂᐊᓂᔨᒡ᙮ ᐊᑯ ᒪᒃ ᒥᓯᐛ ᑲ ᑎᓯᔭᒡ ᑲ ᒥᔪᐱᔭᒡ ᒐᒋ ᑭᐸᔭᒡ ᐊᔅᒋᔾ ᒐᒋ ᑕᒋᔅᑭᒪᒡ᙮
Currently Selected:
ᐊᑈᔅᑕᓇᒡ 27: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
